(vovowrld) - ມື້ນີ້, ທ່ານປະທານປະເທດ Truong Tan Sang ປະຕິບັດການຢ້ຽມຢາມທາງລັດຖະກິດເຖິງສາທາລະນະລັດ Kazakhstan ໃນ 2 ວັນ ຄືວັນທີ 10 ແລະ 11/9/2012. ການຢ້ຽມຢາມເພື່ອແນໃສ່ເພີ່ມທະວີການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫຼາຍດ້ານລະຫວ່າງສອງປະເທດ, ສ້າງກຳລັງໜູນຊຸກຍູ້ການພົວພັນຮ່ວມມືຢ່າງຮອບດ້ານໃນທຸກຂົງເຂດ.
ທ່ານປະທານປະເທດ Truong Tan Sang
ຢ້ຽມຢາມທາງລັດຖະກິດເຖິງສາທາລະນະລັດ Kazakhstan
ໂດຍຕັ້ງຢູ່ເຂດອາຊີກາງ, Kazakhstan ແມ່ນໜຶ່ງໃນຈຳນວນ 15 ປະເທດສາທາລະນະລັດທີ່ຂຶ້ນກັບສະຫະພາບໂຊວຽດເກົ່າ. ພາຍຫຼັງປະກາດຖະແຫຼງເອກະລາດເມື່ອປີ 1999, Kazakhstan ໄດ້ຫັນໄປສູ່ເສດຖະກິດການຕະຫຼາດ, ຕັ້ງໜ້າເຊື່ອມຕົວເຂົ້າກັບເສດຖະກິດໂລກ, ບັນດາມາດຕະການປະຕິຮູບເສດຖະກິດຂອງລັດຖະບານ ແລະ ວິວັດການຫັນເປັນພາກສ່ວນເສດຖະກິດເອກະຊົນພວມດຳເນີນຢ່າງວ່ອງໄວ, ນຳມາເຊິ່ງຜົນງານອັນໃຫຍ່ຫຼວງໃຫ້ແກ່ການພັດທະນາເສດຖະກິດ. ປະຈຸບັນ, Kazakhstan ພວມດຳເນີນນະໂຍບາຍອຸດສາຫະກຳ ເພື່ອແນໃສ່ຫັນພື້ນຖານເສດຖະກິດເປັນຫຼາຍຮູບຫຼາຍແບບ. ນັບແຕ່ປີ 2000, ເສດຖະກິດ Kazakhstan ເລີ່ມບັນລຸລະດັບເຕີບໂຕສູງ. ໃນ 10 ປີມານີ້, GDP ຂອງ Kazakhstan ເພີ່ມຂຶ້ນ 3,5 ເທົ່າ ແລະ ວົງເງິນສົ່ງອອກຜະລິດຕະພັນກະເສດເພີ່ມຂຶ້ນ 3 ເທົ່າ, ອັນໄດ້ເຮັດໃຫ້ປະເທດນີ້ກາຍເປັນໜຶ່ງໃນຈຳນວນ 6 ປະເທດນຳໜ້າໂລກກ່ຽວກັບການສົ່ງອອກທັນຍາຫານ. ປີ 2010, GDP ຂອງ Kazakhstan ເພີ່ມຂຶ້ນ 7% ແລະ GDP ປີ 2011 ເພີ່ມຂຶ້ນ 7,5%. Kazakhstan ມີນ້ຳມັນສະສົມຫຼາຍອັນດັບ 8 ຢູ່ໂລກ.
Kazakhstan ເຂົ້າຮ່ວມພັນທະພາບພາສີກັບລັດເຊຍ, ເບລາຮຸດ ໃນເດືອນ 7/2010 ແລະກ້າວໄປເຖິງການກໍ່ສ້າງພື້ນຖານເສດຖະກິດເປັນເອກະພາບລະຫວ່າງ 3 ປະເທດໃນປີ 2012, Kazakhstan ປະຕິບັດນະໂຍບາຍດຶງດູດການລົງທຶນຈາກຕ່າງປະເທດຢ່າງແຮງ, ປະຈຸບັນ, Kazakhstan ມີ 19.000 ໂຄງການລົງທຶນຈາກຕ່າງປະເທດ.
ຊາວຫວຽດນາມອາໄສຢູ່Kazakhstan ຕ້ອນຮັບປະທານປະເທດ Trương Tấn Sang ຫວຽດນາມ ແລະ Kazakhstan ມີການພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອນຳກັນ. ສອງປະເທດສ້າງຕັ້ງການພົວພັນທາງການທູດນັບແຕ່ວັນທີ 26/6/1992. ນັບແຕ່ນັ້ນມາຮອດປະຈຸບັນ, ການພົວພັນທາງດ້ານການເມືອງລະຫວ່າງສອງປະເທດໄດ້ຮັບການປັບປຸງ ແລະ ພັດທະນາຢ່າງບໍ່ຢຸດຢັ້ງ. ສອງຝ່າຍໄດ້ຮັກສາການແລກປ່ຽນຄະນະຜູ້ແທນຂັ້ນສູງ ແລະ ການພົບປະສອງຝ່າຍ. ມາຮອດປະຈຸບັນ, ຫວຽດນາມ ແລະ Kazakhstan ໄດ້ລົງນາມໃນສັນຍາແມ່ກ່ຽວກັບການຮ່ວມມືທາງດ້ານເສດຖະກິດ, ການຄ້າ, ການຕ່າງປະເທດ, ການສຶກສາ, ການລົງທຶນ, ການອອກແຮງງານ, ພະລັງງານ… ການຮ່ວມມືທາງດ້ານເສດຖະກິດ - ການຄ້າພວມມີທ່າພັດທະນາຢ່າງຕັ້ງໜ້າ. ວົງເງິນການຄ້າສອງຝ່າຍເພີ່ມຂຶ້ນເທື່ອລະກ້າວ, ແຕ່ຍັງໜ້ອຍຢູ່ເມື່ອທຽບໃສ່ຄວາມສາມາດບົ່ມຊ້ອນຂອງສອງປະເທດ, ປີ 2011 ບັນລຸປະມານ 49 ລ້ານ USD, 8 ເດືອນຕົ້ນປີ 2012 ວົງເງິນການຄ້າສອງສົ້ນບັນລຸກວ່າ 41 ລ້ານ USD. ຢູ່ທີ່ສະໄໝປະຊຸມທີ 5 ຄະນະກຳມະການລະຫວ່າງລັດຖະບານກ່ຽວກັບການຮ່ວມມືທາງດ້ານເສດຖະກິດ - ການຄ້າ ແລະ ວິທະຍາສາດເຕັກນິກ ເຊິ່ງດຳເນີນໃນເດືອນ 9/2011 ນັ້ນ, ສອງຝ່າຍໄດ້ລົງນາມໃນແຜນການດຳເນີນງານຮ່ວມຫວຽດນາມ - Kazakhdtan ໄລຍະ 2011-2013 ເພື່ອແນໃສ່ຍູ້ແຮງການຮ່ວມມື. ພິເສດ, ໃນການຢ້ຽມຢາມຫວຽດນາມເມື່ອເດືອນ 11/2011 ຂອງປະທານາທິບໍດີ Kazakhstan Nursultan Nazarbayev, ສອງຝ່າຍໄດ້ອອກຖະແຫຼງການຮ່ວມໂດຍຢັ້ງຢືນວ່າ ຫວຽດນາມ ແລະ Kazakhstan ພວມຢືນຢູ່ຕໍ່ໜ້າບັນດາກາລະໂອກາດອັນໃຫຍ່ຫຼວງ ເພື່ອປັບປຸງ ແລະ ເພີ່ມທະວີການພົວພັນຮ່ວມມືຫຼາຍດ້ານກວ່າອີກໃນຂົງເຂດການເມືອງ, ການຕ່າງປະເທດ, ເສດຖະກິດ - ການຄ້າ - ການລົງທຶນ ແລະ ຫຼາຍຂົງເຂດອື່ນໆ. ສອງຝ່າຍສະແດງຄວາມປາຖະໜາຢາກດຶງດູດທຶນຂອງກັນເຂົ້າບັນດາຂະແໜງເສດຖະກິດ, ໃນນັ້ນໃຫ້ບຸລິມາສິດແກ່ການພັດທະນາພື້ນຖານໂຄງລ່າງ, ຂະແໜງຂຸດຄົ້ນແຮ່ທາດ. ຜະລິດເຄື່ອງຕຳແຜ່ນຕັດຫຍິບ ແລະ ເກີບ, ສ້າງຕັ້ງບໍລິສັດຮ່ວມທຸລະກິດຜະລິດຢາງພາລາ, ໝາກໄມ້, ສິນໃນນ້ຳ, ລ້ຽງສັດ….
ບໍ່ພຽງແຕ່ໃນຂົງເຂດຮ່ວມມືສອງຝ່າຍເທົ່ານັ້ນ, ຫວຽດນາມ ແລະ Kazakhstan ຍັງສົມທົບກັນຢ່າງແໜ້ນແຟ້ນ ແລະ ສະໜັບສະໜູນກັນຢູ່ສະຫະປະຊາຊາດ ແລະ ບັນດາເວທີປາໄສສາກົນອີກດ້ວຍ. ສອງປະເທດໄດ້ໃຫ້ຄຳໝັ້ນສັນຍາໜູນຊ່ວຍກັນ ສະໝັກຮັບເລືອກຕັ້ງເຂົ້າສະພາສິດທິມະນຸດ ສະຫະປະຊາຊາດ ແລະ ຮັບຮູ້ກັນແມ່ນປະເທດມີພື້ນຖານເສດຖະກິດການຕະຫຼາດ….
ບົນພື້ນຖານສາຍພົວພັນທີ່ພວມມີທ່າພັດທະນາຢ່າງຈົບງາມນັ້ນ, ການຢ້ຽມຢາມສາທາລະນະລັດ Kazakhstan ຂອງທ່ານປະທານປະເທດ Truong Tan Sang ຄັ້ງນີ້ໄດ້ເປັນການຢັ້ງຢືນເຖິງຄວາມປາດຖະໜາຢາກເພີ່ມທະວີການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫຼາຍດ້ານກັບ Kazakhstan ຢ່າງບໍ່ຢຸດຢັ້ງ, ສ້າງກຳລັງໜູນຊຸກຍູ້ການພົວພັນຮ່ວມມືຢ່າງຮອບດ້ານໃນທຸກຂົງເຂດການເມືອງ, ເສດຖະກິດ - ການຄ້າ, ກະສີກຳ - ອຸດສາຫະກຳ, ວິທະຍາສາດ - ການສຶກສາ ລະຫວ່າງສອງປະເທດ, ທັງແມ່ນໂອກາດເພື່ອຂົນຂວາຍການນຳ Kazakhstan ສ້າງເງື່ອນໄຂສະດວກເພື່ອໃຫ້ວິສາຫະກິດຫວຽດນາມເຂົ້າຮ່ວມບັນດາໂຄງການນ້ຳມັນອາຍແກດຢູ່ Kazakhstan. ການຢ້ຽມຢາມກໍ່ແມ່ນເຫດການທີ່ມີຄວາມໝາຍ ເພື່ອສະເຫຼີມສະຫຼອງ 20 ປີ ແຫ່ງວັນສ້າງຕັ້ງການພົວພັນທາງການທູດລະຫວ່າງສອງປະເທດ.