(vovworld)- ບົດລາຍງານຂອງລັດຖະບານທີ່ວາລະປະຊຸມຄັ້ງທີ 11 ຂອງຄະນະປະຈຳສະພາແຫ່ງຊາດ ຫວຽດນາມ ໄດ້ຮັບຮູ້ວ່າ: ວຽກງານປ້ອງກັນ ແລະ ຕ້ານອາດຊະຍາກຳສໍ້ລາດບັງຫລວງປີ 2012 ບັນລຸໝາກຜົນຕັ້ງຫນ້າ, ແຕ່ສະພາບອາດຊະຍາກຳສໍ້ລາດບັງຫລວງບໍ່ທັນມີສັນຍານຫລຸດລົງເທື່ອ, ຍັງຄົງຜັນແປໄປຢ່າງສັບສົນນັບທັງດ້ານລັກສະນະກໍຄືລະດັບຄວາມເສຍຫາຍ. ກ່ຽວຂ້ອງເຖິງບັນຫານີ້, ທ່ານ Huynh Phong Tranh ຫົວຫນ້າອົງການກວດກາລັດຖະບານ ໄດ້ຢືນຢັນວ່າ: ພັກ ແລະ ລັດ ຫວຽດນາມ ສືບຕໍ່ຖືວຽກງານປ້ອງກັນ ແລະ ຕ້ານການສໍ້ລາດບັງຫລວງເປັນບັນຫາຕົ້ນຕໍ ດ້ວຍບັນດາມາດຕະການເດັດຂາດ ແລະ ແຂງແຮງ.
ພາບປະກອບ: internet
|
ບົດລາຍງານຂອງລັດຖະບານ ໂດຍທ່ານ Huynh Phong Tranh ຫົວຫນ້າອົງການກວດກາລັດຖະບານ ສະເຫນີທີ່ວາລະປະຊຸມຄັ້ງທີ 11 ຄະນະປະຈຳສະພາແຫ່ງຊາດ ໃຫ້ຮູ້ວ່າ: ຈຳນວນຄະດີສໍ້ລາດບັງຫລວງຖືກເປີດການ ສືບສວນສອບສວນ, ການສືບສວນສອບສວນ, ສັ່ງຟ້ອງໃນປີ 2012 ລ້ວນແຕ່ເພີ່ມຂຶ້ນເມື່ອທຽບໃສ່ໄລຍະດຽວກັນຂອງປີກາຍ. ບົດລາຍງານຂອງລັດຖະບານຕີລາຄາວ່າ: “ສະພາບອາດຊະຍາກຳສໍ້ລາດບັງຫລວງບໍ່ທັນມີສັນຍານຫລຸດລົງເທື່ອ, ຍັງຄົງສືບຕໍ່ຜັນແປໄປຢ່າງສັບສົນນັບທັງດ້ານລັກສະນະກໍຄືລະດັບຄວາມເສຍຫາຍ, ພິເສດ ໃນຂົງເຂດທະນາຄານ, ການເງິນ, ກໍ່ສ້າງພື້ນຖານໂຄງລ່າງ, ຄຸ້ມຄອງທີ່ດິນ ແລະ ໃນບັນດາກຸ່ມບໍລິສັດ, ບໍລິສັດໃຫຍ່ແຫ່ງລັດ, ເຮັດໃຫ້ຊັບສິນຂອງລັດຖືກຮົ່ວໄຫລ. ກ່ຽວຂ້ອງເຖິງບັນຫານີ້, ທ່ານ Huynh Phong Tranh ຫົວຫນ້າອົງການກວດກາລັດຖະບານ ຢືນຢັນ: ສະພາບການສໍ້ລາດບັງຫລວງຍັງຄົງຜັນແປໄປຢ່າງສັບສົນ, ເຖິງວ່າ ວຽກງານປ້ອງກັນ ແລະ ຕ້ານການສໍ້ລາດບັງຫລວງໄດ້ຮັບຄວາມເອົາໃຈໃສ່ເປັນພິເສດ.
“ໃນຊຸມປີຜ່ານມາ ພິເສດແມ່ນໃນປີ 2012, ພັກ ແລະ ລັດກໍຄືທຸກຂັ້ນ, ຂະແຫນງການຕ່າງໆ ພ້ອມກັບທົ່ວປວງຊົນ ໄດ້ສຸມໃສ່ວຽກງານປ້ອງກັນ ແລະ ຕ້ານການສໍ້ລາດບັງຫລວງຫລາຍທີ່ສຸດເພື່ອຍູ້ການສໍ້ລາດບັງຫລວງໃຫ້ຖອຍໄປ. ໃນປີ 2012 ໄດ້ຜັນຂະຫຍາຍຫລາຍມາດຕະການຢ່າງຄົບຊຸດ ຈາກການແຈ້ງຊັບສິນຕະຫລອດຮອດຄວາມຮັບຜິດຊອບຂອງຫົວຫນ້າຂະແຫນງ ແລະ ການສືບສວນສອບສວນ ປັບໄຫມລົງໂທດຄະດີສໍ້ລາດບັງຫລວງ…ອັນໄດ້ບັນລຸປະສິດຜົນຢ່າງແນ່ນອນໃນຂົງເຂດຈຳນວນຫນຶ່ງ
ເພີ່ມທະວີວຽກງານປ້ອງກັນ ແລະ ຕ້ານການສໍ້ລາດບັງຫລວງ
ພາບ: phapluatvn.vn
|
ທ່ານ Huynh Phong Tranh ກໍໃຫ້ຮູ້ວ່າ: ໃນວິວັດການປະຕິບັດວຽກງານປ້ອງກັນ ແລະ ຕ້ານການສໍ້ລາດບັງຫລວງ ຢູ່ ຫວຽດນາມ ໄດ້ປະສົບກັບຄວາມຫຍຸ້ງຍາກ, ຂໍ້ຈຳກັດບາງຢ່າງ ແລະ ນັ້ນກໍແມ່ນສາຍເຫດທີ່ພາໃຫ້ສະພາບການສໍ້ລາດບັງຫລວງໃນປະຈຸບັນຍັງຜັນແປໄປຢ່າງຮ້າຍແຮງ. ນັ້ນແມ່ນລະບອບກົນໄກນະໂຍບາຍປ້ອງກັນ ແລະ ຕ້ານການສໍ້ລາດບັງຫລວງ ແລະ ປັບໄຫມລົງໂທດການສໍ້ລາດບັງຫລວງຍັງຈຳກັດຫລາຍ. ເລື່ອງເປີດເຜີຍ, ແຈ້ງຊັບສິນ, ການປ່ຽນຕຳແຫນ່ງວຽກງານ ຫລືປັບໄຫມລົງໂທດກ່ຽວກັບຄວາມຮັບຜິດຊອບຂອງການນຳຂະແຫນງເມື່ອປະໃຫ້ເກີດກໍລະນີສໍ້ລາດບັງຫລວງ, ເລື່ອງຊື້ຊັບສິນໃຫຍ່ຂອງອົງການລັດຜ່ານບັນຊີ … ເພື່ອແນໃສ່ປ້ອງກັນ ແລະ ຕ້ານການສໍ້ລາດບັງຫລວງໄດ້ຮັບການຜັນຂະຫຍາຍ ແຕ່ບໍ່ທັນບັນລຸປະສິດທິຜົນໃນໄລຍະຜ່ານມາ. ສະນັ້ນ ບັນດາອົງການກ່ຽວຂ້ອງຈະເພີ່ມທະວີການຜັນຂະຫຍາຍປະຕິບັດບັນດາມາດຕະການນີ້ເພື່ອຍົກສູງປະສິດທິຜົນວຽກງານປ້ອງກັນ, ຕ້ານການສໍ້ລາດບັງຫລວງໃນໄລຍະຈະມາເຖິງ. ທ່ານ Huynh Phong Tranh ເນັ້ນຫນັກວ່າ:
“ທີຫນຶ່ງແມ່ນ ຕ້ອງເຊີດຊູບົດບາດ, ຄວາມຮັບຜິດຊອບຂອງການນຳຂະແຫນງ, ແກ້ໄຂ ແລະ ຕ້ອງມີຄວາມຮັບຜິດຊອບເມື່ອປະໃຫ້ເກີດການສໍ້ລາດບັງຫລວງຢູ່ໃນຫົວຫນ່ວຍຂອງຕົນ, ທ້ອງຖິ່ນຕົນ. ທີສອງ ຕ້ອງຕັ້ງຫນ້າວາງອອກບັນດານະໂຍບາຍຕິດພັນກັບການປະຕິຮູບລະບຽບການບໍລິຫານ ເພື່ອເຮັດແນວໃດໃຫ້ມີການປະຕິບັດຢ່າງເປີດເຜີຍ, ໂປ່ງໃສ. ທີສາມ ຕ້ອງປັບປຸງກົດໝາຍກ່ຽວກັບການປ້ອງກັນ ແລະ ຕ້ານການສໍ້ລາດບັງຫລວງໃຫ້ສົມບູນແບບຕາມທິດເປີດກວ້າງເປົ້າໝາຍແຈ້ງຊັບສິນ, ເປີດເຜີຍແລະ ແຈ້ງຊັບສິນຄືແນວໃດ.”
ຄວາມຈິງສະແດງໃຫ້ເຫັນວ່າ, ການປະຕິບັດບັນດາຂໍ້ກຳນົດກ່ຽວກັບການເປີດເຜີຍ,ໂປ່ງໃສໃນການເຄື່ອນໄຫວຂອງອົງການ, ຫົວຫນ່ວຍ, ສ້າງ ແລະ ປະຕິບັດບັນດາລະບອບ, ກຳນົດລະດັບມາດຕະຖານ, ຫລັກການປະພຶດ, ຫລັກຄຸນສົມບັດອາຊີບ, ຊັບປ່ຽນທີ່ຕັ້ງວຽກງານຂອງພະນັກງານ, ລັດຖະກອນ … ຕາມບັນດາຂໍ້ກຳນົດຂອງກົດໝາຍວ່າດ້ວຍການປ້ອງກັນ ແລະ ຕ້ານການສໍ້ລາດບັງຫລວງປີ 2005 ຂອງ ຫວຽດນາມ ໄດ້ເສີມຂະຫຍາຍຄຸນປະໂຫຍດ, ປະກອບສ່ວນປ້ອງກັນ ສະກັດກັ້ນ ແລະ ຈຳກັດການສໍ້ລາດບັງຫລວງໃນຂົງເຂດຄຸ້ມຄອງລັດຈຳນວນຫນຶ່ງ. ເພື່ອໃຫ້ກິດຈະການປ້ອງກັນ ແລະ ຕ້ານການສໍ້ລາດບັງຫລວງຢ່າງມີປະສິດທິຜົນກວ່າ, ກົດໝາຍວ່າດ້ວຍການປ້ອງກັນ ແລະ ຕ້ານການສໍ້ລາດບັງຫລວງ ສະບັບປັບປຸງ ຕາມທິດເປີດກວ້າງເປົ້າໝາຍຕ້ອງແຈ້ງຊັບສິນ, ແຈ້ງລາຍຮັບ ຊຶ່ງລວມມີ: ຜູ້ມີຖານະຕຳແຫນ່ງ, ສິດອຳນາດທັງໝົດ, ເພີ່ມເຕີມຂໍ້ກຳນົດກ່ຽວກັບການແຈ້ງຊັບສິນທີ່ຢູ່ອາໄສ ຈະຖືກຍື່ນສະເຫນີຕໍ່ສະພາແຫ່ງຊາດຮັບຮອງເອົາໃນໄລຍະຈະມາເຖິງ. ຄວາມມານະພະຍາຍາມປັບປຸງລະບົບເອກະສານນິຕິກຳໃຫ້ສົມບູນແບບ, ແກ້ໄຂບັນດາຂໍ້ຂາດຕົກບົກຜ່ອງຂອງກົນໄກກວດກາຊັບສິນ, ລາຍຮັບຂອງພະນັກງານຄຸ້ມຄອງທຸກຂັ້ນ ໄດ້ສະແດງໃຫ້ເຫັນວ່າ ຫວຽດນາມ ໄດ້ ແລະ ພວມຜັນຂະຫຍາຍກິດຈະການປ້ອງກັນ ແລະ ຕ້ານການສ້ໍລາດບັງຫລວງຢ່າງແຂງແຮງ ເພື່ອສ້າງສັງຄົມໃຫ້ປອດໃສ ແລະ ພັດທະນາ.