ທ່ານຮອງນາຍົກລັດຖະມົນຕີ ຫວູວັນນີນ ພົບປະກັບ
ທ່ານ Ron Bryson ລັດຖະມົນຕີ ກະຊວງການຄ້າອາເມລິກາ
(ພາບ:tinmoi.vn)
(vov) - ແຕ່ວັນທີ 8 - 11/2, ຄະນະຜູ້ແທນຂັ້ນສູງລັດຖະບານ ຫວຽດນາມ ໂດຍທ່ານ ຫວູວັນນີນ ຮອງນາຍົກລັດຖະມົນຕີ ນຳຫນ້າ ໄດ້ໄປຢ້ຽມຢາມ ແລະ ເຮັດວຽກຢູ່ ອາເມລິກາ. ການພົບປະກັບການນຳ ອຳນາດການປົກຄອງ, ສະພາແຫ່ງຊາດ, ບັນດາກະຊວງ ຂະແຫນງການ ແລະ ນັກທຸລະກິດ ອາເມລິກາ ຄັ້ງຕ່າງໆ ໃນຂອບເຂດການຢ້ຽມຢາມ ໄດ້ເປີດກາລະໂອກາດການຮ່ວມມືຫລາຍຢ່າງລະຫວ່າງສອງປະເທດ.
ທ່ານ ບູ່ຍແທນເຊີນ ຮອງລັດຖະມົນຕີການຕ່າງປະເທດ, ສະມາຊິກໃນຄະນະຜູ້ແທນຫວຽດນາມ ໃຫ້ຮູ້ວ່າ: ໃນການຢ້ຽມຢາມຄັ້ງນີ້ ຄະນະຜູ້ແທນຫວຽດນາມ ໄດ້ສົ່ງສານທີ່ມີຄວາມໝາຍຫລາຍສະບັບເຖິງວົງການການເມືອງ ແລະ ວິສາຫະກິດ ອາເມລິກາ. ນັ້ນແມ່ນ ຫວຽດນາມ ສືບຕໍ່ປະຕິບັດບັນດາກິດຈະການປ່ຽນແປງໃຫມ່ໃນທຸກຂົງເຂດ. ຫວຽດນາມ ກໍຕັ້ງຫນ້າເປັນເຈົ້າການເຊື່ອມໂຍງເຂົ້າກັບສາກົນ, ໃນນັ້ນ ສືບຕໍ່ປະຕິບັດແນວທາງການຕ່າງປະເທດເອກະລາດ, ເປັນເຈົ້າຕົນເອງ, ຫັນການພົວພັນເປັນຫລາຍຮູບຫລາຍແບບ ແລະ ຫລາຍຝ່າຍ, ນຳການພົວພັນຄູ່ຮ່ວມມືເຂົ້າສູ່ລວງເລີກ, ໃນນັ້ນ ມີຄູ່ຮ່ວມມືອາເມລິກາ. ໃນປີ 2012 ແລະ ຊຸມປີຕໍ່ໄປ, ຫວຽດນາມ ປະຕິບັດການປ່ຽນໃຫມ່ຮູບແບບການເຕີບໂຕ, ປະຕິຮູບເສດຖະກິດ ສ້າງໂຄງປະກອບພື້ນຖານເສດຖະກິດຄືນໃຫມ່, ຫັນປ່ຽນຮູບແບບເສດຖະກິດຂອງຫວຽດນາມ ຈາກລວງກວ້າງໄປສູ່ລວງເລີກ. ຄະນະຜູ້ແທນຫວຽດນາມ ກໍຢືນຢັນວ່າ: ໃນສະພາບເສດຖະກິດໂລກ ຍັງປະສົບກັບຄວາມຫຍຸ້ງຍາກຫລາຍຢ່າງ, ອາເມລິກາ ຄວນຮ່ວມມືກັບຝ່າຍຫວຽດນາມ ເພື່ອຈຳກັດ, ລົບລ້າງຮົ້ວກີດຂວາງດ້ານການຄ້າສຳລັບສິນຄ້າຂອງຫວຽດນາມ ທີ່ສົ່ງໄປຂາຍຢູ່ ອາເມລິກາຄື: ປາຈາ, ປາບາຊາ, ທໍ່ເຫລັກກ້າ ແລະ ເສົາໄຟຟ້າໃຊ້ພະລັງແຮງລົມ.
“ສານ ຂອງທ່ານຮອງນາຍົກລັດຖະມົນຕີ ແລະ ຄະນະຜູ້ແທນຂັ້ນສູງລັດຖະບານ ໃນການຢ້ຽມຢາມຄັ້ງນີ້ ໄດ້ສະແດງອອກຢ່າງຈະແຈ້ງວ່າ ປີ 2012 ແລະ ຊຸມປີຕໍ່ໄປ ຫວຽດນາມ ຈະປະຕິບັດວຽກງານຈຳນວນຫນຶ່ງຄື. ທີຫນຶ່ງ ແມ່ນສືບຕໍ່ຄວບຄຸມໄພເງິນເຟີ້, ຮັກສາເສດຖະກິດມະຫາພາກ ແລະ ຮັກສາການຮັບປະກັນຊີວິດສັງຄົມໃຫ້ເປັນປົກກະຕິ. ທີສອງ ແມ່ນສ້າງໂຄງປະກອບພື້ນຖານເສດຖະກິດຄືນໃຫມ່ ແລະ ປ່ຽນໃຫມ່ຮູບແບບການເຕີບໂຕ. ທີສາມ ແມ່ນປະຕິບັດຍຸດທະສາດພັດທະນາເສດຖະກິດ ສັງຄົມ ປີ 2011 - 2021, ໃນນັ້ນ ສ້າງ 3 ບາດກ້າວບຸກທະລຸສຳຄັນ ນັ້ນແມ່ນສ້າງລະບອບ ກົນໄກການຕະຫລາດ, ພັດທະນາພື້ນຖານໂຄງລ່າງ ແລະ ຍົກສູງຄຸນນະພາບໃນການຮັບໃຊ້ຂອງ ແຫລ່ງຊັບພະຍາກອນມະນຸດ ເພື່ອຮັບໃຊ້ວິວັດທະນາການຫັນເປັນອຸດສາຫະກຳ ແລະ ທັນສະໄຫມ.”
ພ້ອມກັບບັນດາສານຈາກຄະນະຜູ້ແທນຫວຽດນາມ, ຜູ້ຕາງຫນ້າວົງການການເມືອງ ອາເມລິກາ ເນັ້ນຫນັກວ່າ ຢາກສືບຕໍ່ເພີ່ມທະວີການຮ່ວມມືໃນບັນດາຂົງເຂດເສດຖະກິດ ການຄ້າ ການລົງທຶນ, ວິທະຍາສາດ - ເທັກໂນໂລຊີ, ການສຶກສາ ບຳລຸງສ້າງ, ມະນຸດສະທຳ ກໍຄື ສົມທົບກັນຢ່າງແຫນ້ນແຟ້ນຢູ່ບັນດາເວທີປາໄສຫລາຍຝ່າຍ ແລະ ພາກພື້ນຄື: ສະມາຄົມປະຊາຊາດ ອາຊີ ຕາເວັນອອກສຽງໃຕ້ (ASEAN), ເວທີປາໄສປ້ອງກັນຄວາມສະຫງົບພາກພື້ນ ASEAN (ARF), ເວທີປາໄສການຮ່ວມມືເສດຖະກິດ ອາຊີ ປາຊີຟີກ (APEC), ກອງປະຊຸມສຸດຍອດ ອາຊີຕາເວັນອອກ (EAS). ພ້ອມກັນນັ້ນຝ່າຍອາເມລິກາ ຍັງປາດຖະຫນາຢາກສອງຝ່າຍແກ້ໄຂບັນດາບັນຫາຍັງຄົງຄ້າງໃນການພົວພັນດ້ານການຄ້າ ພ້ອມກັນມານະພະຍາຍາມເພ່ືອສາມາດປະຕິບັດສຳເລັດການເຈລະຈາສັນຍາການຄ້າພາກພື້ນ ອາຊີ - ປາຊີຟີກ (TPP) ໂດຍໄວ. ຕາມທ່ານຮອງລັດຖະມົນຕີ ບຸ່ຍແທງເຊີນແລ້ວ, ດ້ວຍພື້ນຖານນັ້ນ ຄວາມສາມາດບົ່ມຊ້ອນຂອງສອງປະເທດຈະໄດ້ຮັບການຂຸດຄົ້ນ ແລະ ຂະຫຍາຍຕົວຫລາຍກວ່າ ໃນໄລຍະຈະມາເຖິງ. ແລະກໍໃນໄລຍະຢູ່ຢ້ຽມຢາມ ນະຄອນຫລວງ ວໍໍຊິງຕັນ, ທ່ານຮອງນາຍົກລັດຖະມົນຕີ ຫວູວັນນີນ ໄດ້ເຂົ້າຮ່ວມການພົບປະສົນທະນາກ່ຽວກັບການພົວພັນດ້ານເສດຖະກິດ ລະຫວ່າງຫວຽດນາມ ແລະ ອາເມລິກາ ໂດຍມີການເຂົ້າຮ່ວມຂອງບັນດາການນຳກຸ່ມບໍລິສັດຊັ້ນນຳຂອງອາເມລິກາ. ທ່ານຮອງນາຍົກລັດຖະມົນຕີ ຫວູວັນນີນ ຢືນຢັນຄຳໝັ້ນສັນຍາ ສືບຕໍ່ສ້າງສະພາບແວດລ້ອມແຫ່ງການລົງທຶນຢ່າງສະດວກສະບາຍໃຫ້ແກ່ບັນດານັກລົງທຶນຕ່າງປະເທດ, ໃນນັ້ນ ມີບັນດານັກລົງທຶນອາເມລິກາ. ເມື່ອຕີລາຄາກ່ຽວກັບແງ່ຫວັງແຫ່ງການພັດທະນາການພົວພັນສອງຝ່າຍເນື່ອງໃນໂອກາດນີ້, ທ່ານ ບຸ່ຍແທນເຊີນ ຮອງລັດຖະມົນຕີການຕ່າງປະເທດ ໃຫ້ຮູ້ວ່າ:
“ສອງຝ່າຍໄດ້ແລກປ່ຽນເພື່ອວາງອອກບັນດາມາດຕະການຮ່ວມມືຢ່າງລະອຽດກວ່າ ແນໃສ່ຍົກລະດັບການພົວພັນນີ້. ໃນວິວັດການແລກປ່ຽນ, ສອງຝ່າຍ ມີຄວາມເຂົ້າໃຈຢ່າງຈະແຈ້ງກ່ຽວກັບບັນດາບັນຫາຈຳເປັນຕ້ອງຮ່ວມມື ກໍຄື ບັນດາສິ່ງ ກີດຂວາງທີ່ຍັງຄົງຄ້າງ. ບົນຈິດໃຈນັ້ນ ດ້ວຍເຈດຕະນາດີ ກໍຄືຄວາມເອົາໃຈໃສ່ຢ່າງໃກ້ຊິດຕິດແທດຈາກຝ່າຍອຳນາດການປົກຄອງ ແລະ ບັນດາວິສາຫະກິດ ອາເມລິກາ ທີ່ມີຕໍ່ຫວຽດນາມ, ຂ້າພະເຈົ້າຄິດວ່າ ພວກເຮົາ ມີພື້ນຖານຢ່າງຄົບຖ້ວນເພື່ອເວົ້າວ່າ: ພວກເຮົາສາມາດຍົກການພົວພັນກັບອາເມລິກາ ຂຶ້ນສູ່ລະດັບສູງໃຫມ່ ໃນໄລຍະທີ່ຈະມາເຖິງ.”
ທ່ານຮອງລັດຖະມົນຕີ ບຸ່ຍແທນເຊີນ ກໍໃຫ້ຮູ້ວ່າ: ນອກຈາກບັນດາການພົບປະກັບບັນດານັກການເມືອງ ອາເມລິກາ ຄື: ທ່ານ Daniel Inouye ຜູ້ຮັກສາການ ປະທານສະພາສູງ, ທ່ານ Jim Webb ປະທານອະນຸກຳມະການ ອາຊີ - ຕາເວັນອອກ ປາຊີຟີກ ຂຶ້ນກັບຄະນະກຳມາທິການການຕ່າງປະເທດ ສະພາສູງ, ທ່ານ John Bryson ລັດຖະມົນຕີກະຊວງການຄ້າ, ສ່ວນ ທ່ານຮອງນາຍົກລັດຖະມົນຕີ ຫວູວັນນີນ ໄດ້ມີການພົບປະກັບທ່ານ Robert Zoelick ປະທານທະນາຄານໂລກ (WB) ແລະ ທ່ານ Naoyuki Shinohara ຮອງຜູ້ອຳນວຍການໃຫຍ່ບໍລິຫານກອງທຶນເງິນຕາສາກົນ (IMF). ຜູ້ຕາງຫນ້າບັນດາອົງການການເງິນສາກົນ ໄດ້ມີການຕີລາຄາຢ່າງຕັ້ງຫນ້າກ່ຽວກັບບັນດານະໂຍບາຍເສດຖະກິດ ຊຶ່ງຫວຽດນາມ ພວມນຳໃຊ້.
“ບັນດາອົງການການເງິນສາກົນ ຕີລາຄາສູງບັນດາມາດຕະການ ຊຶ່ງລັດ ແລະ ລັດຖະບານຫວຽດນາມ ວາງອອກ. ເຂົາເຈົ້າໄດ້ໃຫ້ຂໍ້ສັງເກດວ່າ ຖ້າຫວຽດນາມ ຢືດໝັ້ນປະຕິບັດ ປີ 2012 ຫວຽດນາມ ຈະຄວບຄຸມໄພເງິນເຟີ້ລົງລະດັບ 1 ຕົວເລກ ພ້ອມກັນນັນ ຍັງຮັກສາລະດັບຈະເລີນເຕີບໂຕເສດຖະກິດຢ່າງເໝາະສົມ. ບັນດາອົງການນີ້ ພ້ອມແລ້ວທີ່ຈະຮ່ວມມືຫນູນຊ່ວຍຫວຽດນາມ ປະຕິບັດບັນດາຈຸດໝາຍທີ່ກ່າວມາຂ້າງເທິງ ດ້ວຍເລື່ອງສົ່ງຄະນະການນຳ ແລະ ຜູ້ຊ່ຽວຊານຫລາຍຄະນະ ມາແລກປ່ຽນກັບບັນດາກະຊວງ, ຂະແຫນງການ ແລະ ບັນດາອົງການທີ່ມີຫນ້າທ່ີຮັບຜິດຊອບຂອງຫວຽດນາມເພື່ອເປັນທ່ີປຶກສາ. ບັນດາການແລກປ່ຽນຂອງເຂົາເຈົ້າແມ່ນກົງໄປກົງມາ ແລະ ມີຜົນປະໂຫຍດ, ນັ້ນແມ່ນພື້ນຖານເພື່ອໃຫ້ພວກເຮົາທາບທ່າມຄວາມເຫັນ ເພື່ອໃຫ້ຫວຽດນາມ ສືບຕໍ່ຜັນຂະຫຍາຍບັນດາມາດຕະການທີ່ໄດ້ວາງອອກ.”
ການພົວພັນລະຫວ່າງ ຫວຽດນາມ ແລະ ອາເມລິກາ ພວມສືບຕໍ່ພັດທະນາໃນຫລາຍຂົງເຂດເສດຖະກິດ, ການຄ້າ, ການລົງທຶນ, ວິທະຍາສາດ, ເທັກໂນໂລຊີ, ການສຶກສາ. ການຢ້ຽມຢາມ ແລະ ເຮັດວຽກຢູ່ ອາເມລິກາ ຄັ້ງນີ້ຂອງທ່ານຮອງນາຍົກລັດຖະມົນຕີ ຫວູວັນນີນ ປະກອບສ່ວນປັບປຸງຜົນງານດັ່ງກ່າວ ແລະ ເປີດບັນດາກາລະໂອກາດການຮ່ວມມືລະຫວ່າງສອງປະເທດໃນໄລຍະຈະມາເຖິງ.
ນັກຂ່າວ VOV ປະຈຳອາເມລິກາ