(vovworld)-ປະກອບສ່ວນເຂົ້າໃນຜົນສຳເລັດວຽກງານການທູກຂອງຫວຽດນາມໃນຊຸມປີຜ່ານມາ, ພິເສດໃນປີ 2013 ມີບົດບາດສຳຄັນຂອງວຽກງານການຕ່າງປະເທດປະຊາຊົນ. ບໍ່ພຽງແຕ່ແມ່ນຂົວເຊື່ອມຕໍ່, ເຮັດແຈ້ງບັນດາແຜນນະໂຍບາຍ, ນະໂຍບາຍຂອງຫວຽດນາມເຖິງເພື່ອນມິດສາກົນ, ຮັກສາຄວາມໄວ້ເນື້ອເຊ່ືອໃຈຂອງບັນດາປະຊາຊາດ, ອົງການສາກົນທີ່ສະຫນັບສະຫນູນຫວຽດນາມເທົ່ານັ້ນ, ວຽກງານການຕ່າງປະເທດປະຊາຊົນຍັງປະກອບສ່ວນຫນູນຊ່ວຍບັນດາຈຸດໝາຍພັດທະນາເສດຖະກິດສັງຄົມຂອງປະເທດຊາດອີກດ້ວຍ. ເນື່ອງໃນໂອກາດ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 5 ສະຫະພັນບັນດາອົງການມິດຕະພາບຫວຽດນາມ ຊື່ງໄຂຂຶ້ນໃນວັນທີ 30/12 ຢູ່ຮ່າໂນ້ຍ, ນັກຂ່າວ ແອງຮ່ວຽນ ມີບົດຂຽນທີ່ພາດຫົວເລື່ອງວ່າ: ເສີມຂະຫຍາຍບົດບາດການຕ່າງປະເທດປະຊາຊົນໃນໄລຍະເຊື່ອມໂຍງເຂົ້າກັບສາກົນ.
ທ່ານ ຫວູຊວນຮົ່ງ, ປະທານສະຫະພັນບັນດາອົງການມິດຕະພາບຫວຽດນາມ
photo:vietnamplus.vn
|
ດ້ວຍບົດບາດແມ່ນອົງການການເມືອງສັງຄົມຮັບຜິດຊອບວຽກງານການຕ່າງປະເທດປະຊາຊົນ, ການເຄື່ອນໄຫວຂອງສະຫະພັນບັນດາອົງການມິດຕະພາບຫວຽດນາມໃນຊຸມປີຜ່ານມາໄດ້ພັດທະນາຢ່າງແຂງແຮງ, ຕັ້ງຫນ້າໃນວຽກງານສ້າງສັນຕິພາບ, ສາມັກຄີ, ມິດຕະພາບ, ຮ່ວມມືປະຊາຊົນ. ວຽກງານຂົນຂວາຍຊ່ວຍເຫລືອຈາກອົງການບໍ່ຂຶ້ນກັບລັດຖະບານຂອງຕ່າງປະເທດ ແລະ ຂົນຂວາຍ, ຕໍ່ສູ້ການເສກສັນປັ້ນແຕ່ງກໍ່ໄດ້ຮັບການຜັນຂະຫຍາຍຢ່າງມີປະສິດທິຜົນຈາກສະຫະພັນດັ່ງກ່າວ, ຜ່ານນັ້ນ ປະກອບສ່ວນເຮັດແຈ້ງແນວທາງ, ແຜນນະໂຍບາຍຂອງພັກ,ລັດຫວຽດນາມເຖິງເພື່ອນມິດສາກົນ.
ສ້າງທີ່ຕັ້ງບົດບາດ ແລະ ກຳລັງແຮງໃຫ້ແກ່ປະເທດຊາດ
ໃນ 5 ປີຜ່ານມາ, ໃນບັນຫາສັນຕິພາບ, ຄວາມສາມັກຄີ, ມິດຕະພາບ, ຕາມການສະຖິຕິ ມີກວ່າ 240 ຄະນະ ດ້ວຍຜູ້ແທນກວ່າ 2.800 ເທື່ອຄົນມາຈາກຫລາຍປະເທດໃນໂລກໄດ້ມາຢ້ຽມຢາມຫວຽດນາມ. ສະຫະພັນບັນດາອົງການມິດຕະພາບຫວຽດນາມ ໄດ້ຈັດຕັ້ງ 3000 ການເຄື່ອນໄຫວພົວພັນຕ່າງປະເທດຢູ່ກັບທີ່ ແລະ ການພົບປະ, ເຮັດວຽກກັບບັນດາຄູ່ຮ່ວມມືສາກົນ, ສ້າງການພົວພັນຄູ່ຮ່ວມມືກັບອົງການຕ່າງປະເທດ, ພາກພື້ນ ແລະສາກົນກວ່າ 1000 ແຫ່ງ. ຕາມທ່ານ ຫວູຊວນຮົ່ງ, ປະທານສະຫະພັນບັນດາອົງການມິດຕະພາບຫວຽດນາມແລ້ວ, ຜົນປະໂຫຍດນຳມາໃຫ້ປະເທດຊາດຈາກບັນດາການຢ້ຽມຢາມດັ່ງກ່າວ ແມ່ນໃຫຍ່ຫລວງທີ່ສຸດ:
“ການພົບປະນັບພັນຄັ້ງໄດ້ສ້າງເງື່ອນໄຂໃຫ້ເພື່ອນມິດສາກົນເຂົ້າໃຈກ່ຽວກັບຫວຽດນາມກວ່າ. ຜ່ານນັ້ນ ການພົວພັນລະຫວ່າງຫວຽດນາມກັບບັນດາປະເທດບ້ານໃກ້ເຮືອນຄຽງ, ບັນດາປະເທດໃນພາກພື້ນ, ບັນດາປະເທດມີການພົວພັນທີ່ເປັນມູນເຊື້ອ, ມີການພົວພັນສຳຄັນກັບຫວຽດນາມ ລ້ວນແຕ່ໄດ້ຮັບການປັບປຸງ, ຍົກລະດັບ ແລະ ເສີມຂະຫຍາຍປະສິດທິຜົນຢ່າງສຸດຂີດ, ສືບຕໍ່ປັບປຸງເຄືອຂ່າຍເພື່ອນມິດສາກົນ, ສາມັກຄີ, ສະຫນັບສະຫນູນ, ຊ່ວຍເຫລືອ, ແບ່ງປັນກັບຫວຽດນາມ.”
ໃນຂະນະທີ່ໂລກຫາກໍຜ່ານຜ່າວິກິດການການເງິນ, ເປັນຕົ້ນຫວຽດນາມ ພວມມີທີ່ຕັ້ງບົດບາດແມ່ນປະເທດມີລາຍຮັບປານກາງ, ການຊ່ວຍເຫລືອຈາກອົງການບໍ່ຂຶ້ນກັບລັດຖະບານໃຫ້ແກ່ຫວຽດນາມ ໃນ 5 ປີຜ່ານມາ ຍັງຄົງບັນລຸຕົວເລກກວ່າ 1,4 ຕື້ USD. ການປ່ອຍທຶນໃຫ້ຫລາຍໂຄງການໄດ້ຊ່ວຍປ່ຽນແປງໂສມຫນ້າຂອງຫລາຍທ້ອງຖິ່ນ, ເຂດຫ່າງໄກສອກຫລີກ, ເຂດຊົນເຜົ່າສ່ວນຫນ້ອຍ. ຜ່ານຫລາຍໂຄງການຂອງບັນດາອົງການບໍ່ຂຶ້ນກັບລັດຖະບານ, ມີເນື້ອທີ່ດິນນັບພັນເຮັກຕາທີ່ຖືກມົນລະພິດຈາກລູກລະເບີດບໍ່ທັນແຕກຫລັງສົງຄາມໄດ້ຮັບການແກ້ໄຂຢ່າງປອດໄພ, ສ້າງເງື່ອນໄຂໃຫ້ແກ່ປະຊາຊົນໃນການດຳລົງຊີວິດ ແລະ ການປູກຝັງ. ທ່ານ ດົນຕວນຟອງ, ຮອງປະທານສະຫະພັນບັນດາອົງການມິດຕະພາບຫວຽດນາມ ໃຫ້ຮູ້ວ່າ:
“ໃນ 5 ປີຜ່ານມາ, ພວກເຮົາໄດ້ຕ້ອນຮັບເກືອບ 200 ອົງການບໍ່ຂຶ້ນກັບລັດຖະບານສາກົນໃຫມ່ມາຫວຽດນາມ. ນີ້ແມ່ນຕົວເລກປະທັບໃຈໃນສະພາບຫວຽດນາມໄດ້ກາຍເປັນປະເທດມີລາຍຮັບປານກາງ. ທາງດ້ານມູນຄ່າຈາກການຊ່ວຍເຫລືອ ໃນຊຸມປີຜ່ານມາກໍບັນລຸຕົວເລກສະຖິຕິ, ລື່ນກາຍລະດັບ 300 ລ້ານ USD/ປີ ແມ່ນມູນຄ່າການຊ່ວຍເຫລືອ, ລື່ນກາຍມູນຄ່າແຫລ່ງທຶນ ODA ຊ່ວຍເຫລືອລ້າ.”
ຍ້ອນປະຕິບັດວຽກງານຂົນຂວາຍ, ຕໍ່ສູ້ຕ້ານການເສກສັນປັ້ນແຕ່ງໃນໄລຍະຜ່ານມາເປັນຢ່າງດີ, ຫວຽດນາມ ໄດ້ຮັບການສະຫນັບສະຫນູນຢ່າງແຮງຈາກເພື່ອນມິດສາກົນ, ເປັນຕົ້ນໃນປີ 2013 ເປັນຂີດໝາຍເມື່ອຫວຽດນາມໄດ້ຮັບເລືອກຕັ້ງເປັນສະມາຊິກຂອງສະພາສິດທິມະນຸດສປຊ ອາຍຸການ 2014-2016
ສືບຕໍ່ປະຕິບັດແຜນນະໂຍບາຍເຊື່ອມໂຍງເຂົ້າກັບສາກົນ
ກ່ອນນີ້ 3 ປີ, ໃນຈົດໝາຍສົ່ງເຖິງສະຫະພັນບັນດາອົງການມິດຕະພາບຫວຽດນາມເນື່ອງໃນໂອກາດສະເຫລີມສະຫລອງ 60 ປີ ແຫ່ງວັນມູນເຊື້ອ(11/2010), ອະດີດປະທານປະເທດ ຫງວຽນມີງຈຽດ ໄດ້ຊີ້ແຈ້ງວ່າ: ໃນວຽກງານຕໍ່ສູ້ປົດປ່ອຍຊາດ, ໂຮມປະເທດຊາດເປັນເອກະພາບກໍຄືກິດຈະການສ້າງສາປະເທດຊາດ, ເພື່ອບືນຕົວຂຶ້ນ ແລະ ທັດທຽບກັບໂລກ, ໃນຫລາຍສີບປີຜ່ານມາ ຖ້າຫາກມີພຽງກຳລັງແຮງເທົ່ານັ້ນ ຫວຽດນາມ ບໍ່ສາມາດຍາດໄຊຊະນະໄດ້. ບໍ່ວ່າໃນກໍລະນີໃດ, ກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ ດ້ວຍການສະຫນັບສະຫນູນຂອງສາກົນ ຈຶ່ງແມ່ນກຳລັງແຮງລຳ້ເລີດ. ເນື້ອໃນຈິດໃຈນັ້ນບັນດາຜູ້ເຮັດວຽກງານການຕ່າງປະເທດປະຊາຊົນລ້ວນແຕ່ເຂົ້າໃຈແຈ້ງ. ເພາະສະນັ້ນ ໃນອາຍຸການຈະມາເຖິງ, ວຽກງານການຕ່າງປະເທດປະຊາຊົນສືບຕໍ່ໄດ້ຮັບການຍູ້ແຮງຈາກສະຫະພັນບັນດາອົງການມິດຕະພາບ ແລະ ບັນດາອົງການສະມາຊິກ. ທ່ານ ດົນຕວນຟອງ, ຮອງປະທານສະຫະພັນບັນດາອົງການມິດຕະພາບຫວຽດນາມ ໄດ້ຢືນຢັນວ່າ:
“ໃນອາຍຸການຈະມາເຖິງ, ສະຫະພັນບັນດາອົງການມິດຕະພາບຈະສືບຕໍ່ພັດທະນາທັງລວງກວ້າງ ແລະ ລວງເລິກ, ໃນນັ້ນປະຕິບັດຕາມແຜນນະໂຍບາຍລວມແມ່ນເຊື່ອມໂຍງເຂົ້າກັບສາກົນຢ່າງຮອບດ້ານ. ສະນັ້ນ ໃຫ້ບຸລິມະສິດໃນການພັດທະນາການພົວພັນກັບປະຊາຊົນບັນດາປະເທດໃນໂລກກໍສ່ອງແສງຕາມແຜນນະໂຍບາຍລວມນັ້ນ, ພິເສດ ໃນພາກພື້ນອາຊຽນ. ພວກເຮົາໃຫ້ບຸລິມະສິດການພັດທະນາການພົວພັນກັບບັນດາປະເທດອາຊຽນ, ກັບປະຊາຊົນບັນດາປະເທດອາຊຽນ ເພື່ອເພີ່ມທະວີການເຊື່ອມຕໍ່, ແບ່ງປັນໃນປະຊາຄົມອາຊຽນ.”
ຄຽງຄູ່ກັບການພົວພັນກັບຕ່າງປະເທດຂອງພັກ, ການທູດຂອງລັດ, ການພົວພັນກັບຕ່າງປະເທດຂອງສະພາແຫ່ງຊາດ, ການຕ່າງປະເທດປະຊາຊົນພວມເສີມຂະຫຍາຍທີ່ຕັ້ງ,ບົດບາດສຳຄັນໃນການເຂົ້າຮ່ວມປະຕິບັດແນວທາງ, ນະໂຍບາຍການຕ່າງປະເທດລວມ, ປະກອບສ່ວນເຂົ້າໃນການສ້າງສະພາບແວດລ້ອມສາກົນຢ່າງສະດວກໃຫ້ແກ່ການພັດທະນາຂອງປະເທດຊາດ.