(vovworld) - ຕາມການຕີລາຄາໃນວາລະປະຊຸມປະຈຳເດີອນ 3 ຂອງລັດຖະບານຊຶ່ງດຳເນີນໄປໃນໄລຍະມໍ່ໆມານີ້, ສະພາບການເສດຖະກິດມະຫາພາກໃນ 3 ເດືອນຕົ້ນປີຂອງ ຫວຽດນາມ ໄດ້ຄ່ອຍໆກັບຄືນສູ່ຄວາມເປັນປົກກະຕິ ແລະ ໄດ້ມີສັນຍານດີພໍສົມຄວນກ່ຽວກັບການຄວບຄຸມໄພເງິນເຟີ້. ເຖິງຢ່າງໃດກໍຕາມ, ຄວາມຈິງພາວະວິໄສ ຍັງຊ້ອນແຝງມີຄວາມສ່ຽງຫລາຍຢ່າງ ສະນັ້ນ ການບຸລິມະສິດຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິຍັງຄົງແມ່ນບັນຫາວາງຕົ້ນຕໍໃນໄລຍະຈະມາເຖິງ.
ໃນປີ 2012, ພິເສດໃນ 6 ເດືອນຕົ້ນປີ, ໂດຍໄດ້ຮັບການຄາດຄະເນຫລ່ວງຫນ້າວ່າ ປີ 2012 ແມ່ນຫນຶ່ງໃນບັນດາປີທີ່ພື້ນຖານເສດຖະກິດ ຫວຽດນາມ ແລະ ໂລກ ປະສົບກັບຄວາມຫຍຸ້ງຍາກທີ່ສຸດ. ເຖິງຢ່າງໃດກໍຕາມ, ໝົດເດືອນ 3, ສະພາບເສດຖະກິດ ຫວຽດນາມ ໄດ້ມີສັນຍານດີພໍສົມຄວນ ເປັນຕົ້ນແມ່ນການຄວບຄຸມໄພເງິນເຟີ້. ເມື່ອທຽບກັບເດືອນກ່ອນ, CPI ໃນເດືອນ 1/2012 ເພີ່ມຂຶ້ນ 1% ແລະ ເດືອນ 2/2012 ເພີ່ມຂຶ້ນ 1,37% ເທົ່າກັບລະດັບຂອງໄລຍະດຽວກັນປີ 2009 ແລະ ແມ່ນລະດັບຕ່ຳສຸດໃນຮອບເວລາ 10 ປີຜ່ານມາ. ໄລ່ສະເພາະໃນເດືອນ 3/2012, CPI ພຽງແຕ່ເພີ່ມຂຶ້ນ 0,16% ຊຶ່ງແມ່ນລະດັບຕ່ຳສຸດໃນຮອບເວລາເກືອບ 2 ປີຜ່ານມາ. ໃນຂະນະນັ້ນ, ການນຳເຂົ້າເກີນດຸນຂອງທັງປະເທດ ປະມານ 300 ລ້ານ USD, ເທົ່າກັບ 1,2% ຍອດວົງເງິນສົ່ງອອກ, ຊຶ່ງແມ່ນລະດັບຕ່ຳກວ່າຫລາຍເມື່ອທຽບກັບໄລຍະດຽວກັນຂອງຊຸມປີມໍ່ໆມານີ້. ເລື່ອງປັບປຸງໂຄງປະກອບຄຸນນະພາບການດຶງດູດທຶນ FDI ນັບທັງແຫລ່ງທຶນ ແລະ ຂົງເຂດດຶງດູດທຶນ FDI ກໍດີພໍສົມຄວນເມື່ອທຽບໃສ່ຊຸມປີກ່ອນ. ນອກນັ້ນ ບັນດາສັນຍານປັບປຸງຄວາມສາມາດການຊຳລະຂອງທະນາຄານ ແລະ ການສະສົມເງິນຕາຕ່າງປະເທດກໍໄດ້ຮັບການຮັບຮູ້. ໃນ 2 ເດືອນຕົ້ນປີ 2012, ຕາມທະນາຄານແຫ່ງລັດແລ້ວ, ການສະສົມເງິນຕາຕ່າງປະເທດໄດ້ເພີ່ມຂຶ້ນ20%,ໃນຂະນະທີ່ອັດຕາແລກປ່ຽນເງິນຕາຕ່າງປະເທດຍັງຄົງເປັນປົກກະຕິ. ບັນດາສັນຍານກ່ຽວກັບການປັບປຸງຄວາມສາມາດການຊຳລະຢູ່ໃນຕະຫລາດທະນາຄານໄດ້ຮັບການສ່ອງແສງຢ່າງເຫັນໄດ້ຊັດຜ່ານການຈຳຫນ່າຍພັນທະບັດຂອງລັດຖະບານໃນ2ເດືອນຕົ້ນປີສຳເລັດຜົນ ແລະ ຈຳນວນພັນທະບັດຂອງລັດຖະບານຊຶ່ງບັນດາຖືກຳມະສິດໄດ້ເພີ່ມຂຶ້ນ10%. ເມື່ອຕອບສຳພາດຕໍ່ນັກຂ່າວວິທະຍຸກະຈາຍສຽງ ຫວຽດນາມ ຫວ່າງແລ້ວນີ້, ທ່ານ Cao Viet Sinhຮອງລັດຖະມົນຕີກະຊວງແຜນການ ແລະ ການລົງທຶນຫວຽດນາມໄດ້ໃຫ້ຂໍ້ສັງເກດວ່າ:
“ພວກຂ້າພະເຈົ້າເຫັນວ່າ ສະພາບເສດຖະກິດມະຫາພາກເລີ່ມເຂົ້າສູ່ຄວາມເປັນປົກກະຕິ. ນັ້ນແມ່ນສິ່ງສຳຄັນທີ່ສຸດ. ພິເສດ ຄວາມໄວ້ເນື້ອເຊື່ອໃຈຂອງປະຊາຊົນຕໍ່ສະກຸນເງິນດົ່ງກໍເພີ່ມຂຶ້ນ. ເຖິງວ່າອັດຕາດອກເບ້ຍເງິນຝາກເລີ່ມຫລຸດລົງແລ້ວ ແຕ່ປະຊາຊົນຍັງຄົງສືບຕໍ່ຝາກເງິນເຂົ້າທະນາຄານ. ຍ້ອນເຫດນັ້ນ ຄວາມສາມາດຊຳລະຂອງບາງທະນາຄານກໍດີຂຶ້ນກວ່າເກົ່າ.”
ຄວາມຈິງໃນຊຸມເດືອນຕົ້ນປີພວມສະແດງໃຫ້ເຫັນວ່າ, ຄວາມສາມາດປະຕິບັດຄາດໝາຍການຄວບຄຸມໄພເງິນເຟີ້ໃນປີ 2012 ຂອງຫວຽດນາມ ຢູ່ໃນລະດັບ 1 ຕົວເລກພວມປະກົດຜົນເປັນຈິງ ຍ້ອນມີບັນດາປັດໄຈຕັ້ງຫນ້າຄື: ສະຕິຄວາມຮັບຮູ້ ແລະ ຄວາມຕັດສິນໃຈດ້ານການເມືອງໃຫມ່ ຈາກຂັ້ນສູງສຸດ, ຄວາມສະເໝີຕົ້ນສະເໝີປາຍນະໂຍບາຍການເງິນ ເງິນຕາຢ່າງມີໄຫວພິບ ແລະ ລະມັດລະວັງ, ຕາມທິດສືບຕໍ່ຮັດແຫນ້ນ, ຫລຸດຜ່ອນປະລິມານ ແລະ ຍົກສູງປະສິດທິຜົນການລົງທຶນຂອງລັດ, ຊຸກຍູ້ການປ່ຽນໃຫມ່ຮູບແບບ ແລະ ກົນໄກພັດທະນາ, ແຫລ່ງສິນຄ້າ ແລະ ຄົນງານອຸດົມສົມບູນ, ຄວາມຂະຫຍັນຂັນເຄື່ອນ ແລະ ກຳລັງສະຕິປັນຍາໃນການແກ້ງ ແຍ້ງຂອງຖັນແຖວນັກທຸລະກິດຢູ່ຕະຫລາດ, ທີ່ຕັ້ງບົດບາດໃນເວທີສາກົນ ແລະ ຄວາມໄວ້ເນື້ອເຊື່ອໃຈຈາກໂລກທີ່ມີຕໍ່ຄວາມສາມາດບົ່ມຊ້ອນຂອງ ຫວຽດນາມ ການພັດທະນາໄລຍະກາງ ແລະ ໄລຍະຍາວ ນັບມື້ນັບໄດ້ຮັບການປັບປຸງ. ບົນພື້ນຖານບັນດາໝາກຜົນທີ່ບັນລຸໄດ້ໃນ 3 ເດືອນຕົ້ນປີ 2012 ນັ້ນ, ບັນດາຜູ້ຊ່ຽວຊານດ້ານເສດຖະກິດຮັບຮູ້ວ່າ ການຈະເລີນເຕີບໂຕເສດຖະກິດຂອງ ຫວຽດນາມ ໃນປີນີ້ ຈະຢູ່ໃນລະດັບ 6 - 6,5%.
ກອງປະຊຸມປະຈຳເດືອນ 3 ຂອງລັດຖະບານ ຫວຽດນາມ
ພາບ: internet
|
ເຖິງວ່າ ປະຈຸບັນພື້ນຖານເສດຖະກິດ ຫວຽດນາມ ຍັງຄົງປະສົບກັບຄວາມຫຍຸ້ງຍາກ ເພາະວ່າ ບັນດາວິສາຫະກິດອຸດສາຫະກຳຖືກຮັດແຄບສົ້ນອອກ ແລະ ສິນຄ້າຄ້າງສາງຍັງຫລາຍຢູ່, ບາງວິສາຫະກິດຂະຫນາດກາງ ແລະ ນ້ອຍ ຕ້ອງຢຸດຕິການຜະລິດ, ຢຸດຕິການເຄື່ອນໄຫວ. ນອກນັ້ນ ບັນດາຄວາມສ່ຽງອາດຈະເກິດຂຶ້ນໃນເດືອນຈະມາເຖິງ ຍ້ອນກຳລັງດັນຈາກການເພີ່ມຂຶ້ນຂອງລາຄາສິນຄ້າປະເພດຕ່າງໆ ແລະ ການເຫນັງຕີງລາຄາຂອງສິນຄ້າປະເພດຕ່າງໆ ຢູ່ໃນໂລກຈະສົ່ງຜົນກະທົບເຖິງ ຫວຽດນາມ. ເພາະສະນັ້ນ ລັດຖະບານ ຫວຽດນາມ ຈະສືບຕໍ່ຕິດຕາມເພື່ອປັບປຸງນະໂຍບາຍໃຫ້ເໝາະສົມ, ພິເສດແມ່ນປະຕິບັດການສ້າງອົງປະກອບການລົງທຶນຂອງລັດ, ເພີ່ມທະວີການຄຸ້ມຄອງການລົງທຶນໂດຍນຳໃຊ້ແຫລ່ງທຶນຈາກງົບປະມານແຫ່ງລັດ ແລະ ພັນທະບັດ ເພື່ອສືບຕໍ່ປະຕິບັດການຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ. ກ່ຽວກັບສິ່ງນີ້ ທ່ານ Cao Viet Sinh ຮອງລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ ໃຫ້ຮູ້ວ່າ: ລັດຖະບານໄດ້ມີຄຳສັ່ງເລກທີ 1792 ກ່ຽວກັບການສ້າງໂຄງປະກອບບັນຊີລາຍຊຶ່ບັນດາໂຄງການລົງທຶນຂອງລັດຄືນໃຫມ່ໃນປີ 2012 ນີ້.
“ແຕ່ດົນນານແລ້ວ, ພວກເຮົາບໍ່ທັນເອົາໃຈໃສ່ຢ່າງເໝາະສົມເຖິງຄວາມຄືບຫນ້າໃນການປະຕິບັດໂຄງການໃຫ້ສຳເລັດ, ສະນັ້ນ ເມື່ອໂຄງການຖືກແກ່ຍາວ ປະສິດທິຜົນການລົງທຶນກໍຖືກຊັກຊ້າໄປນຳ. ປີນີ້ ພວກເຮົາສະເຫນີວ່າ: ໂຄງການໃດປະຕິບັດສຳເລັດຖືກຕ້ອງກັບການກຳນົດເວລາ 3 ປີໃນໝວດ C, 5 ປີໃນໝວດ B ຈຶ່ງໄດ້ຮັບຫນັງສືອະນຸຍາດໃຫ້ປະຕິບັດ. ໂຄງການໃດບໍ່ສາມາດປະຕິບັດສຳເລັດໄດ້ຈະຖືກໂຈະໄວ້. ກ່ອນນີ້ ການກຳນົດຂອງລັດ ແມ່ນແບ່ງຂັ້ນໃຫ້ແກ່ປະທານຄະນະກຳມະການປະຊາຊົນແຂວງ ແລະ ລັດຖະມົນຕີບັນດາກະຊວງອະນຸມັດການລົງທຶນ. ແຕ່ຄັ້ງນີ້ ເມ່ືອອະນຸມັດການລົງທຶນ, ຕ້ອງຂໍຄຳເຫັນຈາກບັນດາກະຊວງ, ຂະແຫນງການ ພິຈາລະນາຄວາມສາມາດຫນູນຊ່ວຍດ້ານທຶນຮອນຂອງສູນກາງໄດ້ເທົ່າໃດ. ຖ້າຫາກ ສູນກາງພຽງຫນູນຊ່ວຍໄດ້ 20 - 30% ຍອດຈຳນວນເງິນລົງທຶນຂອງໂຄງການ ສ່ວນຍັງເຫລືອແມ່ນທ້ອງຖິ່ນຕ້ອງຮັບຜິດຊອບ. ຖ້າຫາກທ້ອງຖິ່ນໃດບໍ່ຮັບຜິດຊອບໄດ້ ແນ່ນອນວ່າໂຄງການນັ້ນບໍ່ໄດ້ຮັບການຜັນຂະຫຍາຍອີກ.”
ເພື່ອສືບຕໍ່ປະຕິບັດຄາດໝາຍຄວບຄຸມໄພເງິນເຟີ້, ຕາມຄຳຮຽກຮ້ອງຕ້ອງການຂອງລັດຖະບານ, ໃນໄລຍະຈະມາເຖິງ ການປະຕິບັດວິວັດການຫລຸດຜ່ອນອັດຕາດອກເບ້ຍຢູ່ບັນດາທະນາຄານ ຈຳເປັນຕ້ອງຮັບປະກັນຜົນປະໂຫຍດທຸກດ້ານ, ເປັນຕົ້ນແມ່ນຕ້ອງຮັບປະກັນຫລຸດຜ່ອນອັດຕາດອກເບ້ຍໃຫ້ກູ້ຢືມ ຈາກນັ້ນ ຊ່ວຍໃຫ້ບັນດາວິສາຫະກິດບັນເທົາຄວາມຫຍຸ້ງຍາກໃນການສຳພັດກັບແຫລ່ງທຶນຂອງ ທະນາຄານ. ບັນດາຜູ້ຊ່ຽວຊານເສດຖະກິດກໍໄດ້ໃຫ້ຂໍ້ສັງເກດວ່າ ເລື່ອງຮັບຮູ້ອັດຕາດອກເບ້ຍໃຫ້ກູ້ຢືມຢູ່ລະດັບ 15 - 16% ແລະ ບໍລິຫານຢ່າງເໝາະສົມ, ມີຫລັກການເພື່ອກ້າວໄປເຖິງການລົບລ້າງອັດຕາດອກເບ້ຍເພດານແມ່ນວຽກງານທີ່ຕ້ອງເຮັດໃນການເຄື່ອນໄຫວຂອງທະນາຄານ, ຕອບສະຫນອງຄວາມຮຽກຮ້ອງຕ້ອງການໃນການຄວບຄຸມໄພເງິນເຟີ້, ຫນູນຊ່ວຍວິສາຫະກິດຜ່ານຜ່າຄວາມຫຍຸ້ງຍາກ, ຮັກສາກຳລັງຫນູນໃນການເຕີບໂຕ, ສ້າງໂຄງປະກອບຄືນໃຫມ່ໄປຄຽງຄູ່ກັບການຮັກສາເສດຖະກິດມະຫາພາກເປັນປົກກະຕິ ແລະ ຮັບປະກັນຊີວິດສັງຄົມໃນປີນີ້.
ນັກຂ່າວ ທູຮວາ