(vovworld)-ກ່ອນນີ້ 68 ປີເຕັມ, ພາຍຫລັງໄຊຊະນະອັນຍິ່ງໃຫຍ່ຂອງການປະຕິວັດເດືອນສິງຫາປີ 1945, ທ່ານປະທານໂຮ່ຈິມີນ ອ່ານບົດຖະແຫລງປະກາດເອກະລາດ, ສະຖາປະນາປະເທດ ສາທາລະນະລັດ ປະຊາທິປະໄຕຫວຽດນາມ ປະຈຸບັນແມ່ນປະເທດ ສາທາລະນະລັດສັງຄົມນິຍົມຫວຽດນາມ ທີ່ສະຫນາມຫລວງ ບາດີງ ປະຫວັດສາດ. ຕາມການຕີລາຄາຂອງນັກຮຽນຮູ້, ວົງການການເມືອງສາກົນແລ້ວ, ໃນຍຸກປະຈຸບັນ, ນ້ຳໃຈປະຕິວັດເດືອນສິງຫາ ແລະ ວັນຊາດທີ 2/9/1945 ຂອງຫວຽດນາມ ຍັງຄົງຮັກສາຄຸນຄ່າເດີມໄວ້ຄືເກົ່າ. ຕາມນັ້ນແລ້ວ ຄວາມເສລີ ແລະ ຍຸຕິທຳຍາມໃດກໍແມ່ນຄວາມມຸ້ງຫວັງຂອງແຕ່ລະຊາດ, ແຕ່ລະປະເທດ.
ທ່ານປະທານໂຮ່ຈິມີນ ອ່ານບົດຖະແຫລງປະກາດເອກະລາດ
ພາບປະກອບ:internet
|
68 ປີໄດ້ລ່ວງເລີຍໄປແລ້ວ, ແຕ່ເມື່ອຕີລາຄາຄວາມໝາຍປະຫວັດສາດຂອງການປະຕິວັດເດືອນສິງຫາ, ເພື່ອນມິດສາກົນຫລາຍຄົນລ້ວນແຕ່ໄດ້ໃຫ້ຂໍ້ສັງເກດວ່າ: ບໍ່ພຽງແຕ່ປະເທດຫວຽດນາມເທົ່ານັ້ນ ຫາກຊົນຊັ້ນກຳມະກອນຊາວຜູ້ອອກແຮງງານ ແລະ ບັນດາປະເທດຖືກກົດຂີ່ຂຸດຮີດອື່ນໆໃນໂລກ ກໍ່ລ້ວນແຕ່ມີສິດເອກອ້າງທະນົງໃຈວ່າ ເປັນຄັ້ງທຳອິດໃນປະຫວັດສາດແຫ່ງການປະຕິວັດຂອງບັນດາປະເທດຫົວເມືອງຂຶ້ນ ແລະ ເຄິ່ງຫົວເມືອງຂຶ້ນ, ພັກທີ່ຫນຸ່ມແຫນ້ນໄດ້ນຳພາການປະຕິວັດສຳເລັດຜົນ. ໄຊຊະນະຂອງການປະຕິວັດເດືອນສິງຫາປີ 1945 ໄດ້ສ້າງປະຫວັດສາດບໍ່ພຽງແຕ່ສະເພາະໃຫ້ແກ່ຫວຽດນາມ ເທ່ົານັ້ນ ຫາກຍັງໃຫ້ທັງທົ່ວໂລກອີກດ້ວຍ ສະແດງໃຫ້ເຫັນຄວາມມຸ້ງມາດປາດຖະຫນາຢາກມີເສລີພາບ ແລະ ຄວາມຍຸຕິທຳຂອງບັນດາປະເທດຫົວເມືອງຂຶ້ນ, ເປັນແບບຢ່າງ ແລະ ແຫລ່ງລະດົມກຳລັງໃຈສຳລັບບັນດາປະເທດຫົວເມືອງຂຶ້ນລຸກຮຶ້ຂຶ້ນຍາດເອົາເອກະລາດ, ຢຸດຕິລັດທິຈັກກະພັດລ່າເມືອງຂຶ້ນ.
ເພາະສະນັ້ນ ແຕ່ລະປີ, ບໍ່ພຽງແຕ່ປະຊາຊົນຫວຽດນາມ ກວ່າ 86 ລ້ານຄົນຢູ່ພາຍໃນປະເທດ ແລະ ຊາວຫວຽດນາມກວ່າ 4 ລ້ານຄົນຢູ່ຕ່າງປະເທດສະເຫລີມສະຫລອງວັນສະຖາປະນາປະເທດເທົ່ານັ້ນ ຫາກ ບັນດາເພື່ອນມິດສາກົນກໍພາກພູມໃຈພ້ອມກັບຊາວຫວຽດນາມອີກດ້ວຍ, ຕີລາຄາສູງບັນດາຜົນງານຂອງຫວຽດນາມ. ສາດສະດາຈານປະຫວັດສາດ ອາເມລິກາ Douglas Jardin, ປະຈຸບັນ ແມ່ນຄູສອນມະຫາວິທະຍາໄລແຫ່ງຊາດ ຮ່າໂນ້ຍ ຖືວ່າ:
“ອາດຈະຖືວັນຊາດທີ 2/9 ແມ່ນວັນສະຖາປະນາປະເທດຫວຽດນາມ. ແຕ່ຂ້າພະເຈົ້າຖືວ່າ ວັນນີ້ຍັງມີຄວາມໝາຍອີກຫລາຍຢ່າງ. ຫວຽດນາມ ແມ່ນປະເທດທຳອິດໃນພາກພື້ນທຳລາຍແອກປົກຄອງຂອງພວກລ່າເມືອງຂຶ້ນເພື່ອກາຍເປັນລັດເອກະລາດ, ເສລິພາບ. ເພາະສະນັ້ນ ຄວາມໝາຍຂອງວັນທີ 2/9 ແມ່ນໃຫຍ່ຫລວງກວ່າ ແລະ ປະຊາຊົນຫວຽດນາມມີສິດເອກອ້າງທະນົງໃຈພິເສດກ່ຽວກັບສິ່ງດັ່ງກ່າວ.”
68 ປີຜ່ານມາ ດ້ວຍການຜັນແປຫລາຍຢ່າງ, ຊາດຫວຽດນາມ ເຂົ້າໃຈຢ່າງເລິກເຊິ່ງກ່ຽວກັບຄຸນຄ່າຂອງເອກະລາດ, ເສລີພາບຍິ່ງກວ່າປະເທດໃດຢູ່ໃນໂລກ. ເພື່ອຮັກສາໝາກຜົນຂອງການປະຕິວັດ, ໃນ 68 ປີຜ່ານມາ ປະຊາຊົນ ຫວຽດນາມນັບລ້ານຄົນໄດ້ເສຍສະຫລະຊີວິດຢ່າງພິລະອາດຫານເພື່ອທ້ອນໂຮມປະເທດຊາດເປັນເອກະພາບ, ແລະຮັກສາເອກະລາດ, ເສລີພາບຂອງປະເທດໄວ້ຢ່າງໝັ້ນຄົງຄືດັ່ງຄຳຢືນຢັນຂອງປະທານໂຮ່ຈິມີນຢູ່ສະຫນາມຫລວງ ບາດີງ ເມື່ອລະດູໃບໄມ້ຫລົ່ນປີ 1945 ວ່າ: ປະເທດຫວຽດນາມ ມີສິດໄດ້ຊົມໃຊ້ເອກະລາດ, ເສລີພາບ ແລະ ທົ່ວປວງຊົນຫວຽດນາມທັງໝົດ ຕັດສິນໃຈສຸມຈິດໃຈ ເຫື່ອແຮງ, ຊີວິດອີນຊີນກໍຄືຊັບສິນທັງໝົດເພື່ອປົກປັກຮັກສາເອກະລາດ ແລະ ເສລິພາບ.”
ບັນດາຜົນງານທີ່ຫວຽດນາມ ຍາດມາໄດ້ໃນ 68 ປີຜ່ານມາ, ເປັນຕົ້ນໃນ ກວ່າ 27 ປີແຫ່ງການປ່ຽນແປງໃຫມ່, ສຳລັບຫລາຍປະເທດອື່ນໄດ້ຮັບຖືວ່າແມ່ນຜົນງານມະຫັດສະຈັນ. ເປັນຄັ້ງທຳອິດໃນປະຫວັດສາດ, ຫວຽດນາມ ໄດ້ຫຼຸດພົ້ນອອກຈາກປະເທດທຸກຍາກ (ມີລາຍຮັບສະເລ່ຍໃສ່ຫົວຄົນຕຳ່ກວ່າ 1000 USD/ປີ), ອັດຕາຄອບຄົວທຸກຍາກ ຫລຸດຜ່ອນຫລາຍພໍສົມຄວນໃນແຕ່ລະປີ ແລະ ແມ່ນຫນຶ່ງໃນບັນດາປະເທດນຳຫນ້າໃນການປະຕິບັດບັນດາເປົ້າໝາຍສະຫັດສະວັດຂອງ ສປຊ. ທ່ານ Maria Fatina ເລຂາທິການໃຫຍ່ສະມາຄົມມິດຕະພາບສັນຕິພາບ ແລະ ສາມັກຄີ ໂມຊຳບີກ ຖືວ່າ:
“ຫວຽດນາມ ປະສົບກັບຄວາມຫຍຸ້ງຍາກຫລາຍຢ່າງໃນອະດີດຕະການ ແຕ່ປະຈຸບັນ ທຸກສິ່ງທຸກຢ່າງໄດ້ປ່ຽນແປງຢ່າງຕັ້ງຫນ້າແລ້ວ. ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການປັບປຸງ. ພວກຂ້າພະເຈົ້າຄິດວ່າ ສິ່ງທີ່ເກີດຂຶ້ນຢູ່ຫວຽດນາມ ແລະ ຫວຽດນາມເຮັດຄືແນວໃດເພື່ອບັນລຸໄດ້ບັນດາຄວາມກ້າວຫນ້າໃນຍຸກສະໄຫມໃຫມ່ແມ່ນສິ່ງມະຫັດສະຈັນຢ່າງແທ້ຈິງ.”
ບໍ່ພຽງແຕ່ປັບປຸງດັດຊະນີມະນຸດໃຫ້ດີຂຶ້ນເທົ່ານັ້ນ, ຫາກທີ່ຕັ້ງບົດບາດຫວຽດນາມ ໃນແຜນທີ່ການເມືອງໂລກກໍໄດ້ຮັບການຮັບຮູ້ຈາກປະຊາຄົມໂລກເທື່ອລະກ້າວອີກດ້ວຍ. ຈາກລັດທີ່ຫນຸ່ມແຫນ້ນ ຫາກໍ່ມີຊື່ໃນແຜນທີ່ຂອງໂລກ, ມາຮອດປະຈຸບັນ ຫວຽດນາມ ໄດ້ສ້າງການພົວພັນທາງການທູດກັບ 180 ປະເທດ, ມີການພົວພັນດ້ານການຄ້າກັບເກືອບ 230 ປະເທດ ແລະ ເຂດແຄ້ວນ ແລະ ເປັນສະມາຊິກຕັ້ງຫນ້າຂອງ 70 ກວ່າອົງການພາກພື້ນ ແລະ ສາກົນ. ທ່ານ Saadi Salama Altumaizi ເອກອັກຄະລັດຖະທູດ ປາແລດສະຕີນ ປະຈຳຫວຽດນາມ ຢືນຢັນວ່າ:
“ຫວຽດນາມ ພວມສູ້ຊົນກາຍເປັນປະເທດອຸດສາຫະກຳທີ່ທັນສະໄຫມໃນປີ 2020. ຂ້າພະເຈົ້າເຊື່ອໝັ້ນວ່າ ບັນດາໝາກຜົນຊື່ງຫວຽດນາມບັນລຸໄດ້ໃນຊຸມປີຜ່ານມາ ຈະເປັນພື້ນຖານອັນໝັ້ນຄົງເພື່ອໃຫ້ຫວຽດນາມພັດທະນາແລະ ຍາດໄດ້ຜົນງານໃຫມ່ຫລາຍຢ່າງ. ຫວຽດນາມ ມີຄວາມສາມາດຢ່າງພຽງພໍເພື່ອປະຕິບັດຈຸດໝາຍກາຍເປັນປະເທດອຸດສາຫະກຳທີ່ພັດທະນາໃນປີ 2020. ສຳລັບພວກຂ້າພະເຈົ້າແລ້ວ, ຍາມໃດ ປາແລດສະຕີນກໍຕິດຕາມການພັດທະນາຂອງຫວຽດນາມ, ຖືບັນດາຜົນງານຂອງຫວຽດນາມຄືດັ່ງຜົນງານຂອງຕົນເອງ ເພາະວ່າ ຍາມໃດປາແລດສະຕີນກໍສະຫນັບສະຫນູນ ແລະ ສາມັກຄີກັບປະຊາຊົນຫວຽດນາມໃນພາລະກິດຕໍ່ສູ້ເພື່ອຄວາມເປັນທຳ.”
ຮອດ ປີ 2020, ຫວຽດນາມ ຈະກາຍເປັນປະເທດອຸດສາຫະກຳທີ່ທັນສະໄຫມ. ນັ້ນແມ່ນຄວາມມຸ້ງຫວັງອັນໃຫຍ່ຫລວງຂອງທັງຊາດຫວຽດນາມ. ປະຈຸບັນ, ໃນສະພາບທີ່ບັນດາບັນຫາພົວພັນພາຍໃນປະເທດ ແລະ ພົວພັນຕ່າງປະເທດພວມຊ້ອນແຝງກັນ, ພິເສດແມ່ນການພິພາດອະທິປະໄຕຜືນແຜນດິນ, ການສະເຫລີມສະຫລອງວັນຊາດທີ 2/9 ມີຄວາມໝາຍຢ່າງເລິກເຊິ່ງກວ່າ ແລະ ແຂງແຮງກວ່າ. 68 ປີໄດ້ລ່ວງເລີຍໄປແລ້ວ ແຕ່ ວັນເອກະລາດຍັງຄົງຝັງເລິກໃນດວງໃຈຂອງຊາວຫວຽດນາມຕະຫລອດການ. ເຫດການວັນທີ 2/9/1945 ແມ່ນຄວາມເອກອ້າງທະນົງໃຈ, ແມ່ນກຳລັງຫນູນຢ່າງແຂງແຮງເພື່ອໃຫ້ຊາວຫວຽດນາມແຕ່ລະຄົນບືນຕົວຂຶ້ນຜ່ານຜ່າຄວາມຫຍຸ້ງຍາກ, ສູ້ຊົນເພື່ອຈຸດໝາຍສ້າງສັງຄົມປະຊາທິປະໄຕ, ຍຸຕິທຳ ແລະ ສີວິໄລ.