(vovworld) - ໃນບົດກ່າວປາໄສອັດກອງປະຊຸມທົ່ວປະເທດກ່ຽວກັບວຽກງານປ້ອງກັນ, ຕ້ານການສໍ້ລາດບັງຫຼວງ, ເຊິ່ງດຳເນີນໃນວັນທີ 5/5 ຢູ່ຮ່າໂນ້ຍ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ, ຫົວໜ້າຄະນະຊີ້ນຳສູນກາງກ່ຽວກັບການປ້ອງກັນ, ຕ້ານການສໍ້ລາດບັງຫຼວງ ເນັ້ນໜັກວ່າ, ວຽກງານປ້ອງກັນ, ຕ້ານການສໍ້ລາດບັງຫຼວງ ຈະສືບຕໍ່ໄດ້ຮັບການຍູ້ແຮງ ດ້ວຍຄວາມຕັດສິນໃຈສູງກວ່າອີກ. ວິທະຍຸກະຈາຍສຽງຫວຽດນາມ ຄັດສະເໜີເນື້ອໃນບົດປາໄສຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ດ້ວຍເນື້ອໃນ “ເດັດດຽວຕ້ານການສໍ້ລາດບັງຫຼວງ ດ້ວຍບັນດາມາດຕະການລະອຽດ “.
ທ່ານເລຂາທິການໃຫຍ່ ຫງວຽນຟູ໋ຈ້ອງ
(ພາບ: ອິນເຕີແນດ)
ຕາມທ່ານເລຂາທິການໃຫຍ່ ຫງວຽນຟູ໋ຈ້ອງ, ໃນປີຜ່ານມາ, ຄະນະຊີ້ນຳສູນກາງກ່ຽວກັບການປ້ອງກັນ, ຕ້ານການສໍ້ລາດບັງຫຼວງ ໄດ້ສຸມໃສ່ຊີ້ນຳ, ແກ້ໄຂ, ຍົກສູງປະສິດທິຜົນວຽກງານສົມທົບກັນລະຫວ່າງອົງການຕ່າງໆໃນການຕໍ່ສູ້ຕ້ານການສໍ້ລາດບັງຫຼວງ. ຍ້ອນເຫດນັ້ນ, ວຽກງານຄົ້ນພົບ, ແກ້ໄຂບັນດາເຫດການ, ຄະດີສໍ້ລາດບັງຫຼວງໄດ້ຮັບການຍູ້ແຮງ, ປະກອບສ່ວນປັບປຸງຄວາມໄວ້ເນື້ອເຊື່ອໃຈຂອງປະຊາຊົນທີ່ມີຕໍ່ພັກ, ລັດ.
ປັບປຸງລະບົບບັນດາຂໍ້ກຳນົດກ່ຽວກັບການປ້ອງກັນ, ຕ້ານການສໍ້ລາດບັງຫຼວງ
ທ່ານເລຂາທິການໃຫຍ່ ຫງວຽນຟູ໋ຈ້ອງ ຊີ້ແຈ້ງວ່າ, ໃນປີ 2014 ແລະ ໃນຊຸມປີຕໍ່ໆໄປ, ຫວຽດນາມ ຄວນຍູ້ໄວວຽກງານກໍ່ສ້າງ, ປັບປຸງກົນໄກ, ນະໂຍບາຍ, ກົດໝາຍ, ແກ້ໄຂຊ່ອງຫວ່າງໃນການຄຸ້ມຄອງເສດຖະກິດ - ສັງຄົມ, ພິເສດແມ່ນໃນຂົງເຂດຕ່າງໆທີ່ເກີດການສໍ້ລາດບັງຫຼວງງ່າຍ. ທ່ານເລຂາທິການໃຫຍ່ ສະເໜີໃຫ້ສະພາແຫ່ງຊາດ, ລັດຖະບານ ສຸມໃສ່ຊີ້ນຳສືບຕໍ່ການປັບປຸງ, ເພີ່ມເຕີມ ເຮັດໃຫ້ກົດໝາຍ, ກົນໄກ, ນະໂຍບາຍທີ່ກ່ຽວຂ້ອງເຖິງວຽກງານປ້ອງກັນ, ຕ້ານການສໍ້ລາດບັງຫຼວງສົມບູນແບບ, ພິເສດແມ່ນພາຍຫຼັງສະພາແຫ່ງຊາດຮັບຮອງເອົາລັດຖະທຳມະນູນປີ 2013 ແລະ ກົດໝາຍຈຳນວນໜຶ່ງ, ກໍ່ຄືສືບຕໍ່ການຄົ້ນຄ້ວາປັບປຸງຂໍ້ກຳນົດກ່ຽວກັບບັນດາມາດຕະການປ້ອງກັນ, ຕ້ານການສໍ້ລາດບັງຫຼວງທີ່ພວມປະຕິບັດ ແຕ່ປະສິດທິຜົນຍັງຕຳ່. ຕາມທ່ານເລຂາທິການໃຫຍ່ແລ້ວ, ຕ້ອງເດັດດຽວ, ຍືດໝັ້ນການສ້າງກົນໄກສະກັດກັ້ນ, ກົນໄກແກ້ໄຂ, ນາບຂູ່ ເພື່ອບໍ່ໃຫ້ເກີດການສໍ້ລາດບັງຫຼວງ.
ຍູ້ແຮງວຽກງານໂຄສະນາ, ສຶກສາກ່ຽວກັບການປ້ອງກັນ, ຕ້ານການສໍ້ລາດບັງຫຼວງ
ຕາມທ່ານເລຂາທິການໃຫຍ່, ຄວນມີທ່າທີຕຳນິຕິຕຽນຢ່າງເຄັ່ງຄັດສຳລັບການກະທຳສໍ້ລາດບັງຫຼວງ, ສຶກສາຈິດໃຈເປັນກຽດ, ສັດຊື່ບໍລິສຸດ. ຮູ້ລະອາຍ, ເຈັບໃຈເມື່ອສໍ້ລາດບັງຫຼວງ. ມີຄວາມຮັບຮູ້ຢ່າງຖືກຕ້ອງກ່ຽວກັບຄວາມຮັບຜິດຊອບໃນການຄົ້ນພົບ, ແກ້ໄຂບັນດາກໍລະນີສໍ້ລາດບັງຫຼວງໃນຄະນະພັກແຕ່ລະຂັ້ນ, ແຕ່ລະອົງການຈັດຕັ້ງ, ອົງການສຳນັກງານ, ຫົວໜ່ວຍ ແລະ ພັກນັກງານ, ສະມາຊິກພັກແຕ່ລະຄົນ. ມີຄວາມ ຮູ້ຢ່າງຈະແຈ້ງ ແລະ ເຂົ້າໃຈຢ່າງເລິກເຊິ່ງ ກ່ຽວກັບຈຸດປະສົງ, ຄວາມໝາຍ, ເນື້ອໃນບັນດາຂໍ້ກຳນົດຂອງພັກ, ລັດ ໃນວຽກງານປ້ອງກັນ, ຕ້ານການສໍ້ລາດບັງຫຼວງ, ໃນນັ້ນຖືການສະກັດກັ້ນເປັນຕົ້ນຕໍ ແລະ ການຄົ້ນພົບ, ແກ້ໄຂບັນດາການກະທຳສໍ້ລາດບັງຫຼວງ ກໍ່ມີປະໂຫຍດຢ່າງຕັ້ງໜ້າ ເພື່ອຂົ່ມຂູ່, ສະກັດກັ້ນການສໍ້ລາດບັງຫຼວງ.
ຍົກສູງຄວາມສາມາດໃຫ້ພະນັກງານ, ສະມາຊິກພັກໃນວຽກງານປ້ອງກັນ, ຕ້ານການສໍ້ລາດບັງຫຼວງ
ທ່ານເລຂາທິການໃຫຍ່ ຫງຽນຟູ໋ຈ້ອງ ຢືນຢັນຢ່າງຈະແຈ້ງວ່າ, ອົງການພັກ ແລະ ການນຳຕ້ອງມີຄວາມຕັດສິນໃຈດ້ານການເມືອງສູງ, ສຸມໃສ່ຊີ້ນຳນຳພາເປັນປະຈຳ, ສ້າງການສົມທົບກັນຢ່າງແໜ້ນແຟ້ນ, ລະດົມກຳລັງແຮງສັງລວມຂອງລະບົບການເມືອງ ແລະ ທົ່ວສັງຄົມໃນວຽກງານປ້ອງກັນ ແລະ ຕ້ານການສໍ້ລາດບັງຫຼວງ. ທ່ານເລຂາທິການໃຫຍ່ ຫງຽນຟູ໋ຈ້ອງ ເນັ້ນໜັກວ່າ:
”ຄວາມຕັດສິນໃຈດ້ານການເມືອງ ນັ້ນແມ່ນຄຳໝັ້ນສັນຍາເດັດດຽວຕໍ່ສູ້ຕ້ານການສໍ້ລາດບັງຫຼວງ, ເຊິ່ງຕ້ອງສະແດງອອກຜ່ານການກະທຳຢ່າງລະອຽດ ແລະ ເປີດເຜີຍ ເພື່ອໃຫ້ປະຊາຊົນຮູ້, ປະຊາຊົນປະກອບກຳລັງເຫື່ອແຮງ ແລະ ຕິດຕາມກວດກາ. ດ້ານໜຶ່ງ, ຕົນເອງຕ້ອງເປັນແບບຢ່າງປະຕິບັດບັນດາຂໍ້ກຳນົດກ່ຽວກັບຄວາມສັດຊື່ບໍລິສຸດ, ຄວາມເປັນລະບຽບ, ປະຕິບັດການປະຢັດມັດທະຍັດ, ບໍ່ຟຸມເຟືອຍ, ບໍ່ຮູ້ແຕ່ປະໂຫຍດສ່ວນຕົວ, ຕື່ນຕົວປະຕິບັດບັນດາຂໍ້ກຳນົດຂອງພັກ, ກົດໝາຍຂອງລັດ, ມີການພົວພັນໃກ້ຊິດກັບມະຫາຊົນ. ດ້ານອື່ນ, ຕ້ອງມີທ່າທີຈະແຈ້ງ, ເດັດດຽວ, ຍືດໝັ້ນໃນການຕ້ານສໍ້ລາດບັງຫຼວງ, ຄວາມຫຍໍ້ທໍ້, ບໍ່ພຽງແຕ່ດ້ວຍຄຳເວົ້າຊື່ໆ, ໃນໜ້າເຈ້ຍ ຫຼືຮຽກຮ້ອງແບບລວມໆເທົ່ານັ້ນ, ຫາກຕ້ອງເຮັດດ້ວຍວຽກງານລະອຽດ, ແທດຈິງ, ມີປະສິດທິຜົນ. ຄະນະພັກ, ອົງການພັກທຸກຂັ້ນຕ້ອງມີລັກສະນະຕໍ່ສູ້ສູງ, ເປັນເຈົ້າການສະກັດກັ້ນ, ຄົ້ນພົບ ແລະ ແກ້ໄຂບັນດາການກະທຳສໍ້ລາດບັງຫຼວງຢ່າງເຂັ້ມງວດ”.
ການປ້ອງກັນ, ຕ້ານການສໍ້ລາດບັງຫຼວງຕ້ອງມີຈຸດສຸມ
ທ່ານເລຂາທິການໃຫຍ່ ຫງຽນຟູ໋ຈ້ອງ ເນັ້ນໜັກວ່າໃນໄລຍະຈະມາເຖິງຕ້ອງສຸມໃສ່ຊີ້ນຳ, ນຳພາວຽກງານຄົ້ນພົບ, ສືບສວນ, ແກ້ໄຂບັນດາຄະດີສໍ້ລາດບັງຫຼວງໃຫຍ່ຢ່າງເໝາະສົມ, ທັນການ.
”ກ່ອນອື່ນໝົດຕ້ອງຍູ້ໄວຄວາມຄືບໜ້າໃນການແກ້ໄຂບັນດາເຫດ ການ, ຄະດີສໍ້ລາດບັງຫຼວງທີ່ຮ້າຍແຮງ, ສັບສົນຕາມຂໍ້ກຳນົດຂອງກົດ ໝາຍ. ຄວນດຳເນີນຢ່າງມີຈຸດສຸມ, ສຸມໃສ່ແກ້ໄຂບັນດາການສໍ້ລາດບັງຫຼວງທີ່ມີລັກສະນະລວມໝູ່, ມີການຈັດຕັ້ງ. ”
ທ່ານເລຂາທິການໃຫຍ່ ຫງຽນຟູ໋ຈ້ອງ ສະເໜີ ຄະນະພັກ, ທັງລະບົບການເມືອງ ແລະ ທົ່ວສັງຄົມຄວນເພີ່ມທະວີວຽກງານກວດກາ, ຕິດຕາມກວດກາວຽກງານປ້ອງກັນ ແລະ ຕ້ານການສໍ້ລາດບັງຫຼວງກວ່າອີກ; ນຳເນື້ອໃນປ້ອງກັນ ແລະ ຕ້ານການສໍ້ລາດບັງຫຼວງເຂົ້າລາຍການກວດກາ, ຕິດຕາມກວດກາປະຈຳປີ. ປະຕິບັດວຽກງານປ້ອງກັນ ແລະ ຕ້ານການສໍ້ລາດບັງຫຼວງໃຫ້ດີ ຈະເປັນກຳລັງໜູນ, ສ້າງຄວາມໄວ້ເນື້ອເຊື່ອໃຈໃນທົ່ວສັງຄົມ ເພື່ອໃຫ້ຫວຽດນາມ ພັດທະນາຢ່າງໝັ້ນຄົງ.