ຈຳນວນເງິນຂອງຊາວຫວຽດນາມ ອາໄສຢູ່ຕ່າງປະເທດຝາກມາຫວຽດນາມ ໃນຊຸມປີຜ່ານມາໄດ້ເພິ່ມຂຶ້ນຢ່າງໄວວາ. ປີ 2012, ໂດຍບໍ່ຫົວຊາຕໍ່ວິກິດການເສດຖະກິດໂລກ, ຈຳນວນເງິນຂອງຊາວຫວຽດນາມ ອາໄສຢູ່ຕ່າງປະເທດຝາກມາຫວຽດນາມ ຍັງບັນລຸເກືອບ 10 ຕື້ໂດລາສະຫະລັດ ຊື່ງໄດ້ປະກອບແຫຼ່ງກຳລັງບໍ່ແມ່ນໜ້ອຍເຂົ້າໃນການສ້າງສາ ແລະ ພັດທະນາເສດຖະກິດຂອງປະເທດຊາດ, ມີບົດບາດສຳຄັນ ເມື່ອທຽບກັບບັນດາແຫຼ່ງທຶນອຸປະຖຳຫລືແຫຼ່ງທຶນຊ່ວຍເຫຼືອເພື່ອການພັດທະນາ.
(ພາບປະກອບ: gdtd.vn)
ໃນ 10 ປີມານີ້, ຈຳນວນເງິນຂອງຊາວຫວຽດນາມ ອາໄສຢູ່ຕ່າງປະເທດຝາກມາຫວຽດນາມ ບັນລຸກ່ວາ 70 ຕື້ໂດລາສະຫະລັດ. ຈຳນວນເງິນຂອງຊາວຫວຽດນາມ ອາໄສຢູ່ຕ່າງປະເທດຝາກມາ ໄດ້ປະກອບສ່ວນເພິ່ມເຕີມແຫຼ່ງເງິນຕາຕ່າງປະເທດເປັນປົກກະຕິໃຫ້ແກ່ຫວຽດນາມ, ໜູນຊ່ວຍການດຸ່ນດຽງດຸນຊຳລະແຫ່ງຊາດ, ຫລຸດກຳລັງດັນເພິ່ມອັດຕາແລກປ່ຽນເງິນຕາ. ໃນປີ 2011-2012, ດຸນຊຳລະມີສ່ວນເກີນລື່ນກາຍການຄາດຄະເນ, ພາຍຫຼັງ 2,3 ປີຖືກຂາດດຸນ. ທ່ານຫງວຽນແທນເຊີນ (Nguyễn Thanh Sơn) ຮອງລັດຖະມົນຕີການຕ່າງປະເທດຫວຽດນາມ, ປະທານຄະນະກຳມະການແຫ່ງຊາດກ່ຽວກັບຊາວຫວຽດນາມ ອາໄສຢູ່ຕ່າງປະເທດ (ສັງກັດກະຊວງການຕ່າງປະເທດຫວຽດນາມ) ໃຫ້ຂໍ້ສັງເກດວ່າ:
“ໃນ 4 ປີມານີ້, ຈຳນວນເງິນຂອງຊາວຫວຽດນາມ ອາໄສຢູ່ຕ່າງປະເທດຝາກມາໄດ້ເພີ່ມເຂຶ້ນເປັນກ້າວໆຄື: 10-15%. ເຖິງວ່າເສດຖະກິດໂລກມີບັນດາການຜັນແປທີ່ບໍ່ດີແຕ່ປະຊາຊົນຍັງຝາກເງິນມາປະເທດເພື່ອລົງທຶນ. ສິ່ງດັ່ງກ່າວສະແດງໃຫ້ເຫັນວ່າຄວາມຫຍຸ້ງຍາກຂອງເສດຖະກິດໂລກບໍ່ແມ່ນສິ່ງທ້າທາຍສຳລັບປະຊາຊົນ. ບັນຫາຕົ້ນຕໍແມ່ນປະຊາຊົນຍັງສະຫງວນອາລົມຈິດ, ຄວາມຮັກແພງໃຫ້ແກ່ປະເທດຊາດ”
ເງິນຂອງຊາວຫວຽດນາມອາໄສຢູ່ຕ່າງປະເທດ
ຝາກມາຫວຽດນາມຜ່ານ World Bank
(ພາບ:vef.vn)
ຖ້າຫາກວ່າ, ໃນເມື່ອກ່ອນ, ຈຳນວນເງິນຂອງຊາວຫວຽດນາມ ອາໄສຢູ່ຕ່າງປະເທດຝາກມາຫວຽດນາມ ສຸ່ມໃສ່ການໃຊ້ສອຍເປັນຕົ້ນນັ້ນ, ໃນ 2,3 ປີມານີ້, ພ້ອມກັບການພັດທະນາຂອງພື້ນຖານເສດຖະກິດຢ່າງໄວວານັ້ນ, ປະຊາຄົມຊາວຫວຽດນາມ ອາໄສຢູ່ຕ່າງປະເທດ ມີຄວາມສົນໃຈຕໍ່ບັນດາກາລະໂອກາດລົງທຶນຫາກຳໄລຢູ່ຫວຽດນາມ ຫຼາຍກ່ວາ. ປະຈຸບັນ, ຫວຽດນາມ ມີກ່ວາ 2000 ໂຄງການໂດຍຊາວຫວຽດນາມ ອາໄສຢູ່ຕ່າງປະເທດຈົດທະບຽນລົງທຶນດ້ວຍຍອດຈຳນວນທຶນເກືອບ 6 ຕື້ໂດລາສະຫະລັດໃນຫຼາຍຂະແໜງຄື: ກະສິກຳ, ສາທາລະນະສຸກ, ການສຶກສາ, ອຸດສາຫະກຳ, ອະສັງຫາລິມະຊັບ, ການທ່ອງທ່ຽວ. ທ່ານຮ່ວາງວັນເລີມ (Hoàng Văn Lâm) ຊາວຫວຽດນາມ ອາໄສຢູ່ອາເມລິກາ ໃຫ້ຮູ້ວ່າ:
“ປະຈຸບັນ, ພ້ອມກັບການເປີດປະຕູ, ຫວຽດນາມ ໄດ້ໃຫ້ບຸລິມະສິດ, ສ້າງເງື່ອນໄຂອຳນວຍຄວາມສະດວກເພື່ອໃຫ້ຊາວຫວຽດນາມ ອາໄສຢູ່ຕ່າງປະເທດຝາກເງິນມາລົງທຶນ. ຍ້ອນໄດ້ຮັບເງື່ອນໄຂສະດວກດ້ານກົດໝາຍ, ຊາວຫວຽດນາມ ອາໄສຢູ່ຕ່າງປະເທດມີຄວາມອຸ່ນອຽນໃຈຝາກເງິນມາລົງທຶນຢູ່ຫວຽດນາມ ຫລາຍກ່ວາ”
ຈຳນວນເງິນຂອງຊາວຫວຽດນາມ ອາໄສຢູ່ຕ່າງປະເທດຝາກມາໄດ້ເພີ່ມຂຶ້ນ ແລະ ມີຂອບຂະໜາດໃຫ່ຍຜ່ານຫຼາຍລະບົບ. ປະຈຸບັນ, ມີຊາວຫວຽດນາມ ອາໄສຢູ່ກ່ວາ 100 ປະເທດ ແລະ ເຂດແຄ້ວນໃນໂລກ. ນອກຈາກນັ້ນແລ້ວ, ຈຳນວນເງິນຂອງຊາວຫວຽດນາມ ອາໄສຢູ່ຕ່າງປະເທດຝາກມາໄດ້ເພິ່ມຂຶ້ນກໍ່ຍ້ອນລັດໄດ້ອອກຫນັງສືອະນຸຍາດໃຫ້ບັນດາອົງການຈັດຕັ້ງເຂົ້າຮ່ວມການຝາກເງິນຂອງຊາວຫວຽດນາມ ອາໄສຢູ່ຕ່າງປະເທດ ຄືກັນກັບບັນດາທະນາຄານການຄ້າ, ໄປສະນີ, ບໍລິສັດດຳເນີນທຸລະກິດການບໍລິການຝາກເງິນຂອງຊາວຫວຽດນາມ ອາໄສຢູ່ຕ່າງປະເທດ.
ເງິນຂອງຊາວຫວຽດນາມ ອາໄສຢູ່ຕ່າງປະເທດພວມກາຍເປັນແຫຼ່ງກຳລັງຫຼາຍພໍສົມຄວນສຳລັບພື້ນຖານເສດຖະກິດ, ສະນັ້ນ, ລັດຖະບານໄດ້ຊີ້ນຳໃຫ້ບັນດາກະຊວງ, ຂະແໜງການກ່ຽວຂ້ອງ, ພິເສດແມ່ນລະບົບທະນາຄານຕ້ອງດຶງດູດແຫຼ່ງກຳລັງນີ້, ສ້າງເງື່ອນໄຂສະດວກໃນການປຸກລະດົມ ແລະ ປ່ອຍເງິນ. ຕາມຄະນະກຳມະການແຫ່ງຊາດກ່ຽວກັບຊາວຫວຽດນາມ ອາໄສຢູ່ຕ່າງປະເທດແລ້ວ, ປີ 2013, ທາງຄະນະກຳມະການສືບຕໍ່ສະເໜີ, ປັບປຸງ, ເພີ່ມເຕີມບັນດາເອກະສານກ່ຽວຂ້ອງເຖິງກົດໝາຍວ່າດ້ວຍສັນຊາດປີ 2008 ເພື່ອສ້າງເງື່ອນໄຂອຳນວຍຄວາມສະດວກໃນບັນດາລະບຽບການກ່ຽວຂ້ອງເຖິງສັນຊາດ,ກຳມະສິດນຳໃຊ້ເຮືອນຢູ່, ການລົງທຶນໃຫ້ແກ່ຊາວຫວຽດນາມ ອາໄສຢູ່ຕ່າງປະເທດ, ລັດຄົ້ນຄ້ວາເພື່ອປະກາດໃຊ້ບັນດານະໂຍບາຍສົ່ງເສີມຜູ້ໄດ້ຮັບເງິນຂອງຊາວຫວຽດນາມ ອາໄສຢູ່ຕ່າງປະເທດຝາກມາ ຂາຍເງິນຕາຕ່າງປະເທດໃຫ້ແກ່ທະນາຄານການຄ້າຫຼືວ່າມຸ້ງໄປເຖິງການນຳໃຊ້ເງິນຂອງຊາວຫວຽດນາມອາໄສຢູ່ຕ່າງປະເທດຝາກມາລົງທຶນເຂົ້າໃນການຜະລິດດຳເນີນທຸລະກິດໂດຍກົງ. ນອກຈາກນັ້ນແລ້ວ, ບັນດາອົງການມີ່ໜ້າທີ່ຮັບຜິດຊອບກໍ່ສົມທົບກັນເພື່ອຮັບປະກັນແຫຼ່ງຄົນງານສົ່ງອອກ, ປະກອບສ່ວນດຶງດູດເງິນຂອງຊາວຫວຽດນາມ ອາໄສຢູ່ຕ່າງປະເທດຝາກມາ. ທ່ານຫງວຽນແທນເຊີນ (Nguyễn Thanh Sơn) ຮອງລັດຖະມົນຕີການຕ່າງປະເທດຫວຽດນາມ ໃຫ້ຮູ້ວ່າ:
“ພວກເຮົາສືບຕໍ່ຜັນຂະຫຍາຍມະຕິເລກທີ 36 ຂອງກົມການເມືອງສູນກາງພັກ ແລະ ໂຄງການດຳເນີນງານຂອງລັດຖະບານກ່ຽວກັບວຽກງານຂອງຊາວຫວຽດນາມ ອາໄສຢູ່ຕ່າງປະເທດຢ່າງຮອບດ້ານຕາມທິດສືບຕໍ່ສ້າງກົນໄກ, ນະໂຍບາຍ, ກົດໝາຍແລະກົນໄກຮັບປະກັນບັນດາສິດຜົນປະໂຫຍດອັນຊອບທຳຂອງຊາວຫວຽດນາມອາໄສຢູ່ຕ່າງປະເທດໃຫ້ສົມບູນແບບ ເພື່ອແນໃສ່ລະດົມກຳລົງໃຈເຂົາເຈົ້າເພື່ອປະກອບສ່ວນສ້າງສາປະເທດຊາດ”
ທະນາຄານໂລກໄດ້ຈັດຫວຽດນາມເຂົ້າໃນບັນຊີລາຍຊື່ບັນດາປະເທດມີແຫຼ່ງເງິນຂອງຊາວຫວຽດນາມອາໄສຢູ່ຕ່າງປະເທດຝາກມາຫຼາຍກ່ວາໝູ່, ກວມເອົາອັດຕາສູງພໍສົມຕວນໃນຈີດີພີ. ສະນັ້ນ, ເລື່ອງດຶງດູດ ແລະ ນຳໃຊ້ແຫຼ່ງກຳລັງນີ້ຢ່າງມີປະສິດທິຜົນ ໄດ້ ແລະ ພວມປະກອບສ່ວນສຳຄັນເຂົ້າໃນພາລະກິດສ້າງສາ ແລະ ພັດທະນາປະເທດຊາດ.