“ຫວຽດນາມພ້ອມແລ້ວຈະກ້າວເດີນໄປຄຽງຄູ່ກັບການພັດທະນາຂອງພື້ນຖານເສດຖະກິດໂລກ“ ນັ້ນແມ່ນສິ່ງທີ່ທ່ານຮອງນາຍົກລັດຖະມົນຕີ ຫວຽດນາມ ຮ່ວາງຈູງຫາຍ ຢືນຢັນຢູ່“ກອງປະຊຸມເສດຖະກິດການຕ່າງປະເທດຫວຽດນາມ ຄັ້ງທີ 3” ຫາກໍດຳເນີນໄປຢູ່ ຮ່າໂນ້ຍ. ກອງປະຊຸມເສດຖະກິດການຕ່າງປະເທດຫວຽດນາມ ປີ 2012 ຄັ້ງນີ້ ແມ່ນໂອກາດເພື່ອໃຫ້ລັດຖະບານຫວຽດນາມ ເປັນເຈົ້າການວາງອອກສານກ່ຽວກັບຄວາມຕັດສິນໃຈຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້ ແລະ ປົວແປງສະພາບແວດລ້ອມແຫ່ງການລົງທຶນ,ໂຄສະນາກ່ຽວກັບແນວທາງ, ບັນດາບຸລິມະສິດພັດທະນາຂອງຫວຽດນາມ ພາຍຫລັງກອງປະຊຸມໃຫຍ່ຄັ້ງທີ 11 ຂອງພັກກອມມູນິດຫວຽດນາມ ມາສູ່ປະຊາຄົມໂລກ. ນະທີ່ນີ້ ທ່ານຮອງນາຍົກລັດຖະມົນຕີ ຮ່ວາງຈູງຫາຍ ໄດ້ມີການແລກປ່ຽນຢ່າງເປີດເຜີຍ ແລະ ກົງໄປກົງມາກັບບັນດານັກລົງທຶນຢູ່ພາຍໃນ ແລະ ຕ່າງປະເທດ ພ້ອມທັງຢືນຢັນວ່າ: ຫວຽດນາມ ຕັດສິນໃຈຍູ້ແຮງກິດຈະການປ່ຽນແປງໃຫມ່, ປະຕິຮູບພື້ນຖານເສດຖະກິດ, ສ້າງສາປະເທດຊາດ ແລະ ສ້າງທຸກເງື່ອນໄຂອຳນວຍຄວາມສະດວກໃຫ້ແກ່ບັນດານັກລົງທຶນຕ່າງປະເທດ ເມື່ອເຂົ້າມາລົງທຶນຢູ່ຫວຽດນາມ.
ຕາມທ່ານຮອງນາຍົກລັດຖະມົນຕີ ຮ່ວາງຈູງຫາຍແລ້ວ, ໃນສະພາບວິກິດການເສດຖະກິດໂລກ, ຫວຽດນາມ ໄດ້ຜັນຂະຫຍາຍບັນດາໝວດມາດຕະການກ່ຽວກັບເສດຖະກິດຢ່າງສຳເລັດຜົນ, ດັດປັບຈຸດໝາຍຈາກການເຕີບໂຕມາສູ່ການຄວບຄຸມໄພເງິນເຟີ້, ຮັກສາເສດຖະກິດມະຫານພາກເປັນປົກກະຕິ ແລະ ຮັບປະກັນຊີວິດສັງຄົມ. ຫວຽດນາມ ມີຄວາມປະເອີບໃຈກ່ຽວກັບແງ່ຫວັງການພັດທະນາເສດຖະກິດຂອງຕົນ. ຈາກການແກ້ໄຂວິກິດການໃນໄລຍະຜ່ານມາ, ຫວຽດນາມ ຖອດຖອນໄດ້ບົດຮຽນຫລາຍຢ່າງ. ຫວຽດນາມ ຈະຢືດໝັ້ນປະຕິບັດນະໂຍບາຍປະຕິຮູບ, ປ່ຽນໃຫມ່ພື້ນຖານເສດຖະກິດ, ພິເສດ ແມ່ນປະຕິຮູບດ້ານບໍລິຫານ, ພັດທະນາ ແຫລ່ງຊັບພະຍາກອນມະນຸດ, ພື້ນຖານໂຄງລ່າງຢ່າງຄົບຊຸດ, ພັດທະນາວິທະຍາສາດເທັກໂນໂລຊີ. ຫວຽດນາມ ຈະຍູ້ແຮງການສ້າງໂຄງປະກອບພື້ນຖານເສດຖະກິດຄືນໃຫມ່.
ທ່ານຮອງນາຍົກລັດຖະມົນຕີ ຮ່ວາງຈູງຫາຍ ໄດ້ຢືນຢັນວ່າ ຈະສືບຕໍ່ຮັກສາການພົບປະສົນທະນາກັບປະຊາຄົມວິສາຫະກິດເປັນປະຈຳ ເພື່ອຮັບເອົາຄຳເຫັນ ແລະ ມີການປັບປຸງນະໂຍບາຍໃຫ້ສອດຄ່ອງກັບຜົນປະໂຫຍດພັດທະນາຂອງປະເທດຊາດ ແລະ ຜົນປະໂຫຍດອັນຊອບທຳຂອງບັນດານັກລົງທຶນ ແລະ ປະຊາຄົມວິສາຫະກິດ. ບັນດາວິສາຫະກິດ, ນັກລົງທຶນ ເມື່ອເຂົ້າຮ່ວມຕະຫລາດຂອງຫວຽດນາມ ລ້ວນແຕ່ໄດ້ຮັບຖືວ່າ ແມ່ນພາກສ່ວນຫນຶ່ງຂອງພື້ນຖານເສດຖະກິດຫວຽດນາມ ແລະ ເພື່ອປະຕິບັດຍຸດທະສາດພັດທະນາເສດຖະກິດ ສັງຄົມ ໄລຍະ 2011 - 2020 ໃຫ້ສຳເລັດຜົນ, ລັດຖະບານ ຫວຽດນາມ ໄດ້ຮຽກຮ້ອງໃຫ້ບັນດານັກລົງທຶນຕ່າງປະເທດ ຈົ່ງສຸມໃສ່ເຂົ້າໃນບັນດາຂົງເຂດຄື: ເທັກໂນໂລຊີສູງ ແລະ ພື້ນຖານໂຄງລ່າງທີ່ມີລັກສະນະບຸກທະລຸ ທີ່ມີຕໍ່ພື້ນຖານເສດຖະກິດຫວຽດນາມ. ພ້ອມທັງ ລັດຖະບານກໍຢືນຢັນຈະສືບຕໍ່ປະຕິບັດບັນດານະໂຍບາຍ ແລະ ສ້າງກອບກົດໝາຍ ເພື່ອຮັບປະກັນຜົນປະໂຫຍດຂອງວິສາຫະກິດ ພ້ອມກັນແບ່ງປັນຄວາມສ່ຽງ ແລະ ສ້າງເງື່ອນໄຂເພື່ອໃຫ້ບັນດາວິສາຫະກິດດຳເນີນທຸລະກິດຢ່າງຍາວນານ ແລະ ປະສົບຜົນສຳເລັດ ຢູ່ ຫວຽດນາມ. ທ່ານຮອງນາຍົກລັດຖະມົນຕີ ຮ່ວາງຈູງຫາຍ ເວົ້າວ່າ:
“ໃນບັນດາມາດຕະການຊຶ່ງລັດຖະບານຈະປະຕິບັດໃນໄລຍະຈະມາເຖິງ ການເຂົ້າຮ່ວມຂອງປະຊາຄົມວິສາຫະກິດ ພິເສດແມ່ນວິສາຫະກິດທີ່ມີເງິນລົງທຶນຂອງຕ່າງປະເທດແມ່ນຂາດບໍ່ໄດ້. ລັດຖະບານບໍ່ຖືການເຕີບໂຕເປັນຈຸດໝາຍບຸລິມະສິດ, ເພາະວ່າ ການຮັກສາເສດຖະກິດມະຫາພາກແມ່ນສ້າງສະພາບແວດລ້ອມເປັນປົກກະຕິໃຫ້ແກ່ບັນດາວິສາຫະກິດເຄື່ອນໄຫວທີ່ມີປະສິດທິຜົນ. ການເຕີບໂຕກ່ຽວຂ້ອງເຖິງບັນຫາວຽກເຮັດງານທຳ, ປະສິດທິຜົນຂອງແຫລ່ງທຶນຮອນ, ປະສິດທິຜົນຂອງວິສາຫະກິດ.“
ເມື່ອຕອບຂໍ້ຂ້ອງໃຈຂອງບັນດາຜູ້ແທນກ່ຽວກັບການມີຫນ້າຂອງລັດວິສາຫະກິດໃນໂຄງປະກອບພື້ນຖານເສດຖະກິດຫວຽດນາມ ຈະເຮັດໃຫ້ປະສິດທິຜົນຂອງພື້ນຖານເສດຖະກິດຫລຸດລົງຫລືບໍ່ ແລະ ຫວຽດນາມ ມີແຜນການແນວໃດໃນການສ້າງໂຄງປະກອບລັດວິສາຫະກິດຄືນໃຫມ່, ທ່ານຮອງນາຍົກລັດຖະມົນຕີ ຮ່ວາງຈູງຫາຍ ໃຫ້ຮູ້ວ່າ: ມີລັດວິສາຫະກິດກວ່າ 1000 ແຫ່ງ ແລະ ລັດຖະບານພວມມີແຜນການຫັນລັດວິສາຫະກິດເປັນຫຸ້ນສ່ວນ ແລະ ສ້າງໂຄງປະກອບລັດວິສາຫະກິດຄືນໃຫມ່ ເພື່ອໃຫ້ກຸ່ມວິສາຫະກິດດຳເນີນທຸລະກິດມີປະສິດທິຜົນກວ່າ ແລະ ໃນວິວັດການນີ້ ສ້າງສະພາບແວດລ້ອມ ໃຫ້ແກ່ວິສາຫະກິດພາກເອກະຊົນ ຢ່າງສະເໝີກວ່າ.
“ອາດຈະເວົ້າໄດ້ວ່າ ບັນດາບົດຮຽນໃນຊຸມປີຜ່ານມາ ໄດ້ຊ່ວຍໃຫ້ຫວຽດນາມມີຄວາມຮັບຮູ້ກ່ຽວກັບການສ້າງໂຄງປະກອບລັດວິສາຫະກິດຢ່າງຈະແຈ້ງກວ່າ. ປະຈຸບັນ ລັກສະນະແກ້ງແຍ້ງຂອງວິສາຫະກິດຫວຽດນາມ ຍັງຕຳ່ຢູ່ ນັບທັງລັດວິສາຫະກິດ ແລະ ວິສາຫະກິດພາກເອກະຊົນ. ທ່ານນາຍົກລັດຖະມົນຕີ ກໍຖືເປັນສຳຄັນການຈຳແນກການປະພຶດຕໍ່ຢ່າງສະເຫມີພາບ ລະຫວ່າງລັດວິສາຫະກິດ ແລະ ວິສາຫະກິດພາກເອກະຊົນ. ໃນໄລຍະຜ່ານມາ ນະໂຍບາຍຈຳນວນຫນຶ່ງ ແລະ ບັນດາມາດຕະການຂອງລັດຖະບານວາງອອກ ແມ່ນສະແດງໃຫ້ເຫັນບໍ່ມີການຈຳແນກປະພຶດຕໍ່ລະຫວ່າງ ລັດວິສາຫະກິດ ແລະ ວິສາຫະກິດພາກເອກະຊົນ.”
ທ່ານຮອງນາຍົກລັດຖະມົນຕີ ຮ່ວາງຈູງຫາຍ ກໍໄດ້ຢືນຢັນກຳລັງຫນູນປ່ຽນແປງຢ່າງແຂງແຮງ ຍາມໃດກໍປະກົດອອກພາຍຫລັງບັນດາຄວາມຫຍຸ້ງຍາກ ແລະ ຫວຽດນາມ ພວມຕັ້ງຫນ້າປ່ຽນໃຫມ່, ສ້າງໂຄງປະກອບເສດຖະກິດຄືນໃຫມ່ ເພື່ອສ້າງປະຖົມປັດໃຈ ບືນຕົວຂຶ້ນຢ່າງວ່ອງໄວ ພາຍຫລັງເສດຖະກິດໂລກຟື້ນຕົວ. ຫວຽດນາມ ກຳນົດວ່າ:ປີ 2012 ແມ່ນປີບານພັບໃນການສ້າງໂຄງປະກອບເສດຖະກິດຄືນໃຫມ່ ຊື່ງລວມມີ 3 ເນື້ອໃນຕົ້ນຕໍຄື: ສ້າງໂຄງປະກອບການລົງທຶນຄືນໃຫມ່, ສ້າງໂຄງປະກອບລະບົບການເງິນ ທະນາຄານ ແລະ ສ້າງໂຄງປະກອບລັດວິສາຫະກິດຄືນໃຫມ່.
ການສົ່ງອອກເຂົ້າສານແມ່ນທ່າແຮງຂອງເສດຖະກິດຫວຽດນາມ
ແລະກໍຢູ່ທີ່ກອງປະຊຸມ, ທ່ານ ຮອງນາຍົກລັດຖະມົນຕີ ພ້ອມກັບຜູ້ຕາງຫນ້າບັນດາກະຊວງ, ຂະແຫນງການ ໄດ້ຕອບຄຳຖາມ, ຂໍ້ຂ້ອງໃຈຫລາຍຂໍ້ຂອງບັນດານັກລົງທຶນ, ວິສາຫະກິດຢູ່ພາຍໃນ ແລະ ຕ່າງປະເທດ ກໍຄືສະເຫນີກ່ຽວກັບທິດທາງການພັດທະນາບັນດາຂະແຫນງເສດຖະກິດຂອງຫວຽດນາມ. ຕາມບັນດາຜູ້ແທນສາກົນແລ້ວ, ຫວຽດນາມ ຍັງມີຄວາມສາມາດບົ່ມຊ້ອນຫລາຍຢ່າງເພື່ອພັດທະນາ. ໃນໄລຍະຈະມາເຖິງ ຖ້າຮູ້ຈັກເສີມຂະຫຍາຍເປັນຢ່າງດີ, ຫວຽດນາມ ອາດຈະບັນລຸໃຫ້ໄດ້ຈຸດໝາຍລະດັບການເຕີບໂຕຈາກ 7 -8%/ປີ, ກາຍເປັນປະເທດອຸດສາຫະກຳຕາມທິດທັນສະໄຫມໃນປີ 2020. ບັນດາຜູ້ແທນຕີລາຄາສູງ ຄວາມຕັດສິນໃຈ, ນະໂຍບາຍຂອງລັດຖະບານໃນການປ່ຽນໃຫມ່, ສ້າງໂຄງປະກອບເສດຖະກິດຄືນໃຫມ່ ແລະ ລ້ວນແຕ່ໃຫ້ຂໍ້ສັງເກດວ່າ: ບັນດາແຜນການຂອງລັດຖະບານແມ່ນຖືກທິດ, ທັນການ ແລະ ຖືກກັບຈຸດເວລາ./.
ຫວີງຟອງ