ເພື່ອໃຫ້ວິທະຍາສາດເຕັກໂນໂລຊີກາຍເປັນກຳລັງຫນູນພັດທະນາ

Thu Hoa -

ວັນຈັນ ທີ 8 ຕຸລາ ຄ.ສ. 2012 | 15:05:29

(vovworld)- ການພັດທະນາວິທະຍາສາດເຕັກໂນໂລຊີແມ່ນຫນຶ່ງໃນບັນດາເນື້ອໃນສຳຄັນທີ່ໄດ້ຮັບການປຶກສາຫາລືຢູ່ກອງປະຊຸມຄັ້ງທີ 6 ຄະນະບໍລິຫານງານສູນກາງພັກກອມມູນິດ ຫວຽດນາມ ຄັ້ງທີ 11 ພວມດຳເນີນໄປຢູ່ ຮ່າໂນ້ຍ. ຄວາມຈິງສະແດງໃຫ້ເຫັນວ່າ: ວິທະຍາສາດ ແລະ ເຕັກໂນໂລຊີ ຫວຽດນາມ ໄດ້ມີການພັດທະນາດີພໍສົມຄວນ ແຕ່ຍັງຄົງບໍ່ທັນຕອບສະຫນອງຄວາມຕ້ອງການພັດທະນາເສດຖະກິດສັງຄົມຂອງປະເທດຊາດໄດ້ ແລະ ຄວາມຮຽກຮ້ອງປ່ຽນໃຫມ່ກ່ຽວກັບກົນໄກຄຸ້ມຄອງ, ການເຄື່ອນໄຫວດ້ານວິທະຍາສາດເຕັກໂນໂລຊີໃນປະຈຸບັນໄດ້ກາຍເປັນຄວາມຮຽກຮ້ອງຕ້ອງການທີ່ຈຳເປັນ.

ເພື່ອໃຫ້ວິທະຍາສາດເຕັກໂນໂລຊີກາຍເປັນກຳລັງຫນູນພັດທະນາ - ảnh 1

ພາບປະກອບ: internet

ໃນຊຸມປີຜ່ານມາ, ວິທະຍາສາດເຕັກໂນໂລຊີ ຫວຽດນາມ ໄດ້ມີການປະກອບສ່ວນສຳຄັນໃນການພັດທະນາເສດຖະກິດສັງຄົມ ແລະ ຮັບປະກັນຄວາມໝັ້ນຄົງ, ປ້ອງກັນຊາດ, ປັບປຸງຊີວິດການເປັນຢູ່ຂອງປະຊາຊົນ. ຕາມນັ້ນແລ້ວ, ວິທະຍາສາດສັງຄົມ ແລະ ວັດທະນະທຳມະນຸດ ໄດ້ສະຫນອງຫລັກມູນວິທະຍາສາດ

ໃນການວາງແຜນກຳນົດແນວທາງ, ແຜນນະໂຍບາຍ, ນະໂຍບາຍປ່ຽນແປງໃຫມ່, ສ້າງສາ ແລະ ພັດທະນາປະເທດຊາດ ແລະເສັ້ນທາງກ້າວຂຶ້ນສັງຄົມນິຍົມຢູ່ ຫວຽດນາມ. ວິທະຍາສາດທຳມະຊາດບັນລຸໄດ້ບັນດາຜົນງານພົ້ນເດັ່ນໃນການຄົ້ນຄ້ວາພື້ນຖານ ແລະ ຄົ້ນຄ້ວາການໝູນໃຊ້ຮັບໃຊ້ບັນດາຈຸດໝາຍພັດທະນາເສດຖະກິດສັງຄົມ, ຜ່ານນັ້ນ ຍົກສູງທີ່ຕັ້ງບົດບາດວິທະຍາສາດ ຫວຽດນາມ ໃນເວທີສາກົນ, ພິເສດແມ່ນໃນຂົງເຂດຄະນີດສາດ, ທິດສະດີພິຊິກສາດ, ວິທະຍາສາດເຕັກໂນໂລຊີ ປະກອບສ່ວນສຳຄັນເຂົ້າໃນການຊຸກຍູ້ການໝູນໃຊ້ ແລະ ປ່ຽນໃຫມ່ເຕັກໂນໂລຊີຂອງບັນດາຂະແຫນງການ ແລະ ຂົງເຂດເສດຖະກິດສັງຄົມ, ເປັນຕົ້ນແມ່ນອຸດສາຫະກຳ, ກະສິກຳ, ຄົມມະນາຄົມຂົນສົ່ງ, ກໍ່ສ້າງ, ເຕັກໂນໂລຊີຂໍ້ມູນຂ່າວສານ. ພິເສດ, ບັນດາຜົນງານຂອງຂະແຫນງກະສິກຳ ແລະ ສາທາລະນະສຸກບັນລຸໄດ້ຄືປະຈຸບັນ ຍ້ອນມີການປະກອບສ່ວນຈາກ 30 -35% ຂອງວິທະຍາສາດເຕັກໂນໂລຊີ ຫວຽດນາມ.

ຄຽງຄູ່ກັນນັ້ນ ບັນດາຜົນງານ ວິທະຍາສາດເຕັກໂນໂລຊີ ຍັງບໍ່ທັນຕອບສະຫນອງຄວາມຕ້ອງການພັດທະນາເສດຖະກິດສັງຄົມຂອງປະເທດຊາດໄດ້ ດ້ວຍບັນດາຂໍ້ຈຳກັດຄື: ມີລັກສະນະທິດສະດີຫລາຍ, ບໍ່ທັນຕິດພັນຢ່າງແຫນ້ນແຟ້ນ, ມີປະສິດທິຜົນ ກັບຈຸດໝາຍ, ຫນ້າທີ່ພັດທະນາເສດຖະກິດສັງຄົມ. ການເຄື່ອນໄຫວ ວິທະຍາສາດເຕັກໂນໂລຊີ ຈຳເປັນຕ້ອງປ່ຽນໃຫມ່, ປັບປຸງໃຫ້ສົມບູນແບບ. ນັ້ນແມ່ນຄວາມຕ້ອງການທີ່ຈຳເປັນ. ວັນທີ 11/4/2012, ທ່ານນາຍົກລັດຖະມົນຕີໄດ້ປະກາດໃຊ້ຂໍ້ຕົກລົງເລກທີ 418 ອະນຸມັດຍຸດທະສາດພັດທະນາ ວິທະຍາສາດ ແລະ ເຕັກໂນ ໂລຊີ ໄລຍະ 2011 -2020. ກ່ຽວກັບຍຸດທະສາດນີ້, ທ່ານ Nguyen Quan ລັດຖະມົນຕີກະຊວງວິທະຍາສາດ ເຕັກໂນໂລຊີ ຫວຽດນາມ ໃຫ້ຮູ້ວ່າ:

“ມີບາງເນື້ອໃນໃຫມ່ເມື່ອທຽບໃສ່ກ່ອນນີ້ ນັ້ນແມ່ນບັນດາຈຸດໝາຍລະອຽດຂອງຍຸດທະສາດ ແລະ ບາງມາດຕະການຊຸກຍູ້ ວິທະຍາສາດເຕັກໂນໂລຊີ ຫວຽດນາມ. ລະອຽດຄື: ຮອດປີ 2020, ວິທະຍາສາດເຕັກໂນໂລຊີ ປະກອບສ່ວນຫລາຍພໍສົມຄວນເຂົ້າໃນການຈະເລີນເຕີບໂຕ ແລະ ສ້າງໂຄງປະກອບພື້ນຖານເສດຖະກິດຄືນໃຫມ່, ມູນຄ່າຜະລິດຕະພັນເຕັກໂນໂລຊີສູງ ແລະ ຜະລິດຕະພັນທີ່ໝູນໃຊ້ເຕັກໂນໂລຊີສູງບັນລຸປະມານ 45% GDP. ລະດັບການປ່ຽນໃຫມ່ເຕັກໂນໂລຊີ, ອຸປະກອນ ບັນລຸກວ່າ 20%/ປີໃນໄລຍະ 2016 -2020, ມູນຄ່າການພົວພັນແລກປ່ຽນຂອງຕະຫລາດ ວິທະຍາສາດເຕັກໂນໂລຊີ ເພີ່ມຂຶ້ນສະເລ່ຍ 15- 17%/ປີ. ສູ້ຊົນເພື່ອໃຫ້ລະດັບການພັດທະນາ ວິທະຍາສາດເຕັກໂນໂລຊີ ແມ່ນຫນຶ່ງໃນບັນດາປະເທດຖືກຈັດອັນດັບໃນພາກພື້ນ ອາຊຽນ.”

ເພື່ອໃຫ້ວິທະຍາສາດເຕັກໂນໂລຊີກາຍເປັນກຳລັງຫນູນພັດທະນາ - ảnh 2

ທ່ານ Nguyen Quan ລັດຖະມົນຕີກະຊວງວິທະຍາສາດ ເຕັກໂນໂລຊີ
ພາບ: internet

ຍຸດທະສາດພັດທະນາວິທະຍາສາດເຕັກໂນໂລຊີໄລຍະ 2011 -2020 ຂອງ ຫວຽດນາມ ໄດ້ວາງຄາດໝາຍ: ຈຳນວນຫົວເລື່ອງສະເພາະຄົ້ນຄ້ວາການນຳໃຊ້ງົບປະມານແຫ່ງລັດທີ່ໄດ້ປະກາດອອກສູ່ສາກົນແມ່ນເພີ່ມຂຶ້ນສະເລ່ຍ 15 -20%/ປີ, , ລະດັບຈົດທະບຽນການສ້າງມາດຕະການທີ່ມີປະໂຫຍດເພີ່ມຂຶ້ນ ຈາກ 1,5 -2 ເທົ່າ. ຫວຽດນາມ ສູ້ຊົນເພີ່ມຍອດຈຳນວນເງິນລົງທຶນໃຫ້ແກ່ ວິທະຍາສາດເຕັກໂນໂລຊີບັນລຸກວ່າ 2% GDP ໃນປີ 2020, ຮັບປະກັນລະດັບລົງທຶນຈາກງົບປະມານແຫ່ງລັດໃຫ້ແກ່ ວິທະຍາສາດເຕັກໂນໂລຊີ ບໍ່ຕຳ່ກວ່າ 2% ຍອດລາຍຈ່າຍງົບປະມານແຫ່ງລັດໃນແຕ່ລະປີ, ເພີ່ມກຳລັງບົ່ມຊ້ອນດ້ານວິທະຍາສາດເຕັກໂນໂລຊີ, ກໍ່ສ້າງຮາກຖານບຳລຸງສ້າງ ວິທະຍາສາດເຕັກໂນໂລຊີສູງ, ວິສາຫະກິດເຕັກໂນໂລຊີສູງ 60 ຮາກຖານ, ມີວິສາຫະກິດເຕັກໂນໂລຊີ 5000 ແຫ່ງ ເພື່ອປະກອບສ່ວນສຳຄັນໃຫ້ແກ່ການເຕີບໂຕ. ພິເສດ ຫວຽດນາມ ສູ້ຊົນບຳລຸງສ້າງຖັນແຖວຊັບພະຍາກອນມະນຸດເຮັດວຽກງານ ວິທະຍາສາດເຕັກໂນໂລຊີ ມີລະດັບຄວາມຮູ້ພຽງພໍ ດ້ວຍອັດຕາສ່ວນ 11 - 12 ຄົນໃນຈຳນວນປະຊາຊົນ 10.000 ຄົນໃນປີ 2020. ທົ່ວລະບົບຈະມີອົງການວິທະຍາສາດເຕັກໂນໂລຊີແຫ່ງລັດ ແລະ ພາກສ່ວນເສດຖະກິດອື່ນເກືອບ 2.000 ຄົນ.

ບົດບາດຂອງ ວິທະຍາສາດເຕັກໂນໂລຊີ ຖືກລະບຸຢ່າງຈະແຈ້ງໃນມະຕິຕ່າງໆຜ່ານບັນດາສະໄຫມຂອງກອງປະຊຸມໃຫຍ່ພັກກອມມູນິດ ຫວຽດນາມ. ຕາມນັ້ນແລ້ວ, ວິທະຍາສາດເຕັກໂນໂລຊີ ແມ່ນຂອດເປັນໄລກອນ ແມ່ນກຳລັງຫນູນເພື່ອພັດທະນາເສດຖະກິດສັງຄົມຂອງປະເທດຊາດ. ເພື່ອປະຕິບັດຄາດໝາຍດັ່ງກ່າວໃຫ້ໄດ້, ທ່ານ Nguyen Quan ລັດຖະມົນຕີກະຊວງ ວິທະຍາສາດເຕັກໂນໂລຊີ ຫວຽດນາມ ໄດ້ຢືນຢັນວ່າ:

“ມີຫລາຍມາດຕະການແລ້ວ ແຕ່ມາດຕະການສຳຄັນ ມີລັກສະນະບຸກທະລຸແມ່ນເພີ່ມທະວີການສຸມໃສ່ລົງທຶນ, ຍົກສູງກຳລັງແຮງໃຫ້ແກ່ ວິທະຍາສາດເຕັກໂນໂລຊີຂອງປະເທດຊາດ. ຄຽງຄູ່ກັນນັ້ນ ຮັກສາ 2% ຍອດລາຍຈ່າຍງົບປະມານ, ຕ້ອງມີມາດຕະການລະດົມການປະກອບສ່ວນຂອງສັງຄົມ, ວິສາຫະກິດ. ເພື່ອບັນລຸໃຫ້ໄດ້ 2% ຍອດ GDP ແຫ່ງຊາດສະຫງວນໃຫ້ແກ່ ວິທະຍາສາດເຕັກໂນໂລຊີ ແນ່ນອນວ່າ ບັນດາວິສາຫະກິດຕ້ອງປະກອບສ່ວນ3 -4 ເທົ່າລະດັບລາຍຈ່າຍງົບປະມານແຫ່ງລັດ . ນອກນັ້ນ ຕ້ອງມີຫລາຍມາດຕະການຢ່າງຄົບຊຸດໃນນັ້ນ ມີນະໂຍບາຍສົ່ງເສີມ, ຂໍ້ກຳນົດ… ເພື່ອໃຫ້ວິສາຫະກິດ, ອົງການຈັດຕັ້ງສະຫງວນລາຍຮັບສ່ວນຫນຶ່ງໃຫ້ແກ່ກອງທຶນພັດທະນາວິທະຍາສາດຂອງວິສາຫະກິດເອງ ຫລື ຂອງ ທ້ອງຖິ່ນ, ເຮັດຄືແນວນັ້ນ ພວກເຮົາຈຶ່ງມີແຫລ່ງກຳລັງຢ່າງພຽງພໍເພື່ອພັດທະນາ ວິທະຍາສາດເຕັກໂນໂລຊີ ຂອງປະເທດຊາດໄດ້.”

ທ່ານລັດຖະມົນຕີກະຊວງ ວິທະຍາສາດເຕັກໂນໂລຊີ ຫວຽດນາມ Nguyen Quan ກໍໃຫ້ຮູ້ວ່າ: ທາງກະຊວງພວມປະຕິບັດແຜນຮ່າງ “ສືບຕໍ່ປ່ຽນໃຫມ່ອົງການຈັດຕັ້ງ, ກົນໄກຄຸ້ມຄອງ, ການເຄື່ອນໄຫວ ວິທະຍາສາດເຕັກໂນໂລຊີ ໂດຍພື້ນຖານ, ຮອບດ້ານ ແລະ ຄົບຊຸດ” ເພື່ອຍົກສູງຄຸນນະພາບການເຄື່ອນໄຫວ ວິທະຍາສາດເຕັກໂນໂລຊີຂອງປະເທດຊາດ. ບັນດາການປ່ຽນໃຫມ່ກ່ຽວກັບກົນໄກການເຄື່ອນໄຫວວິທະຍາສາດ ລ້ວນແຕ່ມຸ່ງໄປເຖິງຈຸດໝາຍດຶງດູດ, ລະດົມກຳລັງໃຈຖັນແຖວຊັບພະຍາກອນມະນຸດເຮັດວຽກງານ ວິທະຍາສາດເຕັກໂນໂລຊີ ມີຫົວຄິດປະດິດສ້າງ, ໝູນໃຊ້ວິທະຍາສາດເຕັກໂນໂລຊີນັບແຕ່ການຄົ້ນຄ້ວາຕະຫລອດຮອດການໝູນໃຊ້ພຶດຕິກຳ, ສ້າງປະສິດທິຜົນທາງດ້ານເສດຖະກິດສັງຄົມ.

Thu Hoa