ວັນທີ 21/3, ປະທານາທິບໍດີປະເທດສາທາລະນະລັດຈີເລ Sebastian Pinera Echennique ໄດ້ເລີ່ມດຳເນີນການຢ້ຽມຢາມຫວຽດນາມ ຢ່າງເປັນທາງການ ໃນເວລາ 2 ວັນ ຕາມຄຳເຊີນຂອງທ່ານປະທານປະເທດຫວຽດນາມ ເຈືອງເຕີນຊາງ. ການຢ້ຽມຢາມຄັ້ງນີ້ແມ່ນໂອກາດເພື່ອໃຫ້ການນຳສອງປະເທດແລກປ່ຽນທິດທາງ ແລະ ບັນດາມາດຕະການ ເພື່ອເພີ່ມທະວີການພົວພັນຄ່ຮ່ວມມືຮອບດ້ານລະຫວ່າງຫວຽດນາມ-ຈີເລ ໃນທຸກໆຂົງເຂດ ແລະ ແລກປ່ຽນບັນດາບັນຫາພາກພື້ນ ແລະ ສາກົນທີ່ສອງຝ່າຍຕ່າງມີຄວາມສົນໃຈ.
ພິທີລົງນາມ FTA ລະຫວ່າງຫວຽດນາມ ແລະ ຈີເລ
(ພາບ:thesaigontimes.vn)
ເຖິງວ່າພູມມີສັນຖານຂອງສອງປະເທດຢູ່ຫ່າງໄກກັນກໍ່ຕາມ ແຕ່ຫວຽດນາມ ແລະ ຈີເລ ມີການພົວພັນອັນຈົບງາມ, ອີງບົນພື້ນຖານດ້ານປະຫວັດສາດພິເສດ. ໃນໄລຍະທີ່ປະເທດຫວຽດນາມ ທຳການຕໍ່ສູ້ຍາດເອົາເອກະລາດແຫ່ງຊາດ ແລະ ທ້ອນໂຮມປະເທດຊາດເປັນເອກະພາບ, ຂະບວນການສາມັກຄີ ແລະ ສະໜັບສະໜູນຫວຽດນາມ ໄດ້ຂະຫຍາຍຕົວຢ່າງແຮງຢູ່ ຈີເລ. ໃນຂະນະທີ່ການຕໍ່ຕ້ານຍາດເອົາເອກະລາດແຫ່ງຊາດ ແລະ ທ້ອນໂຮມປະເທດພາບເປັນເອກະລາດ ຂອງປະຊາຊົນຫວຽດນາມ ພວມຢູ່ໃນໄລຍະດຸເດືອດທີ່ສຸດນັ້ນ, ຈີເລ ໄດ້ກາຍເປັນປະເທດທີ 2 ຢູ່ອາເມລິກາລາຕິນ, ຖັດຈາກ ກູຍບາ ທີ່ໄດ້ສ້າງສາຍພົວພັນທາງການທູດກັບຫວຽດນາມ ຢ່າງເປັນທາງການ. ເຫດການດັ່ງກ່າວໄດ້ເປີດໜ້າປະຫວັດສາດໃໝ່ໃຫ້ແກ່ການພົວພັນລະຫວ່າງຫວຽດນາມ ແລະ ຈີເລ. ປີ 1990, ຫວຽດນາມ ແລະ ຈີເລ ໄດ້ສ້າງສາຍພົວພັນທາງການທູດໃນຂັ້ນເອກອັກຄະລັດຖະທູດຢ່າງເປັນທາງການ ແລະ ນັບແຕ່ນັ້ນມາ, ການພົວພັນລະຫວ່າງສອງປະເທດໄດ້ພັດທະນາຢ່າງເລິກເຊີ່ງກ້ວາງຂວາງ ແລະ ມີປະສິດທິຜົນ. ທ່ານ Fernando Urrutina, ເອກອັກຄະລັດຖະທູດຈີເລ ປະຈຳຫວຽດນາມ ຖືວ່າ:
“ຈີເລ ບໍ່ພຽງແຕ່ແມ່ນ 1 ໃນຈຳນວນບັນດາປະເທດທຳອິດຢູ່ທະວີບ ອາເມລິກາລາຕິນ ໄດ້ສ້າງຕັ້ງການພົວພັນທາງການທູດກັບຫວຽດນາມ ຄືໃນວັນທີ 25/31971 ເທົ່ານັ້ນ, ຫາກໃນຕະຫຼອດ 40 ທີ່ຜ່ານມາ, ການພົວພັນລະຫວ່າງສອງປະເທດ ໄດ້ພັດທະນາຢ່າງແຂງແຮງ. ການພົວພັນອັນດີງາມໃນອະດີດຕະການ ແມ່ນພື້ນຖານເພື່ອໃຫ້ຫວຽດນາມ ແລະ ຈີເລ ສືບຕໍ່ຊຸກຍູ້ການຮ່ວມມື, ເພື່ອຄວາມຈະເລີນຮູ່ງເຮືອງຢູ່ແຕ່ລະປະເທດ“
ສະຖານທູດຫວຽດນາມ ປະຈຳ ຈີເລ ລະນຶກ 40 ປີ
ແຫ່ງວັນສ້າງຕັ້ງສາຍພົວພັນທາງການທູດລະຫວ່າງສອງປະເທດ
(ພາບ:socongthuong.danang.gov.vn )
ໃນຊຸມປີມໍ່ໆມານີ້, ການນຳຂັ້ນສູງຂອງສອງປະເທດໄດ້ພົບປະກັນເປັນປະຈຳ ເພື່ອແນໃສ່ປຶກສາຫາລື ແລະ ກຳນົດທິດທາງການຮ່ວມມື. ສອງປະເທດມີຈຸດຄ້າຍຄືກັນຫຼາຍຢ່າງ ຊື່ງສາມາດຮ່ວມມືນຳກັນໄດ້ ແລະ ຕ່າງຝ່າຍຕ່າງມີຜົນປະໂຫຍດ, ໂດຍສະເພາະແມ່ນໃນບັນດາຂົງເຂດພັດທະນາການຂຸດຄົ້ນແຮ່ທາດ, ວິທະຍາສາດ-ເຕັກນິກ, ກະສິກຳ, ການສຶກສາ… ຈີເລ ໄດ້ຖືການພົວພັນກັບຫວຽດນາມ ເປັນສຳຄັນ ແລະ ໃຫ້ບຸລິມະສິດໃນການພົວພັນກັບຫວຽດນາມ. ຈີເລ ປາດຖະໜາຢາກຮ່ວມມືກັບຫວຽດນາມ ໃນການນຳໃຊ້ວິທະຍາສາດເຕັກນິກ, ເຕັກໂນໂລຊີໃໝ່ເຂົ້າໃນຂົງເຂດຂຸດຄົ້ນແຮ່ທາດ, ປົກປັກຮັກສາສິ່ງແວດລ້ອມຊີວະພາບ. ດ້ວຍບັນດາບົດຮຽນ ແລະ ຜົນງານໃນຂົງເຂດກະສິກຳ, ຈີເລ ກໍສາມາດຮ່ວມມືກັບຫວຽດນາມ ໃນການພັດທະນາເຕັກໂນໂລຊີປຸງແຕ່ງຜະລິດຕະພັນກະເສດ, ສົ່ງອອກໝາກໄມ້ ແລະ ອຸດສາຫະກຳສະບຽງອາຫານ…. ຫວຽດນາມ ຖືການພົວພັນຮ່ວມມືກັບຈີເລ ເປັນສຳຄັນ ແລະ ພ້ອມແລ້ວທີ່ຈະຮ່ວມມືກັບຈີເລ ໃນບັນດາຂົງເຂດທີ່ສອງຝ່າຍມີທ່າແຮງ. ການນຳຫວຽດນາມ ໄດ້ຖະແຫຼງເປັນຫຼາຍເທື່ອວ່າ ພ້ອມແລ້ວທີ່ຈະເປັນຂົວຕໍ່ ເພື່ອໃຫ້ຈີເລ ພັດທະນາການຮ່ວມມືກັບບັນດາປະເທດອາຊີຕາເວັນອອກສ່ຽງໃຕ້ ແລະ ກົງກັນຂ້າມ, ຈີເລ ກໍມີຄວາມຫວັງວ່າ ຫວຽດນາມ ຈະແມ່ນຂົວເຊື່ອມຕໍ່ ເພື່ອໃຫ້ບັນດາຜະລິດຕະພັນຂອງຈີເລ ສົ່ງໄປຍັງຕະຫຼາດແຫ່ງອື່ນໆຢູ່ອາຊີຕາເວັນອອກສ່ຽງໃຕ້. ທ່ານ Fernando Urrutina, ເອກອັກຄະລັດຖະທູດຈີເລ ປະຈຳຫວຽດນາມ ໄດ້ເວົ້າວ່າ:
“ໂດຍແມ່ນຕະຫຼາດແຫ່ງໜື່ງດ້ວຍພົນລະເມືອງ 17 ລ້ານຄົນ, ລາຍຮັບສະເລັຍຕໍ່ຫົວຄົນແມ່ນ 14.000 USD/ປີນັ້ນ, ຈີເລ ບໍ່ພຽງແຕ່ແມ່ນຕະຫຼາດນຳເຂົ້າບັນດາຜະລິດຕະພັນ, ສິນຄ້າຂອງຫວຽດນາມ ໃນຈຳນວນຫຼາຍເທົ່ານັ້ນ, ຫາກຍັງແມ່ນຂົວຕໍ່ເພື່ອສົ່ງສິນຄ້າຂອງຫວຽດນາມ ໄປຂາຍຢູ່ທັງພາກພື້ນອາເມລິກາລາຕິນທີ່ກ້ວາງໃຫ່ຍອີກດ້ວຍ. ນອກຈາກນັ້ນແລ້ວ, ສອງປະເທດກໍ່ພວມຮ່ວມມືກັນຢ່າງແໜ້ນແຟ້ນ ໃນຂອບເຂດສັນຍາການພົວພັນຄູ່ຮ່ວມມືເສດຖະກິດຍຸດທະສາດເຂດປາຊີຟິກ. ຄຽງຂ້າງກັບການພົວພັນດ້ານເສດຖະກິດ-ການຄ້າ, ພວກເຮົາສາມາດ ແລະ ຄວນຊຸກຍູ້ການພົວພັນດ້ານວັດທະນະທຳ ແລະ ນ້ຳໃຈມິດຕະພາບຕື່ມອີກ“
ມາຮອດປະຈຸບັນ, ຫວຽດນາມ ແລະ ຈີເລໄດ້ລົງນາມໃນເອກະສານຮ່ວມມືໃນບັນດາຂົງເຂດການເມືອງ-ການທູດ, ເສດຖະກິດ-ການຄ້າ, ວິທະຍາສາດ-ເຕັກໂນໂລຊີ, ວັດທະນະທຳ, ການທ່ອງທ່ຽວ...ເກືອບ 20 ສະບັບແລ້ວ ຊື່ງໄດ້ເປັນພື້ນຖານດ້ານກົດໝາຍໃຫ້ແກ່ການພົວພັນຮ່ວມມືລະຫວ່າງສອງປະເທດ. ການແລກປ່ຽນດ້ານການຄ້າລະຫວ່າງສອງປະເທດໄດ້ເພີ່ມຂຶ້ນຢ່າງວ່ອງໄວ, ຈາກ 18 ລ້ານ USD ໃນປີ 2000 ຂຶ້ນເປັນ 500 ລ້ານ USD ໃນປີ 2011. ປີ 2007, ຈີເລ ໄດ້ຮັບຮູ້ຂໍ້ກຳນົດເສດຖະກິດການຕະຫຼາດຢູ່ຫວຽດນາມ ຢ່າງເປັນທາງການ. ພິເສດ, ໃນວັນທີ 11/11/2011, ຫວຽດນາມ ແລະ ຈີເລ ໄດ້ລົງນາມໃນສັນຍາການຄ້າເສລີ (FTA) ຢ່າງເປັນທາງການ ພາຍຫລັງດຳເນີນການເຈລະຈາ 8 ຮອບໃນເວລາ 3 ປີ. ເມື່ອ FTA ມີຜົນສັກສິດ, ຈີເລ ສາມາດ ສົ່ງຊີ້ນໝູ, ໝາກໄມ້, ນ້ຳໝາກໄມ້ ໄປຂາຍຢູ່ຫວຽດນາມ ດ້ວຍອັດຕາພາສີບຸລິມະສິດ ແລະ ຫວຽດນາມ ກໍ່ສາມາດສົ່ງເກີບ, ເຂົ້າສານ, ເຄື່ອງຕ່ຳແຜ່ນຕັດຫຍີບ, ກາເຟ… ໄປຈີເລ ດ້ວຍອັດຕາພາສີຕ່ຳ.
ຫວຽດນາມ ແລະ ຈີເລ ມີການພົວພັນມິດຕະພາບອັນເປັນມູນເຊື້ອ, ເຄີຍສະຫນັບສະໜູນ, ຊ່ວຍເຫຼືອຊື່ງກັນ ແລະ ກັນ. ປະຊາຊົນສອງປະເທດລ້ວນແຕ່ຮັກຫອມສັນຕິພາບ, ເອກະລາດ, ເສລີພາບ. ຈີເລ ເຄີຍລະດົມກຳລັງໃຈ ແລະ ສະໜັບສະໜູນການຕໍ່ສູ້ອັນຊອບທຳ ເພື່ອຍາດເອົາເອກະລາດຂອງປະຊາຊົນຫວຽດນາມ ແລະ ປະຈຸບັນ, ປະຊາຊົນຈີເລ ສືບຕໍ່ສະໜັບສະໜູນພາລະກິດປ່ຽນແປງໃໝ່ຢູ່ຫວຽດນາມ ຢ່າງແຮງ. ສ່ວນຫວຽດນາມ ຍາມໃດກໍ່ປາດຖະໜາຢາກໃຫ້ຈີເລ ນັບມື້ນັບມີການພັດທະນາກ່ວາອີກ. ນີ້ແມ່ນພື້ນຖານເພື່ອໃຫ້ການຢ້ຽມຢາມຫວຽດນາມ ຂອງປະທານາທິບໍດີ Sebastian Pinera Echennique ປະສົບຜົນສຳເລັດຢ່າງຈົບງາມ, ນຳສາຍພົວພັນ “ຄູ່ຮ່ວມມືຮອບດ້ານ“ ລະຫວ່າງຫວຽດນາມ-ຈີເລ ພັດທະນາກ່ວາອີກ ຕາມທິດແທດຈິງ ແລະ ມີປະສິດທິຜົນ.