(vovworld) - ກອງປະຊຸມເວທີປາໄສເສດຖະກິດໂລກ (WEF) ຄັ້ງທີ 45 ຈະດຳເນີນແຕ່ວັນທີ 21-24/1, ຢູ່ ດາໂວດ (ຊະວິດ), ດ້ວຍຫົວຂໍ້ວ່າ ”ສະພາບໂລກາພິວັດໃໝ່”. ກອງປະຊຸມໃນປີນີ້ດຳເນີນໄປໃນສະພາບປະເທດຕ່າງໆພວມຕ້ອງປະເຊີນໜ້າບັນດາການທ້າທາຍໃຫຍ່ໃນການສົບທົບ ແລະ ຮ່ວມສຳພັນນຳກັນ, ເພື່ອແນໃສ່ຮັບມີກັບການທ້າທາຍໃນທົ່ວໂລກ. ຍ້ອນເຫດນັ້ນ. ເລື່ອງຊອກຫາວິທີເພື່ອບັນລຸຜົນສຳເລັດໃນປີ 2015 ແມ່ນບຸລິມາສິດທີ່ສຳຄັນ ເພື່ອຮັບປະກັນໃຫ້ແກ່ການເຕີບໂຕຢ່າງໝັ້ນຄົງ ແລະ ສ້າງຄວາມໄວ້ເນື້ອເຊື່ອໃຈຄືນໃໝ່. ເຖິງຢ່າງໃດກໍ່ຕາມ, ນີ້ບໍ່ແມ່ນໜ້າທີ່ງ່າຍດາຍເທື່ອ.
(ພາບປະກອບ)
WEF ຄັ້ງທີ 45 ມີຜູ້ແທນເຂົ້າຮ່ວມເປັນຈຳນວນຫຼວງຫຼາຍ, ດ້ວຍ 2.500 ຄົນ. ນອກຈາກການນຳທີ່ມາຈາກຫຼາຍປະເທດແລ້ວ, ຍັງມີນັກທຸລະກິດອັນດັບໜຶ່ງ 1.500 ຄົນ, ທີ່ມາຈາກ 140 ກວ່າປະເທດ ແລະ ເຂດແຄວ້ນຢູ່ໃນໂລກ. ຄາດວ່າທ່ານນາງນາຍົກລັດຖະມົນຕີ ເຢຍລະມັນ Angela Merkel, ທ່ານນາຍົກລັດຖະມົນຕີເຕິກກີ Ahmet Davutoglu, ທ່ານປະທານາທິບໍດີຝລັ່ງ Francois Hollande, ທ່ານນາຍົກລັດຖະມົນຕີຈີນ ຫຼີເຄີຊຽງ, ທ່ານນາຍົກລັດຖະມົນຕີອີຕາລີ Matteo Renzi, ທ່ານປະທານາທິບໍດີອາຟະລິກາໃຕ້ Jacob Zuma, ທ່ານລັດຖະມົນຕີວ່າການການຕ່າງປະເທດອາເມລິກາ John Kerry ຈະມີໜ້າໃນເວທີປາໄສປີນີ້.
WEF 2015 ດຳເນີນໄປໃນສະພາບໂລກພວມເກີດການຜັນແປຫຼາຍຢ່າງເຊັ່ນ: ການພົວພັນລະຫວ່າງລັດເຊຍ ແລະ ຝ່າຍຕາເວັນຕົກຊົ່ວຮ້າຍລົງນັບແຕ່ພາຍຫຼັງສົງຄາມເຢັນ; ໂລກພະຍາດເອໂບລາ ແຜ່ລະບາດຢູ່ອາຟລິກາຕາເວັນຕົກ; ລາຄານຳ້ມັນຕົກລົງໃນລະດັບຕຳ່ສຸດ, ບັນດາບັນຫາກ່ຽວກັບການຜະລິດ ແລະ ຂົ່ມຂູ່ນຳໃຊ້ອາວຸດນິວຄະເລຍຢູ່ບາງປະເທດ. ດັ່ງນັ້ນໃນກອງປະຊຸມຄັ້ງນີຈະດຳເນີນການພົບປະ, ເຈລະຈາທາງການ ແລະ ບໍ່ເປັນທາງການຄັ້ງຕ່າງໆ ເພື່ອແນໃສ່ຊຸກຍູ້ຄວາມມານະພະຍາຍາມສ້າງສັນຕິພາບ. ນີ້ກໍ່ແມ່ນສາຍເຫດ, ກ່ອນທີ່ດຳເນີນກອງປະຊຸມປະຈຳປີຄັ້ງທີ 45, ແທນທີ່ຈະສຸມໃສ່ເຂົ້າຫົວເລື່ອງເສດຖະກິດ, WEF ພັດປະກາດ ການທ້າທາຍໃຫຍ່ 10 ຢ່າງ, ເຊິ່ງໂລກພວມຕ້ອງປະເຊີນໜ້າຄື: ບັນຫາຂາດຊັບພະຍາກອນ, ທັກສະເຮັດວຽກ; ແຫຼ່ງຊັບພະຍາກອນມະນຸດ, ຄວາມສະເໝີພາບລະຫວ່າງຍິງ - ຊາຍ; ການລົງທຶນໄລຍະຍາວ, ພື້ນຖານໂຄງລ່າງ ແລະ ການພັດທະນາ; ການຄ້າ ແລະ ການລົງທຶນສາກົນ; ອະນາຄົດຂອງລະບົບການເງິນ; ການຄຳ້ປະກັນດ້ານສະບຽງອາຫານ. ສ່ວນບັນດາບັນຫາໃນປະຈຸບັນຄື: ການປະທະກັນປິ່ນຂັ້ນໄດ, ດ້ານພູມສາດການເມືອງ, ໂລກລະບາດ, ການແບ່ງໄລຍະເຕີບໂຕ ແລະ ສິ່ງແວດລ້ອມພະລັງງານໃໝ່ກໍ່ຖືກນຳເຂົ້າລາຍການເຮັດວຽກຂອງກອງປະຊຸມ.
ຕາມປະທານຜູ້ບໍລິຫານ WEF ທ່ານ Klaus Schwab ແລ້ວ, ເວທີປາໄສເສດຖະກິດ Davos ຮັບໃຊ້ປະຊາຄົມໂລກຄືດັ່ງພື້ນຖານໃຫ້ແກ່ການຮ່ວມມືພາກລັດ - ເອກະຊົນ. ການຮ່ວມມືນີ້ເພື່ອແນໃສ່ແກ້ໄຂບັນດາການທ້າທາຍເຊິ່ງທຸກໆປະເທດພວມຕ້ອງປະເຊີນໜ້າ. ດັ່ງນັ້ນຮຽກຮ້ອງຕ້ອງມີຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ. ທ່ານ Schwab ຫວັງວ່າ ກອງປະຊຸມປະຈຳປີຄັ້ງນີ້ຈະເລີ່ມຕົ້ນໄລຍະຟື້ນຟູຄວາມໄວ້ເນື້ອເຊື່ອໃຈທົ່ວໂລກ.
ໃນຂະນະນັ້ນ, ຫົວໜ້ານັກເສດຖະກິດຂອງເວທີປາໄສເສດຖະກິດໂລກ Jennifer Blanke ກໍ່ຖືວ່າ: ໜຶ່ງໃນບັນດາບັນຫາສຳຄັນໃນປີນີ້ເຊິ່ງກອງປະຊຸມຄວນບຸລິມະສິດນັ້ນແມ່ນການຮັບປະກັນຄວາມສະຫງົບທົ່ວໂລກ. ຜ່ານນັ້ນຟື້ນຟູຄວາມໄວ້ເນື້ອເຊື່ອໃຈໃນລະບົບການເມືອງ ແລະ ເສດຖະກິດ. ຕາມນັກເສດຖະກິດ Jennifer Blanke ແລ້ວ, ມີການກະທົບລະຫວ່າງລະບົບເສດຖະກິດ ແລະ ພູມສາດການເມືອງ. ໂລກພວມປະເຊີນໜ້າກັບບັນດາການປະທະກັນດ້ານພູມສາດການເມືອງ ເຮັດໃຫ້ຄວາມໄວ້ເນື້ອເຊື່ອໃຈຖືກທຳລາຍ, ສົ່ງຜົນສະທ້ອນເຖິງການເຄື່ອນໄຫວຮ່ວມມືເສດຖະກິດລະຫວ່າງປະເທດຕ່າງໆ. ຜູ້ອຳນວຍການໃຫຍ່ກອງທຶນເງິນຕາສາກົນ Christine Lagarde ຮັບຮູ້ວ່າ: ເສດຖະກິດກິດທົ່ວໂລກພວມຕ້ອງປະເຊີນໜ້າກັບການທ້າທາຍຫຼາຍຢ່າງ, ໂດຍບໍ່ຫົວຊາຕໍ່ບັນດາສັນຍານຕັ້ງໜ້າຈາກພື້ນຖານເສດຖະກິດ ອາເມລິກາ ແລະ ລາຄານ້ຳມັນຫລຸດລົງ. ເພື່ອຮັບປະກັນໃຫ້ການຟື້ນຟູຢ່າງໝັ້ນຄົງຂອງພື້ນຖານເສດຖະກິດທົ່ວໂລກ ຮຽກຮ້ອງໃຫ້ມີບັນດາການເຄື່ອນໄຫວເໝາະສົມຂອງບັນດານັກວາງແຜນນະໂຍບາຍຈາກ ເອີລົບ ແລະ ທົ່ວໂລກ.
ກາລະໂອກາດໃຫ້ແກ່ການເຕີບໂຕເສດຖະກິດໂລກບໍ່ມີຫຼາຍ
ອາດເຫັນໄດ້ວ່າ: ເຖິງວ່ານີ້ແມ່ນກອງປະຊຸມປະຈຳປີຂອງເວທີປາໄສເສດຖະກິດໂລກ ກໍ່ຕາມ ແຕ່ບັນຫາເສດຖະກິດພັດບໍ່ຖືກຈັດອັບດັບຕົ້ນຢູ່ WEF ຄັ້ງທີ 45. ບັນດາຄວາມວິຕົກວັງວົນກ່ຽວກັບຄວາມສ່ຽງດ້ານເສດຖະກິດຄື: ສະພາບຫວ່າງງານ, ຂາດວຽກເຮັດງານທຳ ຫຼື ວິກິດການການເງິນບໍ່ໄດ້ເຕື້ອງເຖິງຫຼາຍ ຫາກຖັດຈາກຄວາມສົນໃຈອື່ນໆເຊັ່ນ: ການປະທະກັນ, ບັນຫາສັງຄົມ, ສິ່ງແວດລ້ອມ. ຍິ່ງກວ່ານັ້ນ, ດ້ວຍລາຍການເຮັດວຽກທີ່ມີຫຼາຍເນື້ອໃນຄືແນວນັ້ນ, ຍາກທີ່ຈະບັນລຸໄດ້ບັນດາມາດຕະການລະອຽດ ແລະ ສຳຄັນທີ່ເວທີປາໄສຄັ້ງນີ້. ປະທານ WEF ທ່ານ Klaus Schwab ສະແດງຄວາມຫວັງວ່າ, ກອງປະຊຸມຄັ້ງນີ້ຈະບັນລຸໄດ້ຄວາມຮັບຮູ້ລວມລະຫວ່າງປະເທດຕ່າງໆ, ຊອກຫາມາດຕະການໃຫ້ສົນທິສັນຍາແມ່ ກໍ່ຄືປະກອບສ່ວນເຂົ້າໃນການສ້າງຄວາມໄວ້ເນື້ອເຊື່ອໃຈຢູ່ເຂດທີ່ພວມມີການປະທະກັນ, ບັນລຸໄດ້ບາດກ້າວໃນການແກ້ໄຂການທ້າທາຍທາງດ້ານເສດຖະກິດທີ່ມີລັກສະນະທົ່ວໂລກ.
ເປັນທີ່ຈະແຈ້ງແລ້ວວ່າ, ບັນດາການທ້າທາຍທົ່ວໂລກໄດ້ມີການກະທົບຢ່າງແຮງເຖິງເນື້ອໃນກອງປະຊຸມ WEF 2015. ສິ່ງດັ່ງກ່າວສະແດງໃຫ້ເຫັນວ່າ ໂລກພວມຕົກເຂົ້າໃນສະພາບວິກິດການຢ່າງຮອບດ້ານ ແລະ ເລື່ອງຊອກຫາວິທີຫຼຸດພົ້ນອອກຈາກການທ້າທາຍນີ້ ຈຳເປັນຕ້ອງມີຄວາມມານະພະຍາຍາມຂອງທຸກປະເທດ, ຫາກບໍ່ແມ່ນໜ້າທີ່ສະເພາະຂອງ WEF 45 ເທົ່ານັ້ນ.