(vovworld)- ກອງປະຊຸມປະຈຳເດືອນ 3/2015 ຂອງລັດຖະບານ ໃຫ້ເຫັນວ່າ: ໃນ 3 ເດືອນຕົ້ນປີ 2015, ຍອດຜະລິດຕະພັນພາຍໃນ (GDP) ຂອງຫວຽດນາມ ບັນລຸ 6,03% ຊື່ງແມ່ນລະດັບສູງສຸດເມື່ອທຽບໃສ່ໄລຍະດຽວກັນຂອງ 5 ປີມານີ້. ເລື່ອງຮັກສາເສດຖະກິດມະຫາພາກເປັນປົກກະຕິ ແມ່ນຄາດໝາຍຂອງຫວຽດນາມ ໃນໄລຍະຈະມາເຖິງ.
ກອງປະຊຸມປະຈຳເດືອນ 3/2015 ຂອງລັດຖະບານຫວຽດນາມ
ພາບ:mof.gov.vn
|
GDP ບັນລຸລະດັບ 6,03% ແມ່ນຍ້ອນການເຕີບໂຕເພີ່ມຂຶ້ນທົບສອງເທົ່າເມື່ອທຽບໃສ່ປີກາຍໃນຂົງເຂດອຸດສາຫະກຳ ແລະ ກໍ່ສ້າງ. ພ້ອມກັນນັ້ນ, ໄພເງິນເຟີ້ ໃນເດືອນ 3 ເພີ່ມຂຶ້ນ 0,15%, ສິນເຊື່ອສຳລັບພື້ນຖານເສດຖະກິດ ກໍເພີ່ມຂຶ້ນ 1,25%, ຍອດຈຳນວນເງິນລົງທຶນສັງຄົມເພີ່ມຂຶ້ນ 9,1% ເມື່ອທຽບໃສ່ໄລຍະດຽວກັນຂອງປີກາຍ ແລະ ກວມກວ່າ 30% GDP. ອັດຕາດອກເບ້ຍ, ອັດຕາແລກປ່ຽນເງິນຕາ, ຕະຫລາດເງິນຕາຕ່າງປະເທດເປັນປົກກະຕິໂດຍພື້ນຖານ, ການສະສົມເງິນຕາຕ່າງປະເທດເພີ່ມຂຶ້ນ. ລາຍຮັບ, ລາຍຈ່າຍງົບປະມານແຫ່ງລັດບັນລຸໝາກຜົນຕັ້ງຫນ້າ. ເງິນລົງທຶນໂດຍກົງຂອງຕ່າງປະເທດບັນລຸກວ່າ 3 ຕື້ USD, ລະດັບປ່ອຍ ທຶນ ODA ເພີ່ມຂຶ້ນກວ່າ 10%.
ວາງຄາດໝາຍ GDP ບັນລຸ 6,2%
ເຖິງຢ່າງໃດກໍຕາມ, ໃນໄລຍະປະຈຸບັນ ພື້ນຖານເສດຖະກິດຫວຽດນາມ ຍັງຄົງປະສົບກັບສິ່ງທ້າທາຍ, ໃນນັ້ນ ພົ້ນເດັ່ນແມ່ນການຜະລິດດຳເນີນທຸລະກິດຂອງວິສາຫະກິດຍັງປະສົບກັບຄວາມຫຍຸ້ງຍາກ, ການເຕີບໂຕຂອງຂົງເຂດບໍລິການ, ກະສິກຳ, ປ່າໄມ້ ແລະ ສິນໃນນ້ຳ ບັນລຸລະດັບຕ່ຳກວ່າເມື່ອທຽບໃສ່ໄລຍະດຽວກັນຂອງປີກາຍ, ອາກາດແດດຮ້ອນ, ແຫ້ງແລ້ງ ຢູ່ບາງແຂວງແຄມທະເລທາງທິດໃຕ້ພາກກາງ ແລະ ທາງທິດຕາເວັນອອກພາກໃຕ້ຫວຽດນາມ ໄດ້ສົ່ງຜົນສະທ້ອນເຖິງການຜະລິດກະສິກຳ; ການສົ່ງອອກຫລຸດລົງເມື່ອທຽບໃສ່ໄລຍະດຽວກັນຂອງປີກາຍ. ຫນ້າທີ່ວາງອອກໃຫ້ແກ່ບັນດາກະຊວງ, ຂະແຫນງການ ແລະ ທ້ອງຖິ່ນ ນັ້ນແມ່ນ ເປັນເຈົ້າການແກ້ໄຂບັນດາບັນຫາເກີດຂຶ້ນຢ່າງທັນການ ເພື່ອບັນລຸ ແລະ ລື່ນກາຍ ບັນດາຄາດໝາຍພັດທະນາເສດຖະກິດສັງຄົມທີ່ວາງອອກ, ສູ້ຊົນບັນລຸການເຕີບໂຕ GDP 6,2% ແລະ ສູງກວ່ານັ້ນ. ລັດຖະບານເອົາໃຈໃສ່ເປັນພິເສດເຊິງການຊີ້ນຳປະຕິບັດບັນດາມາດຕະການຮັກສາເສດຖະກິດມະຫາພາກເປັນປົກກະຕິ, ພິເສດ ແມ່ນການຄວບຄຸມໄພເງິນເຟີ້, ລາຍຈ່າຍງົບປະມານເກີນດຸ່ນ, ການນຳເຂົ້າເກີນດຸ່ນຢູ່ໃນລະດັບ 5%, ສູ້ຊົນບັນລຸລະດັບການສົ່ງອອກ 10% ຕິດພັນກັບການຮັກສາອັດຕາແລກປ່ຽນລາຄາ, ອັດຕາດອກເບ້ຍເປັນປົກກະຕິ. ການແກ້ໄຂຄວາມຫຍຸ້ງຍາກໃຫ້ແກ່ການຜະລິດດຳເນີນທຸລະກິດ, ພິເສດສຳລັບຂະແຫນງກະສິກຳ ແມ່ນປັດໄຈຕັດສິນການພັດທະນາ. ທ່ານນາຍົກລັດຖະມົນຕີ ຫງວຽນເຕີນຢູງ ຊີ້ແຈ້ງວ່າ:
“ພວກເຮົາຕ້ອງຮ່ວມແຮງຮ່ວມໃຈແກ້ໄຂຄວາມຫຍຸ້ງຍາກໃຫ້ແກ່ຂະແຫນງກະສິກຳ. ປະຈຸບັນ ການສົ່ງອອກຫລຸດລົງຢ່າງແຮງ, ຄວນຫນູນຊ່ວຍແນວໃດ? ຂ້າພະເຈົ້າສະເຫນີ ບັນດາກະຊວງ ຄວນສຸມໃສ່ຫນຸນຊ່ວຍໃຫ້ແກ່ຂະແຫນງກະສິກຳ, ແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ. ລັດຖະບານ ຈະເປັນເຈົ້າພາບກອງປະຊຸມ ເພື່ອເປັນເອກະພາບຄຳສະເຫນີບັນດາມາດຕະການໃນທັນທີ, ສິ່ງໃດຫນູນຊ່ວຍໃຫ້ແກ່ຊາວກະສິກອນໄດ້, ໃຫ້ແກ່ຂົງເຂດກະສິກຳໄດ້ແມ່ນ ຕ້ອງຫນູນຊ່ວຍໃນທັນທີ.”
ທ່ານນາຍົກລັດຖະມົນຕີ ຫງວຽນເຕີນຢູງ ສະເຫນີ: ໃນປີ 2015 ນີ້ ຕ້ອງປະຕິບັດການຫັນລັດວິສາຫະກິດ 289 ແຫ່ງເປັນຫຸ້ນສ່ວນ, ບໍ່ພຽງແຕ່ຫັນວິສາຫະກິດເປັນຫຸ້ນສ່ວນເທົ່ານັ້ນ ຫາກຕ້ອງກວດກາການສືບຕໍ່ຂາຍທຶນຂອງລັດຢູ່ບັນດາວິສາຫະກິດບໍ່ຈຳເປັນ ແລະ ປະສິດທິຜົນການນຳໃຊ້ທຶນຕ່ຳ ພ້ອມທັງຍູ້ແຮງການຖອນເງິນລົງທຶນນອກຂະແຫນງ. ເລື່ອງສ້າງໂຄງປະກອບທະນາຄານຄືນໃຫມ່ ພວມໄດ້ຮັບການປະຕິບັດຢ່າງຖືກຕ້ອງກັບວິວັດການ, ພາຍໃຕ້ການຊີ້ນຳຕິດຕາມກວດກາຢ່າງແຫນ້ນແຟ້ນຂອງລັດຖະບານ, ຮັບປະກັນການສ້າງໂຄງປະກອບຄືນໃຫມ່ນັ້ນຕ້ອງຢູ່ໃນລະດັບຄວມຄຸມ ແລະ ປອດໄພ.
ຮັບປະກັນແຜນການສົ່ງອອກປີ 2015
ລັດຖະບານເນັ້ນຫນັກເປັນພິເສດເຖິງບັນດາມາດຕະການຊຸກຍູ້ການສົ່ງອອກບັນດາປະເພດສິນຄ້າຕົ້ນຕໍຄື: ເຂົ້າສານ, ກາເຟ, ຢາງພາລາ ແລະ ເຊື້ອເພີງ, ບໍ່ແຮ່.. ຄຽງຄູ່ກັນນັ້ນ ຍັງຊຸກຍູ້ການສົ່ງອອກໃຫ້ພັດທະນາແບບຍືນຍົງຜ່ານການເປີດກວ້າງ, ຊອກຫາບັນດາຕະຫລາດໃຫມ່. ກ່ຽວກັບບັນຫານີ້, ທ່ານ ເຈີນຕວນແອງ, ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ຫວຽດນາມ ຖືວ່າ:
“ສັນຍາການຄ້າເສລີຫລາຍສະບັບໃນກິດຈະການເຊື່ອມໂຍງຂອງຫວຽດນາມ ພວມໄດ້ຮັບການຜັນຂະຫຍາຍຢ່າງຕັ້ງຫນ້າ. ພວກເຮົາມີປະຊາຄົມເສດຖະກິດ ອາຊຽນໃນທ້າຍປີ 2015, ບັນດາການເຈລະຈາກ່ຽວກັບສັນຍາຄູ່ຮ່ວມມືເສດຖະກິດຍຸດທະສາດຂ້າມປາຊີຟີກ ກໍຄື ສັນຍາການຄ້າເສລີກັບ ສະຫະພາບເອີລົບ, ພັນທະພາບພາສີ ກັບ ລັດເຊຍ, ເບລາຣຸດ ແລະ ກາຢັກສະຖານ ລ້ວນແຕ່ພວມໄດ້ຮັບການຜັນຂະຫຍາຍຢ່າງຕັ້ງຫນ້າ. ບັນດາສັນຍາການຄ້າເສລີອື່ນ ກັບ ສເກົາຫລີ, ກັບ ຈີເລ ກໍໄດ້ຮັບການຜັນຂະຫຍາຍ ແລະ ມີປະສິດທິຜົນ, ພວມເປີດບັນດາກາລະໂອກາດໃຫ້ແກ່ພວກເຮົາຊຸກຍູ້ການເຕີບໂຕການສົ່ງອອກ.”
ພ້ອມກັບບັນດາມາດຕະການແກ້ໄຂຄວາມຫຍຸ້ງຍາກເພື່ອຊຸກຍູ້ການເຕີບໂຕເສດຖະກິດ, ລັດຖະບານ ສະເຫນີ ກະຊວງ ວັດທະນະທຳ, ກິລາ ແລະ ທ່ອງທ່ຽວ ຕ້ອງແກ້ໄຂຄວາມຫຍຸ້ງຍາກໃຫ້ແກ່ຂະແຫນງທ່ອງທ່ຽວ, ກະຊວງການເງິນ ຕ້ອງປັບປຸງບັນດາປະເພດພາສີອາກອນ ຮັບປະກັນເໝາະສົມກັບບັນດາຄຳໝັ້ນສັນຍາສາກົນຂອງຫວຽດນາມ ພ້ອມທັງ ບໍ່ເຮັດໃຫ້ແຫລ່ງລາຍຮັບງົບປະມານຫລຸດລົງ. ບັນດາກະຊວງ, ຂະແຫນງການຈະສົມທົບກັນຢ່າງແຫນ້ນແຟ້ນ, ສ້າງລະບົບມາດຖານດ້ານເຕັກນິກສຳລັບບັນດາປະເພດສິນຄ້ານຳເຂົ້າ, ສຸມໃສ່ປ່ອຍບັນດາແຫລ່ງເງິນລົງທຶນ, ປະຕິບັດວຽກງານສ້າງກົດໝາຍ, ລັດຖະບັນຍັດ ແລະ ເອກະສານແນະນຳການປະຕິບັດກົດໝາຍຢ່າງເຂັ້ມງວດ, ເອົາໃຈໃສ່ເປັນພິເສດເຖິງການເບິ່ງແຍງດູແລຊີວິດການເປັນຢູ່ໃຫ້ແກ່ຜູ້ມີຄຸນງາມຄວາມດີ, ຊາວຊົນເຜົ່າສ່ວນຫນ້ອຍ ແລະ ຮັບປະກັນບັນດາຄາດໝາຍຮັບປະກັນຊີວິດສັງຄົມ.