ປີ 2012 ຫວຽດນາມ ໄດ້ຮັບການຄາດຄະເນວ່າ, ຈະປະສົບກັບຄວາມຫຍູ້ງຍາກຫຼາຍຢ່າງໃນການປະຕິບັດບັນດາຈຸດໝາຍພັດທະນາເສດຖະກິດ -ສັງຄົມ. ສະນັ້ນ, ນັບແຕ່ຕົ້ນປີ, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ໋ງ ໄດ້ຮຽກຮ້ອງໃຫ້ບັນດາກະຊວງ, ຂະແໜງການ ຕ້ອງຊີ້ນຳຢ່າງຂ້ຽວຂາດ ພ້ອມທັງຕິດຕາມກວດກາສະພາບການຢ່າງໃກ້ຊິດ ມີບັນດານະໂຍບາຍທີ່ເໝາະສົມ ເພື່ອແນ່ໃສ່ເສີມຂະຫຍາຍຄວາມສາມາດບົ່ມຊ້ອນ, ທ່າໄດ້ປຽບ, ກຳລັງພາຍໃນຂອງ ຫວຽດນາມ ໃນການປະຕິບັດບັນດາຈຸດໝາຍພັດທະນາໃນລະດັບສູງສຸດ.
ຮັດກຸ່ມເງິນຕາເພື່ອຄວບຄຸມໄພເງິນເຟີ້
(ພາບ: laodong.com.vn)
ຈຸດໝາຍໄດ້ຮັບບຸລິມະສິດຂອງ ຫວຽດນາມ ໃນປີ 2012 ແມ່ນສືບຕໍ່ຄວບຄຸມໄພເງິນເງິນເຟີ້, ຮັກສາເສດຖະກິດມະຫາພາກເປັນປົກກະຕິ. ເພື່ອປະຕິບັດວຽກງານນີ້, ກ່ອນອື່ນໝົດຕ້ອງປະຕິບັດບັນດາມາດຕະການໃນນະໂຍບາຍເງິນຕາຢ່າງມີປະສິດທິຜົນ, ບໍ່ໃຫ້ຂາດຄວາມດຸນດຽງກ່ຽວກັບການສະໜອງຄວາມຕ້ອງການສິນຄ້າ, ເອົາໃຈໃສ່ເຖິງການຮັກສາລາຄາບັນດາປະເພດສິນຄ້າທີ່ຈຳເປັນໃຫ້ເປັນປົກກະຕິ ໃນໄລຍະເວລາ ແລະ ບໍລິເວນທີ່ມີການນຳໃຊ້ສູງ…..ໂດຍແມ່ນຂະແໜງສວມບົດບາດສຳຄັນໃນການຜັນຂະຫຍາຍໜ້າທີ່ດັ່ງກ່າວ, ນັບຕັ້ງແຕ່ຕົ້ນປີ, ຂະແໜງອຸດສາຫະກຳການຄ້າໄດ້ຢັ້ງຢືນຄວາມຕັດສິນໃຈສູ້ຊົນເພື່ອບັນລຸມູນຄ່າຜະລິດອຸດສາຫະກຳປີ 2012 ໃຫ້ເພີ່ມຂຶ້ນ 13% ເມື່ອທຽບກັບປີ 2011. ຕາມນັ້ນແລ້ວ, ຂະແໜງໄດ້ສຸມໃສ່ພັດທະນາບັນດາຂະແໜງອຸດສາຫະກຳເຕັກໂນໂລຊີສູງ, ມູນຄ່າເພີ່ມສູງ, ມີຜະລິດຕະພັນສົ່ງອອກຫຼາຍ, ສົ່ງເສີມພັດທະນາອຸດສາຫະກຳປຸ່ງແຕ່ງຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳ….ໃນຂົງເຂດການສົ່ງອອກ, ຂະແໜງອຸດສາຫະກຳການຄ້າສູ້ຊົນບັນລຸລະດັບເພີ່ມຂຶ້ນ 13% ເມື່ອທຽບກັບປີ 2011, ບັນລຸວົງເງິນປະມານ 109 ຕື້ໂດລາສະຫະລັດ… ໃນຂົງເຂດເສດຖະກິດ, ຕາມທ່ານລັດຖະມົນຕີກະຊວງການເງິນ ເວືອງດີ່ງເຮ້ວ ແລ້ວ, ໃນສະພາບການເສດຖະກິດປະສົບກັບຄວາມຫຍຸ້ງຍາກຫຼາຍຢ່າງ, ປີ 2012, ຫວຽດນາມ ວາງຈຸດໝາຍຫລຸດຜ່ອນລາຍຈາຍງົບປະມານເກີນດຸນລົງຕ່ຳກ່ວາ 4,8% GDP. ສິ່ງດັ່ງກ່າວຮຽກຮ້ອງໃຫ້ຂະແໜງຕ່າງໆຕ້ອງມານະພະຍາຍາມທີ່ສຸດ ໃນຂະນະທີ່ນະໂຍບາຍເກັບອາກອນບໍ່ມີການປ່ຽນແປງພໍເທົ່າໃດ. ກ່ຽວກັບບັນດາມາດຕະການຕົ້ນຕໍ, ທ່ານລັດຖະມົນຕີກະຊວງການເງິນ ເວືອງດີ່ງເຮ້ວ ໃຫ້ຮູ້ວ່າ ກ່ອນອື່ນໝົດຕ້ອງສຸມທຸກຄວາມມານະພະຍາຍາມ ເພື່ອໜູນຊ່ວຍການຜະລິດ, ດຳເນີນທຸລະກິດ ແລະ ຄຽງຂ້າງນັ້ນ ແມ່ນຕ້ອງເກັບພາສີອາກອນໃຫ້ຄົບຖ້ວນ. ນອກຈາກແຜນຮ່າງຂອງກົມໃຫ່ຍຊ່ວຍສາອາກອນແລ້ວ, ກະຊວງການເງິນໄດ້ມອບໜ້າທີ່ໃຫ້ກົມໃຫ່ຍພາສີ ສ້າງແຜນຮ່າງຄຸມຄອງສິນຄ້ານຳເຂົ້າສົ່ງອອກຊົ່ວຄາວ, ພິເສດແມ່ນການຄຸ້ມຄອງພາສີອາກອນໃນຂົງເຂດນີ້. ທ່ານລັດຖະມົນຕີກະຊວງການເງິນ ເວືອງດີ່ງເຮ້ວ ເວົ້າວ່າ:
“ກະຊວງການເງິນພວມສຸມທຸກຄວາມມານະພະຍາຍາມເພື່ອສູ້ຊົນບັນລຸລະດັບເຕີບໂຕແຕ່ 5-8% ເມື່ອທຽບໃສ່ແຜນງົບປະມານເກັບພາສີອາກອນຊື່ງສະພາແຫ່ງຊາດໄດ້ຕົກລົງ, ໃນນັ້ນເອົາໃຈໃສ່ເຖິງການເກັບພາສີອາກອນໃຫ້ຄົບ. ກ່ຽວກັບການຫລຸດຜ່ອນລາຍຈ່າຍ, ປີນີ້ ບັນດາກະຊວງ, ຂະແໜງການ, ທ້ອງຖິ່ນຕ່າງໆ ລ້ວນແຕ່ຕ້ອງຫລຸດ 10 % GDP ຄືກັນກັບຊຸມປີຜ່ານມາ ພ້ອມທັງດັດປັບແຜນງົບປະມານໃຊ້ຈ່າຍ ຄືນໃໝ່ ຕາມທິດຫລຸດຜ່ອນອັດຕາສ່ວນການລົງທຶນຂອງລັດ ແລະ ເພີ່ມລາຍຈາຍໃຫ້ແກ່ມະນຸດ ແລະ ຊີວິດສັງຄົມ. ຫວຽດນາມ ຕ້ອງຖືເລື່ອງຍົກສູງປະສິດທິຜົນການລົງທຶນຂອງລັດ ແລະ ຖືປັດໃຈເພີ່ມສະມັດຕະພາບການອອກແຮງງານສັງຄົມ ໃນການຈະເລີນເຕີບໂຕ GDP ເປັນສຳຄັນທີ່ສຸດ“
ເພື່ອພັດທະນາແບບຍືນຍົງ, ໄປຄຽງຄູ່ກັບການປະຕິບັດບັນດາໜ້າທີ່ເສດຖະກິດ, ບັນດາກະຊວງ, ຂະແໜງການກໍຄວນເອົາໃຈໃສ່ເປັນພິເສດເຖິງບັນດາຫາຊີວິດສັງຄົມ, ໃນນັ້ນມີຫຼາຍໜ້າທີ່ສຳຄັນຄື: ຍົກສູງຄຸນນະພາບແຫຼ່ງຊັບພະຍາກອນມະນຸດ ເພື່ອຮັບໃຊ້ໃຫ້ແກ່ການຫັນເປັນອຸດສາຫະກຳ ແລະທັນສະໄໝ, ສ້າງວຽກເຮັດງານທຳໃຫ້ແກ່ປະຊາຊົນ ປະມານ 1.600.000 ຄົນໃນປີ 2012; ຍົກສູງອັດຕາສ່ວນຜູ້ອອກແຮງງານໄດ້ຮັບການບຳລຸງສ້າງ ໃນຈຳຈວນຜູ້ອອກແຮງງານທີ່ພວມເຮັດວຽກ ທັງໝົດຂຶ້ນ 46%....ເພື່ອບັນລຸໄດ້ບັນດາຄາດໝາຍດັ່ງກ່າວ, ທ່ານນາງ ຟ້າມທິຫາຍຈ່ວຽນ ລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມ ຫວຽດນາມ ໃຫ້ຮູ້ວ່າ:“ພວກຂ້າພະເຈົ້າກໍກຳນົດດວ່າ ປີ 2012 ຕ້ອງສູ້ຊົນຢ່າງຕັ້ງໜ້າ, ສະນັ້ນ ນັບແຕ່ຕົ້ນປີ, ໄດ້ເພີ່ມທະວີການສ້າງຕັ້ງຮູບແບບຈຸດສຸມຈຳນວນໜື່ງ ກ່ຽວກັບການສອນວິຊາຊີບຄື: ລ້ຽງປູກສິນໃນນ້ຳ, ປູກຜັກສະອາດ. ພ້ອມກັບການບຳລຸງສ້າງວິຊາຊີບຢູ່ກັບທີ່, ທາງກະຊວງກໍມອບໜ້າທີ່ໃຫ້ບັນດາສູນບຳລຸງສ້າງວິຊາຊີບ, ຕ້ອງພົວພັນກັບວິສາຫະກິດເພື່ອຮູ້ວ່າເຂົາເຈົາຕ້ອງການຫຍັງຈື່ງຈະບຳລຸງສ້າງ. ພວກຂ້າພະເຈົ້າເຫັນວ່າ ຕ້ອງສົມທົບກັບຂະແໜງການສຶກສາ ເພື່ອກໍ່ສ້າງບັນດາໂຮງຮຽນສອນວິຊາຊີບມີຄຸນນະພາບສູງ ຕອບສະໜອງຄວາມຕ້ອງການຂອງສາກົນ ແລະພາກພື້ນ”
ພ້ອມກັບການສ້າງວຽກເຮັດງານທຳ, ສຸມແຫຼ່ງກຳລັງໃຫ້ແກ່ການລົບລ້າງຄວາມອຶດຫີວ ຫລຸດຜ່ອນຄວາມທຸກຍາກນັ້ນ, ປີ 2012, ບັນດາກະຊວງ, ຂະແໜງການ, ທ້ອງຖິ່ນຕ່າງໆກໍຈະສຸມໃສ່ພັດທະນາເຮືອນຢູ່ສັງຄົມ, ເຮືອນຢູ່ໃຫ້ຜູ້ມີລາຍຮັບຕ່ຳ. ທ່ານລັດຖະມົນຕີກະຊວງກໍ່ສ້າງ ຫວຽດນາມ ຈິ້ງດີ່ງຢູ໋ງ ເວົ້າວ່າ:
“ກະຊວງກໍ່ສ້າງພວມຄົ້ນຄ້ວາບັນດານະໂຍບາຍລະອຽດໃນດ້ານເຮືອນ ຢູ່ໃຫ້ເໝາະສົມກັບຄວາມສາມາດພັດທະນາຂອງແຕ່ລະກຸ່ມເປົ້າໝາຍ. ການພັດທະນາເຮືອນຢູ່ແມ່ນວຽກງານຍາກທີ່ສຸດ ແຕ່ພັດທະນາເຮືອນຢູ່ສັງຄົມ, ເຮືອນຢູ່ໃຫ້ແກ່ຜູ້ທຸກຍາກຍິ່ງມີຄວາມຫຍູ້ງຍາກກ່ວາ. ທາງກະຊວງກໍຈະເຮັດຈົນສຸດຄວາມສາມາດ ແຕ່ກໍປາດຖະໜາວ່າ ທ້ອງຖິ້ນຕ່າງໆຈະປະຕິບັດພ້ອມກັນ ເພື່ອຈະກໍ່ສ້າງເຮືອນຢູ່ສັງຄົມໄດ້ຫຼາຍກ່ວາໃນໄລຍະທີ່ຈະມາເຖິງ”
ເຂດຕົວເມືອງ ຈູງຮົວ-ເຍີນຈິງ-ຮ່າໂນ້ຍ
(ພາບ: ຂ່າວສານ ຫວຽດນາມ)
ປີ 2012, ເຖິງວ່າຕ້ອງປະເຊີນໜ້າກັບຄວາມຫຍຸ້ງຍາກ, ການທ້າທາຍນາໆປະການ ແຕ່ຍ້ອນມີການຮ່ວມມື, ຮ່ວມແຮງຮ່ວມໃຈຂອງບັນດາກະຊວງ, ຂະແໜງການ, ຫວຽດນາມ ພວມປະຕິບັດການຫັນບັນດາຈຸດໝາຍພັດທະນາເສດຖະກິດ-ສັງຄົມທີ່ໄດ້ວາງອອກໃຫ້ປະກົດຜົນເປັນຈິງເທື່ອລະກ້າວ.