(vovworld) - ສານປະຊາຊົນນະຄອນ ໂຮ່ຈິມິນ ຫາກໍຕັດສິນລົງໂທດບາງບຸກຄົນ ໄດ້ສ້າງ blog ດ້ວຍໂທດຕ່າງໆຄື: ໂຄສະນາ ຕ້ານລັດສັງຄົມນິຍົມ, ຕາມ ມາດຕາ 88 ປະມວນກົດໝາຍອາຍາ. ກ່ອນຫນ້ານັ້ນ, ອົງການປ້ອງກັນຄວາມສະຫງົບໄດ້ພົບເຫັນຫນ້າເວັບຈຳນວນຫນຶ່ງມີການກະທຳໂຄສະນາຍຸແຍ່, ເສກສັນປັ້ນແຕ່ງແຜນນະໂຍບາຍ, ນະໂຍບາຍຕ່າງໆຂອງພັກ, ລັດ, ໃສ່ຮ້າຍປ້າຍສີ, ເສກສັນປັ້ນແຕ່ງຂໍ້ມູນຂ່າວສານສຳລັບບັນດາການນຳພັກ, ລັດ ຫວຽດນາມ. ບັນດາຂໍ້ມູນເສກສັນປັ້ນແຕ່ງໃນຫນ້າເວັບນັ້ນໄດ້ກໍ່ຄວາມອັນຕະລາຍ, ດັ່ງນັ້ນ ຕ້ອງເພີ່ມທະວີການຄຸ້ມຄອງຂໍ້ມູນຂ່າວສານທາງເຄືອຂ່າຍອິນເຕີແນັດກວ່າອີກ ເພື່ອຮັບປະກັນລັດຖະທຳມະນູນ, ກົດໝາຍ ເພື່ອການພັດທະນາຂອງປະເທດ ຫວຽດນາມ.
ຄືດັ່ງໄດ້ໃຫ້ຂ່າວໄປແລ້ວ, ສານພິພາກສາ bloger ຈຳນວນຫນຶ່ງທີ່ໄດ້ລະເມີດມາດຕາ 88 ຂອງປະມວນກົດໝາຍອາຍາ ຫາກໍດຳເນີນໄປໃນອາທິດຜ່ານມາຢູ່ ນະຄອນ ໂຮ່ຈິມີນ. ກ່ອນຫນ້ານັ້ນ, ວັນທີ 12/9, ຫ້ອງວ່າການລັດຖະບານໄດ້ແຈ້ງຄຳເຫັນຂອງນາຍົກລັດຖະມົນຕີ Nguyen Tan Dung ຊີ້ນຳໃຫ້ບັນດາອົງການທີ່ມີພາລະຫນ້າທີ່ສືບສວນ, ແກ້ໄຂລົງໂທດບາງຫນ້າເວັບເອເລັກໂຕນິກ (blog, ເຄືອຂ່າຍສັງຄົມ) ທີ່ໄດ້ໃຫ້ຂໍ້ມູນຂ່າວສານມີເນື້ອໃນເສັກສັນປັ້ນແຕ່ງ, ບິດເບືອນຄວາມຈິງ ເພື່ອໃສ່ຮ້າຍປ້າຍສີກົງຈັກການນຳຂອງປະເທດຊາດ, ຍຸແຍ່ການຕ້ານພັກ ແລະ ລັດ ຫວຽດນາມ, ສ້າງຄວາມລະແວງສົງໃສ ແລະ ກໍ່ຫາງສຽງບໍ່ດີໃນສັງຄົມ. ນີ້ແມ່ນກົນອຸບາຍໂຫດຮ້າຍຂອງບັນດາອິດທິກຳລັງເປັນປໍລະປັກ ເພື່ອຕ້ານທຳລາຍ ຫວຽດນາມ ຄືດັ່ງຂໍ້ສັງເກດຂອງທ່ານ Nguyen Bac Son ລັດຖະມົນຕີກະຊວງຖະແຫລງຂ່າວ ແລະ ສື່ສານ ຫວຽດນາມ.
“ ບັນດາອິດທິກຳລັງທີ່ເປັນປໍລະປັກໄດ້ສວຍໃຊ້ ອິນເຕີແນັດ ເພື່ອໂຄສະນາ, ຕ້ານທຳລາຍ ຫວຽດນາມ ໃນຫລາຍແນວຮົບ, ຫລາຍຂົງເຂດ, ໃນນັ້ນນັບທັງການເມືອງ, ເສດຖະກິດ ແລະ ແນວຄິດ. ພວກເຂົາໄດ້ໃຊ້ທຸກກົນອຸບາຍເພື່ອຈຸດປະສົງໃສ່ຮ້າຍປ້າຍສີ, ບິດເບື່ອນຄວາມຈິງ, ຢາກແບ່ງແຍກພາຍໃນ, ຍຸແຍ່ ທຳລາຍບົດບາດນຳພາຂອງການນຳພັກ, ລັດ, ເສັກສັນປັ້ນແຕ່ງປະຫວັດສາດ, ວັດທະນະທຳຂອງຊາດ, ເສກສັນປັ້ນແຕ່ງແນວທາງ, ແຜນນະໂຍບາຍຂອງພັກ ແລະ ລັດ. ອາດຈະເວົ້າໄດ້ວ່າ ນີ້ແມ່ນກົນອຸບາຍສວຍໃຊ້ກິດຈະການກໍ່ສ້າງ, ປັບປຸງພັກຂອງພວກເຮົາໃນປະຈຸບັນ ເພື່ອກໍຄວາມຂັດແຍ່ງພາຍໃນພັກ, ໂຄສະນາຍຸແຍ່ ເຮັດໃຫ້ປະຊາຊົນບໍ່ເຊື່ອໝັ້ນຕໍ່ພັກ, ສະກັດກັ້ນຈຸດປະສົງອັນດີງາມຂອງມະຕິສູນກາງພັກຄັ້ງທີ 4 ກ່ຽວກັບການກໍ່ສ້າງ ປັບປຸງພັກ.”
ພາບປະກອບ: internet
|
ພາຍຫລັງຫ້ອງວ່າການລັດຖະບານ ເຜີຍແຜ່ຄຳເຫັນຊີ້ນຳຂອງນາຍົກລັດຖະມົນຕີ ກ່ຽວກັບການສະກັດກັ້ນ ຂໍ້ມູນຂ່າວສານທີ່ເສກສັນປັ້ນແຕ່ງ ທາງ ອິນເຕີແນັດ, ໃນຫນ້າເວັບສັງຄົມ, blog ຈຳນວນຫນຶ່ງ ພັດປະກົດມີຂໍ້ມູນຂ່າວສານທີ່ຖືວ່າ: ການຂຽນ, ວິຈານ ທາງອິນເຕີແນັດ ແມ່ນສິດເສລີໃນການປາກເວົ້າ, ສິດເສລີທາງສື່ສານ”. ການຄຸ້ມຄອງອິນເຕີແນັດ ແມ່ນການລະເມີດຄວາມເສລີໃນການປາກເວົ້າ ແລະ ຄວາມເສລີດ້ານສື່ມວນຊົນ. ກ່ຽວກັບການເປີດສານພິພາກສາແກ້ໄຂລົງໂທດ ບັນດາ bloger, ອົງການຈັດຕັ້ງຕ່າງປະເທດຈຳນວນຫນຶ່ງມີຄວາມວິຕົກກັງວົນຕໍ່ສະພາບສິດເສລີໃນການປາກເວົ້າ ແລະ ສິດທິມະນຸດຂອງ ຫວຽດນາມ. ເຖິງຢ່າງໃດກໍຕາມ, ຈຳເປັນຕ້ອງຢືນຢັນວ່າ ບັນດາຄວາມວິຕົກກັງວົນດັ່ງກ່າວແມ່ນບໍ່ມີພື້ນຖານດ້ານວິທະຍາສາດ. ຢູ່ ຫວຽດນາມ ຫລືຢູ່ຫລາຍປະເທດອື່ນໃນໂລກ, ເລື່ອງອອກຂໍ້ມູນຂ່າວສານທາງອິນເຕີແນດ ລ້ວນແຕ່ຕ້ອງປະຕິບັດຕາມຂໍ້ກຳນົດ, ຫລັກການລະອຽດ, ໃນນັ້ນ ເຖິງວ່າຢູ່ປະເທດພວມພັດທະນາຫລືບັນດາປະເທດພັດທະນາ, ບັນດາຂໍ້ມູນຂ່າວສານອອກທາງອິນເຕີແນັດ ຕ້ອງຮັບປະກັນລັກສະນະພາວະວິໄສ, ຊັດເຈນ. ບັນດາຂໍ້ມູນຂ່າວສານເສກສັນປັ້ນແຕ່ງ, ໃສ່ຮ້າຍປ້າຍສີສ່ວນບຸກຄົນ, ອົງການຈັດຕັ້ງ ລ້ວນແຕ່ແມ່ນລະເມີດກົດໝາຍ ແລະ ຜູ້ລະເມີດຕ້ອງຮັບຜິດຊອບຕໍ່ກົດໝາຍ. ເລື່ອງເພີ່ມທະວີການສືບສວນ, ແກ້ໄຂບັນດາຫນ້າເວັບສັງຄົມຕາມການຊີ້ນຳຂອງນາຍົກລັດຖະມົນຕີ ຫລື ເລື່ອງສານພິພາກສາຕັດສິນລົງໂທດບັນດາ bloger ແມ່ນນອນໃນວິວັດການເພີ່ມທະວີການຄຸ້ມຄອງຂໍ້ມູນຂ່າວສານທາງອິນເຕີແນັດ ຕາມການກຳນົດຂອງລັດຖະທຳມະນູນ, ກົດໝາຍ, ຮັບປະກັນໃຫ້ປະຊາຊົນທຸກຄົນໄດ້ຮັບການປະຕິບັດບັນດາສິດຂອງຕົນໃນກອບກົດໝາຍຢ່າງພຽງພໍ. ກ່ຽວກັບບັນຫານີ້, ທ່ານ Nguyen Bac Son ລັດຖະມົນຕີກະຊວງຖະແຫລງຂ່າວ ແລະ ສື່ສານ ຫວຽດນາມ ຊີ້ແຈງວ່າ:
“ກະຊວງຖະແຫລງຂ່າວ ແລະ ສື່ສານ ຫວຽດນາມ ໄດ້ສ້າງແຜນຮ່າງປັບປຸງ, ເພີ່ມເຕີມການຄຸ້ມຄອງ ແລະ ນຳໃຊ້ບັນດາຂໍ້ມູນຂ່າວສານທາງອິນເຕີແນັດ. ໃນໄລຍະຜ່ານມາ, ກະຊວງຖະແຫລງຂ່າວ ແລະ ສື່ສານ ຫວຽດນາມກໍໄດ້ປະຕິບັດຫລາຍມາດຕະການເພື່ອຄຸ້ມຄອງ ແລະ ແກ້ໄຂຄວາມຜິດພາດໃນການອອກຂ່າວທາງອິນເຕີແນັດຕາມທິດ ຕັກເຕືອນ, ຕຳນິ , ປັບໄຫມການກະທຳຜິດດ້ານບໍລິຫານ, ຫລືຖອນລະຫັດອິນເຕີແນັດ, ຫນັງສືອະນຸຍາດຄືນ. ຖ້າລະເມີດກົດໝາຍຂອງລັດ ສົ່ງເຖິງບັນດາອົງການປົກປ້ອງກົດໝາຍເພື່ອແກ້ໄຂຕາມທິດຄວນ.”
ຢູ່ບັນດາປະເທດພັດທະນາ ອຳນາດການປົກຄອງປະເທດເຫຼົ່ານີ້ກໍວາງອອກບັນດາມາດຕາລະອຽດເພື່ອຄຸ້ມຄອງຂໍ້ມູນຂ່າວສານທາງອິນເຕີແນັດ ແລະ ໄດ້ມີຫລາຍຄົນ, ອົງການຈັດຕັ້ງລະເມີດຖຶກປັບໄຫມ. ອີງຕາມລະບອບການເມືອງ ແລະ ເງືອ່ນໄຂສັງຄົມຂອງແຕ່ລະປະເທດ ຈະມີກຳນົດການຄຸ້ມຄອງ
ຂໍ້ມູນຂ່າວສານທາງອິນເຕີແນດທີ່ ແຕກຕ່າງກັນ, ແຕ່ຫລັກການລວມແມ່ນບໍ່ຮັບຮູ້ການເສກສັນປັ້ນແຕ່ງ, ໃສ່ຮ້າຍປ້າຍສີ, ລະເມີດສິດ, ຜົນປະໂຫຍດອັນຊອບທຳຂອງບຸກຄົນ, ອົງການຈັດຕັ້ງ ແລະ ສູງກວ່າແມ່ນລະເມີດຄວາມສະຫງົບປອດໄພແຫ່ງຊາດ. ສະນັ້ນ ເລື່ອງ ລັດຫວຽດນາມ ວາງອອກບັນດາຂໍ້ກຳນົດຄຸ້ມຄອງຂໍ້ມູນຂ່າວສານທາງອິນເຕີແນັດ ກໍຄືການປັບໃຫມລົງໂທດສ່ວນບຸກຄົນ, ອົງການຈັດຕັ້ງຈຳນວນຫນຶ່ງທີ່ລະເມີດກົດໝາຍ ແມ່ນສອດຄອ່ງກັບພຶດຕິກຳລວມ, ສອດຄ່ອງກັບຂໍ້ກຳນົດຂອງກົດໝາຍສາກົນ ແລະ ສິດທິມະນຸດ, ໃນນັ້ນມີສົນທິສັນຍາສາກົນ ກ່ຽວກັບສິດພົນລະເຮືອນ, ການເມືອງ.
Thu Hoa