(vovworld) -
ໂດຍສືບຕໍ່ການພົວພັນຕ່າງປະເທດທີ່ສຳຄັນຂອງຫວຽດນາມ ນັບແຕ່ຕົ້ນປີມາຮອດປະຈຸບັນ, ການຢ້ຽມຢາມ ສເກົາຫຼີ ຢ່າງເປັນທາງການໃນລະຫວ່າງວັນທີ 21 – 24/7 ແລະ ການຢ້ຽມຢາມມຽນມາ ຢ່າງເປັນທາງການແຕ່ວັນທີ 24 – 26/7 ຂອງປະທານສະພາແຫ່ງຊາດ ຫງວຽນຊິງຮຸ່ງ ເພື່ອແນໃສ່ສືບຕໍ່ຜັນຂະຫຍາຍການເຄື່ອນໄຫວທາງການທູດຂອງຫວຽດນາມ, ພິເສດແມ່ນການທູດລັດຖະສະພາຂອງສະພາແຫ່ງຊາດຫວຽດນາມ. ການຢ້ຽມຢາມເພື່ອແນໃສ່ເພີ່ມທະວີຄວາມເຂົ້າອົກເຂົ້າໃຈ, ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ຊຸກຍູ້ການພົວພັນມິດຕະພາບ ແລະ ການຮ່ວມມືລະຫວ່າງຫວຽດນາມ - ສເກົາຫຼີ ແລະ ມຽນມາ, ພ້ອມທັງສ້າງກົນໄກຮ່ວມມືລະຫວ່າງສະພາແຫ່ງຊາດຫວຽດນາມ ກັບສະພາແຫ່ງຊາດສອງປະເທດໃນໄລຍະຈະມາເຖິງຕາມທິດໝັ້ນຄົງ, ແທດຈິງ ແລະ ມີປະສິດທິຜົນ.
ສຳລັບ ສເກົາຫຼີ, ເຊິ່ງແມ່ນປະເທດທຳອິດໃນການໄປປະຕິບັດງານຄັ້ງນີ້ຂອງທ່ານປະທານສະພາແຫ່ງຊາດ ຫງວຽນຊິງຮຸ່ງ, ການຢ້ຽມຢາມດຳເນີນໄປໃນສະຖານະການທີ່ການພົວພັນຮ່ວມມືມິດຕະພາບລະຫວ່າງຫວຽດນາມ - ສເກົາຫຼີ ພວມພັດທະນາຢ່າງຈົບງາມ. ຫວຽດນາມ ແລະ ສເກົາຫຼີ ເຄີຍແລກປ່ຽນຄະນະຜູ້ແທນຂັ້ນສູງນຳກັນ, ຮັກສາກົນໄກສົນທະນາເປັນປະຈຳ, ສ້າງຄວາມເຂົ້າອົກເຂົ້າໃຈ ແລະ ໄວ້ເນືອເຊື່ອໃຈເຊິ່ງກັນ ແລະ ກັນ, ພິເສດ, ປີ 2012, ຫວຽດນາມ ແລະ ສເກົາຫຼີ ໄດ້ຈັດຕັ້ງຫຼາຍເຫດການສະເຫຼີມສະຫຼອງ 20 ປີ ແຫ່ງວັນສ້າງຕັ້ງການພົວພັນທາງການທູດຢູ່ແຕ່ລະປະເທດ, ປະກອບສ່ວນຫັນການພົວພັນ “ຄູ່ຮ່ວມມື ຮ່ວມມືຍຸດທະສາດ” ເປັນລະອຽດ. ທ່ານເອກອັກຄະລັດຖະທູດຫວຽດນາມ ປະຈຳ ສເກົາຫຼີ ເຈິ່ນຈ້ອງຕ່ວານ ໄດ້ຢືນຢັນວ່າ:
“ບໍ່ມີເວລາໃດທີ່ການພົວພັນລະຫວ່າງຫວຽດນາມ - ສເກົາຫຼີ ໄດ້ຮັບການພັດທະນາອັນດີງາມຄືໃນປະຈຸບັນ. ນັບແຕ່ປີ 1992, ສອງປະເທດໄດ້ສ້າງຕັ້ງການພົວພັນທາງການທູດ, ຫຼັງຈາກນັ້ນການພົວພັນໄດ້ຮັບການພັດທະນາຢ່າງວ່ອງໄວ. ຮອດເດືອນ 8/2001 ສອງປະເທດໄດ້ຍົກການພົວພັນຂຶ້ນສູ່ລະດັບຄູ່ຮ່ວມມື ຮ່ວມມືຮອບດ້ານ ແລະ ຮອດເດືອນ 10/2009 ຍົກເປັນການພົວພັນຄູ່ຮ່ວມມື ຮ່ວມມືຍຸດທະສາດ ແລະ ນັບແຕ່ນັ້ນມາຮອດປະຈຸບັນ, ການພົວພັນລະຫວ່າງສອງປະເທດໄດ້ຮັບການພັດທະນາຢ່າງແຮງ. ກ່ຽວກັບການພົວພັນດ້ານການເມືອງ, ໄດ້ມີຄວາມໄວ້ເນື້ອເຊື່ອໃຈສູງສຸດລະຫວ່າງການນຳສອງປະເທດ”.
ທ່ານປະທານສະພາແຫ່ງຊາດ ຫງວຽນຊິງຮຸ່ງ ໃນການຢ້ຽມຢາມ ສເກົາຫຼີ ຄັ້ງນີ້, ນອກຈາກການເຈລະຈາກັບປະທານສະພາແຫ່ງຊາດ ສເກົາຫຼີ Kang Chang Hee, ທ່ານປະທານສະພາແຫ່ງຊາດ ຫງວຽນຊິງຮຸ່ງ ຍັງມີໂອກາດພົບປະກັບບັນດາການນຳຂັ້ນສູງ ສເກົາຫຼີ ແລະ ແລກປ່ຽນບັນດາມາດຕະການຊຸກຍູ້ການພົວພັນຮ່ວມມື ຄູ່ຮ່ວມມືຍຸດທະສາດຫວຽດນາມ - ສເກົາຫຼີ ໃຫ້ພັດທະນາຢ່າງແຮງກວ່າໃນໄລຍະຈະມາເຖິງ.
ຖັດຈາກ ສເກົາຫຼີ, ມຽນມາ ແມ່ນປະເທດທີສອງທີ່ທ່ານປະທານສະພາແຫ່ງຊາດມາຢ້ຽມຢາມຕາມຄຳເຊີນຂອງທ່ານປະທານສະພາແຫ່ງຊາດມຽນມາ Khin Aung Myint. ໃນຊຸມປີຜ່ານມາ, ສອງປະເທດໄດ້ຕັ້ງໜ້າປັບປຸງ ແລະ ຊຸກຍູ້ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫຼາຍດ້ານ. ການນຳຂັ້ນສູງສອງປະເທດໄດ້ແລກປ່ຽນໄປມາຢ້ຽມຢາມເຊິ່ງກັນ ແລະ ກັນ. ພິເສດ, ແມ່ນການຢ້ຽມຢາມມຽນມາ ຂອງທ່ານນາຍົກລັດຖະມົນຕີ ຫງວຽນເຕິ໋ນຢຸງ (4/2010), ການຢ້ຽມຢາມຫວຽດນາມ ຂອງປະທານາທິບໍດີ Thein Sein ເມື່ອເດືອນ 3/2012 ແລະ ຂອງປະທານສະພາແຫ່ງຊາດມຽນມາ Khin Aung Myint ເມື່ອເດືອນ 6/2012… ໄດ້ນຳການພົວພັນລະຫວ່າງສອງປະເທດຂື້ນສູ່ລະດັບສູງໃໝ່. ທ່ານຮອງລັດຖະມົນຕີການຕ່າງປະເທດຫວຽດນາມ ຟ້າມກວາງວິງ, ຖືວ່າ:
“ໃນຊຸມປີຜ່ານມາ, ຫວຽດນາມ ແລະ ມຽນມາ ໄດ້ສ້າງຂອບເຂດການຮ່ວມມື ແລະ ພື້ນຖານການຮ່ວມມືທາງດ້ານເສດຖະກິດ, ການຄ້າ, ການເມືອງ, ການຕ່າງປະເທດ, ການປ້ອງກັນຊາດ ປ້ອງກັນຄວາມສະຫງົບນຳກັນ. ນີ້ແມ່ນໂອກາດເພື່ອໃຫ້ພວກເຮົາເສີມຂະຫຍາຍຂອບເຂດການຮ່ວມມືນັ້ນກວ່າອີກ”.
ໃນການຢ້ຽມຢາມມຽນມາ ຄັ້ງນີ້, ທ່ານປະທານສະພາແຫ່ງຊາດ Khin Aung Myint ຈະເຊີນທ່ານປະທານສະພາແຫ່ງຊາດ ຫງວຽນຊິງຮຸ່ງ ກ່າວຄວາມເຫັນຕໍ່ສະພາແຫ່ງຊາດ. ສິ່ງດັ່ງກ່າວສະແດງໃຫ້ເຫັນຄວາມນັບຖືຂອງມຽນມາທີ່ມີຕໍ່ທ່ານປະທານສະພາແຫ່ງຊາດຫວຽດນາມ ເວົ້າສະເພາະ ແລະ ປະເທດຫວຽດນາມ ເວົ້າລວມ ກໍ່ຄືຄວາມຕັດສິນໃຈພັດທະນາສາຍພົວພັນມິດຕະພາບທີ່ເປັນມູນເຊື້ອ, ການຮ່ວມມືລະຫວ່າງສອງປະເທດ ແລະ ສອງສະພາແຫ່ງຊາດ.
ການຢ້ຽມຢາມ ສເກົາຫຼີ ແລະ ມຽນມາ ຂອງທ່ານປະທານສະພາແຫ່ງຊາດ ຫງວຽນຊິງຮຸ່ງ ຄັ້ງນີ້ສືບຕໍ່ຢັ້ງຢືນນະໂຍບາຍສະເໝີຕົ້ນສະເໝີປາຍຂອງຫວຽດນາມ ທີ່ຖືການພົວພັນມິດຕະພາບ ແລະ ການຮ່ວມມືຫຼາຍດ້ານກັບສອງປະເທດຄູ່ຮ່ວມມືທີ່ສຳຄັນໃນພາກພື້ນອາຊີຕາເວັນອອກເປັນສຳຄັນ, ພ້ອມທັງສ້າງກົນໄກຮ່ວມມືຢ່າງມີປະສິດທິຜົນກວ່າອີກລະຫວ່າງສະພາແຫ່ງຊາດຫວຽດນາມ ກັບສະພາແຫ່ງຊາດ ສເກົາຫຼີ ແລະ ມຽນມາ ໃນໄລຍະຈະມາເຖິງ. ການຢ້ຽມຢາມກໍ່ແມ່ນໂອກາດເພື່ອເພີ່ມທະວີການສະໜັບສະໜູນສອງປະເທດນີ້ທີ່ມີຕໍ່ເລື່ອງຫວຽດນາມ ເປັນເຈົ້າພາບຈັດຕັ້ງກອງປະຊຸມໃຫຍ່ລັດຖະສະພາລະຫວ່າງຊາດສາກົນ (IPU) ຄັ້ງທີ 132 ໃນປີ 2015 ແລະ ປະກອບສ່ວນຍົກສູງທີ່ຕັ້ງຂອງຫວຽດນາມ ໃນເວທີສາກົນ.