(vovworld)- ພາຍຫລັງ 8 ເດືອນ ທີ່ລັດຖະບານຫວຽດນາມ ປະຕິບັດຈຸດໝາຍພັດທະນາເສດຖະກິດ ສັງຄົມ ປີ 2014 , ໃນ 14 ຄາດໝາຍເສດຖະກິດສັງຄົມທີ່ໄດ້ວາງອອກໃນປີ 2014, ຄາດວ່າ ຈະມີ 12 ຄາດໝາຍບັນລຸ ແລະ ລື່ນແຜນການ. ໝາກຜົນນີ້ແມ່ນພື້ນຖານເພ່ືອສຳເລັດບັນດາຈຸດໝາຍ, ຄາດໝາຍຂອງແຜນການທີ່ໄດ້ວາງອອກໃຫ້ທັງປີ, ແມ່ນປະຖົມປັດໄຈສະດວດເພື່ອໃຫ້ຫວຽດນາມ ສູ້ຊົນບັນລຸບັນດາຄາດໝາຍສູງກວ່າໃນປີ 2015.
ພາບປະກອບ:chinhphu.vn
|
ສະພາບການເສດຖະກິດ ສັງຄົມ ສືບຕໍ່ມີການຫັນປ່ຽນຢ່າງຕັ້ງຫນ້າໃນທຸກຂົງເຂດ ຍ້ອນຄວາມມານະພະຍາຍາມຂອງທັງລະບົບການເມືອງ, ຂອງປະຊາຄົມວິສາຫະກິດ ແລະ ປະຊາຊົນໃນທົ່ວປະເທດ.
ຄາດວ່າມີຫລາຍຄາດໝາຍສຳຄັນລ້ວນແຕ່ບັນລຸ ແລະ ລື່ນແຜນການ
ໃນບັນດາຄາດໝາຍ ຊື່ງຄາດວ່າຈະບັນລຸ ແລະ ລື່ນແຜນການ ມີການເຕີບໂຕ GDP ບັນລຸ 5,8%, ດັດຊະນີລາຄາໃຊ້ສອຍ (CPI) ບັນລຸປະມານ 5%. ການຄາດຄະເນນີ້ແມ່ນອີງໃສ່ຂໍ້ສັງເກດລວມ ນັ້ນແມ່ນເສດຖະກິດຫວຽດນາມ ພວມໃນທ່າຟື້ນຕົວຢ່າງສະໝຳ່ສະເໝີ ແລະ ບາງຂົງເຂດບັນລຸລະດັບເຕີບໂຕສູງ. ໄພເງິນເຟີ້ໄດ້ຮັບການຄວບຄຸມ, ດັດຊະນີລາຄາໃຊ້ສອຍ ເພີ່ມຂຶ້ນຢູ່ໃນລະດັບຕຳ່ນັບແຕ່ຕົ້ນປີມາຮອດປະຈຸບັນ. ລາຄາສິນຄ້າບາງປະເພດຢູ່ທ້ອງຕະຫລາດໝັ້ນທ່ຽງ. ຮອດເດືອນ 8, GDP ໄດ້ເພີ່ມຂຶ້ນ 5,54%. ດ້ວຍບັນດາດັດຊະນີດັ່ງກ່າວ ແຜນການຂອງທັງປີອາດຈະບັນລຸຄາດໝາຍທ່ີວາງອອກ ແມ່ນ 5,8%.
ອຸດສາຫະກຳຜະລິດປຸງແຕ່ງ, ການປະດິດສ້າງ ສືບຕໍ່ຟື້ນຕົວດ້ວຍລະດັບການເຕີບໂຕສູງກວ່າຫລາຍເມື່ອທຽບໃສ່ໄລຍະດຽວກັນຂອງປີກາຍ(ເພີ່ມຂຶ້ນ 6,3% ເມື່ອທຽບໃສ່ໄລຍະດຽວກັນຂອງປີກາຍ, ໃນນັ້ນອຸດສາຫະກຳຜະລິດປຸງແຕ່ງ, ປະດິດສ້າງເພີ່ມຂຶ້ນ 8,1%). ຂົງເຂດກະສິກຳ ກໍເຊັ່ນດຽວກັນ, ເປັນຕົ້ນແມ່ນສິນໃນນ້ຳບັນລຸຕົວເລກທີ່ຫນ້າປະທັບໃຈ ເມື່ອມູນຄ່າການສົ່ງອອກນັບແຕ່ຕົ້ນປີມາຮອດປະຈຸບັນ ບັນລຸເກືອບ 5 ຕື້ USD, ເພີ່ມຂຶ້ນ 25% ເມື່ອທຽບໃສ່ໄລຍະດຽວກັນຂອງປີ 2013. ການບໍລິການກໍຟື້ນຕົວຢ່າງວ່ອງໄວ.
ເລື່ອງກວດກາເສດຖະກິດມະຫາພາກທຸກດ້ານສະແດງໃຫ້ເຫັນວ່າສະກຸນເງິນມີຄວາມໝັ້ນທ່ຽງ. ການສະສົມເງິນຕາຕ່າງປະເທດບັນລຸລະດັບສູງ. ປະຈຸບັນ, ລະດັບສົ່ງອອກເກີນດຸນຍັງຄົງບັນລຸໄດ້ 1,7 ຕຶ້ USD . ສິ່ງທີ່ໜ້າສົນໃຈນັ້ນແມ່ນ, ນັບແຕ່ກ່ອນມາຮອດປະຈຸບັນ, ການສົ່ງອອກຂອງພາກສ່ວນວິສາຫະກິດທີ່ມີເງິນລົງທຶນຈາກຕ່າງປະເທດ (FDI) ໄດ້ ກວມອັດຕາສ່ວນຫຼາຍ, ແຕ່ວ່າທ້າຍປີ 2013, ພາກສ່ວນວິສາຫະກິດພາຍໃນປະເທດໄດ້ປະກອບສ່ວນໃຫ້ແກ່ການສົ່ງອອກ, ດ້ວຍລະດັບເຕີບໂຕ 11%. ການນຳເຂົ້າກໍ່ເພີ່ມຂຶ້ນ, ແຕ່ສ່ວນຫຼາຍແມ່ນເຄື່ອງຈັກ ແລະ ວັດຖຸ ອຸປະກອນທີ່ຮັບໃຊ້ໃຫ້ແກ່ການຜະລິດ, ຈຳກັດການນຳເຂົ້າວັດຖຸອຸປະກອນທີ່ຮັບໃຊ້ໃຫ້ແກ່ການໃຊ້ສອຍ. ນີ້ກໍ່ແມ່ນສັນຍານສະແດງໃຫ້ເຫັນການນຳເຂົ້າໄດ້ຮັບການຄຸ້ມຄອງຢ່າງແໜ້ນແຟ້ນ.
ກ່ຽວກັບການປ່ອຍທຶນ FDI , ທຶນ ODA ແລະ ທຶນກູ້ຢືມດ້ວຍດອກເບ້ຍຕຳ່ແມ່ນບັນລຸລະດັບສູງພໍສົມຄວນ. ສິ່ງທີ່ໜ້າສົນໃຈແມ່ນການປ່ອຍເງິນ ODA ເມື່ອທຽບໃສ່ໄລຍະດຽວກັນຂອງປີ 2013 ແມ່ນເພີ່ມຂຶ້ນ 41%, ເທົ່າກັບ 3 ຕຶ້ກວ່າ USD. ນີ້ແມ່ນອັດຕາສ່ວນສູງສູດນັບແຕ່ກ່ອນມາຮອດປະຈຸບັນ.
ຕາມຕົວເລກສະຖິຕິເຖິງເດືອນ 8 ແລ້ວ, ມີສັນຍານທີ່ໜ້າຊື່ນຊົມໜຶ່ງອີກນັ້ນແມ່ນຄວາມໄວ້ເນື້ອເຊື່ອໃຈຂອງນັກລົງທຶນຕໍ່ການພັດທະນາຂອງພື້ນຖານເສດຖະກິດໄດ້ເພີ່ມຂຶ້ນ, ດັ່ງນັ້ນເຂົາເຈົ້າຈຶ່ງລົງທຶນກ້ອນໃຫຍ່, ແລະ ເປີດກວ້າງການຜະລິດຢູ່ຫວຽດນາມ. ນອກນັ້ນ, ມາຮອດປະຈຸບັນ, ກໍ່ມີວິສາຫະກິດປະມານ 10.000 ແຫ່ງ, ເຊິ່ງກ່ອນນີ້ໄດ້ປະກາດອັດປະຕູ, ແຕ່ປະຈຸບັນໄດ້ສືບຕໍ່ທຳການເຄື່ອນໄຫວຄືນໃໝ່ແລ້ວ.
ການສົມທົບນະໂຍບາຍບໍລິຫານເສດຖະກິດມະຫາພາກຢ່າງແໜ້ນແຟ້ນ, ມີໄຫວພິກ
ເຖິງວ່າເສດຖະກິດມະຫາພາກຂອງຫວຽດນາມໄດ້ຮັບການຄວບຄູມແລ້ວກໍ່ຕາມ, ແຕ່ລັກສະນະໝັ້ນທ່ຽງບໍ່ທັນສູງເທື່ອ, ລະດັບສິນເຊື່ອຍັງຕຳ່, ຄວາມຕ້ອງການສັງລວມບໍ່ທັນຫັນປ່ຽນຕາມທ່າອ່ຽງທີ່ດີເທື່ອ. ບົນພື້ນຖານນັ້ນ, ໃນ 4 ເດືອນທີ່ຍັງເຫຼືອຂອງປີ 2014, ລັດຖະບານຫວຽດນາມຈະສືບຕໍ່ເຕົ້າໂຮມແກ້ໄຂຄວາມຫຍຸ້ງຍາກໃຫ້ແກ່ການຜະລິດດຳເນີນທຸລະກິດ, ເພີ່ມຄວາມຕ້ອງການ, ເພີ່ມລະດັບສິນເຊື່ອດ້ວຍຫຼາຍມາດຕະການ. ກ່ຽວກັບການແກ້ໄຂໜີ້ເສຍ. ຮອງຜູ້ວ່າການທະນາຄານແຫ່ງລັດຫວຽດນາມ, ທ່ານນາງ ຫງວຽນທິຮົ່ງ ໃຫ້ຮູ້ວ່າ, ເພື່ອໜູນຊ່ວຍໃຫ້ວິວັດການແກ້ໄຂໜີ້ເສຍຢ່າງຕັ້ງໜ້າ, ທະນາຄານແຫ່ງລັດໄດ້ຊີ້ນຳໃຫ້ບໍລິສັດຄຸ້ມຄອງຊັບສົມບັດຂອງບັນດາອົງການສິນເຊື່ອຫວຽດນາມ ຕັ້ງໜ້າຊີ້ໜີ້ເສຍ, ເພື່ອຮອດທ້າຍປີນີ້ຊື້ໜີ້ເສຍຂອງບັນດາອົງການສິນເຊື່ອໃຫ້ໄດ້ປະມານ 70.000-100.000 ຕື້ດົ່ງ.
“ໃນໄລຍະຈະມາເຖິງ ທະນາຄານແຫ່ງລັດ ສືບຕໍ່ຊີ້ນຳບັນດາອົງການສິນເຊື່ອເພີ່ມທະວີ ແລະ ນຳໃຊ້ກອງທຶນສະສົມເພື່ອຮັບມືກັບຄວາມສ່ຽງ ເພື່ອແກ້ໄຂຫນີ້ເສຍ ແລະ ສົມທົບກັບບັນດາກະຊວງ, ຂະແຫນງການກ່ຽວຂ້ອງເພື່ອກວດກາບັນດາຂໍ້ຕິດຂັດໃນດຳລັດເລກທີ 53 ກ່ຽວກັບການແກ້ໄຂຫນີ້ເສຍຂອງລັດຖະບານ ເພື່ອແກ້ໄຂຄວາມຫຍຸ້ງຍາກໃນວິວັດການແກ້ໄຂຫນີ້ເສຍ. ນອກນັ້ນ, ຄວນສົມທົບກັບບັນດາກະຊວງ, ຂະແຫນງການກ່ຽວຂ້ອງຢ່າງແຫນ້ນແຟ້ນ ຕາມເນື້ອໃນຈິດໃຈຂອງດຳລັດເລກທີ 53 ເພື່ອຍູ້ໄວວິວັດການແກ້ໄຂຫນີ້ເສຍ.”
ບັນຫາທີ່ສອງຄວນສຸມໃສ່ ລັດຖະບານພວມຊີ້ນຳທຸກຂັ້ນ, ຂະແຫນງການ, ປະຕິບັດການສ້າງໂຄງປະກອບພື້ນຖານເສດຖະກິດຄືນໃຫມ່. ຂົງເຂດນີ້ ຫວຽດນາມ ມີຄວາມານະພະຍາຍາມໃຫຍ່ຫລວງ ແຕ່ໃນໄລຍະນີ້ ຄວນຊີ້ນຳຢ່າງຂ້ຽວຂາດກວ່າອີກ. ການສ້າງໂຄງປະກອບການລົງທຶນຂອງລັດຄືນໃຫມ່, ສ້າງໂຄງປະກອບວິສາຫະກິດ ແລະ ລະບົບທະນາຄານຄືນໃຫມ່ ດ້ວຍບັນດາມາດຕະການຢ່າງຄົບຊຸດເພື່ອປະກອບສ່ວນບັນລຸການເຕີບໂຕ.
ນອກນັ້ນ, ເລື່ອງເດັດດ່ຽວຫລຸດຜ່ອນບັນດາລະບຽບການດ້ານບໍລິຫານທີ່ບໍ່ຈຳເປັນ ເພື່ອສ້າງກຳລັງຫນູນ ຊຸກຍູ້ການຜະລິດ, ການລົງທຶນ, ປັບປຸງສະພາບແວດລ້ອມແຫ່ງການດຳເນີນທຸລະກິດ ແລະ ຍົກສູງກຳລັງແກ້ງແຍ້ງແຫ່ງຊາດ ກໍແມ່ນຄວາມຮຽກຮ້ອງຕ້ອງການທີ່ຈຳເປັນ. ຄຽງຄູ່ກັນນັ້ນແມ່ນການກວດກາ, ສະຫລຸບ, ຕີລາຄາ ແລະ ສະເຫນີ ລົບລ້າງບັນດາການວາງແຜນກຳນົດທີ່ບໍ່ເໝາະສົມ, ສິ້ນເປືອງຫລາຍ, ກີດຂວາງຕະຫລາດ, ກີດຂວາງການພັດທະນາ…. ເມື່ອເຕື້ອງເຖິງເນື້ອໃນນີ້, ທ່ານນາຍົກລັດຖະມົນຕີ ຫງວຽນເຕີນຢູງ ເນັ້ນຫນັກວ່າ:
“ສັງຄົມໃດກໍຕ້ອງຄຸ້ມຄອງດ້ວຍກົດໝາຍ, ດ້ວຍຍຸດທະສາດ, ດ້ວຍການວາງແຜນກຳນົດ. ປະຈຸບັນ ແຜນກຳນົດຂອງຫວຽດນາມ ຄຸນນະພາບບໍ່ທັນສູງ, ສິ້ນເປືອງຫລາຍ, ກໍ່ຄວາມຫຍຸ້ງຍາກສັບສົນ… ສະນັ້ນ ກະຊວງແຜນການ ແລະ ການລົງທຶນ ຮັບຜິດຊອບເປັນເສນາທິການເພື່ອສັງລວມໃຫ້ແກ່ລັດຖະບານ ສຸ່ມໃສ່ວາງແຜນກຳນົດເພື່ອສາມາດເປັນໄປໄດ້.”
ດ້ວຍຄວາມມານະພະຍາຍາມຂອງທັງລະບົບການເມືອງ, ປະຊາຄົມວິສາຫະກິດ ແລະ ປະຊາຊົນ, ຫວຽດນາມ ພວມສຳເລັດບັນດາຄາດໝາຍເສດຖະກິດ ສັງຄົມຂອງປີ 2014 ເທື່ອລະກ້າວ. ນີ້ແມ່ນສັນຍານເປັນຫນ້າຊື່ນຊົມສະແດງໃຫ້ເຫັນວ່າ ເສດຖະກິດຫວຽດນາມ ພວມໃນທ່າຟື້ນຕົວຢ່າງສະໝຳ່ສະເຫມີ, ສ່າງທ່າພັດທະນາຢູ່ໃນລະດັບສູງກວ່າ, ໝັ້ນທ່ຽງກວ່າໃນປີ 2015.