(vovworld)- ການພົບປະແລກປ່ຽນມິດຕະພາບກຳລັງປ້ອງກັນປະເທດຢູ່ເຂດຊາຍແດນຫວຽດນາມ - ຈີນ ຄັ້ງທີ 3 ແລະ ບັນດາການເຄື່ອນໄຫວກ່ຽວຂ້ອງ ໂດຍ ກະຊວງປ້ອງກັນປະເທດຫວຽດນາມ ແລະ ກະຊວງປ້ອງກັນປະເທດ ຈີນ ຈັດຕັ້ງ ຢູ່ ນະຄອນ ລ້າງເຊີນ (ຫວຽດນາມ) ແລະ ແຂວງ ກວາງຊີ (ຈີນ). ການພົບປະແລກປ່ຽນມິດຕະພາບ ຫວຽດນາມ - ຈີນ ປີນີ້ ອີກຄັ້ງຫນຶ່ງປະກອບສ່ວນເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ສ້າງກຳລັງຫນູນໃຫມ່, ຄວາມຕັດສິນໃຈໃຫມ່ ເຮັດໃຫ້ການພົວພັນຄູ່ຮ່ວມມືການຮ່ວມມືຍຸດທະສາດຮອບດ້ານ ຫວຽດນາມ - ຈີນ ເລິກເຊິ່ງກວ່າ, ກໍ່ສ້າງເຂດຊາຍແດນຫວຽດນາມ - ຈີນ ກາຍເປັນເຂດຊາຍແດນສັນຕິພາບ, ມິດຕະພາບ, ການຮ່ວມມືພັດທະນາຢ່າງມີສະຖຽນລະພາບ ແລະ ໝັ້ນຄົງ.
ການພົບປະແລກປ່ຽນມິດຕະພາບກຳລັງປ້ອງກັນປະເທດຢູ່ເຂດຊາຍແດນ ຫວຽດນາມ - ຈີນ ໄດ້ກາຍເປັນການເຄື່ອນໄຫວປະຈຳປີ ມີຄວາມໝາຍສຳຄັນສຳລັບການດຳເນີນຊີວິດດ້ານການເມືອງ, ດ້ານຈິດໃຈຂອງທະຫານ ແລະ ປະຊາຊົນຢູ່ເຂດຊາຍແດນສອງປະເທດຫວຽດນາມ ແລະຈີນ. ພິເສດກວ່າ, ນັ້ນແມ່ນການເຄື່ອນໄຫວມີລັກສະນະ ເປັນສັນຍາລັກຂອງກອງທັບປະຊາຊົນສອງປະເທດມີຊາຍແດນຮ່ວມ.
ຄະນະຜູ້ແທນກຳລັງປ້ອງກັນປະເທດຫວຽດນາມ-ຈີນເຂົ້າຮ່ວມ
ການພົບປະມິດຕະພາບ
ພາບ:TTXVN
|
ສືບທອດປະຫວັດຄວາມເປັນມາຂອງສາຍພົວພັນມິດຕະພາບລະຫວ່າງກອງທັບສອງປະເທດ
ຫວຽດນາມ ແລະ ຈີນ ມີພູຜາປ່າໄມ້ແມ່ນ້ຳລຳເຊຕິດຕໍ່ກັນ. ປັດໄຈພູມສາດທຳມະຊາດ ແລະ ວິວັດແຫ່ງການພັດທະນາຂອງປະຫວັດສາດໄດ້ເຮັດໃຫ້ສອງປະເທດສະຫນິດຕິດພັນນຳກັນ, ສ້າງເປັນຫລາຍຈຸດວັດທະນະທຳ, ຮີດຄອງປະເພນີຄ້າຍຄືກັນ. ໃນພາລະກິດແຫ່ງການຕໍ່ສູ້ປົດປ່ອຍຊາດກ່ອນນີ້, ປະຊາຊົນ ແລະ ກອງທັບສອງປະເທດ ໄດ້ຮຽງບ່າຮຽງໄຫລ່ກັນ, ສະຫນັບສະຫນູນ ແລະ ຊ່ວຍເຫລືອເຊິ່ງກັນ ແລະກັນ.
ໃນໄລຍະປະຈຸບັນ, ສອງປະເທດພ້ອມກັນກ້າວເຂົ້າສູ່ໄລຍະຫລັກແຫລ່ງແກ່ນສານຂອງກິດຈະການປ່ຽນແປງໃຫມ່, ການປະຕິຮູບເປີດປະຕູ. ຜັນຂະຫຍາຍຄວາມຮັບຮູ້ລວມຂອງການນຳຂັ້ນສູງສອງປະເທດກ່ຽວກັບການເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ຊຸກຍູ້ການພົວພັນຄູ່ຮ່ວມມືການຮ່ວມມືຍຸດທະສາດພັດທະນາເປັນປົກກະຕິ, ໝັ້ນຄົງ, ແກ້ໄຂຄວາມບໍ່ລົງລອຍກັນບົນພື້ນຖານການເຈລະຈາສັນຕິພາບ, ເຄົາລົບກົດໝາຍສາກົນ, ການພົບປະແລກປ່ຽນມິດຕະພາບປ້ອງກັນປະເທດຢູ່ຊາຍແດນ ຫວຽດນາມ - ຈີນ ບໍ່ພຽງແຕ່ເປັນການເພີ່ມທະວີຄວາມໄວ້ເນື້ອເຊື່ອໃຈ, ໄມຕິຈິດມິດຕະພາບ, ຄວາມສາມັກຄີລະຫວ່າງປະຊາຊົນ, ກອງທັບສອງປະເທດເວົ້າລວມ, ລະຫວ່າງອຳນາດການປົກຄອງທ້ອງຖິ່ນ, ປະຊາຊົນຢູ່ເຂດຊາຍແດນ ແລະ ກຳລັງປົກປັກຮັກສາຊາຍແດນສອງປະເທດເວົ້າສະເພາະເທົ່ານັ້ນ, ຫາກຍັງປະກອບສ່ວນຕໍ່ສູ້ຕ້ານບັນດາຖ້ອຍທຳນອງເສັກສັນປັ້ນແຕ່ງການພົວພັນມິດຕະພາບລະຫວ່າງ ຫວຽດນາມ ແລະ ຈີນ ຂອງບັນດາອິດທິກຳລັງທີ່ເປັນປໍລະປັກອີກດ້ວຍ. ພົນໂທ ຊືຈຽນກົ້ວ, ຮອງເສນາທິການໃຫຍ່ ກອງເສນາທິການ, ຄະນະພັກການທະຫານສູນກາງຈີນ ຖືວ່າ:
“ພວກເຮົາຈົ່ງສາມັກຄີກັນຢ່າງແຫນ້ນແຟ້ນກວ່າ, ຮ່ວມແຮງຮ່ວມໃຈສ້າງຄູ່ຮ່ວມມືໃຫມ່, ພ້ອມກັນຮ່ວມມືເພື່ອຍາດໄຊຊະນະ, ເປັນຈິດຫນຶ່ງໃຈດຽວພ້ອມກັນຊຸກຍູ້ການພັດທະນາໃຫມ່ມຸ້ງໄປເຖິງອະນາຄົດ, ເພື່ອໃຫ້ນ້ຳໃຈມິດຕະພາບລະຫວ່າງສອງປະເທດ, ສອງກອງທັບນັບມື້ນັບແໜ້ນແຟ້ນກວ່າ, ເພື່ອໃຫ້ທັດສະນະພັດທະນາຄວາມຈະເລີນຮຸ່ງເຮືອງ ແລະ ດຳລົງຊີວິດໃນສັນຕິພາບໄດ້ຮັບການສືບທອດຈາກຄົນລຸ້ນນີ້ໄປສູ່ລຸ້ນອື່ນ.”
ອາດຈະຢືນຢັນໄດ້ວ່າ ການເຄື່ອນໄຫວພົບປະແລກປ່ຽນມິດຕະພາບປ້ອງກັນປະເທດ ຢູ່ຊາຍແດນ ຫວຽດນາມ - ຈີນ ໄດ້ແຜ່ລາມອອກສູ່ວົງກວ້າງ. ຜ່ານການຈັດຕັ້ງມາເປັນເວລາ 3 ຄັ້ງ, ການພົບປະແລກປ່ຽນມິດຕະພາບປ້ອງກັນປະເທດຢູ່ຊາຍແດນ ຫວຽດນາມ - ຈີນ ໄດ້ສ້າງຄວາມໄວ້ເນື້ອເຊື່ອໃຈໃນໝູ່ປະຊາຊົນ ແລະ ບັນດາກຳລັງປະກອບອາວຸດສອງປະເທດເພື່ອເຂດຊາຍແດນສັນຕິພາບ, ມິດຕະພາບ, ການຮ່ວມມື ແລະ ພັດທະນາຍາວນານ. ຄວາມໄວ້ເນື້ອເຊື່ອໃຈນັ້ນ ໄດ້ນຳມາເຊິ່ງປະສິດທິຜົນແທດຈິງໃນວຽກງານຄຸ້ມຄອງ, ປົກປັກຮັກສາ ແລະ ປ້ອງກັນຕ້ານອາດຊະຍາກຳຢູ່ເຂດຊາຍແດນ. ໃນໄລຍະ 3 ປີຜ່ານມາ, ສະຕິການປະຕິບັດກົດໝາຍ, ປົກປັກຮັກສາເສັ້ນຊາຍແດນ, ຫລັກໝາຍຊາຍແດນ ໄດ້ຮັບການເພີ່ມທະວີ ແລະ ປັບປຸງຢ່າງບໍ່ຢຸດຢັ້ງ. ກຳລັງປ້ອງກັນຊາດຫວຽດນາມ ແລະ ຈີນ ເພີ່ມທະວີການໂຄສະນາໃຫ້ພະນັກງານ, ນັກຮົບ ແລະ ປະຊາຊົນຢູ່ເຂດຊາຍແດນສອງປະເທດກ່ຽວກັບບັນດາການນຳນົດທິດ ແລະ ມາດຕະການໃຫຍ່ ຊື່ງການນຳສອງປະເທດບັນລຸໄດ້. ຜ່ານນັ້ນ ປັບປຸງຄວາມໄວ້ເນື້ອເຊື່ອໃຈ, ເພີ່ມທະວີນ້ຳໃຈມິດຕະພາບ, ຊຸກຍູ້ການຮ່ວມມືຕ່າງຝ່າຍຕ່າງມີຜົນປະໂຫຍດໃນທຸກຂົງເຂດ, ກຳການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ- ຈີນ ພັດທະນາຢ່າງແທດຈິງ, ປອດໃສ, ເປັນປົກກະຕິ, ໝັ້ນຄົງເຂັ້ມແຂງ.
ເພີ່ມທະວີນ້ຳໃຈມິດຕະພາບ, ຄວາມສາມັກຄີ
ໃນໄລຍະໃຫມ່, ຕໍ່ຫນ້າບັນດາການຜັນແປ່ຢ່າງວ່ອງໄວຂອງສະພາບການພາກພື້ນ ແລະ ໂລກ, ພິເສດ ລະຫວ່າງສອງປະເທດຍັງມີບາງບັນຫາກ່ຽວຂ້ອງເຖິງຊາຍແດນບົນທະເລ, ການເພີ່ມທະວີຜັນຂະຫຍາຍບັນດາການເຄື່ອນໄຫວພົບປະແລກປ່ຽນມິດຕະພາບ ການຮ່ວມມືຍິ່ງມີຄວາມຈຳເປັນກວ່າເວລາໃດໝົດ. ສິ່ງດັ່ງກ່າວໄດ້ຮັບການຮັບຮູ້ຢ່າງເລິກເຊິ່ງຈາກບັນດາການນຳສອງປະເທດ ຜ່ານບັນດາຖະແຫລງການທີ່ການຢ້ຽມຢາມຄັ້ງຕ່າງ. ເພື່ອເພີ່ມທະວີວຽກງານສົມທົບຕໍ່ສູ້ປ້ອງກັນຕ້ານອາດຊະຍາກຳທຸກປະເພດເປັນຢ່າງດີ, ການຄຸ້ມຄອງຄົນງານຂອງສອງຝ່າຍ, ເພີ່ມທະວີການຜັນຂະຫຍາຍບັນດາການເຄື່ອນໄຫວແຮກສ່ຽວລະຫວ່າງກຳລັງປ້ອງກັນຊາຍແດນສອງປະເທດ, ລະຫວ່າງເຂດຊຸມຊົນຢູ່ລຽບຕາມຊາຍແດນສອງປະເທດ.ກ່າວຄຳເຫັນທີ່ການພົບປະແລກປ່ຽນ, ທ່ານ ຫງວຽນຈີວິ້ງ, ລັດຖະມົນຕີຊ່ວຍວ່າການກະຊວງປ້ອງກັນປະເທດຫວຽດນາມ ສະເຫນີວ່າ:
“ກຳລັງປະກອບອາວຸດສອງປະເທດເວົ້າລວມ ແລະ ກຳລັງຄຸ້ມຄອງປົກປັກຮັກສາຊາຍແດນເວົ້າສະເພາະ ຄວນເພີ່ມທະວີການສົມທົບ, ຜັນຂະຫຍາຍບັນດາເນື້ອໃນຮ່ວມມືທີ່ມີຢູ່ແລ້ວ ແລະ ສະເຫນີບັນດາເນື້ອໃນຮ່ວມມືໃຫມ່ທີ່ມີຊີວິດຊີວາກວ່າ, ອຸດົມສົມບຸນກວ່າ ແລະ ແທດຈິງກວ່າ, ເພື່ອເພີ່ມທະວີສະພາບແວດລ້ອມສັນຕິພາບ, ສະຖຽນລະພາບ, ສ້າງເງື່ອນໄຂໃຫ້ປະຊາຊົນສອງປະເທດພັດທະນາເສດຖະກິດ, ປະກອບສ່ວນເພີ່ມທະວີການພົວພັນອັນດີງາມລະຫວ່າງ ຫວຽດນາມ ແລະ ຈີນ. ຂ້າພະເຈົ້າສະເຫນີ ບັນດາຄະນະ, ຂະແຫນງການ, ທ້ອງຖິ່ນ ສອງແຂວງ ລ້າງເລີນ ແລະ ກວາງຊີ ເອົາໃຈໃສ່ເຖິງບັນດາການເຄື່ອນໄຫວພົບປະແລກປ່ຽນຂອງກຳລັງປະກອບອາວຸດສອງປະເທດ.”
ການພົບປະແລກປ່ຽນມິດຕະພາບຂັ້ນສູງ ຢູ່ຊາຍແດນ ສະແດງໃຫ້ເຫັນຄວາມມຸ່ງມາດປາດຖະຫນາຂອງປະຊາຊົນສອງປະເທດກໍຄືສືບທອດປະຫວັດຄວາມເປັນມາກ່ຽວກັບນ້ຳໃຈມິດຕະພາບລະຫວ່າງກອງທັບສອງປະເທດ. ການເຄື່ອນໄຫວພົບປະແລກປ່ຽນປະຈຳປີນີ້ ຍັງເປັນຂົວເຊື່ອມຕໍ່ໄມຕິຈິດມິດຕະພາບ, ຄວາມຮັກແພງລະຫວ່າງປະຊາຊົນຢູ່ຊາຍແດນສອງປະເທດ ຫວຽດນາມ - ຈີນ.