ວັນທີ 7/11, ທ່ານນາຍົກລັດຖະມົນຕີສະຫະພັນລັດເຊຍ Dmitry Medvedev ໄດ້ເລີ່ມຕົ້ນການເຄື່ອນໄຫວຕ່າງໆໃນການຢ້ຽມຢາມຫວຽດນາມ ຢ່າງເປັນທາງການຕາມຄຳເຊີນຂອງທ່ານນາຍົກລັດຖະມົນຕີ ຫວຽດນາມ Nguyen Tan Dung. ນີ້ແມ່ນເຫດການການເມືອງສຳຄັນສຳລັບສອງປະເທດ ຊື່ງສະແດງໃຫ້ເຫັນການພົວພັນສອງຝ່າຍລະຫວ່າງຫວຽດນາມ-ສະຫະພັນລັດເຊຍ ໄດ້ຮັບການພັດທະນາຢ່າງບໍ່ຢຸດຢັ້ງກໍ່ຄືຄວາມຕັດສິນໃຈເພີ່ມທະວີການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ-ລັດເຊຍ ຂອງການນຳສອງປະເທດ. ຕໍ່ໄປແມ່ນບົດຂຽນຂອງນັກຂ່າວວິທະຍຸກະຈາຍສຽງຫວຽດນາມ ທີ່ມີຫົວຂໍ້ວ່າ: ເພີ່ມທະວີການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ-ລັດເຊຍ ຢ່າງບໍ່ຢຸດຢັ້ງ
ທ່ານ Dmitry Medvedev ແລະ ທ່ານ Truong Tan Sang
(ພາບ:24h.com.vn)
ການຢ້ຽມຢາມຫວຽດນາມ ຂອງທ່ານນາຍົກລັດຖະມົນຕີສະຫະພັນລັດເຊຍ Dmitry Medvedev ໄດ້ດຳເນີນໄປບໍ່ດົນພາຍຫຼັງການຢ້ຽມຢາມສະຫະພັນລັດເຊຍ ຢ່າງເປັນທາງການຂອງທ່ານປະທານປະເທດຫວຽດນາມ Truong Tan Sang ເມື່ອເດືອນ 7/2012, ກໍ່ແມ່ນໂອກາດສອງປະເທດລົງນາມໃນຖະແຫຼງການຮ່ວມກ່ຽວກັບການເພີ່ມທະວີການພົວພັນຄູ່ຮ່ວມມືຍຸດທະສາດຮອບດ້ານກ່ວາອີກ. ສະນັ້ນ, ການຢ້ຽມຢາມຫວຽດນາມ ຄັ້ງນີ້ຂອງການນຳລັດຖະບານລັດເຊຍ ຄັ້ງນີ້ຖືກຖືວ່າ ແມ່ນປະກົດທຳອິດຂອງການປະຕິບັດເອກະສານສຳຄັນສະບັບນີ້. ຕອບສຳພາດຕໍ່ນັກຂ່າວຫວຽດນາມ ກ່ອນການໄປຢ້ຽມຢາມ, ທ່ານນາຍົກ ລັດຖະມົນຕີສະຫະພັນລັດເຊຍ Dmitry Medvedev ໄດ້ຢືນຢັນວ່າ:
“ຂ້າພະເຈົ້າຍັງມີອາລົມຈິດຄວາມຮັກແພງອັນດີງາມ ແລະ ສະໜິດ ສະໜົມກັບປະຊາຊົນຫວຽດນາມ. ໃນຕົວຈິງແລ້ວ, ນີ້ແມ່ນການຢ້ຽມຢາມຫວຽດນາມ ຄັ້ງທີ 3 ຂອງຂ້າພະເຈົ້າ ແລະ ສຳລັບຂ້າພະເຈົ້າແລ້ວ, ຄວາມຮູ້ສຶກອັນດີງາມນັ້ນນັບມື້ນັບເພີ່ມຂຶ້ນ. ຂ້າພະເຈົ້າເຫັນວ່າ ຫວຽດນາມ ມີການປ່ຽນແປງຢ່າງແຮງໃນ 10 ປີມານີ້. ຂ້າພະເຈົ້າເຊື່ອໝັ້ນວ່າ ການຢ້ຽມຢາມຄັ້ງນີ້ຈະມີຜົນປະໂຫຍດໃຫ້ແກ່ການພົວພັນຂອງພວກເຮົາ“
(ພາບປະກອບ:baocongthuong.com.vn)
ທ່ານນາຍົກລັດຖະມົນຕີສະຫະພັນລັດເຊຍ Dmitry Medvedevໃຫ້ຮູ້ວ່າ, ທ່ານ ແລະ ບັນດາການນຳຫວຽດນາມ ປຶກສາຫາລືບັນດາບັນຫາເພື່ອແນໃສ່ເພີ່ມທະວີການພົວພັນອັນເປັນມູນເຊື້ອ ແລະ ຄູ່ຮ່ວມມືຍຸດທະສາດຮອບດ້ານສອງຝ່າຍ, ກ່ອນອື່ນໝົດແມ່ນຖືການປຶກສາຫາລືບັນຫາເສດຖະກິດເປັນສຳຄັນ. ສິ່ງດັ່ງກ່າວອີງບົນພື້ນຖານການພົວພັນດ້ານເສດຖະກິດ-ການຄ້າລັດເຊຍ ແລະ ຫວຽດນາມ ພວມພັດທະນາຢ່າງແຮງ. ໃນ 9 ເດືອນຂອງປີ 2012, ວົງເງິນການຄ້າສອງຝ່າຍບັນລຸ 1,77 ຕື້ໂດລາສະຫະລັດ ແລະ ຄາດວ່າຕົວເລກນີ້ຈະບັນລຸ 3 ຕື້ໂດລາສະຫະລັດໃນທ້າຍປີນີ້. ໃນຂົງເຂດການລົງທຶນ, ໄລ່ຮອດເດືອນ 8/2012, ສະຫະພັນລັດເຊຍມີກ່ວາ 80 ໂຄງການລົງທຶນໂດຍກົງເຂົ້າຫວຽດນາມ ດ້ວຍຍອດຈຳນວນທຶນຈົດທະບຽນເກືອບ 950 ລ້ານໂດລາສະຫະລັດ. ໃນໄລຍະທີ່ຈະມາເຖິງ, ໜ້າທີ່ຂອງສອງປະເທດແມ່ນຈະເພີ່ມທະວີປະສິດທິຜົນແຫ່ງການຮ່ວມມືດ້ານເສດຖະກິດ-ການຄ້າສອງຝ່າຍກ່ວາອີກເພື່ອສົມກັບການພົວພັນຄູ່ຮ່ວມມື ແລະ ມິດຕະພາບອັນດີງາມລະຫ່ວາງຫວຽດນາມ-ລັດເຊຍ.
ໃນການສ້າງໂຄງປະກອບການຮ່ວມມືລະຫວ່າງຫວຽດນາມ-ລັດເຊຍ, ສອງປະເທດກໍ່ຖືການຊຸກຍູ້ບັນດາຂົງເຂດຮ່ວມມືທີ່ເຄີຍມີພື້ນຖານໝັ້ນຄົງແຕ່ຫຼາຍປີກ່ອນເປັນສຳຄັນຄື: ພະລັງງານ, ນ້ຳມັນອາຍແກັດດ້ວຍບັນດາການເຄືອ່ນໄຫວທີ່ມີປະສິດທິຜົນຂອງບັນດາບໍລິສັດຮ່ວມທຸລະກິດຫວຽດນາມ-ລັດເຊຍ ໃນໄລຍະຜ່ານມາ. ການຮ່ວມມືດ້ານວິທະຍາສາດ-ເຕັກໂນໂລຊີ, ການສຶກສາ-ບຳລຸງສ້າງໄດ້ຮັບການສ້າງຂຶ້ນນັບແຕ່ສະໄໝໂຊວຽດເກົ່າ, ປະຈຸບັນສອງຝ່າຍຍັງຖືວ່າແມ່ນທຶນທີ່ມີຄ່າໃນການພົວພັນສອງຝ່າຍ ແລະ ຢືນຢັນຄວາມຈຳເປັນຕ້ອງເປີດກ້ວາງການຮ່ວມມື. ຄວາມສາມາດບົ່ມຊ້ອນ: ແງ່ຫວັງອັນດີງາມຂອງການພົວພັນສອງຝ່າຍຫວຽດນາມ-ລັດເຊຍ ທັງໝົດນັ້ນ ຈະມີໂອກາດພັດທະນາຕື່ມອີກໃນການຢ້ຽມຢາມຫວຽດນາມ ຢ່າງເປັນທາງການຂອງທ່ານນາຍົກລັດຖະມົນຕີສະຫະພັນລັດເຊຍ. ທ່ານ Buianov ປະທານສະມາຄົມມິດຕະພາບລັດເຊຍ-ຫວຽດນາມ ໃຫ້ຮູ້ວ່າ:
“ດ້ວຍການມາຢ້ຽມຢາມຫວຽດນາມ ຂອງທ່ານນາຍົກລັດຖະມົນຕີສະຫະພັນລັດເຊຍ Dmitry Medvedev, ພວກຂ້າພະເຈົ້າເຊື່ອໝັ້ນວ່າ, ສິ່ງທີ່ສອງຝ່າຍໄດ້ຮັບຮອງເອົາໃນການຢ້ຽມຢາມສະຫະພັນລັດເຊຍ ຢ່າງເປັນທາງການຂອງທ່ານປະທານປະເທດຫວຽດນາມ Truong Tan Sang ຈະເປັນເອກະພາບກັນ ແລະ ຜັນຂະຫຍາຍ. ສັນຍາຮ່ວມມືລະຫວ່າງສອງສະມາຄົມມິດຕະພາບຫວຽດນາມ-ລັດເຊຍ ແລະ ລັດເຊຍຫວຽດນາມ ໄດ້ລົງນາມເປັນເທື່ອທຳອິດໃນໂອກາດທ່ານ Dmitry Medvedev ເປັນປະທານາທິບໍດີລັດເຊຍ ມາຢ້ຽມຢາມຫວຽດນາມ ກໍ່ພວມປະກອບສ່ວນຊຸກຍູ້ການພົວພັນໃນຫຼາຍດ້ານລະຫວ່າງສອງປະເທດ “
ເຖິງວ່າຈະດຳເນີນໃນເວລາສັ້ນໆກໍ່ຕາມ, ແຕ່ການມາຢ້ຽມຢາມຄັ້ງນີ້ຂອງທ່ານນາຍົກລັດຖະມົນຕີສະຫະພັນລັດເຊຍ Dmitry Medvedev ສືບຕໍ່ເປັນຂີດໝາຍສຳຄັນໃນການພັດທະນາການພົວພັນສອງຝ່າຍ ກໍ່ຄືປັບປຸງ, ເພີ່ມທະວີການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ-ລັດເຊຍ ໃຫ້ດີຍິ່ງກ່ວາອີກ.