ທ່ານປະທານສະພາແຫ່ງຊາດ ຫງວຽນຊີງຮຸ່ງ ແລະ ທ່ານປະທານປະເທດຈີນ ສີຈິ້ນຜິງ
ພາບ:nld.com.vn
|
ນັບແຕ່ສ້າງການພົວພັນເປັນປົກກະຕິເມື່ອປີ 1991 ມາຮອດປະຈຸບັນ, ການພົວພັນລະຫວ່າງຫວຽດນາມ - ຈີນໄດ້ພັດທະນາຢ່າງແຮງໃນທຸກຂົງເຂດ. ບັນດາການຢ້ຽມຢາມ ແລະ ພົບປະຂັ້ນສູງໄດ້ຮັບການປະຕິບັດເປັນປະຈຳ. ການຮ່ວມມືລະຫວ່າງບັນດາກະຊວງ, ຂະແໜງການ, ທ້ອງຖີ່ນຕ່າງໆ ນັບມື້ນັບແໜ້ນແຟ້ນ. ການຢ້ຽມຢາມມິດຕະພາບ ຈີນ ຢ່າງເປັນທາງການຂອງທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ຄັ້ງນີ້, ແມ່ນສືບຕໍ່ບັນດາການເຄື່ອນໄຫວພົວພັນຕ່າງປະເທດຂອງພັກ, ລັດ ຫວຽດນາມ ໃນປີ 2015.
ການຮ່ວມມືຢ່າງມີປະສິດທິຜົນລະຫວ່າງສອງອົງການນິຕິບັນຍັດ
ພ້ອມກັບການພົວພັນລະຫວ່າງສອງພັກ, ສອງລັດ, ການພົວພັນຮ່ວມມືລະຫວ່າງສະພາແຫ່ງຊາດ ຫວຽດນາມ ແລະ ສະພາແຫ່ງຊາດ ຈີນໃນໄລຍະຜ່ານມາໄດ້ຮັບການຮັກສາ ແລະ ພັດທະນາຢ່າງບໍ່ຢຸດຢັ້ງ. ການນຳສະພາແຫ່ງຊາດສອງປະເທດໄດ້ຈັດຄະນະຜູ້ແທນ ໄປ-ມາ ແລກປ່ຽນເຊິ່ງກັນ ແລະ ກັນເປັນປະຈຳ, ປະກອບສ່ວນປັບປຸງ ແລະ ຊຸກຍູ້ສາຍພົວພັນຮ່ວມມື, ແລກປ່ຽນນຳກັນ. ສະພາແຫ່ງຊາດດຳເນີນການແລກປ່ຽນຄະນະຜູ້ແທນທຸກຂັ້ນເປັນປະຈຳ ເພື່ອແນໃສ່ແບ່ງປັນ ແລະ ຄົ້ນຄ້ວາບົດຮຽນໃນການເຄື່ອນໄຫວນິຕິບັນຍັດ, ສ້າງລະບົບກົດໝາຍຄົບຊຸດ. ໃນນັ້ນມີການຢ້ຽມຢາມຈີນຂອງທ່ານນາງຮອງປະທານສະພາແຫ່ງຊາດ ຫວຽດນາມ ຕ່ອງທິຟ໋ອງ ເມື່ອເດືອນ 1/2012; ຂອງທ່ານຮອງປະທານສະພາແຫ່ງຊາດ ຫວຽດນາມ ອວງຈູລືວ ໃນນາມເປັນປະທານຄະນະກຳມະການສັນຕິພາບ ຫວຽດນາມເມື່ອເດືອນ 9/2012; ຂອງຄະນະຜູ້ແທນສະຖາບັນຄົ້ນຄ້ວານິຕິບັນຍັດເມື່ອເດືອນ 5/2012; ຂອງຄະນະຜູ້ແທນກຳມາທິການກ່ຽວກັບບັນດາບັນຫາສັງຄົມຂອງສະພາແຫ່ງຊາດ ຫວຽດນາມເມື່ອເດືອນ 7/2013. ສ່ວນທາງຝ່າຍ ຈີນ, ກໍ່ມີການຢ້ຽມຢາມ ຫວຽດນາມຂອງທ່ານຮອງປະທານສະພາແຫ່ງຊາດ ຈີນ ຫລີຈຽນກົ້ວ ເມື່ອເດືອນ 12/2012; ຂອງຄະນະຜູ້ແທນກຳມາທິການການຕ່າງປະເທດ ສະພາແຫ່ງຊາດ ຈີນເມື່ອເດືອນ 11/2013. ພິເສດ, ໃນການຢ້ຽມຢາມ ຫວຽດນາມທາງລັດຖະກິດຂອງຕົນ ເມື່ອເດືອນ 11/2015, ທ່ານປະທານປະເທດ ຈີນ ສືຈິນຜິງ ໄດ້ມີບົດປາໄສຕໍ່ສະພາແຫ່ງຊາດຫວຽດນາມ, ໃນນັ້ນຍົກອອກສານທີ່ຕັ້ງໜ້າ, ສັນຕິພາບ ແລະ ມິດຕະພາບ.
ທີ່ບັນດາເວທີປາໄສລັດຖະສະພາຫຼາຍຝ່າຍ, ສະພາແຫ່ງຊາດສອງປະເທດຍາມໃດກໍ່ສະໜັບສະໜູນເຊິ່ງກັນ ແລະ ກັນ, ພ້ອມກັນປະກອບຂໍ້ລິເລິ່ມຫລາຍຢ່າງໃຫ້ບັນດາອົງການລັດຖະສະພາພາກພື້ນ ແລະ ໂລກ.
ຮັກສາການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ-ຈີນ
ໄລຍະປະຈຸບັນ, ການນຳສອງປະເທດບັນລຸຄວາມຮັບຮູ້ລວມທີ່ສຳຄັນ ກ່ຽວກັບທິດທາງ, ມາດຕະການຊຸກຍູ້ການພົວພັນລະຫວ່າງສອງປະເທດພັດທະນາເປັນປົກກະຕິ, ປອດໃສ ແລະ ໝັ້ນຄົງ. ປີ 2015 ກໍແມ່ນປີພິເສດໃນການພົວພັນ ລະຫວ່າງ ຫວຽດນາມ ແລະ ຈີນ, ແມ່ນປີຈັດຕັ້ງການເຄື່ອນໄຫວຫລາຍຢ່າງເພື່ອສະເຫລີມສະຫລອງ 65 ປີ ແຫ່ງວັນສ້າງຕັງການພົວພັນທາງການທູດ. ການພົວພັນມິດຕະພາບ, ການຮ່ວມມືລະຫວ່າງບັນດາກະຊວງ, ຄະນະ, ຂະແຫນງການ, ທ້ອງຖິ່ນສອງປະເທດໄດ້ຮັບການຍູ້ແຮງ. ຄຽງຄູ່ກັນນັ້ນ, ການພົວພັນຮ່ວມມືດ້ານເສດຖະກິດ, ການຄ້າ, ການລົງທຶນ ມີຄວາມຄືບຫນ້າຢ່າງຕັ້ງຫນ້າ. ການຮ່ວມມືດ້ານເສດຖະກິດ, ການຄ້າພັດທະນາຢ່າງວ່ອງໄວ. ປີ 2014 ວົງເງິນການຄ້າສອງຝ່າຍບັນລຸກວ່າ 58 ຕື້ USD. ໃນ 10 ເດືອນຕົ້ນປີ 2015 ບັນລຸເກືອບ 55 ຕື້ USD. ກ່ຽວກັບການລົງທຶນ, ໄລ່ຮອດເດືອນ 10/2015, ຈີນ ມີກວ່າ 1.200 ໂຄງການລົງທຶນຢູ່ ຫວຽດນາມ ດ້ວຍຍອດຈຳນວນທຶນຈົດທະບຽນກວ່າ 8,4 ຕື້ USD, ຢືນອັນດັບທີ 9 ໃນຈຳນວນ 105 ປະເທດ ແລະ ເຂດແຄ້ວນທີ່ມີເງິນລົງທຶນຢູ່ຫວຽດນາມ. ຈຳນວນແຂກທ່ອງທ່ຽວ ຈີນ ມາຢ້ຽມຢາມຫວຽດນາມ ໃນ 10 ເດືອນຕົ້ນປີ 2015 ບັນລຸກວ່າ 1,4 ລ້ານເທື່ອຄົນ. ການຮ່ວມມືລະຫວ່າງສອງປະເທດໃນບັນດາຂົງເຂດວິທະຍາສາດເຕັກນິກ, ການສຶກສາບຳລຸງສ້າງ, ການທ່ອງທ່ຽວ, ການພົວພັນແລກປ່ຽນປະຊາຊົນໄດ້ຮັບການຍູ້ແຮງ. ເຖິງວ່າ ຍັງມີຄວາມຫຍຸ້ງຍາກ, ຂໍ້ຕິດຂັດຈຳນວນຫນຶ່ງໃນການພົວພັນສອງຝ່າຍກໍຕາມ, ແຕ່ສະພາບການຢູ່ເຂດຊາຍແດນທາງບົກ ແລະ ອ່າວພາກເຫນືອ ເປັນປົກກະຕິໂດຍພື້ນຖານ. ການຜັນແປຢູ່ທະເລຕາເວັນອອກ ຍັງສັບສົນຢູ່, ເປັນຕົ້ນແມ່ນເລື່ອງຈີນ ຖົມດິນກໍ່ສ້າງເກາະທຽມຢູ່ໝູ່ເກາະ ເຈື່ອງຊາ ເຮັດໃຫ້ຫາງສຽງຫວຽດນາມມ ແລະ ປະຊາຄົມສາກົນມີຄວາມວິຕົກກັງວົນ. ເຖິງຢ່າງໃດກໍຕາມ, ສອງຝ່າຍໄດ້ເຫັນດີ ຢືດໝັ້ນການເຈລະຈາເພື່ອແກ້ໄຂບັນດາຄວາມບໍ່ລົງລອຍກັນ, ຂໍ້ຕັດຂັດ ເຮັດໃຫ້ການພົວພັນລະຫວ່າງສອງປະເທດປອດໃສ, ເປັນປົກກະຕິ, ເພື່ອຜົນປະໂຫຍດຂອງປະຊາຊົນສອງປະເທດ.
ບົນພື້ນຖານັ້ນ, ການຢ້ຽມຢາມຂອງທ່ານປະທານສະພາແຫ່ງຊາດ ຫງວຽນຊີງຮຸ່ງ ມີຄວາມໝາຍສຳຄັນຍິ່ງໃນການພົວພັນສອງຝ່າຍ ຫວຽດນາມ - ຈີນ ກໍຄື ໃນການພົວພັນກັບຕ່າງປະເທດຂອງ ຫວຽດນາມ. ນີ້ແມ່ນການຢ້ຽມຢາມຈີນເປັນຄັ້ງທຳອິດ ຂອງທ່ານປະທານສະພາແຫ່ງຊາດ ຫງວຽນຊີງຮຸ່ງ ໃນຖານະປະທານ ສະພາແຫ່ງຊາດຊຸດທີ 13. ໃນສະພາບການພົວພັນລະຫວ່າງ ຫວຽດນາມ ແລະ ຈີນ ຮັກສາທ່າອ່ຽງພັດທະນາຢ່າງຕັ້ງຫນ້ານັ້ນ, ການຢ້ຽມຢາມ ປະກອບສ່ວນປະຕິບັດຄວາມຮັບຮູ້ລວມຂອງການນຳຂັ້ນສູງສອງພັກ, ສອງລັດ ກ່ຽວກັບການພົວພັນຖານບ້ານໃກ້ເຮືອນຄຽງ, ມິດຕະພາບທີ່ເປັນມູນເຊື້ອລະຫວ່າງ ຫວຽດນາມ ແລະ ຈີນ ແມ່ນໂອກາດເພື່ອໃຫ້ສອງຝ່າຍຊຸກຍູ້ການພົວພັນແລກປ່ຽນ, ການຮ່ວມມືລະຫວ່າງສອງສະພາແຫ່ງຊາດ ແລະ ແລກປ່ຽນກ່ຽວກັບບັນຫາສຳຄັນຍິ່ງໃນການພົວພັນລະຫວ່າງຫວຽດນາມ ແລະ ຈີນ. ສຳລັບ ຫວຽດນາມ, ການຢ້ຽມຢາມ ເພື່ອຢັ້ງຢືນທັດສະນະສະເໝີຕົ້ນສະເຫມີປາຍ ແມ່ນຖືເປັນສຳຄັນ ແລະ ປາດຖະຫນາຢາກພັດທະນາການພົວພັນອັນດີງາມ, ແທດຈິງ ກັບຈີນ ບົນພື້ນຖານເຄົາລົບເຊິ່ງກັນ ແລະກັນ, ສະເຫມີພາບ ແລະ ຕ່າງຝ່າຍຕ່າງມີຜົນປະໂຫຍດ.