(vovworld)- ວັນທີ 28/7 ເປັນຂີດໝາຍ 19 ປີເຕັມ ທີ່ຫວຽດນາມເຂົ້າເປັນສະມາຊິກ ອາຊຽນ(28/7/1995-28/7/2014). 19 ປີທີ່ເຂົ້າຮ່ວມ ອາຊຽນ, ພຶດຕິກຳຕົວຈິງໄດ້ພິສູດໃຫ້ເຫັນແຜນນະໂຍບາຍເຂົ້າເປັນສະມາຊິກ ອາຊຽນ ແມ່ນລັດຖະນະໂຍບາຍຢ່າຖືກຕ້ອງ, ທັນການ, ມີຄວາມໝາຍປະຫວັດສາດ ແລະ ຍຸດທະສາດສຳຄັນສຳລັບຫວຽດນາມ.
photo:vtv.vn
|
ວັນທີ 28/7/1995, ຢູ່ນະຄອນຫລວງ Bandar Seri Begawan ຂອງບຣູໄນ, ໃນສຽງເພງຊາດດັ່ງຂຶ້ນຢ່າງສະຫງ່າຜ່າເຜີຍ, ທຸງຊາດຫວຽດນາມປີວສະບັດພ້ອມກັບທຸງຊາດຂອງ 6 ປະເທດສະມາຊິກອາຊຽນ ເປີດຫນ້າປະຫວັດສາດໃຫມ່ຂອງພາກພື້ນ. ຫວຽດນາມ ໄດ້ຮັບເຂົ້າເປັນສະມາຊິກທີ 7 ຂອງອາຊຽນ ຢ່າງເປັນທາງການ. ເຫດການນີ້ ເປັນຂີດໝາຍໃນເສັ້ນທາງເຊື່ອມໂຍງເຂົ້າກັບພາກພື້ນ ແລະ ໂລກຂອງຫວຽດນາມ.
ຜົນປະໂຫຍດຍຸດທະສາດກັບອາຊຽນ
19 ປີ ແມ່ນໄລຍະບໍ່ຍາວ, ແຕ່ໃນຊຸມເດືອນປີນັ້ນ, ຫວຽດນາມ ບັນລຸໄດ້ຜົນງານຫລາຍຢ່າງ: ປະກອບສ່ວນປັບປຸງສັນຕິພາບ, ຄວາມໝັ້ນຄົງ ທີ່ສະດວກກວ່າໃຫ້ແກ່ການພັດທະນາ, ເພີ່ມເຕີມໃຫ້ການພົວພັນສອງຝ່າຍ ດ້ວຍການພົວພັນຫລາຍຝ່າຍໃນອາຊຽນ, ເຂົ້າຮ່ວມວິວັດການຮ່ວມສຳພັນດ້ານເສດຖະກິດພາກພື້ນຢ່າງມີປະສິດທິຜົນ ຜ່ານການປະຕິບັດສັນຍາ AFTA, ເຂດລົງທຶນ ອາຊຽນ, ສ້າງຄວາມສະດວກໃຫ້ແກ່ການຄ້າຂາຍໃນພາກພື້ນ, ເຊື່ອມຕໍ່ເສັ້ນທາງຄົມມະນາຄົມ, ເຄືອຂ່າຍໄຟຟ້າ, ອາຍແກສ, ຮ່ວມມືໃນບັນດາຂົງເຂດກະສິກຳ - ປ່າໄມ້-ການປະມົງ, ຄົມມະນາຄົມຂົນສົ່ງ, ວັດທະນະທຳ, ຖະແຫລງຂ່າວ, ການສຶກສາ, ພັດທະນາສັງຄົມ, ລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ປ້ອງກັນ ແລະ ຕ້ານອາດຊະຍາກຳ, ໂລກລະບາດ. ທ່ານລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ຟ້າມກວາງວີງ ໃຫ້ຖືວ່າ:
“ຫວຽດນາມເຂົ້າເປັນສະມາຊິກ ອາຊຽນເມື່ອປີ 1995 ແລະ ນັ້ນກໍແມ່ນຈຸດເວລາກຳນົດທິດສ້າງປະຊາຄົມອາຊຽນ. ຫວຽດນາມ ໄດ້ຮັບປະກັນປະຕິບັດບັນດາຄວາມຮັບຜິດຊອບຂອງປະເທດສະມາຊິກຢ່າງຄົບຖ້ວນທີ່ສຸດ ສຳລັບບັນດາຈຸດໝາຍຊື່ງ ອາຊຽນ ໄດ້ວາງອອກ. ຫວນຄືນວິວັດການຈາກຈຸດເວລານັ້ນມາຮອດປະຈຸບັນ, ພວກເຮົາໄດ້ຕັ້ງຫນ້າເຂົ້າຮ່ວມສ້າງບັນດາກົນໄກຢູ່ຂັ້ນພາກພື້ນ.”
ຍັງມີອີກສິ່ງຫນຶ່ງທີ່ສຳຄັນ ນັ້ນແມ່ນ ຫວຽດນາມ ສ້າງສາຍພົວພັນບ້ານໃກ້ເຮືອນຄຽງທີ່ດີ, ຮ່ວມມື ແລະ ຊ່ວຍເຫລືອເຊິ່ງກັນ ແລະ ກັນ ບົນຈິດໃຈເຄົາລົບ, ສະເຫມີພາບ, ຕ່າງຝ່າຍຕ່າງມີຜົນປະໂຫຍດ, ບໍ່ແຊກແຊງເຂົ້າວຽກງານພາຍໃນຂອງກັນ. ກາຍເປັນສະມາຊິກ ອາຊຽນ ກໍສ້າງທ່ວງທ່າໃຫ້ຫວຽດນາມ ເປີດກວ້າງ ແລະ ເພີ່ມທະວີການພົວພັນກັບບັນດາຄູ່ຮ່ວມມື ນອກ ອາຊຽນ, ເປັນຕົ້ນແມ່ນບັນດາປະເທດໃຫຍ່ ກໍຄືເຂົ້າຮ່ວມບັນດາຂອບເຂດຮ່ວມມືສາກົນຢ່າງເລິກເຊິ່ງກວ້າງຂວາງ ຫລື ເຊື່ອມຕໍ່ພາກພື້ນຢ່າງກວ້າງຂວາງກວ່າຄື: ອາຊຽນ+3, ກອງປະຊຸມສຸດຍອດ ອາຊີຕາເວັນອອກ (EAS), ເວທີປາໄສຮ່ວມມື ອາຊີ- ປາຊີຟີກ(APEC), ວິວັດການຮ່ວມມື ອາຊີ - ເອີລົບ(ASEM), ອົງການການຄ້າໂລກ(WTO), ຜ່ານນັ້ນ ປະກອບສ່ວນຍົກສູງບົດບາດ ແລະ ທີ່ຕັ້ງຂອງຫວຽດນາມ ໃນເວທີສາກົນ.
ເປັນເຈົ້າການ,ຕັ້ງຫນ້າ ແລະ ມີຄວາມຮັບຜິດຊອບພ້ອມກັບ ອາຊຽນ
ຍາມໃດ ຫວຽດນາມກໍກຳນົດວ່າ ອາຊຽນ ຮ່ວມສຳພັນຢ່າງແຫນ້ນແຟ້ນ, ສາມັກຄີ ແລະ ເອກະພາບ, ມີບົດບາດແລະ ທີ່ຕັ້ງສຳຄັນໃນເວທີສາກົນ ແມ່ນສອດຄ່ອງກັບຜົນປະໂຫຍດພື້ນຖານ ແລະ ຍາວນານຂອງຫວຽດນາມ. ສະນັ້ນ 19 ປີຜ່ານມາ ພ້ອມກັບບັນດາປະເທດສະມາຊິກ ອາຊຽນອື່ນ, ຫວຽດນາມ ພ້ອມກັບອາຊຽນ ໄດ້ຜ່ານຜ່າບັນດາຄວາມແຕກຕ່າງກັນ ແລະ ສິ່ງທີ່ຄົງຄ້າງໂດຍປະຫວັດສາດປະໄວ້, ຍູ້ແຮງການຮ່ວມມືຮອບດ້ານບົນຈິດໃຈມິດຕະພາບ ແລະ ສາມັກຄີ.
ໃນໄລຍະແຫ່ງການພັດທະນາໃຫມ່ຂອງອາຊຽນ, ຫວຽດນາມ ສືບຕໍ່ແຜນນະໂຍບາຍເຂົ້າຮ່ວມການຮ່ວມມື ອາຊຽນ ຕາມຈິດໃຈເປັນເຈົ້າການ, ຕັ້ງຫນ້າ ແລະ ມີຄວາມຮັບຜິດຊອບຄື: ເປັນເຈົ້າການສະເຫນີບັນດາຂໍ້ລິເລີ່ມ ແລະ ແນວຄວາມຄິດໃຫມ່ ເພື່ອຊຸກຍູ້ການຮ່ວມມື ແລະ ເພີ່ມທະວີການຮ່ວມສຳພັນອາຊຽນ, ຕັ້ງຫນ້າ ພ້ອມກັບ ອາຊຽນ ຮ່ວມແຮງຮ່ວມໃຈແກ້ໄຂບັນດາບັນຫາຫຍຸ້ງຍາກ,ສັບສົນກໍຄືສິ່ງທ້າທາຍພວມວາງອອກ ເພື່ອຮັກສາພະລັງຊີວິດກໍຄືຄຸນຄ່າຂອງ ອາຊຽນ ໃນສະພາບການໃຫມ່. ທ່ານລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ຟ້າມກວາງວີງ ຢືນຢັນວ່າ:
“ຫວຽດນາມ ດຳລົງຊີວິດໃນພາກພື້ນ ອາຊີຕາເວັນອອກສ່ຽງໃຕ້, ຖ້າພາກພື້ນນີ້ພັດທະນາຢ່າງສັນຕິພາບ ພວກເຮົາຈະໄດ້ຮັບຜົນປະໂຫຍດ. ສະນັ້ນ ພວກເຮົາ ຕັ້ງຜົນປະໂຫຍດຍຸດທະສາດເຂົ້າໃນເລ່ືອງ ພັດທະນາປະຊາຄົມ ອາຊຽນ, ແລະ ຖືວ່າ ນີ້ແມ່ນຜົນປະໂຫຍດແທດຈິງທີ່ສຸດ. ເມື່ອ ອາຊຽນ ກາຍເປັນປະຊາຄົມ ນອກຈາກສະພາບສັນຕິພາບ,ສະຖຽນລະພາບ, ພັດທະນາ ພວກເຮົາຍັງຍາດແຍ່ງທ່າໄດ້ປຽບຈາກບັນດາພື້ນຖານເສດຖະກິດໃນອາຊຽນ ເພື່ອເພີ່ມເຕີມ,ຫນູນຊ່ວຍເຊິ່ງກັນ ແລະ ກັນ ແລະ ພ້ອມກັນພັດທະນາ.”
ໃນພາຍພາກຫນ້າ, ຫວຽດນາມ ພວມສຸມທຸກຄວາມມານະພະຍາຍາມ ແລະ ແຫລ່ງກຳລັງ ເພື່ອປະກອບສ່ວນຫັນບັນດາຈຸດໝາຍຂອງປະຊາຄົມອາຊຽນ ເປັນລະອຽດ, ຜ່ານນັ້ນ ປະກອບສ່ວນຍົກສູງ ບົດບາດ ແລະ ທີ່ຕັ້ງຂອງຫວຽດນາມ ໃນເວທີສາກົນ, ເຊີດຊູພາບພົດປະເທດຫວຽດນາມ ປ່ຽນໃຫມ່ ແລະ ຂະຫຍັນຂັນເຄື່ອນ, ມີແນວທາງການຕ່າງປະເທດເອກະລາດ, ເປັນເຈົ້າຕົນເອງ, ສັນຕິພາບ, ຮ່ວມມື ແລະ ພັດທະນາ. ທ່ານ ຫງວຽນຕຽນມີງ, ຫົວຫນ້າກົມອາຊຽນ, ສັງກັດກະຊວງການຕ່າງປະເທດຫວຽດນາມ ໄດ້ເນັ້ນຫນັກວ່າ:
“ເຮັດແນວໃດເພື່ອປັບປຸງຄວາມສາມັກຄີ, ສົມທົບຫລັກໝັ້ນລວມຂອງອາຊຽນ ໃນບັນຫາພາກພື້ນ, ສາກົນ, ຮັກສາບົດບາດໃຈກາງຂອງອາຊຽນ. ນີ້ແມ່ນບັນຫາສຳຄັນທີ່ສຸດ ແລະ ມີສິ່ງທ້າທາຍຫລາຍຢ່າງ. ຫວຽດນາມ ຈະພ້ອມກັບບັນດາປະເທດ ອາຊຽນ ຊຸກຍູ້ວິວັດການຮ່ວມສຳພັນ, ສ້າງປະຊາຄົມ: ເພີ່ມທະວີການເຊື່ອມຈອດ, ບັນຫາພື້ນຖານໂຄງລ່າງ, ການພົວພັນລະຫວ່າງມະນຸດກັບມະນຸດ, ລະບອບ… ຫວຽນາມ ຈະເພີ່ມທະວີການສົມທົບລະຫວ່າງບັນດາກະຊວງ,ຂະແຫນງການໃນການເພີ່ມທະວີການຊຸກຍູ້ໃນອາຊຽນ ເພື່ອໃຫ້ການເຂົ້າຮ່ວມອາຊຽນຢ່າງຄົບຊຸດກວ່າ.”
19 ປີ ແຫ່ງໄລຍະທີ່ຫວຽດນາມ ເຊື່ອມໂຍງເຂົ້າກັບພາກພື້ນ. ຫວຽດນາມ ໄດ້ມີການປະກອບສ່ວນໃຫ້ແກ່ການຄົງຕົວ, ພັດທະນາຂອງອາຊຽນ ແລະ ກໍບັນລຸໄດ້ບັນດາໝາກຜົນໃນເບື້ອງຕົ້ນ. ໃນພາຍພາກຫນ້າຂອງອາຊຽນ, ເຖິງວ່າ ຍັງມີກາລະໂອກາດຫລາຍຢ່າງເພື່ອພັດທະນາ, ແຕ່ມີສິ່ງທ້າທາຍບໍ່ແມ່ນຫນ້ອຍ ຮຽກຮ້ອງຫວຽດນາມ ກໍຄືບັນດາສະມາຊິກອື່ນໃນອາຊຽນ ຕ້ອງເພີ່ມທະວີການຮ່ວມມື, ຮ່ວມສຳພັນຢ່າງແຫນ້ນແຟ້ນກວ່າອີກ, ພ້ອມກັນວາງອອກບັນດາແນວຄວາມຄິດໃຫມ່ ແລະ ບັນດາມາດຕະການປະຕິບັດບັນດາແນວຄວາມຄິດນີ້ ເພື່ອສາມາດຫັນແນວຄວາມຄິດຂອງ “ວິໄສທັດ 2020” ໃຫ້ປະກົດຜົນເປັນຈິງ, ສ້າງປະຊາຄົມ ອາຊຽນໃຫ້ສຳເລັດ ແລະ ກາຍເປັນປັດໄຈຫລັກແຫລ່ງຂອງປະຊາຄົມອາຊີ.