( vovworld ) – ສົງຄາມເຄມີໂດຍອາເມລິກາ ດຳເນີນຢູ່ຫວຽດນາມ ໃນຊຸມປີ 1961-1971 ໄດ້ກໍ່ຜົນສະທ້ອນອັນໜັກໜ່ວງຕໍ່ສິ່ງແວດລ້ອມ ແລະ ສຸຂະພາບຂອງປະຊາຊົນຫວຽດນາມ. ຕາມການສະຖິຕິບໍ່ທັນຄົບຖ້ວນແລ້ວ, ຊາວຫວຽດນາມ ກ່ວາ 4,8 ລ້ານຄົນຖືກຕິດທາດພິດສີສົ້ມ-ດີໂອຊິນ, ໃນນັ້ນ, ປະຈຸບັນ, ມີຜູ້ປະສົບເຄາະຮ້າຍຫຼາຍຄົນຍັງຕ້ອງທົນຕໍ່ຄວາມເຈັບປວດທັງທາງດ້ານຮ່າງກາຍ ແລະ ຈິດໃຈມາຕະຫຼອດ. ເນື່ອງໃນໂອກາດວັນເພື່ອຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນ (10/8), ນັກຂ່າວ Bui Hang ມີບົດຂຽນທີ່ພາດຫົວເລື່ອງວ່າ: ຮ່ວມແຮງຮ່ວມໃຈບັນເທົາຄວາມເຈັບປວດຈາກທາດພິດສີສົ້ມ-ດີໂອຊິນ
ຊ່ວຍເຫຼືອຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນ
(ພາບປະກອບ:baobacgiang.com.vn)
ພາຍຫຼັງສົງຄາມສິ້ນສຸດລົງ, ພັກ, ລັດຫວຽດນາມ ໄດ້ມີຄວາມເອົາໃຈໃສ່ຕໍ່ຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນ. ຫວຽດນາມ ມີລັດຖະບັນຍັດໂດຍກຳນົດຢ່າງຈະແຈ້ງວ່າ: ຜູ້ເຂົ້າຮ່ວມການຕໍ່ຕ້ານຖືກຕິດທາດພິດສີສົ້ມ-ດີໂອຊິນ ແລະ ລູກຄີງຂອງເຂົາເຈົ້າໄດ້ຊົມໃຊ້ນະໂຍບາຍບຸລິມະສິດຂອງລັດ. ນອກຈາກນັ້ນແລ້ວ, ລັດຖະບານຍັງມີນະໂຍບາຍໃຫ້ບຸລິມະສິດແກ່ລູກຫຼານຂອງຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນ ໃນການຄັດເລືອກ, ສະໜອງທຶນສຶກສາຫຼືຍົກເວັ້ນຄ່າຮຽນອີກດ້ວຍ. ນອກຈາກນະໂຍບາຍຂອງລັດ, ຫຼາຍອົງການຈັດຕັ້ງ, ສ່ວນບຸກຄົນ, ສັງຄົມກໍ່ມີບັນດາການກະທຳອັນແທດຈິງ ເພື່ອແນໃສ່ບັນເທົາຄວາມເຈັບປວດຈາກທາດພິດສີສົ້ມ-ດີໂອຊິນ. ໄລ່ຮອດຈຸດເວລານີ້, ສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນຫວຽດນາມ ຮຽກຮ້ອງການຊ່ວຍເຫຼືອຜູ້ປະສົບເຄາະຮ້າຍໄດ້ປະມານ 160 ຕື້ດົ່ງແລ້ວ. ອະດີດພົນໂທ Nguyen Van Rinh ປະທານສະມາຄົມຂອງຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນຫວຽດນາມ ໃຫ້ຮູ້ວ່າ:
“ນັບແຕ່ປີ 2011 ມາຮອດປະຈຸບັນ, ສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນຫວຽດນາມ ໄດ້ຂົນຂວາຍບໍລິຈາກເງິນໄດ້ນັບຮ້ອຍຕື້ດົ່ງຈາກສູນກາງລົງຮອດທ້ອງຖິ່ນ ເພື່ອກໍ່ສ້າງບັນດາສູນກິນນອນ, ສ້ອມແປງ ແລະ ກໍ່ສ້າງເຮືອນໃໝ່ໃຫ້ຜູ້ປະສົບເຄາະຮ້າຍ, ສະໜອງທຶນສຶກສາ, ສະຫນອງເງິນເພື່ອຫາວຽກເຮັດງານທຳ ແລະ ປີ່ນປົວພະຍາດໃຫ້ຜູ້ປະສົບເຄາະຮ້າຍ“
ລາຍການຍ່າງເພື່ອຜູ້ປະສົບເຄາະຮ້າຍ
ຈາກທາດພິດສີສົ້ມ-ດີໂອຊິນທຸກຍາກ
(ພາບ: savimex.com)
ໄປຄຽງຄູ່ກັບບັນດານະໂຍບາຍບຸລິມະສິດຂອງລັດຖະບານ, ຂະບວນການຊ່ວຍເຫຼືອຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນຂອງບັນດາອົງການຈັດຕັ້ງສັງຄົມ ແລະ ສ່ວນບຸກຄົນຢູ່ພາຍໃນ ແລະ ຕ່າງປະເທດ, ພິເສດແມ່ນອົງການຈັດຕັ້ງຂອງຊາວຫວຽດນາມ ຢູ່ຕ່າງປະເທດນັບມື້ນັບໄດ້ຮັບການຍູ້ແຮງ. ທ່ານ Nguyen Van Rinh ປະທານສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນຫວຽດນາມ ໃຫ້ຮູ້ຕື່ມອີກວ່າ:
“ນັບແຕ່ປີ 2011 ມາຮອດປະຈຸບັນ, ສະມາຄົມພວກຂ້າພະເຈົ້າໄດ້ຮັບວັດຖຸສິ່ງຂອງ ແລະ ເງິນທີ່ມີມູນຄ່ານັບພັນຕື້ດົ່ງ ເພື່ອຊ່ວຍເຫຼືອຜູ້ປະສົບເຄາະຮ້າຍ. ນີ້ແມ່ນການຊ່ວຍເຫຼືອອັນໃຫ່ຍຫຼວງ ເມື່ອທຽບກັບຊຸມປີກ່ອນ. ຈຳນວນຜູ້ສະໜັບສະໜູນຫຼາຍທີ່ສຸດ ແລະ ພິເສດແມ່ນບັນດາອົງການຈັດຕັ້ງສາກົນກໍ່ມີຄວາມເອົາໃຈໃສ່ເຖິງບັນຫານີ້“
(ພາບ:vava.org.vn)
ນອກຈາກຂະບວນການຊ່ວຍເຫຼືອຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນແລ້ວ, ການສະໜັບສະໜູນການຕໍ່ສູ້ທວງເອົາຄວາມຍຸດຕິທຳ ເພື່ອແນໃສ່ບັນເທົາຄວາມເຈັບປວດທັງທາງດ້ານຮ່າງກາຍ ແລະ ຈິດໃຈໃຫ້ຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນ ກໍ່ກາຍເປັນຄວາມເອົາໃຈໃສ່ອັນດັບໜື່ງຂອງຫຼາຍອົງການຈັດຕັ້ງສັງຄົມ. ນັບແຕ່ສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນຫວຽດນາມ ຍື່ນສະເໜີໃບຮ້ອງຟ້ອງບັນດາບໍລິສັດທາດເຄມີອາເມລິກາ ຍ້ອນໄດ້ຜະລິດທາດພິດເຄມີ ເພື່ອໃຫ້ທະຫານອາເມລິກາ ນຳໃຊ້ໃນປາງສົງຄາມຢູ່ຫວຽດນາມ ແຕ່ປີ 2004 ມາຮອດປະຈຸບັນ, ຫາງສຽງສາກົນໄດ້ສະໜັບສະໜູນການຕໍ່ສູ້ຂອງບັນດາຜູ້ປະສົບເຄາະຮ້າຍຢ່າງແຮງ. ທ່ານ Nguyen Van Rinh ໃຫ້ຮູ້ວ່າ:
”ການຟ້ອງຮ້ອງຂອງພວກເຮົາໄດ້ຮັບການສະໜັບສະໜູນຢ່າງແຮງຈາກຫາງສຽງສາກົນ, ພິເສດແມ່ນສະມາຄົມທະນາຍຄວາມປະຊາທິປະໄຕສາກົນໄດ້ເປີດການປະຊຸມສານເພື່ອພິພາກສາບັນດາບໍລິສັດຜະລິດທາດເຄມີອາເມລິກາ. ເຂົ້າເຈົ້າກ່າວປະນາມ ແລະ ຮຽກຮ້ອງໃຫ້ລັດຖະບານອາເມລິກາ ແລະ ບັນດາບໍລິສັດດັ່ງກ່າວ ຕ້ອງຊົດເຊີຍຄວາມເສຍຫາຍໃຫ້ແກ່ບັນດາຜູ້ປະສົບເຄາະຮ້າຍ, ຕ້ອງປົວແປງສິ່ງແວດລ້ອມ ແລະ ຊ່ວຍເຫຼືອຜູ້ປະສົບເຄາະຮ້າຍບືນຕົວຂຶ້ນໃນຊີວິດປະຈຳວັນ. ຂ້າພະເຈົ້າເຫັນວ່າ, ການກະທຳເຫຼົ່ານັ້ນມີຄຸນຄ່າດ້ານວັດທະນະທຳມະນຸດທີ່ສຸດ”
ພາຍຫຼັງຄວາມມານະພະຍາຍາມໃນການຕໍ່ສູ້ຂອງສະມາຄົມຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນຫວຽດນາມ ແລະ ຂະບວນການຊ່ວຍເຫຼືອ, ສະໜັບສະໜູນບັນດາຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນຢູ່ຫວຽດນາມ ກໍ່ຄືໃນທົ່ວໂລກ. ລັດຖະບານອາເມລິກາ ໄດ້ມີບັນດາການເຄື່ອນໄຫວຮ່ວມມືທີ່ແທດຈິງກ່ວາ ໃນການແກ້ໄຂຜົນຮ້າຍຢ້ອນຫຼັງຈາກທາດພິດສີສົ້ມ-ດີໂອຊິນຢູ່ຫວຽດນາມ ກໍ່ຄືຊ່ວຍເຫຼືອຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນຫວຽດນາມ. ການໜູນຊ່ວຍຂອງວົງຄະນາຍາດສັງຄົມ, ບັນດາອົງການຈັດຕັ້ງ, ສ່ວນບຸກຄົນຢູ່ພາຍໃນ ແລະ ຕ່າງປະເທດ, ລັດຖະບານ ແລະ ປະຊາຊົນປະເທດຕ່າງໆ ຈະຊ່ວຍຜູ້ປະສົບເຄາະຮ້າຍຈາກທາດພິດສີສົ້ມ-ດີໂອຊິນຫວຽດນາມ ບັນເທົາຄວາມເຈັບປວດ ແລະ ບືນຕົວຂຶ້ນໃນດຳລົງຊີວິດ.