(vovworld) - ເລື່ອງເງິນຢວນຂອງຈີນ ຖືກຫຼຸດລາຄາຢ່າງລຽນຕິດໃນ 3 ວັນ ດ້ວຍລະດັບສະຖິຕິ, ນັບແຕ່ຈີນ ສ້າງລະບົບແລກປ່ຽນເງິນຕາທັນສະໄໝເມື່ອປີ 1994 ມາຮອດປະຈຸບັນນັ້ນ, ບໍ່ຕ່າງຫຍັງກັບແຜ່ນດິນໄຫວໃນຕະຫຼາດການເງິນພາກພື້ນ ແລະ ໂລກ. ເປັນຫຍັງຈີນ ຈຶ່ງຫຼຸດລາຄາເງິນຢວນຢ່າງລຽນຕິດ ແລະ ການກະທຳນີ້ຈະນຳມາເຊິ່ງຜົນປະໂຫຍດ ກໍ່ຄືສົ່ງຜົນສະທ້ອນຄືແນວໃດໃຫ້ແກ່ປະເທດຈີນ? ນີ້ແມ່ນສິ່ງທີ່ບັນດານັກໄຈ້ແຍກ, ວົງການນັກສັງເກດດ້ານການເງິນພວມຕິດຕາມ ແລະ ໄຈ້ແຍກຢ່າງໃກ້ຊິດໃນຊຸມມື້ຜ່ານມາ.
![ເບື້ອງຫຼັງຂອງການຫຼຸດລາຄາເງິນຢວນ - ảnh 1](https://photo-cms-vovworld.zadn.vn/w730/uploaded/vovworld/bcgmbuiq/2015_08_18/tien.jpeg)
(ພາບ,google.com.vn)
ຕາມທຳມະດາ, ອັດຕາແລກປ່ຽນເງິນຕາຕ້ອງເປັນປົກກະຕິ ເພື່ອປັບປຸງຄວາມເຊື່ອໝັ້ນໃຫ້ບັນດານັກລົງທຶນຕ່າງປະເທດ ກ່ຽວກັບສະພາບແວດລ້ອມແຫ່ງການລົງທຶນ, ຈຳກັດຄວາມສ່ຽງໃຫ້ບັນດາວິສາຫະກິດຂາອອກຂາເຂົ້າ, ພ້ອມທັງຊ່ວຍປະຊາຊົນມີຄວາມເຊື່ອໝັ້ນຕໍ່ເງິນຢວນ ແລະ ຮັກສາສະຖຽນລະຖາບດ້ານເສດຖະກິດມະຫາພາກ, ແຕ່ຈີນ ພັດຕົກລົງຫຼຸດອັດຕາແລກປ່ຽນເງິນຢວນດ້ວຍລະດັບສະຖິຕິໃນ 20 ປີມານີ້. ພາຍໃນ 3 ວັນທ້າຍສັບປະດາ, ເງິນຢວນຖືກຫຼຸດລາຄາເຖິງ 4,6%. ຕະຫຼາດການເງິນທົ່ວໂລກກໍ່ຖືກຜົນສະທ້ອນຢ່າງຮ້າຍແຮງ.
ແກ້ໄຂສະພາບຊຸດໂຊມເສດຖະກິດ, ຊຸກຍູ້ການສົ່ງອອກ
ໃນປະຫວັດແຫ່ງເງິນຕາສາກົນ, ເມື່ອເສດຖະກິດຖືກຢຸດໄວ້ ແລະ ຊຸດໂຊມ ປະເທດຕ່າງໆຈະຕ້ອງເລືອກເຟັ້ນວິທີແກ້ໄຂ, ດ້ວຍເຄື່ອງມືແມ່ນອັດຕາແລກປ່ຽນເງິນຕາ. ສຳລັບຈີນ ກໍ່ເຊັ່ນດຽວກັນ. ຕາມການສະຖິຕິແລ້ວ, ພື້ນຖານເສດຖະກິດຂອງຈີນ ພວມເຕີບໂຕໃນລະດັບຊັກຊ້າທີ່ສຸດ ນັບແຕ່ 6 ປີມານີ້. ການສົ່ງອອກຂອງຈີນ ໃນເດືອນ 7 ໄດ້ຫຼຸດລົງເຖິງ 8,3% ເມື່ອທຽບໃສ່ໄລຍະດຽວກັນຂອງປີ 2014. ການຜະລິດເຕີບໂຕຕຳ່ກວ່າລະດັບພະຍາກອນ, ລະດັບສິນເຊື່ອກໍ່ມີເຕີບໂຕຊ້າໄວ້. ຍ້ອນເຫດນັ້ນ, ນັກຊ່ຽວຊານຫຼາຍຄົນຖືວ່າ ເພື່ອໜູນຊ່ວຍບັນດານັກສົ່ງອອກພາຍໃນປະເທດ, ເພີ່ມລັກສະນະແກ່ງແຍ້ງຂອງສິນຄ້າ, ຈີນ ໄດ້ເລືອກໄລຍະນີ້ເພື່ອຫຼຸດລາຄາເງິນຢວນລົງ. ແຕ່ບັນດານັກໄຈ້ແຍກສ່ວນຫຼາຍພັດຖືວ່າ, ນອກຈາກເຫດໜູນຊ່ວຍການສົ່ງອອກແລ້ວ, ການຫຼຸດລາຄາເງິນຢວນຍັງແມ່ນການກະທຳທີ່ມີຈຸດປະສົງຂອງຈີນເພື່ອແນໃສ່ຍາດເອົາທ່າໄດ້ປຽບໃນການແກ່ງແຍ້ງ. ສິ່ງດັ່ງກ່າວໄດ້ເປັນການກະທົບເຖິງຕະຫຼາດເງິນຕາໂລກ. ເຮັດໃຫ້ສະກຸນເງິນຂອງບັນດາປະເທດອົດສະຕາລີ, ສເກົາຫຼີ, ອິນເດຍ ແລະ ສິງຄະໂປກໍ່ຖືກຫຼຸດລາຄາໃນລະດັບກວ່າ 1%.
ຄວາມມານະພະຍາຍາມຫັນເງິນຢວນເປັນສະກຸນເງິນສາກົນ
ການຫຼຸດລາຄາເງິນຢວນ ເພື່ອແນໃສ່ໜູນຊ່ວຍໃຫ້ແກ່ການສົ່ງອອກ ກໍ່ຄືໜູນຊ່ວຍໃຫ້ແກ່ການເຕີບໂຕ. ແຕ່ສິ່ງທີ່ເລິກເຊິ່ງກວ່ານັ້ນແມ່ນ, ມັນນອນໃນວິວັດການຫັນເງິນຢວນເປັນສະກຸນເງິນສາກົນ. ນັບແຕ່ດົນນານມາແລ້ວ, ຈີນ ຍາມໃດກໍ່ຊອກຫາວິທີ ເພື່ອນຳເງິນຢວນເຂົ້າຮ່ວມກຸ່ມເງິນຕາທີ່ມີສິດຖອນທຶນພິເສດ (SDR) ແລະ ແມ່ນໜຶ່ງໃນບັນດາເງິນຕາຕ່າງປະເທດ ພ້ອມກັບ USD, ເອີໂຣ, ເງິນເຢັນ (ຍີ່ປຸ່ນ) ກາຍເປັນສະກຸນເງິນສະສົມຂອງໂລກ. ແຕ່ຄວາມຈິງແລ້ວ, ຄວາມມານະພະຍາຍາມຫັນເງິນຢວນເປັນສະກຸນເງິນສາກົນຂອງປັກກິງ ພວມປະສົບກັບຄວາມຫຍຸ້ງຍາກຫຼາຍຢ່າງ. ເຖິງວ່າຈີນ ໄດ້ຊື້ພັນທະບັດຂອງກອງທຶນເງິນຕາສາກົນ (IMF) 50 ຕື້ USD ດ້ວຍເງິນຢວນແຕ່ເດືອນ 9/2009 ແລ້ວກໍ່ຕາມ, ແຕ່ບັນດາຂໍ້ຕົກລົງແລກປ່ຽນທຸລະກຳດ້ວຍເງິນຢວນລະຫວ່າງຈີນ ກັບບາງປະເທດແມ່ນໜ້ອຍສຸດ. ປະເທດຕ່າງໆບໍ່ອາດນຳໃຊ້ເງິນຢວນເພື່ອນຳເຂົ້າສິນຄ້າຈາກປະເທດທີ 3, ຫຼືຊຳລະໃຫ້ທະນາຄານຕ່າງປະເທດ ກໍ່ຄືໃຫ້ຜູ້ລົງທຶນພັນທະບັດຕ່າງປະເທດໄດ້. ມາຮອດປະຈຸບັນ, ພັນທະບັດເປັນເງິນຢວນພຽງແຕ່ຂາຍໄດ້ຢູ່ປະເທດດຽວແມ່ນຈີນ, ຜ່ານລະບົບທະນາຄານຈີນ ຫຼືອົງການການເງິນຫຼາຍຝ່າຍຈຳນວນໜຶ່ງເທົ່ານັ້ນ.
ຍ້ອນເຫດນັ້ນເລື່ອງຫຼຸດລາຄາງິນຢວນຄັ້ງນີ້ຂອງປັກກິງ ເພື່ອແນໃສ່ພິສູດໃຫ້ເຫັນລັກສະນະໄຫວພິບຂອງກົນໄກອັດຕາແລກປ່ຽນເງິນຕາ, ເຊິ່ງແມ່ນໜຶ່ງໃນບັນດາເງື່ອນໄຂ ເພື່ອໃຫ້ຈີນ ເຊື່ອມໂຍງເຂົ້າຕະຫຼາດການເງິນທົ່ວໂລກ.
ຜົນຢ້ອນຫຼັງທີ່ກົງກັນຂ້າມ
ຄຽງຂ້າງບັນດາຜົນປະໂຫຍດໃນຕໍ່ໜ້າ, ວົງການນັກໄຈ້ແຍກກໍ່ຖືວ່າ, ຈີນ ເອງກໍ່ຕ້ອງຮັບຜົນສະທ້ອນຢ່າງໃຫຍ່ຫຼວງຈາກການບັບອັດຕາແລກປ່ຽນເງິນຕາຄັ້ງນີ້. ຄາດວ່າເມື່ອອັດຕາແລກປ່ຽນເງິນຕາຂອງຈີນ ຫຼຸດລົງ 1%, ຈະຊ່ວຍໃຫ້ການສົ່ງອອກຂອງຈີນ ເພີ່ມຂື້ນ, ແຕ່ກໍ່ມີທຶນປະມານ 40 ຕື້ USD ຖືກຖອນອອກຈາກຕະຫຼາດຈີນ. ການຜັນແປຂອງອັດຕາແລກປ່ຽນເງິນຕາ ໄດ້ສົ່ງຜົນສະທ້ອນຫຼາຍເຖິງຂົງເຂດເຕັກໂນໂລຢີຂໍ້ມູນຂ່າວສານ, ອະສັງຫະລິມຊັບ ແລະ ການເງິນ.
ເຫັນໄດ້ຜົນຢ້ອນຫຼັງທີ່ກົງກັນຂ້າມ, ພາຍຫຼັງຫຼຸດລາຄາເງິນຢວນລົງລະດັບສະຖິຕິແລ້ວ, ຈີນ ໄດ້ຄ່ອຍເພີ່ມລາຄາເງິນຢວນຂຶ້ນ. ຍ້ອນເຫດນັ້ນ, ບັນດານັກໄຈ້ແຍກໄດ້ຖືກວ່າ ນີ້ແມ່ນການກະທຳທີ່ມີຈຸດປະສົງຂອງປັກກິງ. ດ້ານໜຶ່ງແມ່ນເພື່ອແນໃສ່ຊຸກຍູ້ພື້ນຖານເສດຖະກິດ, ຮັກສາລະດັບເຕີບໂຕ ແລະ ວຽກເຮັດງານທຳ, ດ້ານໜຶ່ງແມ່ນຍົກສູງສິດອຳນາດໃຫ້ເງິນຢວນ, ຊ່ວຍປະເທດນີ້ປະຕິບັດບັນດາຄາດໝາຍການທູດ ແລະ ປັບປຸງບົດບາດໃຈກາງຂອງເຂົາເຈົ້າໃນພື້ນຖານເສດຖະກິດທົ່ວໂລກຢ່າງສະບາຍ.