ເພື່ອໃຫ້ເພື່ອນມິດສາກົນ, ຊາວຫວຽດນາມ ອາໄສຢູ່ຕ່າງປະເທດເຂົ້າໃຈຢ່າງຖືກຕ້ອງກ່ຽວກັບຫວຽດນາມ, ຍິ່ງກ່ວາເວລາໃດໝົດ, ວຽກງານໂຄສະນາກັບຕ່າງປະເທດຕ້ອງໄດ້ຮັບການຜັນຂະຫຍາຍຢ່າງເປັນເຈົ້າການ ແລະ ຂ້ຽວຂາດກ່ວາອີກ. ໜຶ່ງໃນບັນດາມາດຕະການນັ້ນແມ່ນເພີ່ມທະວີການຮ່ວມມືກັບສາກົນໃນຂົງເຂດໂຄສະນາ. ນີ້ກໍ່ແມ່ນເນື້ອໃນໜຶ່ງໃນວາລະປະຊຸມຂອງຄະນະຊີ້ນຳວຽກງານໂຄສະນາກັບຕ່າງປະເທດ ໂດຍຄະນະໂຄສະນາສຶກສາສູນກາງເປັນປະທານ ຊື່ງຈັດຂຶ້ນໃນວັນທີ 9/4 ຢູ່ຮ່າໂນ້ຍ.
ຄະນະນັກຂ່າວຈີນເຮັດວຽກກັບການນຳໜັງສືພິມ
ກອງທັບປະຊາຊົນຫວຽດນາມ
(ພາບ:qdnd.vn)
ໃນວິວັດທະນະການແຫ່ງການສ້າງສາ ແລະ ປົກປັກຮັກສາປະເທດຊາດຂອງປະຊາຊົນຫວຽດນາມ, ບັນດາອິດທິກຳລັງທີ່ເປັນປໍລະປັກໄດ້ ແລະ ພວມປະຕິບັດ “ການຜັນແປ່ສັນຕິພາບ“ ບໍ່ພຽງແຕ່ເພື່ອແນໃສ່ກໍ່ຄວາມແບ່ງແຍກກຸ່ມກ້ອນມະຫາສາມັກຄີທົ່ວປວງຊົນທັງຊາດເທົ່ານັ້ນ, ຫາກຍັງເພື່ອແນໃສ່ໃສ່ຮ້າຍປາຍສີ ແລະ ຫລຸດຜ່ອນອິດທິພົນຊື່ສຽງຂອງຫວຽດນາມ ຕໍ່ໜ້າເພື່ອນມິດສາກົນອີກດ້ວຍ. ເພື່ອຊ່ວຍໃຫ້ເພື່ອນມິດສາກົນ, ປະຊາຊົນໂລກ, ຊາວຫວຽດນາມ ອາໄສຢູ່ຕ່າງປະເທດເຂົ້າໃຈຢ່າງຖືກຕ້ອງ ແລະ ຄົບຖ້ວນກ່ຽວກັບຫວຽດນາມ, ໃນໄລຍະຜ່ານມາ, ໜຶ່ງໃນບັນດາມາດຕະການສຳຄັນແມ່ນການເປີດກ້ວາງການຮ່ວມມືກັບສາກົນໃນຂົງເຂດສື່ສານ. ທ່ານເຈິ່ນດັກເລີ້ຍ, ຮອງຫົວໜ້າຄະນະພົວພັນກັບຕ່າງປະເທດສູນກາງພັກ ໃຫ້ຮູ້ວ່າ:
“ບົດຮຽນໃນໄລຍະຜ່ານມາສະແດງໃຫ້ເຫັນວ່າ, ພາຍຫຼັງມາຫວຽດນາມ, ບັນດານັກຂ່າວຕ່າງປະເທດ ມີຄວາມຮັບຮູ້ຄົບຖ້ວນກ່ວາ, ຈາກນັ້ນ ເຂົາເຈົ້າຈຶ່ງມີວິໃສທັດຖືກຕ້ອງກ່ວາກ່ຽວກັບສະພາບການຢູ່ຫວຽດນາມ, ບົນພື້ນຖານນັ້ນ, ເຂົາເຈົ້າຈະສ່ອງແສງກ່ຽວກັບສະພາບຢູ່ຫວຽດນາມຢ່າງພາວະວິໄສ“
ຄະນະນັກຂ່າວລາວເຮັດວຽກກັບໜັງສືພິມ
ເສດຖະກິດ ແລະ ຕົວເມືອງ
(ພາບ:ktdt.com.vn)
ຕາມການສະຖິຕິແລ້ວ, ສະເລ່ຍແຕ່ລະປີ, ກະຊວງຖະແຫຼງຂ່າວ ແລະ ສື່ສານຫວຽດນາມ ໄດ້ເຊື້ອເຊີນປະມານ 6 ຄະນະນັກຂ່າວສາກົນມາຫວຽດນາມ ເພື່ອຂຽນບົດ ແລະ ຕ້ອນຮັບແຕ່ 20-30 ຄະນະນັກຂ່າວສາກົນມາຫວຽດນາມ ຕາມລາຍການເຮັດວຽກສະເພາະ. ການເຄື່ອນໄຫວນີ້ມີຄວາມໝາຍສຳຄັນທີ່ສຸດໃນການເພີ່ມທະວີຄວາມເຂົ້າອົກເຂົ້າໃຈໃຫ້ເພື່ອນມິດສາກົນກ່ຽວກັບປະເທດຊາດ, ຊາວຫວຽດນາມ ແລະ ສະພາບຕົວຈິງຂອງຫວຽດນາມ. ທ່ານຫງວນດຶກເລີ້ຍ, ຜູ້ອຳນວຍການໃຫ່ຍສຳນັກຂ່າວສານຫວຽດນາມ ໃຫ້ຮູ້ວ່າ:
“ຍົກຕົວຢ່າງຄື: ພາຍຫຼັງທີ່ຄະນະນັກຂ່າວຂອງສື່ເອເລກໂຕນິກ ແຈວນຈຽວ ຂອງຈີນ ມາຊອກຮູ້ສະພາບຕົວຈິງຢູ່ຫວຽດນາມ ແລະ ແລກປ່ຽນກັບບັນດາອົງການສື່ມວນຊົນຫວຽດນາມ ແລ້ວກໍ່ເຫັນວ່າ, ບັນດາຂໍ້ມູນຂ່າວສານທີ່ມີລັກສະນະປໍລະປັກກັບຫວຽດນາມ ໃນສື່ເອເລກໂຕນິກນີ້ໄດ້ຫລຸດລົງຫຼາຍ“
ຕົວຈິງໄດ້ພິສູດໃຫ້ເຫັນປະສິດທິຜົນຂອງວິທີໂຄສະນາກັບຕ່າງປະເທດນີ້. ໃນເດືອນພຶດສະພາປີ 2011, ບັນດາພາຫະນະສື່ມວນຊົນສາກົນ ໄດ້ໃຫ້ຫຼາຍຂໍ້ມູນຂ່າວທີ່ຜິດພາດກ່ຽວກັບເຫດການທີ່ຖືວ່າ “ການຈະລາຈົນ“ ເກີດຂຶ້ນຢູ່ເມືອງແຍ, ດ້ຽນບຽນ ອັນໄດ້ກໍ່ຄວາມສົງໃສໃນປະຊາຄົມຊາວຫວຽດນາມ ອາໄສຢູ່ຕ່າງປະເທດ. ຫວຽດນາມ ໄດ້ເປັນເຈົ້າການເຊີນນັກຂ່າວຂອງບັນດາສຳນັກຂ່າວສານສາກົນມາດ້ຽນບຽນ ເພື່ອຊອກ ຮູ້ສະພາບການຕົວຈິງໃນເຫດການດັ່ງກ່າວ. ຜ່ານການເຮັດວຽກ ແລະ ລົງພຶດຕິກຳຕົວຈິງ, ບັນດານັກຂ່າວໄດ້ເຂົ້າໃຈຕື່ມອີກກ່ຽວກັບນະໂຍບາຍສະເໝີຕົ້ນສະເໝີປາຍຂອງຫວຽດນາມ ນັ້ນແມ່ນຮັບປະກັນສິດ ແລະ ຜົນປະໂຫຍດຂອງປະຊາຊົນ, ສິດເສລີພາບໃນການເຫຼື້ອມໃສສາສະໜາ ແລະ ຄວາມສະເໝີພາບຂອງປະຊາຄົມບັນດາເຜົ່າຫວຽດນາມ ພ້ອມທັງເດັດດ່ຽວຮັກສາຄວາມເຂັ້ມງວດຂອງກົດໝາຍ.
ໄປຄຽງຄູ່ກັບການເພີ່ມທະວີການໂຄສະນາກັບຕ່າງປະເທດ ຜ່ານການຮ່ວມມືສາກົນໃນຂອບເຂດສື່ສານ, ການພົວພັນຕ່າງປະເທດປະຊາຊົນກໍ່ແມ່ນຊ່ອງໄດ້ຮັບບຸລິມະສິດ. ດ້ວຍບົດບາດແມ່ນຂົວຕໍ່ຜັນຂະຫຍາຍການເຄື່ອນໄຫວດ້ານການພົວພັນຕ່າງປະເທດປະຊາຊົນ, ທ່ານຫວູ໋ຊວນຮົ່ງ, ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ ຢືນຢັນວ່າ:
“ພາລະກຳຂອງພວກຂ້າພະເຈົ້າສືບຕໍ່ແມ່ນເຮັດແນວໃດໃຫ້ປະຊາຊົນໂລກເຂົ້າໃຈກ່ຽວກັບຫວຽດນາມ ກ່ວາ. ເຮັດແນວໃດເພື່ອແນະນຳວັດທະນະທຳ, ມູນເຊື້ອ, ສິ່ງທີ່ດີຂອງຫວຽດນາມ ແລະ ທັງຄວາມຫຍຸ້ງຍາກຂອງຫວຽດນມ ເພື່ອໃຫ້ເພື່ອນມິດເຂົ້າໃຈພວກເຮົາ, ບົນພື້ນຖານນັ້ນເຂົາເຈົ້າຈະແບ່ງປັນ, ສະໜັບສະໜູນຫວຽດນາມ ໃນພາລະກິດຫັນປະເທດຊາດເປັນອຸດສາຫະກຳ ແລະ ທັນສະໄໝ“.
ການໂຄສະນາຂ່າວຢ່າງຈະແຈ້ງ ແມ່ນວິທີປະຕິບັດທີ່ມີປະສິດທິຜົນໃນການຕໍ່ສູ້ຫາງສຽງ, ຍາດແຍ່ງການສະໜັບສະໜູນ ແລະ ຄວາມເຫັນດີເຫັນພ້ອມຈາກປະຊາຊົນໂລກ ທີ່ມີຕໍ່ພາລະກິດເປັນທຳຂອງຫວຽດນາມ. ເພີ່ມທະວີ, ຍູ້ແຮງການໂຄສະນາກັບຕ່າງປະເທດ ຈະເຮັດໃຫ້ບັນດາອິດທິກຳລັງທີ່ເປັນປໍລະປັກບໍ່ສາມາດຕ້ານທຳລາຍ, ແບ່ງແຍກກຸ່ມກ້ອນມະຫາສາມັກຄີທົ່ວປວງຊົນທັງຊາດຫວຽດນາມ ໄດ້. ນີ້ຈະແມ່ນວຽກງານຍາວນານ, ຢ່າງຕໍ່ເນື່ອງ ແລະ ທົນທານໜຽວແໜ້ນຊື່ງຫວຽດນາມ ພວມຕັດສິນໃຈປະຕິບັດ./.