(vovworld) – ຕາມການຄາດຄະເນແລ້ວ, ການເຈລະຈາຂັ້ນນັກວິຊາການລະຫວ່າງ ສເກົາຫຼີ ແລະ ສປປ ເກົາຫຼີ ກ່ຽວກັບການເຄື່ອນໄຫວຂອງເຂດອຸດສາຫະກຳຮ່ວມ Kaesong ຈະດຳເນີນໃນວັນທີ 17/7. ນີ້ແມ່ນການເຈລະຈາຂັ້ນນັກວິຊາການຄັ້ງທີ 4 ເຊິ່ງຖືກຈັດຂຶ້ນຢ່າງຕໍ່ເນື່ອງໃນຊຸມວັນຜ່ານມາ. ພາຍຫຼັງ 3 ຄັ້ງບໍ່ໄດ້ຮັບຜົນກ່ອນນັ້ນ. ເຖິງວ່າທັງສເກົາຫຼີ ແລະ ສປປ ເກົາຫຼີ ລ້ວນແຕ່ສະແດງເຈດຕະນາດີໃນການຟື້ນຟູການເຄື່ອນໄຫວຂອງເຂດອຸດສາຫະກຳນີ້ຄືນໃໝ່ກໍ່ຕາມ, ແຕ່ສິ່ງດັ່ງກ່າວບໍ່ທັນພຽງພໍ ເພື່ອໃຫ້ເຂດອຸດສາຫະກຳ Kaesong, ເຊິ່ງແມ່ນສັນຍາລັກແຫ່ງການຮ່ວມມືທາງດ້ານເສດຖະກິດໜຶ່ງດຽວລະຫວ່າງສອງພາກເກົາຫຼີຟື້ນຟູຄືນໃໝ່ໄດ້.
ອາດເຫັນໄດ້ວ່າ ບໍ່ມີຝ່າຍໃດມີຜົນປະໂຫຍດເມື່ອເຂດອຸດສາຫະກຳຮ່ວມ Kaesong ຢຸດຕິການເຄື່ອນໄຫວ, ດັ່ງນັ້ນທັງສເກົາຫຼີ ແລະ ສປປ ເກົາຫຼີ ລ້ວນແຕ່ມານະພະຍາຍາມເຈລະຈາເພື່ອຟື້ນຟູການເຄື່ອນໄຫວຂອງເຂດອຸດສາຫະກຳນີ້ຄືນໃໝ່. ຕາມການຄິດໄລ່ແລ້ວ, ເຂດອຸດສາຫະກຳຮ່ວມ Kaesong, ໂດຍບັນດາບໍລິສັດ ສເກົາຫຼີລົງທຶນ 100% (ເກືອບ 900 ລ້ານໂດລາສະຫະລັດ), ບໍ່ພຽງແຕ່ມີຄວາມໝາຍທາງດ້ານເສດຖະກິດເທົ່ານັ້ນ, ຫາກຍັງມີຄວາມໝາຍທາງດ້ານສັງຄົມອີກດ້ວຍ ເພາະວ່າມັນຈະສ້າງວຽກເຮັດງານທຳໃຫ້ກຳມະກອນ ສປປ ເກົາຫຼີກວ່າ 53.000 ຄົນ. ຂໍ້ຕົກລົງອັດປະຕູເຂດອຸດສາຫະກຳຮ່ວມ Kaesong ຂອງພຽງຢາງເມື່ອເດືອນ 4/2013 ນັ້ນ ໄດ້ເຮັດໃຫ້ວົງເງິນການຄ້າສອງສົ້ນລະຫວ່າງ ສເກົາຫຼີ ແລະ ສປປ ເກົາຫຼີ ໃນເດືອນ 5 ຜ່ານມາຕົກຢູ່ໃນຕົວເລກ 0 ແລະ ກໍ່ຄວາມເສຍຫາຍເກືອບ 1 ຕື້ໂດລາສະຫະລັດໃຫ້ກວ່າ 100 ບໍລິສັດຂອງສເກົາຫຼີ ທີ່ມີບັນດາໂຮງງານເຄື່ອນໄຫວຢູ່ທີ່ນີ້.
ຍ້ອນເຫດນັ້ນ, ທັງສອງຝ່າຍຈຶ່ງຍົກອອກວິວັດການດຳເນີນຮອບເຈລະຈາທີ 4 ພາຍຫຼັງທີ່ການເຈລະຈາຂັ້ນນັກວິຊາການຄັ້ງທີ 3 ຖືກດຳເນີນເມື່ອຕອນບ່າຍວັນທີ 15/7 ແຕ່ບໍ່ບັນລຸໄດ້ຂໍ້ຕົກລົງໃດໆ. ສາຍເຫດຕົ້ນຕໍ່ແມ່ນຍ້ອນທັງສອງຝ່າຍລ້ວນແຕ່ບໍ່ຮັບຜິດຊອບຕໍ່ເລື່ອງເຮັດໃຫ້ເຂດອຸດສາຫະກຳຕ້ອງຢຸດຕິການເຄື່ອນໄຫວ ກໍ່ຄືບໍ່ເຫັນດີເຫັນພ້ອມຕໍ່ວິທີການເຊື່ອມຕໍ່ການເຄື່ອນໄຫວຂອງເຂດອຸດສາຫະກຳນີ້. ທີ່ການເຈລະຈາ, ເຊີອູນ ສືບຕໍ່ສະເໜີໃຫ້ພຽງຢາງຮັບຜິດຊອບຕໍ່ຄວາມເສຍຫາຍຕ່າງໆ ເຊິ່ງບັນດາບໍລິສັດ ສເກົາຫຼີ ຕ້ອງແບກຫາບ ກໍ່ຄືສະເໜີໃຫ້ພຽງຢາງ ຕ້ອງຮັບປະກັນບໍ່ປະໃຫ້ເກີດສະພາບຄືດັ່ງກ່າວອີກ. ສເກົາຫຼີ ກໍ່ຮຽກຮ້ອງພັດທະນາເຂດອຸດສາຫະກຳຮ່ວມ Kaesong ໃຫ້ກາຍເປັນເຂດອຸດສາຫະກຳສາກົນ ດ້ວຍເລື່ອງເຫັນດີໃຫ້ບັນດາບໍລິສັດຕ່າງປະເທດເຂົ້າມາລົງທຶນຢູ່ທີ່ນີ້. ນີ້ແມ່ນສິ່ງທີ່ກໍ່ຄວາມຫຍຸ້ງຍາກໃຫ້ແກ່ ສປປ ເກົາຫຼີ ເມື່ອປະເທດນີ້ຢາກກີດຂວາງການເຄື່ອນໄຫວຕ່າງໆຢູ່ເຂດອຸດສາຫະກຳ. ໃນຂະນະນັ້ນ, ຫົວໜ້າຄະນະເຈລະຈາຂອງ ສປປ ເກົາຫຼີ ທ່ານ Park Chul – su ພັດກ່າວຫາເຊີອູນ ຕ້ອງຮັບຜິດຊອບຕໍ່ເລື່ອງເຂດອຸດສາຫະກຳຮ່ວມ Kaesong ຖືກຢຸດຕິການເຄື່ອນໄຫວ ຍ້ອນການຊ້ອມຮົບຮ່ວມລະຫວ່າງ ສເກົາຫຼີ ແລະ ອາເມລິກາ. ວົງການສື່ມວນຊົນ ສປປ ເກົາຫຼີ ກໍ່ຮຽກຮ້ອງໃຫ້ເຊີອູນ ຄວນປ່ຽນແປງນະໂຍບາຍ ແລະ ຫຼັກໝັ້ນ ເພື່ອແກ້ໄຂສະພາບບໍ່ມີທາງອອກ ທີ່ກ່ຽວຂ້ອງເຖິງເຂດອຸດສາຫະກຳ Kaesong.
ເຂດອຸດສາຫະກຳ Kaesong.
(ພາບ: hanoimoi.com.vn) ຫາງສຽງຫວັງວ່າ, ການເຈລະຈາຈະບັນລຸໄດ້ຂໍ້ຕົກລົງໃນການຮ່ວມມືລະຫວ່າງສອງພາກ. ເຖິງຢ່າງໃດກໍ່ຕາມ, ການປະລາໄຊຂອງຮອບເຈລະຈາຂັ້ນນັກວິຊາການຄັ້ງທີ 2 (ວັນທີ10/7) ແລະ ຄັ້ງທີ 3 (ວັນທີ 15/7) ນັ້ນ ແມ່ນຍ້ອນວ່າ ບໍ່ມີຝ່າຍໃດຮັບຜິດຊອບ, ອັນໄດ້ກໍ່ຄວາມວິຕົກກັງວົນວ່າ ສິ່ງດັ່ງກ່າວອາດຈະເກີດຂຶ້ນໃນຮອບເຈລະຈາທີ 4 ເຊິ່ງຈະດຳເນີນໃນໃກ້ໆນີ້. ທ່ານ Chang Yong-seok, ນັກຄົ້ນຄ້ວາຂັ້ນສູງຢູ່ສະຖາບັນຄົ້ນຄ້ວາສັນຕິພາບ ແລະ ເອກະພາບຂອງມະຫາວິທະຍາໄລແຫ່ງຊາດເຊີອູນ, ໃຫ້ຂໍ້ສັງເກດວ່າ, ການເຈລະຈາກ່ຽວກັບເຂດອຸດສາຫະກຳຮ່ວມ Kaesong ອາດຈະຕ້ອງດຳເນີນໃນໄລຍະເວລາອັນຍາວນານ. ຕາມສາສະດາຈານ ຄົ້ນຄ້ວາສເກົາຫຼີ Kim Yong-hyun ຢູ່ມະຫາວິທະຍາໄລ Dongguk ແລ້ວ, ສິ່ງທີ່ກີດຂວາງສອງຝ່າຍໃນປະຈຸບັນແມ່ນຫຼາຍພໍສົມຄວນ, ດັ່ງນັ້ນທັງສອງຝ່າຍຕ້ອງຊອກຫາຈຸດລວມໃຫ້ໄດ້
ເລື່ອງ ສເກົາຫຼີ, ແລະ ສປປເກົາຫຼີ ດຳເນີນການເຈລະຈາກ່ຽວກັບເຂດອຸດສາຫະກຳຮ່ວມ Kaesong ໄດ້ເປັນຂີດໝາຍບາດກ້າວທຳອິດ, ແຕ່ກໍ່ແມ່ນບາດກ້າວທີ່ຫຍຸ້ງຍາກທີ່ສຸດ, ຖ້າຫາກທັງສອງຝ່າຍບໍ່ຜ່ອນສັ້ນຜ່ອນຍາວ, ບັນຫາເຂດອຸດສາຫະກຳຮ່ວມ Kaesong ບໍ່ໄດ້ຮັບການແກ້ໄຂ, ການພົວພັນລະຫວ່າງສອງພາກເກົາຫຼີຈະບໍ່ສາມາດພັດທະນາໄດ້.