(vovworld)- ກົດໝາຍວ່າດ້ວຍເຮືອນຢູ່(ສະບັບປັບປຸງ) ແມ່ນຫນຶ່ງໃນບັນດາເນື້ອໃນໄດ້ຮັບການປຶກສາຫາລືໃນກອງປະຊຸມຄັ້ງທີ 26 ຂອງຄະນະປະຈຳສະພາແຫ່ງຊາດ ຊື່ງດຳເນີນໄປໃນອາທິດ. ຄຳເຫັນຂອງຜູ້ແທນຫລາຍທ່ານໄດ້ເຫັນດີກັບແຜນນະໂຍບາຍເປີດກວ້າງເງື່ອນໄຂໃຫ້ແກ່ຊາວຕ່າງປະເທດກຳມະສິດເຮືອນຢູ່, ຄຽງຄູ່ກັນນັ້ນແມ່ນຮັບປະກັນສິດມີເຮືອນຢູ່ຂອງຊາວຫວຽດນາມ, ເໝາະສົມກັບລັດຖະທຳມະນູນປີ 2013 ກ່ຽວກັບສິດທິມະນຸດ, ສິດພົນລະເມືອງ.
ກອງປະຊຸມຄັ້ງທີ 26 ຂອງຄະນະປະຈຳສະພາແຫ່ງຊາດ
photo:dienbientv.vn
|
ຕາມຮ່າງກົດໝາຍວ່າດ້ວຍເຮືອນຢູ່(ສະບັບປັບປຸງ) ແລ້ວ, ຊາວຫວຽດນາມ ອາໄສຢູ່ຕ່າງປະເທດ ມີບັນດາສິດ ແລະ ພັນທະເຊັ່ນດຽວກັນກັບພົນລະເມືອງຢູ່ພາຍໃນປະເທດຄື: ກຳມະສິດເຮືອນຢູ່ໂດຍບໍ່ຈຳກັດດ້ານຈຳນວນ ພ້ອມທັງມີສິດຂາຍ, ມອບ, ຈຳນຳ, ສືບມູນ…ສ່ວນອົງການ, ສ່ວນບຸກຄົນຊື່ງແມ່ນຊາວຕ່າງປະເທດ ພວມເຄື່ອນໄຫວຢູ່ຫວຽດນາມ ມີສິດກຳມະສິດເຮືອນຢູ່ ທີ່ບັນດາໂຄງການກໍ່ສ້າງເຮືອນຢູ່. ກຳນົດເວລາກຳມະສິດເຮືອນຢູ່ ສຳລັບອົງການແມ່ນຫລາຍສຸດບໍ່ເກີນເວລາກຳນົດຊື່ງໄດ້ລະບຸໄວ້ໃນຫນັງສືອະນຸຍາດໃຫ້ລົງທຶນ. ສຳລັບສ່ວນບຸກຄົນ,ກຳນົດເວລາກຳມະສິດແມ່ນ 50 ປີ ແລະ ສາມາດຕໍ່ກຳນົດເວລາຕື່ມອີກ.
ຊຸກຍູ້ການເຊື່ອມໂຍງເຂົ້າກັບສາກົນ
ທ່ານ ຈີ້ງດີງຢູງ, ລັດຖະມົນຕີກະຊວງກໍ່ສ້າງ ຫວຽດນາມ ຖືວ່າ: ເປີດກວ້າງເງື່ອນໄຂຊື້, ກຳມະສິດເຮືອນຢູ່ ສຳລັບຊາວຫວຽດນາມ ອາໄສຢູ່ຕ່າງປະເທດ ແລະ ຊາວຕ່າງປະເທດ ເພື່ອດຶງດູດແຫລ່ງກຳລັງ, ຜູ້ເກັ່ງກ້າສາມາດ… ສິ່ງດັ່ງກ່າວແມ່ນເໝາະສົມກັບທຳນຽມສາກົນ, ປະກອບສ່ວນຊຸກຍູ້ການເຊື່ອມໂຍງເຂົ້າກັບເສດຖະກິດໂລກ.
ໂດຍເຫັນດີກັບແຜນນະໂຍບາຍເປີດກວ້າງເງື່ອນໄຂໃຫ້ຊາວຫວຽດນາມອາໄສຢູ່ຕ່າງປະເທດ, ອົງການ, ສ່ວນບຸກຄົນຊື່ງແມ່ນຊາວຕ່າງປະເທດ ຢູ່ຫວຽດນາມ ມີສິດກຳມະສິດເຮືອນຢູ່, ທ່ານ ຫງວຽນກີມຄວາ, ຫົວຫນ້າກຳມາທິການປ້ອງກັນຊາດ ແລະ ປ້ອງກັນຄວາມສະຫງົບຂອງສະພາແຫ່ງຊາດ ຖືວ່າ:
“ຂ້າພະເຈົ້າເຫັນດີເປີດກວ້າງເງື່ອນໄຂໃຫ້ຊາວຕ່າງປະເທດກຳມະສິດເຮືອນຢູ່ ຢູ່ ຫວຽດນາມ. ແຕ່ສຳລັບຊາວຫວຽດນາມ ອາໄສຢູ່ຕ່າງປະເທດ ດ້ວຍຖານະແມ່ນຊາວຕ່າງປະເທດ ຕ້ອງມີການກຳນົດແຕກຕ່າງ ເພື່ອໃຫ້ເໝາະສົມກັບທັດສະນະນະໂຍບາຍການຕ່າງປະເທດ ແລະ ລັດຖະທຳມະນູນສະບັບໃຫມ່. ສຳລັບຊາວຕ່າງປະເທດທີ່ພວມອາໄສຊົ່ວຄາວຢູ່ຫວຽດນາມ ແລະ ມີເງື່ອນໄຂພຽງພໍ ຕ້ອງພິຈາລະນາເພື່ອໃຫ້ເຂົາເຈົ້າອາໄສຢ່າງຍາວນານ ແລະ ມີສິດຊື້ເຮືອນຢູ່.”
ເຖິງຢ່າງໃດກໍຕາມ, ຄຳເຫັນຂອງຜູ້ແທນບາງທ່ານໄດ້ຖືວ່າ: ໃນຂົງເຂດນີ້ ຄວນມີຂໍ້ກຳນົດຕື່ມອີກເພື່ອຮັບປະກັນສະຖຽນລະພາບດ້ານການເມືອງຂອງປະເທດຊາດ, ເປັນຕົ້ນຢູ່ບໍລິເວນ, ສະຖານທີ່ຈຸດສຸມ. ຕາມທ່ານ ຟານຈູງລີ, ຫົວຫນ້າກຳມາທິການກົດໝາຍສະພາແຫ່ງຊາດແລ້ວ, ຄວນມີການກຳນົດບໍ່ໄດ້ຊື້ເຮືອນຢູ່ ທີ່ບັນດາເຂດພິເສດ, ຈຳກັດກ່ຽວກັບຈຳນວນເຮືອນຢູ່ທີ່ໄດ້ຊື້ໃນເຂດຫນື່ງ, ຈຳກັດຈຳນວນຄົວເຮືອນຢູ່ໃນຕືກອາຄານຫລາຍຊັ້ນຫລັງຫນຶ່ງ.
ກ່ຽວກັບການກຳນົດຂອງຮ່າງ ກົດໝາຍວ່າດ້ວຍເຮືອນຢູ່ ສະບັບປັບປຸງ ສຳລັບຊາວຫວຽດນາມ ອາໄສຢູ່ຕ່າງປະເທດ, ທ່ານ ຫງວຽນວັນເຢົາ, ຫົວຫນ້າກຳມາທິການເສດຖະກິດ ຖືວ່າ: ລັດຖະທຳມະນູນ ໄດ້ຢືນຢັນວ່າ:ຊາວຫວຽດນາມ ອາໄສຢູ່ຕ່າງປະເທດ ແມ່ນພາກສ່ວນຫນຶ່ງບໍ່ສາມາດຕັດແຍກອອກຈາກວົງຄະນາຍາດຊາວຫວຽດນາມໄດ້. ສະນັ້ນ ບັນດາການກຳນົດຂອງຮ່າງ ກົດໝາຍວ່າດ້ວຍເຮືອນຢູ່ ຕ້ອງເໝາະສົມກັບຂໍ້ກຳນົດນີ້, ຫລີກລ້ຽງການຈຳແນກ.
ຕ້ອງຮັບປະກັນສິດພົນລະເມືອງສຳລັບເຮືອນຢູ່ ຕາມລັດຖະທຳມະນູນປີ 2013
ກົດໝາຍວ່າດ້ວຍເຮືອນຢູ່ ຄວນມີນະໂຍບາຍສົ່ງເສີມການພັດທະນາເຮືອນຢູ່ສັງຄົມເພື່ອໃຫ້ປະຊາຊົນມີເຮືອນຢູ່ກໍຄືເໝາະສົມກັບລັດຖະທຳມະນູນສະບັບໃຫມ່ ກ່ຽວກັບສິດທິມະນຸດ,ສິດພົນລະເມືອງ. ຕາມທ່ານ ຫງວຽນດືກຮ່ຽນ, ຫົວຫນ້າຄະນະຄົ້ນຄ້ວາຄຳຮ້ອງຂໍຄວາມເປັນທຳຂອງສະພາແຫ່ງຊາດ ແລ້ວ, ຫວຽດນາມ ຄວນສ້າງກົນໄກ, ນະໂຍບາຍຄົບຊຸດ ເພື່ອດຶງດູດເຈົ້າຂອງການລົງທຶນມາລົງທຶນເຂົ້າບັນດາໂຄງການອະສັງຫາລິມະຊັບຫລາຍກວ່າ ເພື່ອໃຫ້ປະຊາຊົນໄດ້ຊົມໃຊ້ສະຫວັດດີການສັງຄົມຫລາຍກວ່າ. ເຖິງຢ່າງໃດກໍຕາມ, ໃນຮ່າງກົດໝາຍຄວນກຳນົດຕື່ມອີກ ບັນດາບຸລິມະສິດ, ກົນໄກໃຫ້ຈະແຈ້ງ ເພື່ອແກ້ໄຂຂໍ້ຈຳກັດກ່ຽວກັບເຮືອນຢູ່ສັງຄົມໃນໄລຍະຜ່ານມາ. ທີສອງ ລັດຄວນມີກົນໄກລົງທຶນຄື: ແຕ່ລະປີ ຫັກງົບປະມານພັດທະນາເຮືອນຢູ່ສັງລວມ, ໃນນັ້ນ ມີເຮືອນຢູ່ສັງຄົມ. ທ່ານນາງ ເຈືອງທິມາຍ, ຫົວຫນ້າກຳມາທິການບັນດາບັນຫາສັງຄົມ ຖືວ່າ:
“ທັດສະນະທຳອິດ ຕ້ອງຮັບປະກັນສິດພົນລະເມືອງສຳລັບເຮືອນຢູ່ ຕາມລັດຖະທຳມະນູນປີ 2013. ສິດນີ້ ລັດຕ້ອງມີຄວາມຮັບຜິດຊອບ. ຂ້າພະເຈົ້າສະເຫນີ ໃນການລົງທຶນເຮືອນຢູ່ສັງຄົມ ຫາກມອບໃຫ້ອົງການ, ສ່ວນບຸກຄົນ ບໍ່ຂຶ້ນກັບລັດ ຕ້ອງປະຕິບັດຢ່າງໂປ່ງໃສ, ຕ້ອງຄິດໄລ່ມູນຄ່າເຮືອນຢູ່ຢ່າງຖືກຕ້ອງ, ຄົບຖ້ວນ”
ໃນຊຸມປີມໍ່ໆມານີ້, ລັດມີຫລາຍນະໂຍບາຍກ່ຽວກັບເຮືອນຢູ່ສຳລັບຄອບຄົວທຸກຍາກ, ຄອບຄົວປະສົບກັບຄວາມຫຍຸ້ງຍາກ, ບັນດາເປົ້າໝາຍນະໂຍບາຍ. ກ່ຽວກັບເລື່ອງຮ່າງກົດໝາຍວ່າດ້ວຍເຮືອນຢູ່ສະບັບປັບປຸງ ເປີດກວ້າງສິດກ່ຽວກັບເຮືອນຢູ່ໃຫ້ແກ່ຊາວຕ່າງປະເທດດຳລົງຊີວິດ ແລະ ເຮັດວຽກຢູ່ຫວຽດນາມ, ຊາວຫວຽດນາມ ອາໄສຢູ່ຕ່າງປະເທດ ກໍຄືຮັບປະກັນສິດມີເຮືອນຢູ່ຂອງຊາວຫວຽດນາມ ໄດ້ປະກອບສ່ວນປັບປຸງດ້ານເຮືອນຢູ່ຢ່າງຮອບດ້ານ, ເໝາະສົມກັບລັດຖະທຳມະນູນປີ 2013 ແລະ ຊຸກຍູ້ການເຊື່ອມໂຍງເຂົ້າກັບສາກົນ.