(vovworld) - ເປັນຄັ້ງທຳອິດໃນ 5 ກວ່າປີຜ່ານມາ, ລາຄານຳ້ມັນດິບໃນຕະຫຼາດໂລກໄດ້ຫຼຸດລົງເຫຼືອພຽງ 60 USD/ຖັງ, ເທົ່າກັບ 50% ເມື່ອທຽບໃສ່ກ່ອນນັ້ນ. ສິ່ງທີ່ໜ້າສົນໃຈນັ້ນແມ່ນ, ສະພາບການດັ່ງກ່າວບໍ່ທັນມີສັນຍານຢຸດຕິລົງເທື່ອ. ເລື່ອງລາຄານຳ້ມັນຫຼຸດລົງໃນຊຸມວັນທ້າຍປີ 2014, ເຖິງວ່າໄດ້ມີການກະທົບຢ່າງຕັ້ງໜ້າເຖິງເສດຖະກິດໂລກຢ່າງແນ່ນອນກໍ່ຕາມ, ແຕ່ກໍ່ຊ້ອນແຝງຄວາມສ່ຽງບໍ່ແມ່ນໜ້ອຍ.
(ພາບປະກອບ)
ນ້ຳມັນເຊື້ອໄຟ ແລະ ອາຍແກສ ຍາມໃດກໍ່ແມ່ນສິນຄ້າຍຸດທະສາດ. ລາຄາສິນຄ້າປະເພດນີ້ຖືກຫຼຸດລົງຢ່າງໄວນັ້ນ, ໄດ້ກະທົບຢ່າງແຮງເຖິງຍຸດທະສາດ ແລະ ເສດຖະກິດຂອງບັນດາປະເທດຖືກຜົນເສຍຫາຍ ແລະ ບັນດາປະເທດໄດ້ຮັບຜົນປະໂຫຍດ.
ສາຍເຫດ
ຕະຫຼາດນຳ້ມັນບໍ່ໂລກໄດ້ຫຼຸດລົງຢ່າງແຮງ ພາຍຫຼັງການປະຊຸມຂອງອົງການບັນດາປະເທດສົ່ງອອກນ້ຳມັນບໍ່ (OPEC), ເຊິ່ງແມ່ນອົງການຄວບຄຸມຕະຫຼາດນຳ້ມັນໂລກເຖິງເກືອບ 40%, ໃນວັນທີ 28/11, ຢູ່ວຽນ. ທີ່ການປະຊຸມນີ້ອົງການ OPEC ໄດ້ຕົກລົງຮັກສາປະລິມານການຜະລິດນຳ້ມັນໄວ້ຄືເກົ່າ, ໂດຍບໍ່ຫົວຊາຕໍ່ຂໍ້ສະເໜີຂອງບາງປະເທດສະມາຊິກທີ່ຢາກຫຼຸດຜ່ອນປະລິມານການຜະລິດນຳ້ມັນ ເພື່ອສະກັດກັ້ນທ່າຫຼຸດລາຄານຳ້ມັນດິບໃນຕະຫຼາດໂລກລົງ.
ໃນຂະນະທີ່ແຫຼ່ງສະໜອງອາດຈະເຫຼືອເຟື່ອນັ້ນ, ຄວາມຕ້ອງການໃຊ້ສອຍຂອງພື້ນຖານເສດຖະກິດທົ່ວໂລກພັດຫຼຸດລົງ, ອັນໄດ້ກະທົບຢ່າງແຮງເຖິງລາຄານຳ້ມັນດິບ. ນອກນັ້ນ, ສະພາບລາຄາຖ່ານຫີນກໍ່ຖືກຫຼຸດລົງຢ່າງແຮງຍ້ອນປະລິມານການຂຸດຄົ້ນຢູ່ອາເມລິກາໄດ້ເພີ່ມຂຶ້ນ ແລະ ການແກ່ງແຍ້ງຢ່າງຂ້ຽວຂາດຈາກຂົງເຂດອາຍແກສທຳມະຊາດອີກ.
ເຖິງຢ່າງໃດກໍ່ຕາມ, ທ່ານເລຂາທິການໃຫຍ່ OPEC Abdalla Salem el Badri ກໍ່ໃຫ້ຂໍ້ສັງເກດວ່າ, ເມື່ອປຽບທຽບລະຫວ່າງການຕອບສະໜອງກັບຄວາມຕ້ອງການນຳ້ມັນກໍ່ເຫັນວ່າ, ລະດັບສະໜອງນຳ້ມັນເພີ່ມຂຶ້ນບໍ່ຫຼາຍ, ດັ່ງນັ້ນບໍ່ສາມາດເຮັດໃຫ້ລາຄານຳ້ມັນດິບຫຼຸດລົງເຖິງ 50% ຄືໃນປະຈຸບັນໄດ້. ຍ້ອນເຫດນັ້ນ, ສາຍເຫດບາງເທື່ອແມ່ນການກັກຕຸນໄດ້ເຮັດໃຫ້ລາຄານຳ້ມັນເພີ່ມຂຶ້ນ.
ການກະທົບຈາກສະພາບນ້ຳມັນຕົກລາຄາ
ໃນດ້ານເສດຖະກິດ, ບັນດາປະເທດໄດ້ຊົມໃຊ້ຫຼາຍກ່ວາໝູ່ແມ່ນບັນດາປະເທດຕ້ອງນຳເຂົ້ານ້ຳມັນເຊື້ອໄຟ ແລະ ອາຍແກດຈາກພາຍນອກ. ລາຄານ້ຳມັນຫລຸດລົງໃນປີ 2014 ມີຜົນປະໂຫຍດຫຼາຍທີ່ສຸດໃຫ້ແກ່ບັນດາປະເທດນຳເຂົ້ານ້ຳມັນຫຼາຍຄື: ຈີນ, ຍີ່ປຸ່ນ, ສ.ເກົາຫຼີ, ອາເມລິກາ ແລະ ຊ່ວຍເສດຖະກິດໂລກເພີ່ມລະດັບເຕີບໂຕຕື່ມອີກ 0,5%.
ແຕ່ເຖິງຢ່າງໃດກໍ່ຕາມ, ຊຸມມື້ຫລຸດລາຄາຂອງປະເພດສິນຄ້າຍຸດທະສາດນີ້ຖືກແກ່ຍາວ ໄດ້ກໍ່ໃຫ້ເກີດການກະທົບທີ່ຫຍໍ້ທໍ້ເຖິງຫຼາຍພື້ນຖານເສດຖະກິດໃນໂລກ. ຕາມການຄິດໄລ່ຂອງກອງທຶນເງິນຕາສາກົນ (IMF), ລັດເຊຍ ແມ່ນປະເທດໄດ້ຮັບຜົນສະທ້ອນຫຼາຍກ່ວາໝູ່ໃນຂະນະທີ່ປະຈຸບັນນ້ຳມັນກວມເກືອບ 80% ມູນຄ່າສົ່ງອອກຂອງລັດເຊຍ ແລະ ປະກອບສ່ວນປະມານ 50% ງົບປະມານຂອງລັດເຊຍ.
ຖັດມາແມ່ນ ອີຣານ, ປະເທດອິດຊະລາມນີ້ມີແຕ່ສ້າງຄວາມດຸນດ່ຽງງົບປະມານໄດ້ເມື່ອລາຄານ້ຳມັນຮັກສາໃນລະດັບ 136 USD/ຖັງເທົ່ານັ້ນ. ສ່ວນເວເນຊູເອລາ ແລະ ນີເຊເຣຍ ກໍ່ສາມາດສ້າງຄວາມດຸນດ່ຽງງົບປະມານແຫ່ງລັດໄດ້ເມື່ອຮັກສາລາຄານ້ຳມັນໃນລະດັບ 120 USD/ຖັງ.
ລາຄານ້ຳມັນຫລຸດລົງແຮງຍັງເຮັດໃຫ້ບັນດານັກລົງທຶນ, ປະເທດຕ່າງໆຄົ້ນພົບບໍ່ນ້ຳມັນອາຍແກດໃໝ່ມີຄວາມລັ່ງເລໃຈ. ເຂົາເຈົ້າບໍ່ຢາກລົງທຶນຕໍ່ເຂົ້າບັນດາບໍ່ນ້ຳມັນໃໝ່ຍ້ອນບໍ່ມີປະສິດທິຜົນ. ຢູ່ປະເທດອາເມລິກາ, ບັນດາບໍລິສັດນ້ຳມັນອາຍແກດໄດ້ຢຸດການເຄື່ອນໄຫວຂອງຮ້ານເຈະນ້ຳມັນ 29 ຮ້ານ, ຊື່ງແມ່ນຕົວເລກຫຼາຍກ່ວາໝູ່ໃນຮອບເວລາ 2 ປີຜ່ານມາ. ໃນທົ່ວປະເທດອາເມລິກາ ຍັງມີຮ້ານເຈາະນ້ຳມັນສຳຫຼວດ1546 ຮ້ານພວມເຄືອ່ນໄຫວເທົ່ານັ້ນ, ໃນເດືອນ 10 ແມ່ນມີ 1609 ຮ້ານເຄື່ອນໄຫວ
ໃນຕະຫຼາດຫຼັກຊັບ, ທຸລະກຳຫຼັກຊັບອາເມລິກາ ຫຼາຍຄັ້ງຕົກຢູ່ໃນສັນຍານແດງຍ້ອນລາຄານ້ຳມັນດິບໃນຕະຫຼາດໂລກຫລຸດລົງຢ່າງວ່ອງໄວໃນກ່ວາ 2 ສັບປະດາຜ່ານມາ. ດັດຊະນີອຸດສາຫະກຳ Dow Jones ຂອງ 30 ກຸ່ມບໍລິສັດວິສາຫະກິດໃຫ່ຍ ໄດ້ຫລຸດລົງສະເລ່ຍ 204 ຄະແນນ ເທົ່າກັບ 1,2% ລົງເຫຼືອພຽງ 17.391 ຄະແນນ. ນັບແຕ່ຕົ້ນເດືອນ 12 ມາຮອດປະຈຸບັນ, ດັດຊະນີ Standard & Poor 500 ໄດ້ຕົກລາຄາເຖິງ 4,9%. ບັນດາດັດຊະນີໃຫ່ຍຂອງເອີລົບກໍ່ຖືກກະທົບຢ່າງແຮງ.
ຄາດຄະເນລາຄານ້ຳມັນດິບໃນໄລຍະຈະມາເຖິງ
ໃນສະພາບລາຄານ້ຳມັນດິບຍັງບໍ່ທັນມີສັນຍາຟື້ນຟູນັ້ນ ອົງການພະລັງງານສາກົນ (IEA) ພັດສືບຕໍ່ມີການຄາດຄະເນທີ່ບໍ່ປະເອີບໃຈອີກ. ໂດຍລະອຽດແມ່ນ, ຕາມ IEA ແລ້ວ, ຄວາມຕ້ອງການນຳໃຊ້ນ້ຳມັນດິບຂອງທົ່ວໂລກໃນປີ 2015 ອາດຈະຫລຸດລົງຈາກ 230.000 ຫາ 900.000 ຖັງ/ວັນ. OPEC ກໍ່ຍອມຮັບວ່າຄວາມຕ້ອງການນ້ຳມັນດິບສະເລ່ຍຂອງປີ 2015 ຈະຢູ່ໃນລະດັບຕ່ຳສຸດນັບແຕ່ປີ 2004 ດ້ວຍຈຳນວນ 28,15 ລ້ານຖັງ/ວັນ.
ນັກຊ່ຽວຊານບາງທ່ານຄາດຄະເນວ່າ, ຖ້າຫາກ OPEC ບໍ່ມີການເຂົ້າຮ່ວມໂດຍໄວ, ເພື່ອຫລຸດຜ່ອນປະລິມານນ້ຳມັນຂຸດຄົ້ນໃນແຕ່ລະວັນລົງ, ລາຄານ້ຳມັນດິບ, ອາດຈະຫລຸດລົງລະດັບແຕ່ 50 – 55 USD/ຖັງ, ຊ້ຳບໍ່ໜຳແມ່ນ 40 USD/ຖັງ. ເຖິງຢ່າງໃດກໍ່ຕາມ, ໃນຖະແຫຼງການຫຼ້າສຸດເມື່ອວັນທີ 15/12, ອົງການບັນດາປະເທດສົ່ງອອກນ້ຳມັນບໍ່ ຢັ້ງຢືນຈະບໍ່ຫລຸດຜ່ອນປະລິມານນ້ຳມັນຂຸດຄົ້ນລົງ ຫຼື ຈັດກອງປະຊຸມດ່ວນ.
ຕໍ່ໜ້າການຜັນແປຢ່າງສັບສົນຂອງລາຄານ້ຳມັນນັ້ນ, ລັດຖະບານ ຫວຽດນາມ ໄດ້ເປັນເຈົ້າການຮັບມືເພື່ອຮັບປະກັນປະຕິບັດບັນດາຈຸດໝາຍການເຕີບໂຕໃຫ້ສຳເລັດ. ຕາມນັ້ນແລ້ວ, ຫວຽດນາມ ຈະເພີ່ມທະວີການສະສົມນ້ຳມັນດິບ ພ້ອມທັງເພີ່ມທະວີວຽກງານຄົ້ນຄ້ວາ, ຄາດຄະເນເພື່ອດັດປັບແຜນການຂຸດຄົ້ນນ້ຳມັນ.
ເລື່ອງລາຄານ້ຳມັນຖືກຫລຸດລົງພາຍຫຼັງຫຼາຍປີທີ່ຮັກສາລາຄາເປັນປົກກະຕິນັ້ນ ແມ່ນທັງມີຄວາມຕັ້ງໜ້າ ແລະ ທັງມີຄວາມຫຍໍ້ທໍ້ສຳລັບເສດຖະກິດຂອງຫຼາຍປະເທດ. ໃນໄລຍະຍາວ, ບັນດາການຜັນແປຂອງລາຄານ້ຳມັນຮຽກຮ້ອງໃຫ້ບັນດາປະເທດຕ້ອງມີໄຫວພິບ, ສະກັດກັ້ນສິ່ງທີ່ບໍ່ມີປະໂຫຍດເມື່ອລາຄາປະເພດສິນຄ້ານີ້ຖືກຫລຸດລົງຢ່າງໄວ./.