(vovworld) - ວັນທີ 22/5, ທ່ານເລຂາທິການໃຫຍ່ສະຫະປະຊາຊາດ (ສປຊ) Ban Ki Moon ເລີ່ມຕົ້ນການຢ້ຽມຢາມຫວຽດນາມ ຢ່າງເປັນທາງການ. ໃນສະພາບການທີ່ການພົວພັນລະຫວ່າງຫວຽດນາມ - ສປຊ ພວມພັດທະນາຢ່າງຈົບງາມ. ການຢ້ຽມຢາມຫວຽດນາມ ໃນໄລຍະ 2 ວັນຂອງຜູ້ນຳ ສປຊ ຈະປະກອບສ່ວນເພີ່ມທະວີການພົວພັນຮ່ວມມືຫຼາຍດ້ານລະຫວ່າງຫວຽດນາມ - ສປຊ, ກໍ່ຄືຊຸກຍູ້ບັນດາບັນຫາເຊິ່ງທັງສອງຝ່າຍຕ່າງມີຄວາມສົນໃຈ.
T
ທ່ານເລຂາທິການໃຫຍ່ສະຫະປະຊາຊາດ (ສປຊ) Ban Ki Moon ແລະ ພັນລະຍາ
ໃນການຢ້ຽມຢາມຫວຽດນາມ ປີ 2010 (ພາບ: Reuters)
ສປຊ ໄດ້ຮັບການສ້າງຕັ້ງຂຶ້ນຢ່າງເປັນທາງການໃນວັນທີ 24/10/1945. ປະຈຸບັນ, ສປຊ ແມ່ນອົງການທີ່ມີອິດທິພົນຊື່ສຽງໃນທົ່ວໂລກ ດ້ວຍການເຂົ້າຮ່ວມຂອງບັນດາປະເທດ, ເຂດແຜ່ນດິນທີ່ມີອະທິປະໄຕ, ເອກະລາດເກືອບທັງໝົດໃນໂລກ. ສປຊ ເປີດກວ້າງບົດບາດ ແລະ ການເຄື່ອນໄຫວຂອງຕົນໃນທຸກດ້ານ, ມານະພະຍາຍາມເຄື່ອນໄຫວ, ປະຕິບັດບັນດາຄະຕິທິດ, ຄາດໝາຍທີ່ໄດ້ວງອອກ, ຜ່ານນັ້ນມີການກະທົບຢ່າງຕັ້ງໜ້າ ແລະ ໃຫຍ່ຫຼວງເຖິງຊີວິດສາກົນ ແລະ ແຕ່ລະປະເທດ.
ພື້ນຖານທີ່ຂາດບໍ່ໄດ້ເພື່ອໂລກແຫ່ງສັນຕິພາບ
ໃນເບື້ອງຕົ້ນແຫ່ງການສ້າງຕັ້ງ, ສປຊ ມີ 51 ປະເທດສະມາຊິກ, ແຕ່ປະຈຸບັນໄດ້ມີເຖິງ 193 ປະເທດສະມາຊິກ ແລະ ກາຍເປັນລະບົບຮອບດ້ານ, ດ້ວຍ 6 ອົງການຕົ້ນຕໍ, ຫຼາຍອົງການສຳຮອງ, 20 ອົງການວິຊາການ ແລະ 5 ຄະນະກຳມະການເສດຖະກິດ - ສັງຄົມຢູ່ພາກພື້ນຕ່າງໆ, ພ້ອມກັບກອງທຶນນັບສິບແຫ່ງທີ່ເຄື່ອນໄຫວໃນທຸກຂົງເຂດ, ນັບແຕ່ການແກ້ໄຂ ແລະ ສະກັດກັ້ນການປະທະກັນ, ຫຼຸດຜ່ອນກຳລັງອາວຸດ ແລະ ທະຫານ ກໍ່ຄືບໍ່ເຜີຍແຜ່ກຳລັງອາວຸດ. ຕ້ານກໍ່ການຮ້າຍ, ປົກປ້ອງຄົນຫຼົບໄພ, ປົກປັກຮັກສາສິ່ງແວດລ້ອມ ແລະ ພັດທະນາຢ່າງໝັ້ນຄົງ, ຊຸກຍູ້ປະຊາທິປະໄຕ, ສິດທິມະນຸດ, ຄວາມສະເໝີພາບລະຫວ່າງຍິງຊາຍ, ພັດທະນາເສດຖະກິດ, ສັງຄົມ, ຮັບມືກັບການປ່ຽນແປງຂອງດິນຟ້າອາກາດ… ດ້ວຍບັນດາຜົນງານສຳຄັນທີ່ບັນລຸໄດ້ນັ້ນ, ສປຊ ໄດ້ຮັບການຮັບຮອງຈາກປະຊາຄົມສາກົນວ່າ ແມ່ນອົງການທົ່ວໂລກທີ່ມີບົດບາດສຳຄັນທີ່ສຸດໃນຊີວິດດ້ານການເມືອງສາກົນ, ທັງແມ່ນພື້ນຖານທີ່ຂາດບໍ່ໄດ້ເພື່ອໂລກແຫ່ງສັນຕິພາບ, ວັດທະນາຖາວອນ ແລະ ຍຸຕິທຳກວ່າ.
ໃນຜົນງານລວມ, ແມ່ນມີຄວາມມານະພະຍາຍາມຫຼາຍຢ່າງ ກໍ່ຄືການປະກອບສ່ວນຫຼາຍຢ່າງຂອງທ່ານເລຂາທິການໃຫຍ່ Ban Ki Moon ໃນການຊຸກຍູ້ບົດບາດຂອງ ສປຊ ດ້ວຍສາມເສົາຄຳ້ ແມ່ນສັນຕິພາບ - ຄວາມໝັ້ນຄົງ, ການພັດທະນາ ແລະ ຮັບປະກັນສິດທິມະນຸດ. ທ່ານມີຂໍ້ລິເລີ່ມ ແລະ ການເຄື່ອນໄຫວຫຼາຍຢ່າງ ເພື່ອແນໃສ່ແກ້ໄຂການປະທະກັນໃນພາກພື້ນ, ປະຕິຮູບການເຄື່ອນໄຫວຮັກສາສັນຕິພາບ ແລະ ຊຸກຍູ້ການຫຼຸດຜ່ອນກຳລັງອາວຸດ, ລະດົມຄວາມມານະພະຍາຍາມສາກົນໃນການຕ້ານກໍ່ການຮ້າຍ, ຮັບມືກັບການປ່ຽນແປງຂອງດິນຟ້າອາກາດ, ລົບລ້າງຄວາມອຶດຫີວຫຼຸດຜ່ອນຄວາມທຸກຍາກ, ປ້ອງກັນ, ຕ້ານໂລກລະບາດ, ໄພທຳມະຊາດ, ຊຸກຍູ້ການປະຕິບັດບັນດາຈຸດໝາຍສະຫັດສະວັດ ແລະ ກໍ່ສ້າງລາຍການພັດທະນາຫຼັງປີ 2015. ທ່ານເລຂາທິການໃຫຍ່ Ban Ki Moon ມີຄວາມສະໜິດສະໜົມກັບຫວຽດນາມ ແລະ ໄດ້ປະກອບສ່ວນຊຸກຍູ້ການພົວພັນລະຫວ່າງ ສປຊ - ຫວຽດນາມ ແລະ ນີ້ແມ່ນເທື່ອທີສອງທີ່ທ່ານມາຢາມຫວຽດນາມ.
ຫວຽດນາມ, ສະມາຊິກຕັ້ງໜ້າ ແລະ ມີປະສິດທິຜົນໃນ ສປຊ
ຫວຽດນາມ ເຂົ້າເປັນສະມາຊີກ ສປຊ ຢ່າງເປັນທາງການໃນເດືອນ 9/1977. ມາຮອດປະຈຸບັນ, ການພົວພັນລະຫວ່າງຫວຽດນາມ - ສປຊ ນັບມື້ນັບໄດ້ຮັບການພັດທະນາຢ່າງເລິກເຊິ່ງ, ກວ້າງຂວາງ. ບັນດາການນຳຫວຽດນາມ ແລະ ສປຊ ເຄີຍດຳເນີນການພົບປະເປັນປະຈຳ ເພື່ອແນໃສ່ແລກປ່ຽນມາດຕະການເພີ່ມທະວີການຮ່ວມມື. ຫວຽດນາມ ແລະ ສປຊ ພວມຕັ້ງໜ້າສົມທົບກັນຜັນຂະຫຍາຍແຜນການລວມຂອງ ສປຊ ໄລຍະ 2011-2015 ແລະ ຍຸດທະສາດພັດທະນາເສດຖະກິດ - ສັງຄົມ ໄລຍະ 2011-2020 ຂອງຫວຽດນາມ. ໄລຍະຜ່ານມາ, ຫວຽດນາມ ເປັນເຈົ້າການປະກອບສ່ວນຢ່າງແທດຈິງເຂົ້າໃນການເຄື່ອນໄຫວຂອງ ສປຊ ໃນຫຼາຍຂົງເຂດ. ຫວຽດນາມ ໄດ້ ແລະ ພວມຕັ້ງໜ້າເຂົ້າຮ່ວມການເຄື່ອນໄຫວຮັກສາສັນຕິພາບຂອງ ສປຊ. ຊາຍຄາລວມ ສປຊ ຢູ່ຫວຽດນາມ, ແມ່ນຮູບແບບທຳອິດຂອງ ສປຊ ຢູ່ໂລກ, ແມ່ນການປະກອບສ່ວນຢ່າງລະອຽດ ແລະ ພົ້ນເດັ່ນຂອງຫວຽດນາມ ເຂົ້າໃນກິດຈະການປະຕິຮູບອົງການຫຼາຍຝ່າຍໃຫຍ່ກວ່າໝູ່ຂອງໂລກ.
ການຮ່ວມມືລະຫວ່າງຫວຽດນາມ - ສປຊ ຖືກຖືວ່າແມ່ນຕົວຢ່າງທີ່ດີເດັ່ນກ່ຽວກັບການຮ່ວມມືພັດທະນາລະຫວ່າງບັນດາປະເທດສະມາຊິກ ສປຊ ກໍ່ຄືບົດບາດຂອງ ສປຊ ໃນການຊຸກຍູ້ການຮ່ວມມືສາກົນ ເພື່ອແນໃສ່ແກ້ໄຂບັນດາບັນຫາເສດຖະກິດ, ສັງຄົມ, ວັດທະນະທຳ ແລະ ມະນຸດສະທຳ. ການຮ່ວມມືຢ່າງມີປະສິດທິຜົນນີ້ ພ້ອມກັບບັນດາຄຳໝັ້ນສັນຍາ ແລະ ການປະກອບສ່ວນຢ່າງຕັ້ງໜ້າ, ມີລັກສະນະສ້າງສັນ ແລະ ມີຄວາມຮັບຜິດຊອບຂອງຫວຽດນາມ ໃນການເຄື່ອນໄຫວຕ່າງໆຂອງ ສປຊ ພວມໄດ້ຮັບການຕີລາຄສູງຈາກປະຊາຄົມສາກົນ ແລະ ບັນດາອົງການ ສປຊ, ພິເສດແມ່ນຄວາມມານະພະຍາຍາມ ແລະ ຜົນງານໃນການລົບລ້າງຄວາມອຶດຫີວ, ຫຼຸດຜ່ອນຄວາມທຸກຍາກ, ການຮ່ວມມືສາມຝ່າຍ…
ການຢ້ຽມຢາມຫວຽດນາມ ຄັ້ງນີ້ຂອງທ່ານເລຂາທິການໃຫຍ່ Ban Ki Moon ດຳເນີນໃນປີ 2015, ແມ່ນປີທີ່ມີຂີດໝາຍ ແລະ ການເຄື່ອນໄຫວສຳຄັນຫຼາຍຢ່າງຂອງ ສປຊ. ການຢ້ຽມຢາມຫວຽດນາມ ຂອງທ່ານເລຂາທິການໃຫຍ່ Ban Ki Moon ເພື່ອແນໃສ່ເພີ່ມທະວີການຮ່ວມມືຫຼາຍດ້ານລະຫວ່າງ ສປຊ ແລະ ຫວຽດນາມ, ຊຸກຍູ້ການແລກປ່ຽນບັນຫາສັນຕິພາບ, ຄວາມໝັ້ນຄົງ ແລະ ການພັດທະນາໃນທົ່ວໂລກ. ນີ້ກໍ່ແມ່ນໂອກາດເພື່ອໃຫ້ຫວຽດນາມ ຢັ້ງຢືນນະໂຍບາຍການຕ່າງປະເທດເປັນເອກະລາດ, ເປັນເຈົ້າຕົນເອງ, ຫັນການພົວພັນກັບສາກົນຂອງຫວຽດນາມເປັນຫຼາຍຝ່າຍ, ຫຼາຍຮູບຫຼາຍແບບ. ໃນນັ້ນຖືເປັນສຳຄັນການພົວພັນກັບ ສປຊ ແລະ ແຜນນະໂຍບາຍເປັນເຈົ້າການເຂົ້າຮ່ວມ, ຢ່າງຕັ້ງໜ້າ ແລະ ມີຄວາມຮັບຜິດຊອບໃນການເຄື່ອນໄຫວຕ່າງໆຂອງ ສປຊ, ປະກອບສ່ວນເພື່ອສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ ແລະ ຢູ່ໃນໂລກ.