ຫວ່າງແລ້ວນີ້, ທ່ານນາຍົກລັດຖະມົນຕີຫວຽດນາມ Nguyen Tan Dung ໄດ້ຊີ້ນຳບັນດາອົງການມີໜ້າທີ່ຮັບຜິດຊອບຈົ່ງສືບສວນ, ແກ້ໄຂເລື່ອງໃຫ້ຂ່າວເສກສັນປັ້ນແຕ່ງ, ບໍ່ຖືກກັບຄວາມຈິງເພື່ອໃສ່ຮ້າຍປາຍສີກົງຈັກການນຳຂອງປະເທດ, ກະຕຸກຊຸກຍູ້ການຕ້ານທຳລາຍພັກ ແລະ ລັດຫວຽດນາມ ໃນເວັບໄຊຈຳນວນ 1 ຊື່ງໄດ້ກໍ່ຄວາມລະແວງສົງໃສ ແລະ ຫາງສຽງບໍ່ດີໃນສັງຄົມ. ນີ້ແມ່ນ 1 ໃນບັນດາການຊີ້ນຳໂດຍກົງຂອງຜູ້ນຳລັດຖະບານໃນວິວັດທະນາການຄຸ້ມຄອງເພື່ອໃຫ້ອິນເຕີແນັດກາຍເປັນພາຫະນະສື່ມວນຊົນທີ່ມີປະໂຫຍດຢູ່ຫວຽດນາມ.
(ພາບ:nguoicaotuoi.org.vn)
ກ່ອນທີ່ທ່ານນາຍົກລັດຖະມົນຕີຫວຽດນາມ Nguyen Tan Dung ໄດ້ອອກຄຳສັ່ງນີ້, ບົດລາຍງານຂອງກະຊວງຕຳຫຼວດ, ກະຊວງຖະແຫຼງຂ່າວ ແລະ ສື່ສານ, ຄະນະໂຄສະນາສຶກສາສູນກາງ ແລະ ຫ້ອງວ່າການສູນກາງພັກກອມມູນິດຫວຽດນາມ ໃຫ້ຮູ້ວ່າ: ໃນໄລຍະມໍ່ໆມານີ້, ເວັບໄຊຈຳນວນ 1 ໄດ້ໃຫ້ຂ່າວເສກສັນປັ້ນແຕ່ງ, ບໍ່ຖືກກັບຄວາມຈິງກ່ຽວກັບກົງຈັກການນຳຂອງປະເທດຊາດ, ເສກສັນປັ້ນແຕ່ງບັນດາແຜນນະໂຍບາຍ, ນະໂຍບາຍຂອງພັກ ແລະ ລັດຫວຽດນາມ, ໂຄສະນາບັນດາຄຸນຄ່າ “ເສລີ“ “ປະຊາທິປະໄຕ“ ຕາມແບບຕາເວັນຕົກ. ໃນຕົວຈິງ, ບັນດາເວັບໄຊດັ່ງກ່າວ ກໍ່ຄືເວັບໄຊຂອງບັນດາອົງການປະຕິການຕ່າງປະເທດອື່ນໆ ໄດ້ ແລະ ພວມເຮັດໃຫ້ຂໍ້ມູນຂ່າວໃນເຄືອຂ່າຍອິນເຕີແນັດຖືກປັ່ນປ່ວນ, ກະຕຸກຊຸກຍູ້ການຕ້ານພັກ ແລະ ລັດ, ກໍ່ຄວາມວິຕົກກັງວົນໃນໝູ່ມະຫາຊົນກ່ຽວກັບພາລະກິດສ້າງສາ, ພັດທະນາ ແລະ ປ່ຽນໃໝ່ປະເທດຊາດ. ໃນການພົບປະແລກປ່ຽນໂດຍກົງຜ່ານປະຕູຖານຂໍ້ມູນລັດຖະບານເມືອ່ເດືອນ 6/2012 ທີ່ຜ່ານມາ, ທ່ານ Nguyen Bac Son ລັດຖະມົນຕີກະຊວງຖະແຫຼງຂ່າວ ແລະ ສື່ສານຫວຽດນາມ ຖືວ່າ: ບັນດາຂໍ້ມູນຂ່າວເສກສັນປັ້ນແຕ່ງຄືແນວນັ້ນ ຕອ້ງໄດ້ຮັບການຄວບຄຸມຢ່າງແໜ້ນແຟ້ນ ແລະ ມີມາດຕະການຄຸ້ມຄອງຢ່າງລະອຽດ. ທ່ານລັດຖະມົນຕີ Nguyen Bac Son ຢືນຢັນວ່າ:
“ນີ້ແມ່ນການກະທຳທີ່ກົດໝາຍວ່າດ້ວຍສື່ມວນຊົນ ແລະ ກົດໝາຍອື່ນໆຕ້ອງກຳນົດມາດຕະການບັງຄັບ ຍ້ອນມັນໄດ້ລະເມີດເຖິງຄຸນນະທາດ, ສິດເສລີພາບຂອງຄົນອື່ນ, ອິດທິພົນຊື່ສຽງຂອງບຸກຄົນ. ສ່ວນທາງອົງການຄຸ້ມຄອງສື່ສານພວກຂ້າພະເຈົ້າໄດ້ ແລະ ພວມຮຽບຮຽງຮ່າງເອກະສານແທນໃຫ້ດຳລັດເລກທີ 97 ກ່ຽວກັບການຄຸ້ມຄອງການເຄື່ອນໄຫວໃນເຄືອຂ່າຍອິນເຕີແນັດ ເພື່ອໃຫ້ພວມເຮົາມີມາດຕະການບັງຄັບ, ເຮັດແນວໃດທັງສ້າງເງື່ອນໄຂສະດວກ, ເສລີໃຫ້ແກ່ທຸກຄົນ, ທັງຈຳກັດບັນດາການກະທຳສວຍໂອກາດເພື່ອລະເມີດສິດເສລີພາບຂອງສ່ວນບຸກຄົນ, ລະເມີດກົດໝາຍ“
ປະຕູຖານຂໍ້ມູນລັດຖະບານ
(ພາບ: thongtincongnghe.com)
ອິນເຕີແນັດໄດ້ມີໜ້າຢູ່ຫວຽດນາມ ນັບແຕ່ທ້າຍທົດສະວັດທີ 90 ມາຮອດປະຈຸບັນ. ຍ້ອນນະໂຍບາຍເປີດປະຕູ, ສ້າງເງື່ອນໄຂສະດວກຂອງລັດຖະບານຫວຽດນາມ ເພື່ອໃຫ້ອິນເຕີແນັດພັດທະນານັ້ນ, ພ້ອມກັບຈຳນວນຜູ້ນຳໃຊ້ອິນເຕີແນັດນັບມື້ນັບເພີ່ມຂຶ້ນຢ່າງບໍ່ຢຸດຢັ້ງ ແມ່ນການປະກົດຕົວຂອງບັນດາສື່ເອກເລກໂຕນິກ, ເວັບໄຊຂອງບັນດາອົງການຈັດຕັ້ງ, ຂະແໜງການ, ໝູ່ຄະນະ, ທ້ອງຖິ່ນຕ່າງໆ ພ້ອມກັບ blog ສ່ວນຕົວຂອງນັບລ້ານໆຄົນ…. ໃນຈຳນວນດັ່ງກ່າວ, ມີຫຼາຍເວັບໄຊພວມສວຍໃຊ້ສິດເສລີພາບໃນການປາກເວົ້າເພື່ອຊຸກຍູ້ວິວັດການຜັນແປ່ສັນຕິພາບ, ກະຕຸຊຸກຍູ້ການໂຄ່ນລົ້ມລະບອບ. ສະນັ້ນ, ການຊີ້ນຳຫວ່າງແລ້ວນີ້ຂອງທ່ານນາຍົກລັດຖະມົນຕີຫວຽດນາມ Nguyen Tan Dung ກ່ຽວກັບການສືບສວນ, ແກ້ໄຂເລື່ອງໃຫ້ຂ່າວເສກສັນປັ້ນແຕ່ງ, ບໍ່ຖືກກັບຄວາມຈິງເພື່ອໃສ່ຮ້າຍປາຍສີກົງຈັກການນຳຂອງປະເທດຊາດ, ກະຕຸກຊຸກຍູ້ການຕ້ານທຳລາຍພັກ ແລະ ລັດຫວຽດນາມ ໃນເວັບໄຊຈຳນວນ 1….ໄດ້ສະແດງໃຫ້ເຫັນຄວາມເດັດດຽວສະກັດກັ້ນບັນດາການກະທຳສວຍໃຊ້ສິດເສລີພາບທາງສື່ມວນຊົນເພື່ອຕ້ານລັດ, ໂຄສະນາບັນດາເນື້ອໃນບໍ່ເໝາະສົມກັບຂະນົບທຳນຽມຮີດຄອງປະເພນີ, ຊ້ຳບໍ່ໜຳແມ່ນລະເມີດບັນດາຜົນປະໂຫຍດ ຫລືມີການກະທົບທີ່ຫຍໍ້ທໍ້ເຖິງວົງຄະນາຍາດ….ການຊີ້ນຳຂອງທ່ານນາຍົກລັດຖະມົນຕີກໍ່ເຮັດໃຫ້ແຜນນະໂຍບາຍພັດທະນາໄປຄຽງຄູ່ກັບການຄຸ້ມຄອງອິນເຕີແນັດປະກົດຜົນເປັນຈິງ, ແມ່ນບາດກ້າວເດີນຈຳເປັນບໍ່ພຽງແຕ່ສຳລັບຫວຽດນາມ ເທົ່ານັ້ນ, ຫາກສຳລັບທຸກປະເທດທີ່ມີອະທິປະໄຕ ໃນເລື່ອງຄຸ້ມຄອງຂໍ້ມູນຂ່າວສານໃນເຄືອຂ່າຍອິນເຕີແນັດ. ທ່ານ Nguyen The Ky ຮອງຫົວໜ້າຄະນະໂຄສະນາສຶກສາສູນກາງ ຊີ້ແຈ້ງວ່າ:
“ບັນດາພາຫະນະສື່ມວນຊົນພາຍໃນປະເທດ, ໃນນັ້ນມີສື່ເອເລກໂຕນິກຂອງພວກເຮົາ ຕອ້ງໃຫ້ຂ່າວຢ່າງໄວວາ, ດູດດືມໃຈ, ມີປະໂຫຍດເພື່ອດຶງດູດຜູ້ອ່ານພາຍໃນປະເທດ. ຄະນະໂຄສະນາສຶກສາສູນກາງ, ກະຊວງຖະແຫຼງຂ່າວ ແລະ ສື່ສານ, ສະມາຄົມນັກຂ່າວຫວຽດນາມ ຈະມີກົນໄກສະໜອງຂໍ້ມູນຂ່າວສານໃຫ້ແກ່ສື່ມວນຊົນໄວກ່ວາ ແລະ ຄົບຖ້ວນກ່ວາ“
(ພາບ:nhandan.com.vn)
ຄວາມຈິງໃຫ້ເຫັນວ່າ, ເຖິງວ່າ ຂໍ້ມູນຂ່າວໃນເຄືອຂ່າຍອິນເຕີແນັດໄດ້ນຳມາເຊິ່ງຜົນປະໂຫຍດຫຼາຍຢ່າງໃຫ້ແກ່ຄົນເຮົາກໍ່ຕາມ ແຕ່ກໍ່ບໍ່ແມ່ນຈະແກ້ໄຂທຸກໆບັນຫາໃນຊີວິດໄດ້. ສະນັ້ນ, ລັດຖະບານຫວຽດນາມ ໄດ້ສ້າງເງື່ອນໄຂສະດວກໃຫ້ອິນເຕີແນັດສາມາດເສີມຂະຫຍາຍບັນດາຈຸດດີທີ່ພົ້ນເດັ່ນເພື່ອພັດທະນາເສດຖະກິດສັງຄົມ, ດ້ານອື່ນກໍ່ມານະພະຍາຍາມໃນການຄຸ້ມຄອງເພື່ອສະກັດກັ້ນບັນດາຂໍ້ຈຳກັດ ແລະ ຜົນຮ້າຍໂດຍອິນເຕີກແນັດກໍ່ຂຶ້ນ. ສິ່ງດັ່ງກ່າວກໍ່ແມ່ນຈຸດປະສົງເພື່ອແນໃສ່ຮັບປະກັນຄວາມເປັນລະບຽບຮຽບຮ້ອຍທາງສັງຄົມເປັນປົກກະຕິ, ຈຳກັດບັນດາການກະທົບອັນຫຍໍ້ທໍ້ຂອງອິນເຕີແນັດທີ່ມີຕໍ່ວົງຄະນາຍາດໃນລະດັບຕ່ຳສຸດ. ບໍ່ພຽງແຕ່ຢູ່ຫວຽດນາມ ເທົ່ານັ້ນ, ຫາກຫຼາຍປະເທດອື່ນໆໃນໂລກກໍ່ໄດ້ ແລະ ພວມປະຕິບັດເຊັ່ນກັນ.