ວັນທີ 15/5, ກົມການເມືອງສູນກາງພັກກອມມູນິດຫວຽດນາມໄດ້ປະກາດໃຊ້ຄຳສັ່ງເລກທີ 05 ກ່ຽວກັບການຍູ້ແຮງການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານໂຮ່ຈິມິນ. ການປະຕິບັດຄຳສັ່ງນີ້ ແມ່ນເພື່ອແນໃສ່ນຳແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານໂຮ່ຈິມິນໃຫ້ກາຍເປັນພື້ນຖານຢ່າງໝັ້ນຄົງໜັກແໜ້ນຂອງຊີວິດສັງຄົມ.
ປະທານໂຮ່ຈິມິນໂອ້ລົມກັບພະນັກງານ, ນັກຮົບກຳລັງປະກອບອາວຸດແຂວງວິ້ງຟຸກເມື່ອວັນທີ 2.3.1963 |
ເນື້ອໃນພື້ນຖານຂອງຄຳສັ່ງເລກທີ 05 ຂອງກົມການເມືອງສະໄໝທີ 12 ແມ່ນຕີລາຄາຄືນໂດຍສັງເຂບກ່ຽວກັບໝາກຜົນ, ຄວາມຈຳກັດຂອງການປະຕິບັດ ຄຳສັ່ງເລກທີ 03 ຂອງກົມການເມືອງສະໄໝທີ 11 ກ່ຽວກັບເລື່ອງສືບຕໍ່ຍູ້ແຮງການຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມິນໃນ 5 ປີທີ່ຜ່ານມາ. ຕາມນັ້ນແລ້ວ, ຄຳສັ່ງເລກທີ 03 ຂອງກົມການເມືອງສະໄໝທີ 11 ໄດ້ບັນລຸໝາກຜົນໃນເບື້ອງຕົ້ນ, ປະກອບສ່ວນສຳຄັນເຂົ້າໃນການປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກ ແລະ ມະຕິກອງປະຊຸມສູນກາງພັກຄັ້ງທີ 4 ສະໄໝທີ 11 ກ່ຽວກັບບາງບັນຫາທີ່ຮີບດ່ວນໃນການກໍ່ສ້າງພັກໃນປະຕິບັນຢ່າງມີໄຊ.
ຈຸດໃໝ່ຂອງຄຳສັ່ງເລກທີ 05
ຄຳສັ່ງເລກທີ 05 ໄດ້ຍົກອອກລະບົບທັດສະນະແນວຄິດປະທານໂຮ່ຈິມິນກ່ຽວກັບການປົດປ່ອຍຊາດ, ປົດປ່ອຍຊົນຊັ້ນ, ປົດປ່ອຍສັງຄົມ ແລະ ມະນຸດຊຶ່ງພະນັກງານ, ສະມາຊິກພັກແຕ່ລະຄົນຄວນຮ່ຳຮຽນ. ຄຳສັ່ງເລກທີ 5ໄດ້ເຕື້ອງເຖິງບັນດາທັດສະນະແບບຢ່າງຄຸນສົມບັດປະທານໂຮ່ຈິມິນກ່ຽວກັບການເດັດດ່ຽວຈົງຮັກພັກດີ, ຍຶດໝັ້ນແນວຄິດປະຕິວັດ, ຖືຜົນປະໂຫຍດຂອງພັກ, ຂອງປະຊາຊົນເປັນສຳຄັນອັນດັບໜຶ່ງ, ຮັບໃຊ້ປະເທດຊາດ ແລະ ປະຊາຊົນຢ່າງສຸດໃຈ. ກ່ຽວກັບແບບແຜນການດຳລົງຊີວິດຂອງປະທານໂຮ່ຈິມິນ, ຄຳສັ່ງເລກທີ 5 ໄດ້ຊີ້ໃຫ້ເຫັນແບບແຜນຈິນຕະນາການເອກະລາດ, ເປັນເຈົ້າຕົນເອງ, ມີຫົວຄິດປະດິດສ້າງ, ຍາມໃດທິດສະດີກໍຕ້ອງຕິດພັນກັບພຶດຕິກຳ, ມີຈິດໃຈຮັກປະຊາຊົນ, ເຄົາລົບປະຊາຊົນ, ເພື່ອປະຊາຊົນ, ຄຳເວົ້າໄປຄຽງຄູ່ກັບການກະທຳ, ເກັ້ຍກອມປະຊາຊົນຂອງປະທານໂຮ່ຈິມິນ. ໃນຄຳສັ່ງເລກທີ 05, ກົມການເມືອງໄດ້ກຳນົດການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານໂຮ່ຈິມິນແມ່ນເນື້ອໃນປະການໜຶ່ງທີ່ສຳຄັນຂອງວຽກງານກໍ່ສ້າງປັບປຸງພັກ. ທ່ານນາງ ຫງວຽນທິເຟືອງຮວາ ຫົວໜ້າກົມສັງກັດຄະນະໂຄສະນາສຶກສາສູນກາງ ໃຫ້ຮູ້ວ່າ :
“ຄຳສັ່ງເລກທີ 05 ຂອງກົມການເມືອງໄດ້ຮຽກຮ້ອງໃຫ້ຕ້ອງເຮັດໃຫ້ແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານໂຮ່ຈິມິນກາຍເປັນພື້ນຖານທາງດ້ານຈິດໃຈຢ່າງໝັ້ນຄົງໜັກແໜ້ນຂອງຊີວິດສັງຄົມ, ສ້າງວັດທະນະທຳມະນຸດຫວຽດນາມ. ຕ້ອງເຮັດໃຫ້ທົ່ວພັກ, ທົ່ວກອງທັບມີຄວາມຮັບຮູ້ນັບມື້ນັບເລິກເຊິ່ງກ່ວາກ່ຽວກັບເນື້ອໃນຂອງຄຸນຄ່າອັນໃຫຍ່ຫຼວງຂອງແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານໂຮ່ຈິມິນ. ກົມການເມືອງໃນຄັ້ງນີ້ ພິເສດໄດ້ຮຽກຮ້ອງໃຫ້ການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານໂຮ່ຈິມິນຕ້ອງຕິດພັນກັບການປະຕິບັດມະຕິເລກທີ 29 ຂອງຄະນະບໍລິຫານງານສູນກາງພັກສະໄໝທີ 11 ກ່ຽວກັບການປ່ຽນໃໝ່ການສຶກສາ ແລະ ກໍ່ສ້າງໂດຍພື້ນຖານ ແລະ ຮອບດ້ານ. ດັ່ງນັ້ນ, ກົມການເມືອງສະໄໝທີ 12 ໄດ້ຮຽກຮ້ອງຢ່າງສູງສຸດວ່າ ການກໍ່ສ້າງຕ້ອງຕິດພັນກັບການຕ້ານ, ເພີ່ມທະວີວຽກງານກວດກາ ກະຕຸກຊຸກຍູ້, ໂຄສະນາກ່ຽວກັບແບບຢ່າງຄຸນສົມບັດປະທານໂຮ່ຈິມິນ”
ຮ່ຳຮຽນຕາມແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານໂຮ່ຈິມິນ ຕາມຫົວເລື່ອງໃນທົ່ວທັງອາຍຸການ
ຕາມທ່ານນາງ ຫງວຽນທິເຟືອງຮວາ, ເພື່ອນຳຄຳສັ່ງເລກທີ 05 ເຂົ້າສູ່ຊີວິດຕົວຈິງ, ບັນດາອົງການສຳນັກງານ, ຂະແໜງການ, ທ້ອງຖິ່ນຕ່າງໆຕ້ອງຄົ້ນຄ້ວາຊາບຊຶມຄຳສັ່ງເລກທີ 05 ຂອງກົມການເມືອງໃນບັ້ນດຳເນີນຊີວິດພັກກໍຄືບັ້ນດຳເນີນຊີວິດຂອງອຳນາດການປົກຄອງ, ອົງການຈັດຕັ້ງມະຫາຊົນ. ຈາກນັ້ນ, ສາມາດເຂົ້າໃຈແຈ້ງກ່ຽວກັບບັນດາຈຸດປະສົງທີ່ຕ້ອງການ, ກໍຄືເນື້ອໃນ, ຈຸດໃໝ່ຂອງຄຳສັ່ງເລກທີ 05 ຂອງກົມການເມືອງເພື່ອຈັດຕັ້ງປະຕິບັດໃນໄລຍະທີ່ຈະມາເຖິງ. ທ່ານນາງ ຫງວຽນທິເຟືອງຮວາ ເນັ້ນໜັກວ່າ :
“ ການຮ່ຳຮຽນຕາມແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານໂຮ່ຈິມິນແມ່ນໄດ້ປະຕິບັດຕາມທິດນຳທີ່ວ່າ ຂັ້ນເທິງຮຽນກ່ອນ ປະຕິບັດ ກ່ອນ, ຂັ້ນລຸ່ມຮຽນຕາມພາຍຫຼັງ, ປະຕິບັດຕາມພາຍຫຼັງ ກໍຄືຢູ່ພາຍໃນພັກຮຽນກ່ອນ, ຢູ່ພາຍນອກພັກ ຮຽນຕາມພາຍຫຼັງ. ແຕ່ລະປີ ເນື່ອງໃນໂອກາດສະເຫຼີມສະຫຼອງວັນເກີດປະທານໂຮ່ຈິມິນ, ກົມການເມືອງ ກໍເປີດຊຸດຮຽນ ຫົວເລື່ອງ ກ່ຽວກັບແນວຄິດແບບແຜນການດຳລົງຊີວິດຂອງປະທານໂຮ່ຈິມິນຕິດພັນກັບຄວາມຮຽກຮ້ອງຕ້ອງການ ຂອງໜ້າທີ່ໃນປີ. ພ້ອມກັນນັ້ນ ກໍສ້າງແຜນການປະຕິບັດຕາມປະທານໂຮ່ຈິມິນເພື່ອໃຫ້ພະນັກງານ ສະມາຊິກພັກເຮັດຕາມ”
ຄຳສັ່ງເລກທີ 05 ໄດ້ເນັ້ນໜັກວ່າ ການເພີ່ມທະວີວຽກງານກວດກາ, ກະຕຸກຊຸກຍູ້ການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານໂຮ່ຈິມິນ ຕ້ອງຕິດພັນກັບການສັງເກດຕີລາຄາພະນັກງານ ລັດຖະກອນ, ສະມາຊິກພັກໃນແຕ່ລະປີ ແລະ ທັງອາຍຸການ. ຕາມນັ້ນແລ້ວ, ບັນດາອົງການສຳນັກງານທີ່ມີໜ້າທີ່ຮັບຜິດຊອບສືບຕໍ່ສ້າງມາດຖານດ້ານຈັນຍາບັນ, ຈັນຍາທຳຂອງພະນັກງານຢູ່ແຕ່ລະທ້ອງຖິ່ນ, ອົງການສຳນັກງານ, ຫົວໜ່ວຍໃຫ້ສົມບູນແບບ. ບັນດານະໂຍບາຍ, ກົດໝາຍທີ່ກ່ຽວຂ້ອງເຖິງຈັນຍາບັນ, ຈັນຍາທຳຂອງພະນັກງານ ກໍຈະສືບຕໍ່ສ້າງໃຫ້ສົມບູນແບບ. ຄຳສັ່ງເລກທີ 05 ຍັງເອົາໃຈໃສ່ເປັນພິເສດເຖິງການກໍ່ສ້າງ, ສະຫຼຸບ ແລະ ທະວີຄຸນບັນດາຕົວແບບທີ່ກ້າວໜ້າກ່ຽວກັບການປະຕິບັດຕາມແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານໂຮ່ຈິມິນ.