(vovworld)- ບໍ່ອາດປະຕິເສດໄດ້ວ່າ: ປີ 2013, ເອີລົບ ໄດ້ມານະພະຍາຍາມເພື່ອຜ່ານຜ່າບັນດາຄວາມຫຍຸ້ງຍາກຈາກວິກິດການເສດຖະກິດ. ເບິ່ງລວມແລ້ວ, ນະໂຍບາຍຮັດເຂັມຄັດຂອງບັນດາປະເທດເອີລົບ ບໍໄດ້ຮັບຖືວ່າແມ່ນທາງອອກໜຶ່ງດຽວອີກ.. ຫຼາຍປະເທດໄດ້ເລີ່ມຮັບຮູ້ຄວາມສ່ຽງດ້ານງົບປະມານເພື່ອຊອກຫາທ່າເຕີບໂຕ, ເປີດບັນດາທິດທາງໃໝ່ໃນການຕ້ານວິກິດການ. ແຕ່ເຖິງຢ່າງໃດກໍ່ຕາມ, ບັນດາຄວາມມານະພະຍາຍາມນີ້ແມ່ນບໍ່ທັນຄົບຖ້ວນ ແລະ ໄດ້ສົ່ງຜົນສະທ້ອນບໍ່ແມ່ນໜ້ອຍເຖິງບັນດາລັດຖະນະໂຍບາຍຂອງຫຼາຍປະເທດໃນພາກພື້ນກໍ່ຄືສ່ົງຜົນກະທົບທີ່ຫຍໍ້ທໍ້ເຖິງນະໂຍບາຍການຕ່າງປະເທດຂອງສະຫະພາບເອີລົບ.
(ພາບປະກອບ)
ຕາມການສະຖິຕິ, ຍອດຜະລິດຕະພັນພາຍໃນສະຫະພາບເອີລົບ ເພີ່ມຂຶ້ນປະມານ 1,1% (ໄຕມາດທີ 2-ປີ 2013) ເມື່ອທຽບກັບໄລຍະດຽວກັນຂອງປີ 2012. ເຢັຍລະມັນ ແລະ ຝະລັ່ງ ແມ່ນສອງພື້ນຖານເສດຖະກິດໃຫ່ຍກ່ວາໝູ່ຂອງອີຢູ ພວມນຳໜ້າກ່ຽວກັບລະດັບການເຕີບໂຕ.
ປະຕິບັດການປະຕິຮູບໃຫ່ຍຫຼາຍຢ່າງໃນຂົງເຂດເສດຖະກິດ
ປີ 2013 ບໍ່ແມ່ນປີທີ່ພາກພື້ນເອີລົບ ຫລຸດພົ້ນອອກຈາກວິກິດການໄດ້ ແຕ່ນີ້ແມ່ນປີຊື່ງເອີລົບ ໄດ້ປະຕິບັດການປະຕິຮູບໃຫ່ຍຫຼາຍຢ່າງ ແລະ ບັນດາມາດຕະການທີ່ຂ້ຽວຂາດຄື: ຍູ້ແຮງການສ້າງຕັ້ງພັນທະມິດທະນາຄານ, ມານະພະຍາຍາມຕ້ານການໜີພາສີ, ສຸມໃສ່ສ້າງວຽກເຮັດງານທຳໃຫ້ຄົນງານໜຸ່ມ…
ຖ້າສັງເກດບັນດາຕົວເລກເຕີບໂຕອາດເຫັນໄດ້ວ່າ: ປີ 2013, ລະດັບຮ້າຍແຮງຂອງວິກິດການໄດ້ຢຸດຕິລົງ. ສອງພື້ນຖານເສດຖະກິດນຳໜ້າຄືເຢຍລະມັນ ແລະ ຝະລັ່ງ ຍັງຮັກສາລະດັບເຕີບໂຕໄວ້ຢ່າງໝັ້ນຄົງ, ໂດຍສະເພາະແມ່ນເສດຖະກິດເຢຍລະມັນ. ບັນດາພື້ນຖານເສດຖະກິດທີ່ຖືກຊຸດໂຊມຄື: ແອດສະປາຍ, ອີຕາລີ, ເກຼກ…..ກໍ່ຖືກຖືວ່າໄດ້ຜ່ານຜ່ານຈຸດເວລາອັນຕະລາຍແລ້ວ, ແຕ່ວ່າ, ທຸກສິ່ງທຸກຢ່າງຍັງໄດ້ປະສົບກັບຄວາມຫຍຸ້ງຍາກຢູ່, ໂດຍສະເພາະແມ່ນບັນຫາຕ້ານການຫວ່າງງານ. ມີຫຼາຍປະເທດໄດ້ເລີ່ມຕົກລົງຮັບຮູ້ຄວາມສ່ຽງດ້ານງົບປະມານເພື່ອຊອກຫາທ່າເຕີບໂຕຄືນໃໝ່ ແລະ ເປີດບັນດາທິດເດີນໃໝ່ໃນການຕ້ານວິກິດການ.
ແອດສະປາຍແມ່ນປະເທດມີຄົນຫວ່າງງານຫຼາຍກ່ວາໝູ່
(ພາບ: Guardian)
ນະໂຍບາຍການຕ່າງປະເທດ, ສະຖຽນລະພາບດ້ານການເມືອງຖືກຜົນສະທ້ອນ
ວິກິດການດ້ານເສດຖະກິດໄດ້ກະທົບຢ່າງຫຍໍ້ທໍ້ເຖິງນະໂຍບາຍການຕ່າງປະເທດລວມຂອງອີຢູ ໃນປີ 2013. ຍ້ອນເກີດວິກິດການ, ປະເທດຕ່າງໆຕ້ອງສຸມທຸກແຫຼ່ງກຳລັງໃຫ້ແກ່ບັນຫາເສດຖະກິດ. ເສດຖະກິດບໍ່ພັດທະນາເຮັດໃຫ້ຄວາມສາມັກຄີຂອງອີຢູ ຖືກຜົນສະທ້ອນ. ສິ່ງດັ່ງກ່າວກໍ່ເຫັນໄດ້ຢ່າງຈະແຈ້ງທີ່ສຸດຜ່ານການປະລາໄຊຂອງກອງປະຊຸມຢູ່ Vilnius ຊື່ງຫາກໍ່ຈັດຂຶ້ນຫວ່າງມໍ່ໆມານີ້, ໃນນັ້ນ, ບັນດາປະເທດເອີລົບຕາເວັນອອກຊື່ງອີຢູ ມີເຈດຕະນາດຶງດູດ, ພິເສດແມ່ນຢູແກຼນ ໄດ້ປະຕິເສດເຊັນຂໍ້ຕົກລົງເຂົ້າເປັນສະມາຊິກຂອງກຸ່ມ. ມາຮອດຈຸດເວລານີ້, ບັນດາການຜັນແປຢູ່ ຢູແກຼນ ໃຫ້ເຫັນວ່າ, ບັນດາບາດກ້າວພັດທະນາຂອງອີຢູ ຢູ່ທິດຕາເວັນອອກບໍ່ມີຄວາມສະດວກສະບາຍ ຂະນະທີ່ລັດເຊຍ ເດັດດ່ຽວບໍ່ປະລະເຂດມີຜົນສະທ້ອນຂອງຕົນ. ເບິ່ງລວມແລ້ວ, ອີຢູ ພວມຂາດຄວາມສາມາດບົ່ມຊ້ອນດ້ານເສດຖະກິດ ແລະ ປະຈຸບັນພວມບໍ່ມີທາງອອກໃນນະໂຍບາຍນີ້.
ບໍ່ພຽງແຕ່ເທົ່ານັ້ນ, ນະໂຍບາຍຮັດເຂັມຄັດໄດ້ເຮັດໃຫ້ມາດຖານການດຳລົງຊີວິດໃນພາກພື້ນເອີລົບ ຖືກຫລຸດຜ່ອນລົງ, ຍູ້ອັດຕາຄົນຫວ່າງງານຂຶ້ນສູງ ແລະ ກໍ່ໃຫ້ເກີດບັນດາການແຫ່ຂະບວນ ຄັດຄ້ານຂອງ ປຊຊ.
(ພາບ:Bloomberg)
ສືບຕໍ່ໃຫ້ບຸລິມະສິດຟື້ນຕົວເສດຖະກິດໃນ 2 ປີຕໍ່ໜ້າ
ຕາມການຄາດຄະເນແລ້ວ, ບັນດາພື້ນຖານເສດຖະກິດເອີລົບ ອາດຈະຟື້ນຕົວພ້ອມກັນໃນທ້າຍປີ 2014 ຫຼືຕົ້ນປີ 2015. ແຕ່ນັ້ນພຽງແຕ່ແມ່ນການຄາດຄະເນເທົ່ານັ້ນ, ເພື່ອໃຫ້ມັນປະກົດຜົນເປັນຈິງ, ບັນດາປະເທດອີຢູ ຍັງຈະຕ້ອງຜ່ານຜ່າຄວາມຫຍຸ້ງຍາກຫຼາຍຢ່າງ. ຍ້ອນເຫດນັ້ນ, ສຳລັບອີຢູ ແລ້ວ, ເລື່ອງສືບຕໍ່ປະຕິຮູບເພື່ອບັນລຸໄດ້ທ່າເຕີບໂຕແມ່ນການໃຫ້ບຸລິດມະສິດອັນດັບໜຶ່ງ. ຫາງສຽງຈະເຫັນປະຈັກຕາບັນດາການປ່ຽນແປງໃຫ່ຍຂອງອີຢູ ໂດຍໄວ ນັບແຕ່ຕົ້ນປີ 2014 ໃນຂະນະທີ່ເດືອນ 5/2014, ຜູ້ມີສິດເລືອກຕັ້ງເອີລົບ 390 ລ້ານຄົນຈະໄປປ່ອນບັດເລືອກຕັ້ງສະມາຊິກລັດຖະສະພາເອີລົບໃໝ່ ຊື່ງຈະແມ່ນການເລືອກຕັ້ງຕັດສິນຊີ້ຂາດອະນາຄົດຂອງສະຫະພາບເອີລົບ.
ພ້ອມກັບການປະຕິບັດນະໂຍບາຍເຕີບໂຕເສດຖະກິດ, ປີ 2014, ເອີລົບ ຕ້ອງປັບປຸງຄວາມໄວ້ເນື້ອເຊື່ອໃຈຂອງ ປຊຊ ຄືນໃໝ່. ບັນດາຄວາມມານະພະຍາຍາມຈະຕ້ອງເສຍເວລາຫຼາຍພໍສົມຄວນ ຍ້ອນວ່າ, ປະເທດຕ່າງໆໃນພາກພື້ນໃຊ້ສະກຸນເງິນເອີໂຣລວມ ພວມຕ້ອງພະຍາຍາມເພື່ອບັນລຸໄດ້ຄວາມເຫັນດີເຫັນພ້ອມດ້ານການເມືອງ ແລະ ການເງິນ./.