ໂດຍເຈືອຈານເຂົ້າກັບບັນດາຜົນງານດ້ານການຕ່າງປະເທດຫຼາຍຝ່າຍປີ 2016, ຫວຽດນາມສືບຕໍ່ປະກອບສ່ວນຢ່າງມີປະສິດທິຜົນເຂົ້າໃນທຸກໆຂົງເຂດຮ່ວມມືຂອງອາຊຽນ. ການຮ່ວມມືອາຊຽນໃນປີ 2016 ໄດ້ເປັນຂີດໝາຍດ້ວຍການຮັກສາຄວາມສາມັກຄີ, ເປັນເອກະພາບ, ຮັກສາບົດບາດເປັນໃຈກາງຂອງອາຊຽນໃນການແກ້ໄຂບັນດາສິ່ງທ້າທາຍໃຫຍ່ທີ່ເກີດຂື້ນໃນພາກພື້ນ, ເປັນຕົ້ນແມ່ນບັນຫາທະເລຕາເວັນອອກ.
ປີ 2016 ແມ່ນປີທຳອິດເມື່ອສ້າງຕັ້ງປະຊາຄົມອາຊຽນ, ຜັນຂະຫຍາຍວິໄສທັດອາຊຽນ 2025 ແລະ ບັນດາແຜນການສັງລວມໃນທັງ 3 ເສົາຄ້ຳປະຊາຄົມ. ອາຊຽນໄດ້ຊຸກຍູ້ການສ້າງ ແລະ ຮັບຮອງເອົາບັນດາໂຄງການດຳເນີນງານ, ແຜນການປະຕິບັດຂອງຂະແໜງ, ຂົງເຂດໄລຍະ 2016-2020, ສ້າງແຜນການສັງລວມເຊື່ອມຕໍ່ອາຊຽນ 2025, ຊຸກຍູ້ການພົວພັນກັບພາຍນອກຂອງອາຊຽນ, ພ້ອມທັງປັບປຸງ ແລະ ຍົກສູງປະສິດທິຜົນການເຄື່ອນໄຫວຂອງບັນດາອົງການຈັດຕັ້ງໃນອາຊຽນ.
ອາຊຽນສືບຕໍ່ເສີມຂະຫຍາຍບົດບາດໃຈກາງ, ເປີດກ້ວາງການພົວພັນກັບພາຍນອກ.
ປີ 2016, ການຮ່ວມມືອາຊຽນໄດ້ບັນລຸບັນດາຄວາມຄືບໜ້າດີ ແລະ ບັນດາໝາກຜົນໃນການພັດທະນາປະຊາຄົມອາຊຽນໃນທຸກໆດ້ານ, ທຸກໆເສົາຄ້ຳການເມືອງ, ຄວາມໝັ້ນຄົງ, ເສດຖະກິດ, ວັດທະນະທຳສັງຄົມ, ພ້ອມທັງໄດ້ຮັບຜົນສຳເລັດໃນການຮັດແຄບຄວາມແຕກໂຕນໃນການພັດທະນາລະຫວ່າງບັນດາປະເທດ. ການພົວພັນກັບພາຍນອກຂອງອາຊຽນກໍໄດ້ມີບາດກ້າວຂະຫຍາຍຕົວໃຫຍ່ໃນປີ 2016. ໃນປີ 2016, ອາຊຽນໄດ້ສ້າງການພົວພັນຄູ່ຮ່ວມມືຍຸດທະສາດກັບ 7 ໃນ ຈຳນວນ 11 ຄູ່ຮ່ວມມືຕົ້ນຕໍ, ພ້ອມກັນນັ້ນ ກໍໄດ້ມອບຖານະດ້ານການເຈລະຈາໃຫ້ແກ່ນອກແວ, ສະວິດ, ເຢັຍລະມັນ. ໄດ້ມີ 86 ປະເທດໄດ້ເປີດສະຖານທູດຢູ່ອາຊຽນ ແລະ 9 ປະເທດໄດ້ມີຄະນະຜູ້ຕາງໜ້າສະເພາະຮັບຜິດຊອບອາຊຽນ. ສົນທິສັນຍາສະໜິດສະໜົມ ແລະ ຮ່ວມມືອາຊຽນ (TAC) ໃນປະຈຸບັນໄດ້ເປີດກ້ວາງເປັນ 25 ປະເທດເຂົ້າຮ່ວມ. ທ່ານ ວູ້ໂຮ່ ຮອງຫົວໜ້າກົມອາຊຽນ, ກະຊວງການຕ່າງປະເທດ ຢືນຢັນວ່າ :
“ ສາມັກຄີໃນອາຊຽນສືບຕໍ່ໄດ້ຮັບການຮັກສາໄວ້, ບັນດາບັນຫາພາຍໃນໄດ້ຮັບການແກ້ໄຂຢ່າງແທດເໝາະພໍສົມຄວນກັບຜົນປະໂຫຍດຂອງທຸກໆປະເທດ, ຮັບປະກັນສັນຕິພາບ, ຄວາມໝັ້ນຄົງໃນພາກພື້ນ. ຊຸກຍູ້ການພົວພັນກັບບັນດາປະເທດໃຫຍ່ ແລະ ບັນດາຄູ່ຮ່ວມມືໂດຍອີງບົນບັນດາກົນໄກ, ຂອບເຂດໂດຍອາຊຽນສ້າງຕັ້ງ ແລະ ຊັກຈູງ. ພ້ອມກັບການພັດທະນາຂອງປະຊາຄົມອາຊຽນນັ້ນ, ໂຄງຮ່າງຂອງພາກພື້ນຄ່ອຍໆໄດ້ຮັບການສ້າງຂຶ້ນເປັນຮູບປະທຳດ້ວຍເລື່ອງອາຊຽນສວມບົດບາດເປັນໃຈກາງ ”
ເປັນໜ້າສົນໃຈ, ໃນປີທີ່ຜ່ານມາ, ຫຼັກໝັ້ນຂອງອາຊຽນກ່ຽວກັບບັນຫາທະເລຕາເວັນອອກໄດ້ຖືກສະແດງໃຫ້ເຫັນຢ່າງຈະແຈ້ງ, ປະກອບສ່ວນຢ່າງແທດຈິງໃຫ້ແກ່ສັນຕິພາບ, ສະຖຽນລະພາບ, ຄວາມໝັັ້ນຄົງປອດໄພໃນການເດີນເຮືອ, ແກ້ໄຂການຂັດແຍ້ງດ້ວຍມາດຕະການໂດຍສັນຕິວິທີ, ສອດຄ່ອງກັບກົດໝາຍສາກົນ, ວິວັດທະນາການທາງການທູດຂອງພາກພື້ນ, ປະຕິບັດຕາມຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC), ເພີ່ມທະວີບັນດາມາດຕະການສ້າງຄວາມເຊື່ອໝັ້ນຕໍ່ກັນ ແລະ ການທູດເພື່ອສະກັດກັ້ນ, ກ້າວໄປສູ່ການສ້າງປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ ທະເລຕາເວັນອອກ (COC). ກ່ຽວກັບສິ່ງນີ້, ທ່ານຮອງລັດຖະມົນຕີການຕ່າງປະເທດຫວຽດນາມ ຝ້າມກວາງວິງ ຖືວ່າ :
“ ສິ່ງສຳຄັນກວ່າໝູ່ຂອງອາຊຽນແມ່ນຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ. ນອກຈາກນັ້ນ, ອາຊຽນໄດ້ສ້າງຂອບເຂດ, ເວທີປາໄສຜູກຮັດບັນດາຄູ່ຮ່ວມມືໃຫຍ່ກ່ວາ. ອາຊຽນໄດ້ສ້າງມາດຕະຖານການປະພຶດໃນພາກພື້ນ. ຂ້າພະເຈົ້າຖືວ່າ ໃນທັງ 3 ດ້ານນັ້ນ, ອາຊຽນພວມເສີມຂະຫຍາຍດີທີ່ສຸດ. ອາດຈະເວົ້າວ່າ ບົນເສັ້ນທາງພັດທະນາຂອງອາຊຽນນັ້ນ ກໍມີໄລຍະແນວນີ້, ແນວນັ້ນ, ແຕ່ເມື່ອສັງເກດໃສ່ 3 ຈຸດໃຫຍ່, ເປັນທີ່ຈະແຈ້ງແລ້ວວ່າ ອາຊຽນພວມສວມບົດບາດສຳຄັນທີ່ສຸດສຳລັບພາກພື້ນ, ສະແດງໃຫ້ເຫັນບົດບາດໃຈກາງຂອງຕົນ ”
ຕິດພັນກັບວິວັດທະນາການເຊື່ອມໂຍງຮ່ວມ
ໃນບັນດາຜົນງານລວມຂອງອາຊຽນ, ຫວຽດນາມໄດ້ເຂົ້າຮ່ວມຢ່າງເປັນເຈົ້າການ ແລະ ຕັ້ງໜ້າເຂົ້າໃນທຸກໆຂົງເຂດຮ່ວມມືຂອງອາຊຽນ. ບົດບາດຂອງຫວຽດນາມໄດ້ຖືກສະແດງອອກຜ່ານຂໍ້ລິເລີ່ມຫຼາຍຂໍ້, ຖະແຫຼງການ, ເອກະສານຂອງອາຊຽນໃນຕະຫຼອດປີ 2016. ໃນລະດັບຊາດ, ຫວຽດນາມໄດ້ຜັນຂະຫຍາຍການສ້າງບັນດາແຜນການປະຕິບັດວິໄສທັດອາຊຽນ 2025 ຢູ່ທຸກກະຊວງ, ຂະແໜງການຕ່າງໆ, ຕິດພັນກັບວິວັດທະນາການເຊື່ອມໂຍງຮ່ວມ. ທ່ານຮອງລັດຖະມົນຕີການຕ່າງປະເທດຫວຽດນາມ ເລຮ່ວາຍຈຸງ ຖືວ່າ :
“ ຫວຽດນາມປະກອບສ່ວນຢ່າງຕັ້ງໜ້າໃນການເຄື່ອນໄຫວຂອງຕົນກັບບັນດາປະເທດອາຊຽນ, ສົມທົບຢ່າງແໜ້ນແຟ້ນກັບປະເທດລາວເປັນປະທານອາຊຽນໃນປີ 2016ເພື່ອຮັກສາຄວາມສາມັກຄີ ແລະ ເສີມຂະຫຍາຍ ບົດບາດໃຈກາງຂອງ ອາຊຽນ. ຫວຽດນາມໄດ້ຍົກອອກຂໍ້ລິເລີ່ມຫຼາຍຂໍ້ຊຶ່ງໄດ້ຮັບການຮັບຮອງເອົາຈາກຫຼາຍປະເທດ. ໃນສະຖານະການຢູ່ທະເລຕາເວັນອອກປະຈຸບັນ, ຂໍ້ລິເລີ່ມຂອງຫວຽດນາມແມ່ນມີປະໂຫຍດທີ່ສຸດ ”
ປີ 2017 ເປັນຂີດໝາຍສຳຄັນໃນການສະເຫຼີມສະຫຼອງ 50 ປີແຫ່ງວັນສ້າງຕັ້ງ ອາຊຽນ ແລະ 10 ປີແຫ່ງວັນເຊັນກົດບັດ ອາຊຽນ, ໃນສະຖານະການໂລກ ແລະ ພາກພື້ນມີການຜັນແປທີ່ສັບສົນ ແລະ ຍາກທີ່ຄາດຄະເນໄວ້ລ່ວງໜ້າ, ຊຶ່ງເປັນສິ່ງທ້າທາຍຕໍ່ຄວາມສາມັກຄີ, ເປັນເອກະພາບ, ບົດບາດໃຈກາງຂອງອາຊຽນ. ຫວຽດນາມຈະສືບຕໍ່ເສີມຂະຫຍາຍນ້ຳໃຈເປັນເຈົ້າການ, ຕັ້ງໜ້າ ແລະ ມີຄວາມຮັບຜິດຊອບໃນການຊຸກຍູ້ການຮ່ວມມືອາຊຽນ, ເລັ່ງໃສ່ບັນດາຈຸດສຸມຄື ສືບຕໍ່ຊຸກຍູ້ການຜັນຂະຫຍາຍບັນດາໂຄງການ ແຜນງານສ້າງປະຊາຄົມອາຊຽນ 2025 ໃນ 3 ເສົາຄ້ຳ, ສົມທົບກັນຜັນຂະຫຍາຍບັນດາບຸລິມະສິດຂອງປີປະທານອາຊຽນ 2017 ຂອງຟີລິບປິນ; ຍິ່ງກ່ວານັ້ນ,ຫວຽດນາມຈະພ້ອມກັບບັນດາປະເທດອາຊຽນຊຸກຍູ້ການບັນລຸຄວາມຄືບໜ້າຢ່າງແທ້ຈິງໃນການປະຕິບັດຕາມຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງມີປະສິດທິຜົນ ແລະ ຄົບຖ້ວນ, ກ້າວໄປສູ່ການສ້າງປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ ທະເລຕາເວັນອອກ (COC) ໂດຍໄວ, ເພື່ອສ້າງກຳລັງໜູນ ແລະ ພະລັງຊີວິດໃໝ່ໃຫ້ແກ່ການຮ່ວມມືອາຊຽນ.