ວັນທີ 25/11, ທ່ານປະທານປະເທດຫວຽດນາມ ເຈີນດ້າຍກວາງ ໄດ້ນຳໜ້າຄະນະຜູ້ແທນຫວຽດນາມເຂົ້າຮ່ວມກອງປະຊຸມສຸດຍອດບັນດາປະເທດໃຊ້ພາສາຝະລັ່ງຄັ້ງທີ 16 ຊຶ່ງຖືກຈັດຂຶ້ນຢູ່ Antananarivo, Madagascar ແຕ່ວັນທີ 26-27/11/2016. ຄະນະຜູ້ແທນຫວຽດນາມເຂົ້າຮ່ວມກອງປະຊຸມຈະສືບຕໍ່ປັບປຸງ, ເພີີ່ມທະວີສາຍພົວພັນຮ່ວມມືລະຫວ່າງຫວຽດນາມ ແລະ ປະຊາຄົມບັນດາປະເທດໃຊ້ພາສາຝະລັ່ງ.
ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິນມິນ ກັບ ເລຂາທິການໃຫຍ່ອົງການພາສາຝະລັ່ງສາກົນ |
ໃນເດືອນ 2/1986, ຕາມຂໍ້ລິເລີ່ມຂອງອະດີດປະທານາທິບໍດີຝະລັ່ງ Francois Mitterran, ກອງປະຊຸມສຸດຍອດຄັ້ງທີ 1 ບັນດາປະເທດໃຊ້ພາສາຝະລັ່ງໄດ້ຖືກຈັດຂຶ້ນຢູ່ປາຣີປະເທດຝະລັ່ງໂດຍມີການເຂົ້າຮ່ວມຂອງຜູ້ນຳລັດ, ລັດຖະບານ ບັນດາປະເທດໃຊ້ພາສາຝະລັ່ງຈຳນວນເກືອບ 40 ທ່ານ. ນີ້ເປັນຂີດໝາຍຕໍ່ການສ້າງຕັ້ງປະຊາຄົມ ບັນດາປະເທດໃຊ້ພາສາຝະລັ່ງຢ່າງເປັນທາງການ. ນັບແຕ່ນັ້ນມາຮອດປະຈຸບັນ, ປະຊາຄົມດຳເນີນກອງປະຊຸມສຸດຍອດໄດ້ 15 ຄັ້ງ.
ປະຊາຄົມໜຶ່ງທີ່ມີຫຼາຍຮູບຫຼາຍສີ
ປະຈຸບັນ, ປະຊາຄົມບັນດາປະເທດໃຊ້ພາສາຝະລັ່ງມີທັງໝົດ 80 ປະເທດສະມາຊິກ ແລະ ປະເທດສັງເກດການທີ່ຂຶ້ນກັບ 5 ທະວີບ ດ້ວຍປະມານ 220 ລ້ານຄົນທີ່ໃຊ້ພາສາຝະລັ່ງໃນຍອດຈຳນວນປະຊາກອນ 890 ລ້ານຄົນໃນປະຊາຄົມ. ການຮັກສາວັດທະນະທຳທີ່ມີຫຼາຍຮູບຫຼາຍສີ ແລະ ພາສາຍາມໃດກໍແມ່ນຈຸດໝາຍທີ່ສະເໝີຕົ້ນສະເໝີປາຍຂອງປະຊາຄົມ ແລະ ຕິດພັນກັບການຊຸກຍູ້ພາສາຝະລັ່ງໃນບັນດາເວທີປາໄສສາກົນ. ປະຊາຄົມບັນດາປະເທດໃຊ້ພາສາຝະລັ່ງໄດ້ຕັ້ງໜ້າຂົນຂວາຍໃຫ້ມີຄວາມຫຼາກຫຼາຍທາງດ້ານພາສາຢູ່ບັນດາເວທີປາໄສສາກົນ. ປະຊາຄົມບັນດາປະເທດໃຊ້ພາສາຝະລັ່ງໄດ້ຕັ້ງໜ້າຂົນຂວາຍໃຫ້ມີຄວາມຫຼາກຫຼາຍທາງດ້ານພາສາໃນບັນດາເວທີປາໄສສາກົນດ້ວຍການຊຸກຍູ້ການຮັບຮອງເອົາສົນທິສັນຍາສາກົນກ່ຽວກັບຄວາມມີຫຼາຍຮູບຫຼາຍສີທາງດ້ານວັດທະນະທຳຢູ່ຄະນະກຳມະການວັດທະນະທຳ, ການສຶກສາ, ວິທະຍາສາດຂອງສະຫະປະຊາຊາດ (UNESCO) ປີ 2005. ປະຊາຄົມບັນດາປະເທດໃຊ້ພາສາຝະລັ່ງໄດ້ປະກອບສ່ວນເຂົ້າໃນບັນດາຄວາມມານະພະຍາຍາມຮ່ວມຂອງປະຊາຄົມໂລກ ແນໃສ່ຊຸກຍູ້ສັນຕິພາບ ແລະ ຄວາມໝັ້ນຄົງໃນໂລກ, ສະຫງວນຫຼາຍແຫຼ່ງກຳລັງແນໃສ່ຊອກຫາວິທີການແກ້ໄຂຍາວນານໃຫ້ແກ່ວິກິດການ, ການປະທະກັນ, ຫນູນຊ່ວຍວິວັດທະນາການປະຕິບັດປະຊາທິປະໄຕ ແລະ ກໍ່ສ້າງລັດແຫ່ງກົດໝາຍຢູ່ບາງປະເທດສະມາຊິກອາຟະລິກາ.
ໃນຊຸມປີມໍ່ໆມານີ້, ປະຊາຄົມບັນດາປະເທດໃຊ້ພາສາຝະລັ່ງໄດ້ເອົາໃຈໃສ່ຊຸກຍູ້ການຮ່ວມມືເສດຖະກິດ, ເອົາໃຈໃສ່ສ້າງວຽກເຮັດງານທຳໃຫ້ແກ່ແມ່ຍິງ ແລະ ຊາວໜຸ່ມ. ໃນເດືອນ 11/2014, ເປັນຄັ້ງທຳອິດທີ່ເອກະສານກອງປະຊຸມສຸດຍອດບັນດາປະເທດໃຊ້ພາສາຝະລັ່ງໄດ້ສະແດງຄວາມວິຕົກກັງວົນຕໍ່ສະພາບການຢູ່ທະເລຕາເວັນອອກ ແລະ ຮຽກຮ້ອງໃຫ້ບັນດາຝ່າຍທີ່ກ່ຽວຂ້ອງຈົ່ງລະງັບໃຈ, ແກ້ໄຂການຂັດແຍ້ງດ້ວຍມາດຕະການໂດຍສັນຕິວິທີ, ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982; ຊົມເຊີຍບັນດາຄວາມມານະພະຍາຍາມແນໃສ່ຮັກສາສັນຕິພາບ, ຄວາມໝັ້ນຄົງ ແລະ ສະຖຽນລະພາບ, ຄວາມເສລີ, ປອດໄພໃນການເດີນທະເລ, ການບິນໃນພາກພື້ນ.
ຫວຽດນາມແມ່ນສະມາຊິກທີ່ຕັ້ງໜ້າໃນປະຊາຄົມ
ການພົວພັນລະຫວ່າງຫວຽດນາມ ແລະ ປະຊາຄົມບັນດາປະເທດໃຊ້ພາສາຝະລັ່ງ ນັບມື້ນັບຂະຫຍາຍຕົວ. ບັນດາປະເທດໃຊ້ພາສາຝະລັ່ງສ່ວນຫຼາຍຕ່າງກໍຕັ້ງໜ້າສະໜັບສະໜູນການຕໍ່ສູ້ຍາດເອົາເອກະລາດແຫ່ງຊາດ. ໃນກ່ວາ 30 ປີທີ່ຜ່ານມາ, ຫວຽດນາມໄດ້ຮັບການຊ່ວຍເຫຼືອຢ່າງເລີດລ້ຳຈາກປະຊາຄົມບັນດາປະເທດໃຊ້ພາສາຝະລັ່ງກ່ຽວກັບແຫຼ່ງທຶນ, ພູມປັນຍາ ແລະ ເຕັກນິກ. ພ້ອມກັນນັ້ນ, ປະຊາຄົມບັນດາປະເທດໃຊ້ພາສາຝະລັ່ງກໍແມ່ນເວທີປາໄສເພື່ອໃຫ້ຫວຽດນາມຜັນຂະຫຍາຍນະໂຍບາຍການຕ່າງປະເທດ, ແມ່ນຊອງເພື່ອຍາດແຍ່ງເພີ່ມທະວີການພົວພັນສອງຝ່າຍກັບບາງປະເທດສະມາຊິກພັດທະນາ ແລະ ກັບບັນດາປະເທດເພື່ອນມິດອາຟະລິກາທີ່ເປັນມູນເຊື້ອ. ສາຍພົວພັນອັນດີງາມລະຫວ່າງຫວຽດນາມ ແລະ ປະຊາຄົມບັນດາປະເທດໃຊ້ພາສາຝະລັ່ງໄດ້ຖືກຂີດໝາຍດ້ວຍການເຂົ້າຮ່ວມກອງປະຊຸມສຸດຍອດ ປະຊາຄົມບັນດາປະເທດໃຊ້ພາສາຝະລັ່ງຂອງການນຳຂັ້ນສູງຫວຽດນາມ.
ດ້ວຍການຈັດຕັ້ງກອງປະຊຸມສຸດຍອດຄັ້ງທີ 7 ປີ 1997 ຢູ່ຮ່າໂນ້ຍ, ຫວຽດນາມໄດ້ປະກອບສ່ວນສຳຄັນເຂົ້າໃນການຫັນການເຄື່ອນໄຫວດ້ານການເມືອງໃຫ້ເປັນລະບອບລະບຽບການ, ຍົກສູງການຮ່ວມມືເສດຖະກິດພ້ອມກັບບັນດາຂົງເຂດການເມືອງ, ວັດທະນະທຳ-ພາສາ ແລະ ການສຶກສາ-ກໍ່ສ້າງ. ຍ້ອນໄດ້ເຂົ້າຮ່ວມໃນບັນຫາບຸລິມະສິດເກືອບທັງໝົດຂອງປະຊາຄົມ, ຈາກການວາງຍຸດທະສາດການຮ່ວມມື, ຊຸກຍູ້ການປະຕິຮູບດ້ານການບໍລິຫານ, ການເງິນຕະຫຼອດຮອດການດັດປັບແຫຼ່ງກຳລັງໃຫ້ແກ່ບັຍດາຂົງເຂດການສຶກສາ ແລະ ພັດທະນາ, ດັ່ງນັ້ນຫວຽດນາມໄດ້ຮັບຖືວ່າ ນອນໃນກຸ່ມປະເທດພວມພັດທະນາທີ່ເປັນແກ່ນສານ, ມີສຽງເວົ້າສຳລັບການວາງແຜນກຳນົດ ແລະ ຜັນຂະຫຍາຍຍຸດທະສາດຮ່ວມມືຂອງ ປະຊາຄົມບັນດາປະເທດໃຊ້ພາສາຝະລັ່ງ. ຫວຽດນາມໄດ້ຮັບຄວາມໄວ້ວາງໃຈຈາກປະຊາຄົມເລືອກຕັ້ງເຂົ້າຕຳແໜ່ງຕ່າງໆທີ່ສຳຄັນເຊັ່ນ: ປະທານສະພາປະຈຳ ປະຊາຄົມບັນດາປະເທດໃຊ້ພາສາຝະລັ່ງ, ປະທານກອງປະຊຸມລັດຖະມົນຕີບັນດາປະເທດໃຊ້ພາສາຝະລັ່ງ, ປະທານກອງປະຊຸມຂັ້ນສູງອາຍຸການ 1997 – 1998….
ການເຂົ້າຮ່ວມ ກອງປະຊຸມສຸດຍອດບັນດາປະເທດໃຊ້ພາສາຝະລັ່ງຄັ້ງທີ 16 ຊຶ່ງຖືກຈັດຂຶ້ນຢູ່ Antananarivo, Madagascar ຂອງທ່ານປະທານປະເທດຫວຽດນາມ ເຈີນດ້າຍກວາງ ແມ່ນເຫດການການເມືອງທີ່ສຳຄັນ, ປະກອບສ່ວນຊຸກຍູ້ການພົວພັນຮ່ວມມືລະຫວ່າງຫວຽດນາມກັບ ປະຊາຄົມບັນດາປະເທດໃຊ້ພາສາຝະລັ່ງ, ຢັ້ງຢືນຫວຽດນາມແມ່ນຄູ່ຮ່ວມມືທີ່ໄວ້ວາງໃຈ ແລະ ສຳຄັນຂອງຫຼາຍປະເທດສະມາຊິກໃນປະຊາຄົມ.