(vovworld)- ຕາມການຕີລາຄາຂອງບັນດາຜູ້ຊ່ຽວຊານດ້ານເສດຖະກິດ ແລ້ວ, ກະສິກຳ ຫວຽດນາມ ພວມມີກາລະໂອກາດດຶງດູດເງິນລົງທຶນ ເພື່ອສ້າງໂຄງປະກອບຄືນໃຫມ່ຢ່າງຮອບດ້ານ. ໃນຊຸມປີມໍ່ໆມານີ້, ມີກຸ່ມບໍລິສັດຫລາຍແຫ່ງພາຍໃນປະເທດ ພວມຫັນທິດລົງທຶນເຂົ້າຂົງເຂດກະສິກຳ ພ້ອມກັນນັ້ນ ລັດຖະບານ ໄດ້ມີການຫນູນຊ່ວຍ, ສ້າງເງື່ອນໄຂສະດວກເພື່ອໃຫ້ບັນດາວິສາຫະກິດມີກາລະໂອກາດເຂົ້າຮ່ວມການພັດທະນາກະສິກຳຫລາຍກວ່າ. ນີ້ແມ່ນສັນຍານທີ່ຫນ້າຊື່ນຊົມສຳລັບວິວັດທະນາການພັດທະນາກະສິກຳຂອງປະເທດຊາດ. ບົດຂຽນຂອງນັກຂ່າວ ມີງລອງ ທີ່ມີຫົວຂໍ້ວ່າ: " ເພີ່ມທະວີການລົງທຶນຂອງວິສາຫະກິດເຂົ້າຂົງເຂດກະສິກຳ”
ພາບປະກອບ:internet
|
ລັດຖະບານ, ນາຍົກລັດຖະມົນຕີ ຍາມໃດກໍເອົາໃຈໃສ່ຊີ້ນຳປັບປຸງການສ້າງລະບົບກົນໄກ, ນະໂຍບາຍຫນູນຊ່ວຍບັນດາພາກສ່ວນເສດຖະກິດລົງທຶນເຂົ້າຂົງເຂດກະສິກຳ. ພິເສດ ໃນ ປີ 2014, 2015, ລັດຖະບານໄດ້ປະກາດໃຊ້ ມະຕິ 2 ສະບັບເພື່ອຊຸກຍູ້ການປັບປຸງສະພາບແວດລ້ອມແຫ່ງການດຳເນີນທຸລະກິດ. ພ້ອມກັນນັ້ນ, ແຜນຮ່າງສ້າງໂຄງປະກອບຂະແຫນງກະສິກຳຄືນໃຫມ່ ໂດຍລັດຖະບານອະນຸມັດແຕ່ປີ 2013 ແລະ ພວມກ້າວເຂົ້າສູ່ໄລຍະຜັນຂະຫຍາຍຢ່າງຂ້ຽວຂາດ. ຈຸດສຸມຂອງແຜນຮ່າງແມ່ນສຸມໃສ່ວິສາຫະກິດເພື່ອປ່ຽນແປງໂຄງປະກອບ ແລະ ວິທີການຜະລິດຂອງທົ່ວຂະແຫນງ. ສິ່ງດັ່ງກ່າວຢືນຢັນຄວາມຕັດສິນໃຈຂອງລັດຖະບານໃນການຍົກສູງຄຸນນະພາບກະສິກຳ, ຊົນນະບົດຢູ່ຫວຽດນາມ.
ສັນຍານຕັ້ງຫນ້າຈາກການເຄື່ອນໄຫວລົງທຶນຂອງວິສາຫະກິດສະຫງວນໃຫ້ແກ່ກະສິກຳ
ຫວຽດນາມ ກໍຄືຫລາຍປະເທດອື່ນໃນ ອາຊຽນ ບໍ່ທັນມີວິສາຫະກິດຫລາຍແຫ່ງລົງທຶນເຂົ້າຂົງເຂດກະສິກຳ. ຕາມການສະຖິຕິຂອງກະຊວງກະສິກຳ ແລະ ພັດທະນາຊົນນະບົດແລ້ວ, ການລົງທຶນຂອງບັນດາວິສາຫະກິດບໍ່ທັນສົມກັບຄວາມສາມາດບົ່ມຊ້ອນກໍຄືຄວາມຕ້ອງການພັດທະນາຂອງຂະແຫນງ.
ລັດຖະບານ ໄດ້ສ້າງເງື່ອນໄຂໃຫ້ບັນດາວິສາຫະກິດລົງທຶນເຂົ້າກະສິກຳ, ຊົນນະບົດ. ການລົງທຶນຂອງພາກເອກະຊົນຢູ່ພາຍໃນປະເທດເຂົ້າຂົງເຂດກະສິກຳ, ຊົນນະບົດ ແມ່ນຢຟຢເພີ່ມຂຶ້ນ ຈາກຈຳນວນວິສາຫະກິດ 2.400 ແຫ່ງໃນປີ 2007 ຂຶ້ນເຖິງ 3.630 ວິສາຫະກິດໃນປີ 2013, ສ້າງວຽກເຮັດງານທຳໃຫ້ຄົນງານ 265.000 ຄົນ. ມີວິສາຫະກິດຫລາຍແຫ່ງລົງທຶນສຳເລັດຜົນ ດ້ວຍການໝູນໃຊ້ວິທະຍາສາດເຕັກໂນໂລຊີສູງ, ພັດທະນາຕະຫລາດ, ສ້າງກຳລັງຫນູນພັດທະນາໃຫ້ຫລາຍເຂດ, ທອ້ງຖິ່ນຄື: ບໍລິສັດ Vinamilk, ມີງຟູ, TH Truemilk, ຮ່ວາງແອງຢາລາຍ…ປະຈຸບັນ ມີວິສາຫະກິດ, ກຸ່ມບໍລິສັດໃຫຍ່ ຫລາຍແຫ່ງ ຊອກຫາກາລະໂອກາດ ແລະ ປາດຖະຫນາຢາກລົງທຶນເຂົ້າຂົງເຂດກະສິກຳ, ຊົນນະບົດຄື: Vingroup, Himlam, Viettel, FLC.. ທ່ານກາວດຶກຟາດ, ລັດຖະມົນຕີວ່າການກະຊວງກະສິກຳ ແລະ ພັດທະນາຊົນນະບົດໃຫ້ຮູ້ວ່າ:
“ການສ້າງໂຄງປະກອບກະສິກຳຄືນໃຫມ່ ພ້ອມກັບໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃຫມ່ ແມ່ນ ການປະຕິວັດ 2 ຄັ້ງກ່ຽວກັບກະສິກຳ ແລະຊົນນະບົດ. ເພື່ອປະຕິບັດ 2 ໂຄງການດັ່ງກ່າວ ຄວນມີການເຂົ້າຮ່ວມຢ່າງຕັ້ງຫນ້າຂອງທຸກພາກສ່ວນເສດຖະກິດຈາກສູນກາງຕະຫລອດຮອດທ້ອງຖິ່ນ, ໃນນັ້ນ ລັດສວມບົດບາດ ເປັນຜູ້ກໍ່ຕັ້ງ, ຊາວກະສິກອນເປັນເຈົ້າ ແລະ ວິສາຫະກິດມີບົດບາດຫລັກແຫລ່ງສຳຄັນ.”
ສ້າງເງື່ອນໄຂສະດວກໃຫ້ວິສາຫະກິດລົງທຶນເຂົ້າຂົງເຂດກະສິກຳ
ທີ່ກອງປະຊຸມ “ດຶງດູດວິສາຫະກິດລົງທຶນໃຫ້ກະສິກຳ-ຊົນນະບົດ” ດຳເນີນໃນວັນທີ28/6, ທ່ານຮອງນາຍົກລັດຖະມົນຕີ ຮ່ວາງຈູງຫາຍ ຢືນຢັນ: ພາຍຫລັງ 30 ປີແຫ່ງການປ່ຽນແປງໃຫມ່, ກະສິກຳ ຫວຽດນາມ ມີການປະກອບສ່ວນສຳຄັນຫລາຍຢ່າງເຂົ້າໃນການພັດທະນາເສດຖະກິດສັງຄົມຂອງປະເທດຊາດ. ເພື່ອສືບຕໍ່ເສີມຂະຫຍາຍບັນດາທ່າແຮງຂອງກະສິກຳ, ລັດຖະບານ ຈະສຸມໃສ່ລົງທຶນກ່ຽວກັບພື້ນຖານໂຄງລ່າງຄື: ຊົນລະປະທານ, ຄົມມະນາຄົມຊົນນະບົດ… ພ້ອມກັນນັ້ນ ເພີ່ມທະວີການຫນູນຊ່ວຍວິສາຫະກິດເຂົ້າຮ່ວມການລົງທຶນເຂົ້າກະສິກຳ.
“ເມື່ອເຂົ້າຮ່ວມເຂົ້າຂົງເຂດກະສິກຳ, ບັນດາວິສາຫະກິດອາດຈະເສີມຂະຫຍາຍຄວາມສາມາດບົ່ມຊ້ອນຫົວຄິດປະດິດສ້າງໃນການຜະລິດ. ພວກເຮົາຕ້ອງມີກົນໄກເພຶື່ອເສີມຂະຫຍາຍສຸດກຳລັງຄວາມສາມາດນີ້. ຕ້ອງເສີມຂະຫຍາຍບົດບາດຮ່ວມສຳພັນຂອງບັນດາສະຫະສະມາຄົມ, ຂະແຫນງສິນຄ້າ ພິເສດ ແມ່ນການຮ່ວມສຳພັນຂອງວິສາຫະກິດເອງ. ຂ້າພະເຈົ້າຄິດວ່າ ໃນກະສິກຳຄວນຊຸກຍູ້ຂະບວນການນີ້.”
ກະຊວງກະສິກຳ ແລະ ພັດທະນາຊົນນະບົດ ຕັ້ງຫນ້າຜັນຂະຫຍາຍປະຕິບັດ “ແຜນຮ່າງສ້າງໂຄງປະກອບຂະແຫນງກະສິກຳຄືນໃຫມ່ຕາມທິດຍົກສູງມູນຄ່າເພີ່ມ ແລະ ພັດທະນາແບບຍືນຍົງ.” ມາຮອດປະຈຸບັນ, ຂະແຫນງກະສິກຳ ໄດ້ສ້າງ ແລະ ປະກາດໃຊ້ 12 ແຜນຮ່າງ ແລະ ແຜນການຫັນການກຳນົດທິດ ແລະ ມາດຕະການສ້າງໂຄງປະກອບວິສາຫະກິດຄືນໃຫມ່ໃນທຸກຂົງເຂດເປັນລະອຽດ ຄື: ການປູກຝັງ, ລ້ຽງສັດ, ປ່າໄມ້, ສິນໃນນ້ຳ, ປຸງແຕ່ງ, ຊົນລະປະທານ. ປະຈຸບັນ ມີວິສາຫະກິດນັບຮ້ອຍແຫ່ງ ຊື່ງແມ່ນກຸ່ມບໍລິສັດໃຫຍ່, ບໍລິສັດຮ່ວມສຳພັນກັບຊາວກະສິກອນຜະລິດສິນຄ້າໃນເນື້ອທີ່ 400.000 ເຮັກຕາ.
ເພື່ອໃຫ້ກະສິກຳ ຫວຽດນາມ ສືບຕໍ່ເຕີມໂຕຢ່າງແຮງ ແລະ ໝັ້ນຄົງ, ຄຽງຄູ່ກັບບົດບາດຫລັກແຫລ່ງຂອງຊາວກະສິກອນນ, ຄວນມີການເຂົ້າຮ່ວມຢ່າງຕັ້ງຫນ້າຂອງຖັນແຖວນັກທຸລະກິດ. ດ້ວຍການປະກອບກຳລັງເຫື່ອແຮງ, ການລົງທຶນຂອງບັນດາວິສາຫະກິດ ແລະ ກະສິກຳ ບັນດາຄວາມຫຍຸ້ງຍາກ, ຂໍ້ຕິດຂັດກ່ຽວກັບທຶນຮອນ, ໝູນໃຊ້ເຕັກໂນໂລຊີສູງເຂົ້າໃນການຜະລິດ, ກຳລັງຄວາມສາມາດແກ້ງແຍ້ງໃນຕະຫລາດກະສິກຳຂອງຫວຽດນາມ ຈະໄດ້ຮັບການແກ້ໄຂ. ເລື່ອງລັດຖະບານຢືນຢັນສ້າງເງື່ອນໄຂໃຫ້ບັນດາວິສາຫະກິດນັ້ນ ຈະນຳມາເຊິ່ງແຫລ່ງເງິນລົງທຶນໃຫຍ່ເພື່ອພັດທະນາກະສິກຳຫວຽດນາມ.