(vovworld)- ວັນທີ 30/11, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ນຳຫນ້າ ຄະນະຜູ້ແທນຫວຽດນາມ ເຂົ້າຮ່ວມກອງປະຊຸມສົນທິສັນຍາແມ່ ຂອງ ສປຊ ກ່ຽວກັບການປ່ຽນແປງຂອງດິນຟ້າອາກາດຄັ້ງທີ 21 (COP- 21) ຢູ່ ປາຣີ ປະເທດ ຝລັ່ງ. ເຂົ້າຮ່ວມກອງປະຊຸມຄັ້ງນີ້ ຫວຽດນາມ ສືບຕໍ່ ຢືນຢັນກັບໂລກກ່ຽວກັບຄຳໝັ້ນສັນຍາດ້ານການເມືອງຢ່າງແຮງຂອງຕົນ, ນັ້ນແມ່ນສືບຕໍ່ ເປັນເຈົ້າການ, ມີຄວາມຮັບຜິດຊອບພ້ອມກັບວົງຄະນາຍາດສາກົນ ຮ່ວມແຮງຮ່ວມໃຈມາພະຍາຍາມຮັບມືກັບການປ່ຽນແປງຂອງດິນຟ້າອາກາດ ດ້ວຍບັນດາການກະທຳລະອຽດ ນັບທັງລະດັບຊາດ ແລະ ສາກົນ.
ທ່ານນາຍົກລັດຖະມົນຕີ ຫງວຽນເຕີນຢູງ
ພາບ:TTXVN
|
ຕໍ່ຫນ້າບັນດາຜົນກະທົບນັບມື້ນັບຮ້າຍແຮງຈາກການປ່ຽນແປງຂອງດິນຟ້າອາກາດຕໍ່ມວນມະນຸດ, COP 21 ໄດ້ຮັບການຈັດຕັ້ງຂຶ້ນດ້ວຍຂອບຂະຫນາດ ແມ່ນຫນຶ່ງໃນບັນດາກອງປະຊຸມທົ່ວໂລກໃຫຍ່ສຸດໃນປີ 2015 ໂດຍມີການເຂົ້າຮ່ວມຂອງຜູ້ແທນປະມານ 50.000 ຄົນ ທີ່ມາຈາກ 185 ປະເທດໃນໂລກ. ເປົ້າໝາຍຕົ້ນຕໍຂອງ COP 21 ແມ່ນ ຮັບຮອງເອົາຂອບເຂດກົດໝາຍທົ່ວໂລກໃຫມ່ກ່ຽວກັບ ການປ່ຽນແປງຂອງດິນຟ້າອາກາດ ໃຫ້ແກ່ໄລຍະຫລັງປີ 2020, ໂດຍມີຫົວຂໍ້ວ່າ: ຂໍ້ຕົກລົງ Paris 2015 ດ້ວຍຄຳໝັ້ນສັນຍາຂອງບັນດາປະເທດຫລຸດຜ່ອນອາຍພິດ ເພື່ອຈຳກັດອູນຫະພູມເພີ່ມຂຶ້ນສະເລ່ຍ ຂອງທົ່ວໂລກຢູ່ລະດັບຕ່ຳກວ່າ 2 ອົງສາ C ໃນທ້າຍສັດຕະວັດທີ 21.
ຖ້າຂໍ້ຕົກລົງປາຣີ 2015 ໄດ້ຮັບການຮັບຮອງເອົາ, ນີ້ຈະເປັນຄັ້ງທຳອິດໃນຕະຫລອດ 20 ປີດຳເນີນການເຈລະຈາກ່ຽວກັບ ການປ່ຽນແປງຂອງດິນຟ້າອາກາດໃນຂອບເຂດ ສປຊ, ປະຊາຄົມໂລກ ຈຶ່ງບັນລຸໄດ້ຂໍ້ຕົກລົງມີລັກສະນະຜູກມັດ ໂດຍມີການເຂົ້າຮ່ວມຂອງທັງໝົດບັນດາປະເທດປ່ອຍອາຍພິດເຮືອນແກ້ວຢ່າງຫລວງຫລາຍ, ນັບທັງບັນດາປະເທດພັດທະນາ ແລະ ພວມພັດທະນາ.
ນຳຫນ້າໃນການປະຕິບັດບົດລາຍງານແຫ່ງຊາດກ່ຽວກັບຄຳໝັ້ນສັນຍາຫລຸດຜ່ອນອາຍພິດເຮືອນແກ້ວ
ໂດຍແມ່ນຫນຶ່ງໃນບັນດາປະເທດຖືກຜົນສະທ້ອນຫລາຍກວ່າໝູ່ຈາກ ການປ່ຽນແປງຂອງດິນຟ້າອາກາດ, ຍາມໃດ ຫວຽດນາມ ກໍຮັບຮູ້ບັນດາຜົນກະທົບຢ່າງຮ້າຍແຮງຈາກ ການປ່ຽນແປງຂອງດິນຟ້າອາກາດຕໍ່ການພັດທະນາແບບຍືນຍົງຢູ່ ຫວຽດນາມ ກໍຄືໃນໂລກ. ສະນັ້ນ ແຕ່ດົນນານມາແລ້ວ, ລັດຖະບານ ຫວຽດນາມ ຍາມໃດກໍເອົາໃຈໃສ່ ສ້າງ ແລະ ປະຕິບັດບັນດາໂຄງການ, ນະໂຍບາຍແຫ່ງຊາດກ່ຽວກັບການຮັບມືກັບການປ່ຽນແປງຂອງດິນຟ້າອາກາດ. ຫວຽດນາມ ໄດ້ເຂົ້າຮ່ວມສັນຍາສາກົນສຳຄັນຫລາຍສະບັບ ແລະ ປະກອບສ່ວນເຂົ້າໃນບັນດາວິວັດການເຈລະຈາສາກົນກ່ຽວກັບດິນຟ້າອາກາດ.
ທີ່ກອງປະຊຸມຄັ້ງນີ້, ຫວຽດນາມ ແມ່ນຫນຶ່ງໃນຈຳນວນ 150 ປະເທດ ເຂົ້າຮ່ວມ ກອງປະຊຸມ COP 21 ໄດ້ເປັນເຈົ້າການ ຍົກອອກລະດັບໝັ້ນໝາຍແຫ່ງຊາດ ເພື່ອພ້ອມກັບວົງຄະນາຍາດສາກົນ ມາພະຍາຍາມຫລຸດຜ່ອນການປ່ອຍອາຍພິດເຮືອນແກ້ວ ເພື່ອຮັບປະກັນຈຸດໝາຍຮັກສາອຸນຫະພູມຂອງຫນ່ວຍໂລກໃນທ້າຍສັດຕະວັດທີ 21 ເພີ່ມຂຶ້ນບໍ່ເກີນ 2 ອົງສາ C. ນີ້ກໍແມ່ນຫນຶ່ງໃນເນື້ອໃນຕົ້ນຕໍຂອງຂອບເຂດກົດໝາຍໃຫມ່ກ່ຽວກັບການປ່ຽນແປງຂອງດິນຟ້າອາກາດ. ໄລຍະຜ່ານມາ, ບັນດາກະຊວງ, ຂະແຫນງການ, ບັນດາອົງການຄົ້ນຄ້ວາ, ອົງການບໍ່ຂຶ້ນກັບລັດຖະບານຂອງ ຫວຽດນາມ, ບັນດາອົງການຈັດຕັ້ງສາກົນ ແລະ ຄູ່ຮ່ວມມືພັດທະນາໄດ້ຕັ້ງຫນ້າສົມທົບກັນຢ່າງແຫນ້ນແຟ້ນເພື່ອສຳເລັດບົດລາຍງານນີ້. ບົດລາຍງານຂອງຫວຽດນາມ ລວມມີ 2 ພາກຄື: ຫລຸດຜ່ອນການປ່ອຍອາຍພິດເຮືອນແກ້ວ(ໃນນັ້ນ ຫວຽດນາມ ໃຫ້ຄຳໝັ້ນສັນຍາ ປີ 2030 ຈະຫລຸດຜ່ອນ 8% ປະລິມານອາຍພິດເຮືອນແກ້ວເມື່ອທຽບໃສ່ແຜນການ) ແລະ ການຮັບມືກັບການປ່ຽນແປງຂອງດິນຟ້າອາກາດ. ນອກນັ້ນ, ທ່ານນາຍົກລັດຖະມົນຕີ ຫງວຽນເຕີນຢູງ ມີບົດກ່າວປາໄສສຳຄັນທີ່ກອງປະຊຸມຂັ້ນສູງຂອງ COP 21, ໂດຍຢືນຢັນກັບໂລກກ່ຽວກັບຄຳໝັ້ນສັນຍາດ້ານການເມືອງຢ່າງແຮງຂອງລັດຖະບານຫວຽດນາມ ໄດ້, ພວມ ແລະ ສືບຕໍ່ເປັນເຈົ້າການ, ມີຄວາມຮັບຜິດຊອບພ້ອມກັບປະຊາຄົມໂລກ ຮ່ວມແຮງຮ່ວມໃຈມານະພະຍາຍາມຮັບມືກັບການປ່ຽນແປງຂອງດິນຟ້າອາກາດ ດ້ວຍບັນດາການກະທຳລະອຽດ ນັບທັງໃນລະດັບຊາດ ແລະ ສາກົນ.
ຕັ້ງຫນ້າພ້ອມກັບວົງຄະນາຍາດສາກົນ ຮ່ວມແຮງ ຮ່ວມໃຈຮັບມືກັບການປ່ຽນແປງຂອງດິນຟ້າອາກາດ
ຄຽງຄູ່ກັບການເຂົ້າຮ່ວມບັນດາການເຄື່ອນໄຫວຕົ້ນຕໍຢູ່ COP 21, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ມີການພົບປະສອງຝ່າຍກັບບັນດາການນຳບັນດາປະເທດ, ບັນດາອົງການຈັດຕັ້ງສາກົນ ເພື່ອຊຸກຍູ້ກາລະໂອກາດຮ່ວມມື, ຫນູນຊ່ວຍໃນຂົງເຂດປ່ຽນແປງຂອງດິນຟ້າອາກາດ. ນີ້ແມ່ນສິ່ງທີ່ຈຳເປັນທີ່ສຸດໃນສະພາບ ຫວຽດນາມ ແມ່ນຫນຶ່ງໃນບັນດາປະເທດຖືກຜົນສະທ້ອນກວ່າໝູ່ຈາກ ການປ່ຽນແປງຂອງດິນຟ້າອາກາດ. ເນື່ອງໃນໂອກາດນີ້, ທ່ານນາຍົກລັດຖະມົນຕີ ຫງວຽນເຕີນຢູງ ເປັນປະທານຮ່ວມການເຈລະຈາຂັ້ນສູງ ກ່ຽວກັບການຮັບມືກັບການປ່ຽນແປງຂອງດິນຟ້າອາກາດ ຢູ່ ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ໂດຍມີການເຂົ້າຮ່ວມຂອງ ການນຳບັນດາປະເທດໃນພາກພື້ນ, ບັນດາປະເທດຄູ່ຮ່ວມມື ແລະ ທະນາຄານໂລກ.
ເລື່ອງ ທ່ານນາຍົກລັດຖະມົນຕີ ຫງວຽນເຕີນຢູງ ນຳຫນ້າ ຄະນະຜູ້ແທນຫວຽດນາມ ເຂົ້າຮ່ວມກອງປະຊຸມ ເພື່ອຜັນຂະຫຍາຍແຜນນະໂຍບາຍເປັນເຈົ້າການ ແລະ ຕັ້ງຫນ້າເຊື່ອມໂຍງເຂົ້າກັບສາກົນ ຂອງຫວຽດນາມ, ສະແດງໃຫ້ເຫັນຄຳໝັ້ນສັນຍາຢ່າງແຮງຂອງຫວຽດນາມ ເຂົ້າຮ່ວມບັນດາຄວາມມານະພະຍາຍາມລວມຂອງ ປະຊາຄົມສາກົນ ເພື່ອຮັບມືກັບ ການປ່ຽນແປງຂອງດິນຟ້າອາກາດ ພ້ອມທັງ ຊຸກຍູ້ບັນດາກາລະໂອກາດຮ່ວມມື ລະຫວ່າງ ຫວຽດນາມ ກັບບັນດາປະເທດ ແລະ ບັນດາຄູ່ຮ່ວມມືສາກົນ, ເປັນຕົ້ນໃນຂົງເຂດ ການປ່ຽນແປງຂອງດິນຟ້າອາກາດ.