(vovworld) - ດັ່ງທີ່ພວກເຮົາໄດ້ໃຫ້ຂ່າວໄປແລ້ວ, ວັນທີ 7/8, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ແລະ ພັນລະຍາ ພ້ອມກັບຄະນະຜູ້ແທນຂັ້ນສູງລັດຖະບານຫວຽດນາມ ໄດ້ເດີນທາງອອກຈາກຮ່າໂນ້ຍ ໄປ ກົວລາລຳເປີ ຢ້ຽມຢາມມາເລເຊຍ ຢ່າງເປັນທາງການໃນລະຫວ່າງວັນທີ 7-8/8, ຫຼັງຈາກນັ້ນຈະຢ້ຽມຢາມສິງຄະໂປ, ເພື່ອເຂົ້າຮ່ວມພິທີສະເຫຼີມສະຫຼອງ 50 ປີ ແຫ່ງວັນເອກະລາດປະເທດນີ້ຄືວັນທີ 9/8. ການຢ້ຽມຢາມສອງປະເທດນີ້ ຕາມຄຳເຊີນຂອງທ່ານນາຍົກລັດຖະມົນຕີມາເລເຊຍ NaJip Razak ແລະ ທ່ານນາຍົກລັດຖະມົນຕີສິງຄະໂປ ຫຼີຊຽນຫຼົງ ນັ້ນ, ຈະຮັດແໜ້ນການພົວພັນຮ່ວມມືລະຫວ່າງຫວຽດນາມ ກັບບັນດາປະເທດນີ້ກວ່າອີກ.
ການຢ້ຽມຢາມຂອງທ່ານ ນາຍົກລັດຖະມົນຕີ ຫງວຽນເຕິ໋ນຢຸງ ເຖິງສອງປະເທດມາເລເຊຍ ແລະ ສິງຄະໂປ ແມ່ນເຫດການການເມືອງສຳຄັນ, ຢັ້ງຢືນນະໂຍບາຍຂອງພັກ, ລັດຫວຽດນາມ ທີ່ຍາມໃດກໍ່ຖືເປັນສຳຄັນ ແລະ ສະຫງວນບຸລິມາສິດໃຫ້ການພົວພັນກັບບັນດາປະເທດບ້ານໃກ້ເຮືອນຄຽງໃນພາກພື້ນ, ພິເສດແມ່ນໃນສະພາບຫວຽດນາມ, ມາເລເຊຍ ແລະ ສິງຄະໂປ ພ້ອມກັບບັນດາປະເທດສະມາຊິກອື່ນໆຂອງອາຊຽນ ພວມມານະພະຍາຍາມສ້າງຕັ້ງປະຊາຄົມອາຊຽນໃນທ້າຍປີນີ້,
ມຸ້ງໄປເຖິງການສ້າງຕັ້ງການພົວພັນຄູ່ຮ່ວມມືຍຸດທະສາດຫວຽດນາມ - ມາເລເຊຍ
ໜຶ່ງໃນບັນດາຄາດໝາຍສຳຄັນໃນການຢ້ຽມຢາມມາເລເຊຍຢ່າງເປັນທາງການຄັ້ງນີ້ຂອງທ່ານ ນາຍົກລັດຖະມົນຕີ ຫງວຽນເຕິ໋ນຢຸງ, ນັ້ນແມ່ນສ້າງການພົວພັນຄູ່ຮ່ວມມືຍຸດທະສາດຫວຽດນາມ - ມາເລເຊຍ. ນີ້ແມ່ນຄວາມສົນໃຈລວມ, ທັງແມ່ນຄວາມປາຖະໜາຢາກຍົກສາຍພົວພັນ ສອງຝ່າຍຂອງສອງປະເທດຂຶ້ນລະດັບສູງກວ່າ. ມາຮອດປະຈຸບັນ, ການພົວພັນຮ່ວມມືລະຫວ່າງຫວຽດນາມ ແລະ ມາເລເຊຍ ພວມພັດທະນາຢ່າງຕັ້ງໜ້າ, ພິເສດແມ່ນພາຍຫຼັງກວ່າ 10 ປີແຫ່ງສອງປະເທດຜັນຂະຫຍາຍຖະແຫຼງການຮ່ວມກ່ຽວກັບຂອບເຂດການຮ່ວມມືຮອບດ້ານໃນສະຕະວັດທີ 21, ໄດ້ ແລະ ພວມນຳມາເຊິ່ງຜົນປະໂຫຍດຫຼາຍຢ່າງໃຫ້ທັງຫວຽດນາມ ແລະ ມາເລເຊຍ.
ບົນພື້ນຖານການພົວພັນດ້ານການເມືອງອັນດີງາມ ແລະ ຄວາມໄວ້ເນື້ອເຊື່ອໃຈລະຫວ່າງຫວຽດນາມ ແລະ ມາເລເຊຍ ນັບມື້ນັບໄດ້ຮັບການປັບປຸງ ຜ່ານບັນດາການຢ້ຽມຢາມຂັ້ນສູງ ແລະ ທຸກຂັ້ນລະຫວ່າງ 2 ປະເທດ, ປະຈຸບັນ ມາເລເຊຍ ແມ່ນໜຶ່ງໃນຈຳນວນ 10 ຄູ່ຮ່ວມມືການຄ້າໃຫຍ່ທີ່ສຸດຂອງຫວຽດນາມ. ຖ້າປີ 2010, ວົງເງິນການຄ້າ 2 ສົ້ນລະຫວ່າງ 2 ປະເທດແມ່ນ 5,5 ຕື້ໂດລາສະຫະລັດ, ຮອດປີ 2010, ຕົວເລກນີ້ໄດ້ເພີ່ມຂຶ້ນກວ່າ 8 ຕື້ໂດລາສະຫະລັດ. ສິ່ງທີ່ໜ້າສົນໃຈນັ້ນແມ່ນ, ເຖິງວ່າໃນສະພາບທີ່ເສດຖະກິດທົ່ວໂລກພວມຊຸດໂຊມກໍຕາມ ແຕ່ການເຕີບໂຕດ້ານການຄ້າລະຫວ່າງຫວຽດນາມ ແລະ ມາເລເຊຍ ຍັງເພີ່ມຂຶ້ນຜ່ານແຕ່ລະປີ. ມາເລເຊຍ ພວມແມ່ນຕະຫຼາດບໍລິໂພກ, ອຸປະໂພກ ບັນດາຜະລິດຕະພັນຕົ້ນຕໍ່ຂອງຫວຽດນາມ ຄື: ນ້ຳມັນດິບ, ເຂົ້າສານ, ກາເຟ, ສິນໃນນ້ຳ, ໃນນັ້ນເຂົ້າສານຂອງຫວຽດນາມ ຍາມໃດກໍກວມ 50% ປະລິມານເຂົ້າສານນຳເຂົ້າແຕ່ລະປີຂອງມາເລເຊຍ. ໃນຂົງເຂດຮ່ວມມືລົງທຶນລະຫວ່າງ 2 ປະເທດກໍສ້າງຄວາມປະທັບໃຈຄືການພົວພັນດ້ານການຄ້າ. ດ້ວຍ 500 ໂຄງການລົງທຶນລວມມູນຄ່າເກືອບ 11 ຕື້ດົງ, ມາເລເຊຍ ພວມຢືນອັນດັບ 8 ໃນຈຳນວນ 100 ປະເທດ ແລະ ເຂດແຄ້ວນລົງທຶນເຂົ້າຫວຽດນາມ ແລະ ບັນດາວິສາຫະກິດຫວຽດນາມ ກໍເລີ່ມເປີດກວ້າງການລົງທຶນໄປຍັງປະເທດນີ້, ໂດຍສະເພາະແມ່ນໃນຂົງເຂດສຳຫຼວດ, ຂຸດຄົ້ນນ້ຳມັນອາຍແກສ ແລະ ດ້ວຍ 2 ໂຄງການເທົ່ານັ້ນກໍມີຈຳນວນເງິນລົງທຶນ 558 ລ້ານໂດລາສະຫະລັດແລ້ວ.
ພ້ອມກັບການຮ່ວມມືດ້ານເສດຖະກິດ, ບັນດາຂົງເຂດຮ່ວມມືດ້ານການສຶກສາ, ກິລາ, ທ່ອງທ່ຽວ, ປ້ອງກັນຊາດ ປ້ອງກັນຄວາມສະຫງົບ, ແຮງການ, ສົ່ງອອກ ນຳເຂົ້າຖ່ານຫີນ… ລະຫວ່າງຫວຽດນາມ ແລະ ມາເລເຊຍ ກໍໄດ້ຮັບການເປີດກວ້າງຢ່າງບໍ່ຢຸດຢັ້ງ. 2 ປະເທດກໍພວມສົມທົບກັນແກ້ໄຂບັນຫາຊາວປະມົງ ແລະ ກຳປັ່ນທີ່ລະເມີດເຂດທະເລ ກໍຄືວຽກງານປົກປ້ອງພົນລະເມືອງຢ່າງຕັ້ງໜ້າ.
ດ້ວຍສາຍພົວພັນດ້ານການເມືອງທີ່ໄວ້ເນຶ້ອເຊື່ອໃຈ ເຊິ່ງໄດ້ຮັບການເພີ່ມພູນຄູນມາເປັນເວລາສ້າງກວ່າ 40 ປີຜ່ານມາ ດ້ວຍບັນດາຜົນປະໂຫຍດແທດຈິງທີ່ນຳມາເຊິ່ງແຕ່ລະປະເທດຫວ່າງແລ້ວນີ້ ແລະ ພິເສດແມ່ນດ້ວຍຄວາມສາມາດບົ່ມຊ້ອນ, ທ່າແຮງຢ່າງຫຼວງຫຼາຍລະຫວ່າງ 2 ປະເທດ, ການຢ້ຽມຢາມມາເລເຊຍ ຢ່າງເປັນທາງການຂອງນາຍົກລັດຖະມົນຕີ ຫງວຽນເຕິ໋ນຢຸງ ຄັ້ງນີ້ ແມ່ນໂອກາດເພື່ອໃຫ້ຫວຽດນາມ ແລະ ມາເລເຊຍສ້າງການພົວພັນຄູ່ຮ່ວມມືຍຸດທະສາດໃນລະດັບສູງກວ່າ
ຮັດແໜ້ນຄວາມໄວ້ເນື້ອເຊື່ອໃຈດ້ານການເມືອງກັບສິງຄະໂປ
ສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືສອງຝ່າຍລະຫວ່າງຫວຽດນາມ ແລະ ສິງຄະໂປກໍ່ໄດ້ຮັບການພັດທະນາຢ່າງໄວ ແລະ ແຮງ. ສອງຝ່າຍຖືເປັນສຳຄັນການຊຸກຍູ້ສາຍພົວພັນຄູ່ຮ່ວມມືຍຸດທະສາດສອງຝ່າຍ ເຊິ່ງໄດ້ຮັບການສ້າງຕັ້ງແຕ່ເດືອນ 9/2013 ຕາມທິດແທດຈິງ ແລະ ໄວ້ເນື້ອເຊື່ອໃຈເຊິ່ງກັນ ແລະ ກັນ, ແລກປ່ຽນຄະນະຜູ້ແທນລະຫວ່າງປະເທດຕ່າງໆເປັນປະຈຳ, ນັບມື້ນັບເປີດກວ້າງການຮ່ວມມືກວ່າອີກ. ສິງຄະໂປ ແມ່ນລູກຄ້າໃຫຍ່ອັນດັບ 3 ຂອງຫວຽດນາມ ໃນອາຊຽນ ແລະ ໃຫຍ່ອັນດັບ 8 ຢູ່ໂລກ. ດ້ວຍວົງເງິນການຄ້າສອງສົ້ນປີ 2014 ແມ່ນ 9,8 ຕື້ໂດລາສະຫະລັດ. ກ່ຽວກັບການລົງທຶນ, ປະຈຸບັນ, ສິງຄະໂປ ຖືກຈັດອັນດັບ 3 ໃນຈຳນວນປະເທດ ແລະ ເຂດແຄວ້ນລົງທຶນເຂົ້າຫວຽດນາມ, ເຊິ່ງລວມມີ 1400 ກວ່າໂຄງການພວມມີຜົນສັກສິດ, ດ້ວຍຍອດຈຳນວນທຶນຈົດທະບຽນແມ່ນກວ່າ 33 ຕື້ໂດລາສະຫະລັດ. ສ່ວນການຮ່ວມມືໃນຂົງເຂດອື່ນເຊັ່ນ, ການສຶກສາ, ບຳລຸງສ້າງ, ການທ່ອງທ່ຽວ, ການເງິນ, ການປ້ອງກັນຊາດ, ປ້ອງກັນຄວາມສະຫງົບ ລ້ວນແຕ່ມີບັນດາບາດກ້າວພັດທະນາຢ່າງຕັ້ງໜ້າ.
ດ້ວຍການພົວພັນອັນດີງາມໃນໄລຍະຜ່ານມາ, ພ້ອມກັບການມີໜ້າຂອງທ່ານ ນາຍົກລັດຖະມົນຕີ ຫງວຽນເຕິ໋ນຢຸງ ແລະ ພັນລະຍາທີ່ພິທີສະເຫຼີມສະຫຼອງ 50 ປີແຫ່ງວັນເອກະລາດສິງຄະໂປ ເຊິ່ງດຳເນີນໃນວັນທີ 9/8 ນັ້ນ ຈະປະກອບສ່ວນຮັດແໜ້ນຄວາມໄວ້ເນື້ອເຊື່ອໃຈດ້ານການເມືອງກັບບັນດາການນຳສິງຄະໂປ, ປັບປຸງການພົວພັນຄູ່ຮ່ວມມືຍຸດທະສາດລະຫວ່າງສອງປະເທດໃຫ້ນັບມື້ນັບເລິກເຊິ່ງ, ແທດຈິງ ແລະ ມີປະສິດທິຜົນ, ພິເສດແມ່ນໃນຂົງເຂດເສດຖະກິດ, ການຄ້າ, ການລົງທຶນ.