vovworld)- ພ້ອມກັບການພັດທະນາຂອງປະເທດຊາດ, ໄລຍະຜ່ານມາ ປະຊາຄົມຊາວຫວຽດນາມ ອາໄສຢູ່ຕ່າງປະເທດກວ່າ 4,5 ລ້ານຄົນ ພວມດຳລົງຊີວິດ, ເຮັດວຽກ ແລະຮ່ຳຮຽນ ຢູ່ 109 ປະເທດ ແລະ ເຂດແຄ້ວນໃນໂລກ ນັບມື້ນັບສາມັກຄີ, ເຊື່ອມໂຍງເຂົ້າກັບປະເທດທີ່ເຂົາເຈົ້າດຳລົງຊີວິດ, ບັນລຸໄດ້ບັນດາຜົນສຳເລັດທີ່ສ້າງຊື່ສຽງຮຽງນາມໃຫ້ຊາດຫວຽດນາມ. ໃນໄລຍະໃຫມ່, ພໍ່ແມ່ປະຊາຊົນສືບຕໍ່ເປັນຈິດຫນຶ່ງໃຈດຽວອ່ວາຍຫນ້າເມືອຫາປະເທດຊາດ, ມີການປະກອບສ່ວນອັນແທດຈິງຫລາຍຢ່າງໃຫ້ແກ່ປະເທດຊາດໃນທຸກຂົງເຂດ, ສູ້ຊົນພ້ອມກັບປະຊາຊົນຢູ່ພາຍໃນປະເທດປະຕິບັດສຳເລັດຈຸດໝາຍສ້າງປະເທດຫວຽດນາມ ໃຫ້ຮັ່ງມີເຂັ້ມແຂງ, ປະຊາທິປະໄຕ, ຍຸຕິທຳ ແລະ ສີວິໄລ.
ທ່ານເລຂາທິການໃຫຍ່ ຫງວຽນຟູຈ້ອງ ພົບປະກັບ ຊາວຫວຽດນາມອາໄສຢູ່
ຕ່າງປະເທດ
|
ພ້ອມກັບກິດຈະການປ່ຽນແປງໃຫມ່, ໃນຊຸມປີຜ່ານມາ, ຄວາມເອົາໃຈໃສ່ຢ່າງເລິກເຊິ່ງຂອງພັກ ແລະ ລັດຫວຽດນາມ ສຳລັບຊາວຫວຽດນາມ ອາໄສຢູ່ຕ່າງປະເທດ ໄດ້ສ້າງເງື່ອນໄຂສະດວກໃຫ້ແກ່ຊາວຫວຽດນາມອາໄສຢູ່ຕ່າງປະເທດເຊື່ອມໂຍງ, ພັດທະນາຢ່າງແຮງ. ບົດບາດຂອງຊາວຫວຽດນາມ ອາໄສຢູ່ຕ່າງປະເທດໃນໄລຍະປະຈຸບັນ ອີກຄັ້ງຫນຶ່ງໄດ້ຮັບການຢັ້ງຢືນໃນມະຕິກອງປະຊຸມໃຫຍ່ທົ່ວປະເທດຄັ້ງທີ 12 ຂອງພັກ ຫວ່າງແລ້ວນີ້, ໃນນັ້ນ ສືບຕໍ່ຊີ້ແຈ້ງ: ຊາວຫວຽດນາມ ອາໄສຢູ່ຕ່າງປະເທດ ແມ່ນ ພາກສ່ວນຫນຶ່ງທີ່ບໍ່ອາດຕັດແຍກອອກຈາກຊາດຫວຽດນາມໄດ້. ພັກ, ລັດ ຫວຽດນາມ ປາດຖະຫນາວ່າ ຊາວຫວຽດນາມ ອາໄສຢູ່ຕ່າງປະເທດ ສືບຕໍ່ເສີມຂະຫຍາຍບົດບາດເປັນຂົວເຊື່ອມຕໍ່, ປະກອບສ່ວນຢ່າງແທດຈິງກວ່າໃຫ້ແກ່ປະເທດຊາດໃນໄລຍະເຊື່ອມໂຍງໃຫມ່.
ສຸດຈິດສຸດໃຈໃຫ້ແກ່ບ້ານເກີດເມືອງນອນ
ລະດູບານໃຫມ່ປີນີ້, ພ້ອມກັບຄວາມເບິກບານມ່ວນຊື່ນຂອງປະຊາຊົນຢູ່ພາຍໃນປະເທດຂ່ຳນັບຊົມເຊີຍຜົນສຳເລັດຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກ, ຊາວຫວຽດນາມຢູ່ຕ່າງປະເທດຫລາຍຄົນສະແດງຄວາມປິຕິຊົມຊື່ນ. ເຂົາເຈົ້າເຊື່ອໝັ້ນວ່າ ຜົນສຳເລັດຂອງກອງປະຊຸມໃຫຍ່ຂອງພັກ ໄດ້ນຳປະເທດຊາດກ້າວເຂົ້າລະດູບານໃຫມ່, ປະເທດຊາດ ຈະມີບັນດາບາດກ້າວຫັນປ່ຽນຢ່າງແຂງແຮງ. ທີ່ການພົບປະກັບທ່ານເລຂາທິການໃຫຍ່ ຄະນະບໍລິຫານງານສູນການພັກກອມມູນິດຫວຽດນາມ ຫງວຽນຟູຈ້ອງ ເນື່ອງໃນໂອກາດກັບຄືນມາບ້ານເກີດເມືອງນອນເພື່ອຕ້ອນຮັບບຸນປີໃຫມ່ປະຈຳຊາດ, ທ່ານ ຮ່ວາງແມ້ງເຮວ, ປະທານ ສະຫະພັນວິສາຫະກິດຫວຽດນາມ ຢູ່ ເອີລົບ, ຕາງຫນ້າໃຫ້ຄະນະຊາວຫວຽດນາມ ອາໄສຢູ່ຕ່າງປະເທດເຂົ້າຮ່ວມລາຍການ “ລະດູບານໃຫມ່ແຫ່ງບ້ານເກີດເມືອງນອນ”ປີ 2016 ໄດ້ເວົ້າວ່າ:
“ພວກຂ້າພະເຈົ້າມີຄວາມປິຕິຊົມຊື່ນຕໍ່ຜົນສຳເລັດຂອງກອງປະຊຸມໃຫຍ່ຄັ້ງທີ 12 ຂອງພັກຫວ່າງແລ້ວນີ້, ພວກຂ້າພະເຈົ້າເຫັນວ່າ ພັກ, ລັດ, ກອງທັບ ແລະ ປະຊາຊົນເຮົາ ໄດ້ຕັດສິນໃຈໃນວິວັດການປ່ຽນແປງໃຫມ່ເພື່ອໃຫ້ປະເທດຊາດມີສະຖຽນລະພາບ ແລະ ນັບມື້ນັບພັດທະນາ ແລະ ເຊື່ອມໂຍງເຂົ້າກັບໂລກຢ່າງເລິກເຊິ່ງ. ພວກຂ້າພະເຈົ້າດີໃຈຫລາຍ ແລະ ມີຄວາມເຊື່ອໝັ້ນຕໍ່ກິດຈະການປ່ຽນແປງໃຫມ່ຈະປະສົບຜົນສຳເລັດ. ພວກຂ້າພະເຈົ້າປາດຖະຫນາຢາກໃຫ້ພັກ, ລັດ ເອົາໃຈໃສ່ ແລະ ສະຫງວນໃຫ້ພວກຂ້າພະເຈົ້າກາລະໂອກາດເພື່ອໃຫ້ພໍ່ແມ່ປະຊາຊົນຊາວຫວຽດນາມ ອາໄສຢູ່ຕ່າງປະເທດ ມີເງື່ອນໄຂເຂົ້າຮ່ວມກິດຈະການປ່ຽນແປງໃຫມ່, ສ້າງສາປະເທດຊາດ.”
ຕີລາຄາສູງຕໍ່ເລື່ອງພັກ, ລັດຖະບານ ຍາມໃດກໍສ້າງເງື່ອນໄຂສະດວກໃຫ້ ຊາວຫວຽດນາມ ອາໄສຢູ່ຕ່າງປະເທດ ດຳລົງຊີວິດເປັນປົກກະຕິ ແລະ ເຊື່ອມໂຍງເຂົ້າກັບປະເທດປະຈຳຖິ່ນ, ຊ່ວຍເຫລືອພໍ່ແມ່ປະຊາຊົນເພີ່ມທະວີຄວາມສະຫນິດຕິດພັນກັບບ້ານເກີດເມືອງນອນ. ພິເສດ ກັບຄືນຢ້ຽມຢາມປະເທດໃນຄັ້ງນີ້, ຊາວຫວຽດນາມ ອາໄສຢູ່ຕ່າງປະເທດ ໄດ້ຕີລາຄາສູງການຮັບຮູ້ບົດບາດຂອງ ຊາວຫວຽດນາມ ອາໄສຢູ່ຕ່າງປະເທດ ໃນມະຕິກອງປະຊຸມໃຫຍ່ຄັ້ງທີ 12 ຂອງພັກ. ທ່ານນາງ ຟານບີກທ້ຽນ, ປະທານກອງທຶນເພື່ອການພົວພັນລະຫວ່າງ ຮຸງກາຣີ ແລະ ຫວຽດນາມ ຖືວ່າ:
“ເອກະສານກອງປະຊຸມໃຫຍ່ຄັ້ງທີ 12 ຂອງພັກ ຍັງຄົງສືບຕໍ່ຖື ຊາວຫວຽດນາມ ອາໄສຢູ່ຕ່າງປະເທດ ແມ່ນພາກສ່ວນຫນຶ່ງບໍ່ສາມາດຕັດແຍກອອກຈາກຊາດຫວຽດນາມໄດ້. ນີ້ແມ່ນສິ່ງທີ່ສົ່ງເສີມພວກຂ້າພະເຈົ້າ. ຄຽງຄູ່ກັບການຮຽກຮ້ອງ ຊາວຫວຽດນາມ ອາໄສຢູ່ຕ່າງປະເທດ ປະກອບສ່ວນໃຫ້ແກ່ປະເທດຊາດ, ພັກ ແລະ ລັດ ກໍໄດ້ມີການຫນູນຊ່ວຍ, ປົກປ້ອງ ຊາວຫວຽດນາມ ອາໄສຢູ່ຕ່າງປະເທດ ເມື່ອມີຄວາມຈຳເປັນ. ນີ້ແມ່ນຈີນຕະນາການອັນຖືກຕ້ອງ ເມື່ອການພົວພັນລະຫວ່າງ ພັກ, ລັດ ແລະ ຊາວຫວຽດນາມ ອາໄສຢູ່ຕ່າງປະເທດ ໄດ້ຮັບການສ້າງຂຶ້ນບົນຈີນຕະນາການນີ້ ຈະສ້າງພື້ນຖານອັນໝັ້ນຄົງ, ຍິ່ງດຶງດູດ ຊາວຫວຽດນາມ ອາໄສຢູ່ຕ່າງປະເທດ ຕິດພັນກັບປະເທດຊາດກວ່າ.”
ຄາດວ່າ ປະຈຸບັນ ມີ ຊາວຫວຽດນາມ ອາໄສຢູ່ຕ່າງປະເທດ ກວ່າ 4,5 ລ້ານຄົນ ພວມດຳລົງຊີວິດ, ຮ່ຳຮຽນ ແລະ ເຮັດວຽກຢູ່ຕ່າງປະເທດ. ໃນຊຸມປີຜ່ານມາ, ຊາວຫວຽດນາມ ອາໄສຢູ່ຕ່າງປະເທດ ຍາມໃດກໍສາມັກຄີ, ມານະພະຍາຍາມຜ່ານຜ່າຄວາມຫຍຸ້ງຍາກ, ສ້າງຊີວິດເປັນປົກກະຕິ ແລະ ນັບມື້ນັບຢືນຢັນບົດບາດ ແລະ ອິດທິພົນຊື່ສຽງໃນສັງຄົມຂອງປະເທດປະຈຳຖິ່ນ. ຊາວຫວຽດນາມ ອາໄສຢູ່ຕ່າງປະເທດ ຍາມໃດກໍອ່ວາຍຫນ້າເມືອຫາບ້ານເກີດເມືອງນອນ, ຮ່ວມແຮງຮ່ວມໃຈພ້ອມກັບປະຊາຊົນຢູ່ພາຍໃນປະເທດ ແບ່ງປັນຫລາຍບັນຫາສຳຄັນຂອງປະເທດຊາດ. ໃນໄລຍະໃຫມ່, ປະເທດຊາດຍັງຕ້ອງປະເຊີນຫນ້າກັບຄວາມຫຍຸ້ງຍາກ, ສິ່ງທ້າທາຍຫລາຍຢ່າງ. ກອງປະຊຸມໃຫຍ່ຄັ້ງທີ 12 ຂອງພັກ ໄດ້ວາງອອກບັນດາການກຳນົດທິດໃຫຍ່ໃຫ້ແກ່ການພັດທະນາຂອງປະເທດຊາດໃນໄລຍະຈະມາເຖິງ. ເພື່ອປະຕິບັດຈຸດໝາຍ ປະຊາຊົນຮັ່ງມີ, ປະເທດຊາດເຂັ້ມແຂງ, ສັງຄົມຍຸຕິທຳ, ປະຊາທິປະໄຕ ແລະ ສີວິໄລ, ປັດໄຈຫລັກແຫລ່ງ ແມ່ນມະຫາສາມັກຄີທົ່ວປວງຊົນທັງຊາດ, ໃນນັ້ນ ເອົາໃຈໃສ່ເປັນພິເສດເຖິງການເສີມຂະຫຍາຍກຳລັງແຮງຂອງ ຊາວຫວຽດນາມ ອາໄສຢູ່ຕ່າງປະເທດ. ສິ່ງດັ່ງກ່າວ ແມ່ນຄຳຢືນຢັນຂອງທ່ານເລຂາທິການໃຫຍ່ ຫງວຽນຟູຈ້ອງໃນການພົບປະກັບ ຊາວຫວຽດນາມ ອາໄສຢູ່ຕ່າງປະເທດ ທີ່ດີເດັ່ນໃນວັນທີ 30/1 ຜ່ານມາ.
“ຊາວຫວຽດນາມ ອາໄສຢູ່ຕ່າງປະເທດ ກໍໄດ້ປະກອບຄຳເຫັນຫລາຍຢ່າງຕໍ່ເອກະສານກອງປະຊຸມໃຫຍ່ຄັ້ງທີ 12 ຂອງພັກ. ເອກະສານນັ້ນ ໄດ້ຢັ້ງຢືນບັນຫາຫລັກແຫລ່ງ, ພື້ນຖານ ນັ້ນແມ່ນຕ້ອງປ່ຽນໃຫມ່, ຕ້ອງຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ, ຕ້ອງຖືຜົນປະໂຫຍດຂອງຊາດເຫນືອກວ່າສິ່ງໃດໝົດ. ຢາກປະຕິບັດໄດ້ຄືແນວນັ້ນ ພັກຕ້ອງໝັ້ນຄົງເຂັ້ມແຂງ, ລັດ ຕ້ອງປອດໃສ, ລະບົບການເມືອງຕ້ອງທະລຸລ່ວງ, ຄົບຊຸດ ແລະ ສິ່ງສຳຄັນ ແມ່ນມະຫາສາມັກຄີທົ່ວປວງຊົນທັງຊາດ. ນີ້ແມ່ນແຫລ່ງກຳລັງ, ແມ່ນກຳລັງຫນູນພັດທະນາປະເທດຊາດ ແລະ ແມ່ນຈຸດໝາຍພວກເຮົາຕ້ອງກໍ່ສ້າງ.”
ລະດູບານໃຫມ່ວຽນມາອີກວາລະຫນຶ່ງ, ກ້າວເຂົ້າສູ່ລະດູບານໃຫມ່, ພ້ອມກັບປະຊາຊົນໃນທົ່ວປະເທດ, ພໍ່ແມ່ປະຊາຊົນ ຊາວຫວຽດນາມ ອາໄສຢູ່ຕ່າງປະເທດ ເປັນຈິດຫນຶ່ງໃຈດຽວເຊື່ອໝັ້ນວ່າ ປະເທດຊາດຈະມີບັນດາບາດກ້າວຫັນປ່ຽນຢ່າງແຮງ, ເຊື່ອມໂຍງຢ່າງເລິກເຊິ່ງກວ້າງຂວາງ, ສວມບົດບາດໃຫຍ່ກວ່າໃນເວທີສາກົນ.