(ພາບປະກອບ) |
ມາຮອດມື້ນີ້, ສັນຍາຢຸດຍິງໃນຮອບເວລາ 72 ຊົ່ວໂມງລະຫວ່າງ ອິດສະຣາແອນ ແລະ ຮາມາດ ໂດຍອີຢິບເປັນຄົນກາງໄດ້ປະຕິບັດ 2/3 ເວລາກຳນົດ. ບໍ່ອາດປະຕິເສດໄດ້ວ່າ ນີ້ແມ່ນສັນຍານອັນຕັ້ງໜ້າໃນສະພາວະທີ່ມີຄຳສັ່ງຢຸດຍິງເຊັ່ນດຽວກັນໂດຍລັດຖະມົນຕີການຕ່າງປະເທດອາເມລິກາ John Kerry ແລະ ທ່ານເລຂາທິການໃຫຍ່ ສ.ປ.ຊ Ban ki-moon ເປັນຄົນກາງໃນ 2-3 ວັນກ່ອນນັ້ນ ໄດ້ຖືກທຳລາຍພາຍຫຼັງມີຜົນສັກສິດເປັນເວລາ 2 ຊົ່ວໂມງ. ແຕ່ເລື່ອງທັງ ອິດສະຣາແອນ ແລະ ຮາມາດເຄົາລົບຄຳສັ່ງຢຸດຍິງຮອດເວລານີ້ ບໍ່ໝາຍຄວາມວ່າ ແມ່ນກາລະໂອກາດສັນຕິພາບຈະກັບຕ່າວຄືນມາສູ່ປະຊາຊົນຢູ່ເຂດກາຊາໂດຍໄວ.
ສັນຍາຢຸດຍິງທີ່ບັນລຸໄດ້ພາຍຫຼັງເກີດການປະທະກັນລະຫວ່າງ ອິດສະຣາແອນ ແລະ ຮາມາດເປັນເວລາ 29 ປີ, ອັນໄດ້ເຮັດໃຫ້ຊາວປາແລັດສະຕິນເກືອບ 1900 ຄົນຖືກເສຍຊີວິດ(ໃນນັ້ນ 80%ແມ່ນສາມັນຊົນ) ຍ້ອນຖືກລູກປືນໃຫຍ່ຂອງ ອິດສະຣາແອນ.
ຕາມຂໍ້ຕົກລົງໃໝ່ນີ້, ກຳລັງທະຫານບົກອິດສະຣາແອນຖອນອອກຈາກເຂດກາຊາທັງໝົດນັ້ນ ແມ່ນໜ່ຶງໃນບັນດາເງື່ອນໄຂໂດຍ ຮາມາດຍັກອອກມາເພື່ອມຸ່ງໄປສູ່ ສັນຍາຢຸດຍິງຍາວນານ. ກອງທັບອິດສະຣາແອນ ຍັງຖະແຫຼງວ່າ ເຂົາເຈົ້າໄດ້ທຳລາຍລະບົບທາງອຸໂມງໃຕ້ດິນຂ້າມຊາຍແດນເກືອບທັງໝົດຂອງຮາມາດ, ຊຶ່ງແມ່ນເປົ້າໝາຍຕົ້ນຕໍໃນການບຸກໂຈມຕີຢູ່ເຂດກາຊາຂອງ ອິດສະຣາແອນຄັ້ງ ນີ້.
ປະຕິກິລີຍາຢ່າງຕັ້ງໜ້າຂອງປະຊາຄົມໂລກ
ຕໍ່ໜ້າວົງການນັກຂ່າວສາກົນ, ບັນດາເຈົ້າໜ້າທີ່ກອງທັບອິດສະຣາແອນ ແລະ ຮາມາດຕ່າງກໍໝັ້ນໝາຍຈະເຄົາລົບ ສັນຍາຢຸດຍິງ. ນີ້ແມ່ນຊ່ວງເວລາອັນລ້ຳຄ່າເພື່ອໃຫ້ບັນດາຝ່າຍປະຕິບັດການຊ່ວຍເຫຼືອມະນຸດສະທຳ, ພ້ອມທັງແມ່ນກາລະໂອກາດເພື່ອໃຫ້ ສ.ປ.ຊ, ອາເມລິກາ, ອິດສະຣາແອນ, ຮາມາດ ແລະ ອີຢິບຊອກຫາ ຄຳສັ່ງຢຸດຍິງແບບຖາວອນໃຫ້ແກ່ການສູ້ຮົບນີ້. ກ່ອນທີ່ ສັນຍາຢຸດຍິງມີຜົນສັກສິດ, ກອງທັບອິດສະຣາແອນໄດ້ຖອນກຳລັງທັງໝົດຊຶ່ງລວມມີ ພົນທະຫານ ແລະ ລົດຖັງອອກຈາກເຂດກາຊາ. ໂຄສົກກອງທັບອິດສະຣາແອນ, ພັນຕີ Peter Lerner ໃຫ້ຮູ້ວ່າ ຄຳສັ່ງຖອນທະຫານຖືກຍົກອອກມາພາຍຫຼັງທີ່ກອງທັບຂອງປະເທດນີ້ໄດ້ສຳເລັດບັ້ນທຳລາຍລະບົບທາງອຸໂມງໃຕ້ດິນຂ້າມຊາຍແດນຂອງຮາມາດ. ຕາມນັ້ນແລ້ວ, ມີທາງອຸໂມງໃຕ້ດິນຢ່າງໜ້ອຍ 32 ສາຍ ແລະ ທາງເຂົ້າ ລະບົບທາງອຸໂມງໃຕ້ດິນນັບ 10 ແຫ່ງຖືກທຳລາຍ.
ປະຊາຄົມໂລກປາດຖະໜາວ່າ ສັນຍາຢຸດຍິງຄັ້ງນີ້ ແມ່ນກາລະໂອກາດເພື່ອເປີດຊ່ອງທາງດຳເນີນການສົນທະນາລະຫວ່າງບັນດາຝ່າຍປະທະກັນ. ອາເມລິກາໄດ້ຊົມເຊີຍບາດລ້ຽວໃໝ່ນີ້ ແລະ ຖືວ່າ ນີ້ແມ່ນກາລະໂອກາດຢ່າງແທ້ຈິງໃຫ້ແກ່ສັນຍາທີ່ຕັ້ງໜ້າສະບັບຕໍ່ໄປ. ອາເມລິກາກໍບໍ່ລືມຮຽກຮ້ອງທັງ ອິດສະຣາແອນ ແລະ ຮາມາດຕ້ອງປະຕິບັດຕາມຄຳສັ່ງຢຸດຍິງທີ່ແກ່ຍາວເປັນເວລາ 72 ຊົ່ວໂມງ.
ທ່ານເລຂາທິການໃຫຍ່ສ.ປ.ຊ Ban ki-moon ໄດ້ກະຕຸກຊຸກຍູ້ທັງ ອິດສະຣາແອນ ແລະ ຮາມາດ ຈົ່ງລະງັບໃຈໃນລະດັບສູງສຸດ, ຮຽກຮ້ອງໃຫ້ບັນດາຝ່າຍຈົ່ງດຳເນີນວິວັດທະນາການເຈລະຈາຢູ່ນະຄອນຫຼວງກາຍໂຣປະເທດອີຢິບກ່ຽວກັບ ສັນຍາຢຸດຍິງຍາວນານສະບັບໜຶ່ງກໍຄືບັນດາບັນຫາພື້ນຖານຍິ່ງໄວກໍຍິ່ງດີ. ທ່ານເລຂາທິການໃຫຍ່ ສ.ປ.ຊ Ban ki-moon ຍັງໝັ້ນໝາຍຈະໜູນຊ່ວຍຮອບດ້ານໃຫ້ບັນດາຝ່າຍບັນລຸສັນຍາຢຸດຕິການປະທະກັນຢູ່ເຂດດິນແດນນີ້. ສະຫະພາບເອີລົບກໍອອກຖະແຫຼງການຊົມເຊີຍຄຳສັ່ງຢຸດຍິງ, ເນັ້ນໜັກເຖິງເລື່ອງບັນດາຝ່າຍຕ້ອງຢຸດຕິການກໍ່ຄວາມເສຍຫາຍທີ່ມີຕໍ່ຊີວິດອີນຊີຂອງສາມັນຊົນ, ພ້ອມທັງຮຽກຮ້ອງໃຫ້ອິດສະຣາແອນ ແລະ ຮາມາດບໍ່ປະໃຫ້ພາດໂອກາດນີ້.
ແງ່ຫວັງສັນຕິພາບທີ່ບໍ່ແນ່ນອນ
ພາຍຫຼັງທີ່ ຄຳສັ່ງຢຸດຍິງມີຜົນສັດສິດເປັນເວລາ 1 ວັນ, ວັນທີ 6/8 , ອິດສະຣາແອນ ໄດ້ເຫັນດີແກ່ຍາວ ຄຳສັ່ງຢຸດຍິງໃນປະຈຸບັນຢູ່ເຂດກາຊາຮອດກຳນົດເວລາສຸດທ້າຍແມ່ນວັນທີ 8/8, ໃນສະພາວະບັນດາການເຈລະຈາໂດຍທາງອ້ອມລະຫວ່າງ ອິດສະຣາແອນ ແລະ ປາແລັດສະຕິນຖືກດຳເນີນຢູ່ກາຍໂຣປະເທດອິຢິບ. ແຕ່ຂະບວນການຮາມາດ ພັດປະຕິເສດຂໍ້ມູນຂ່າວສານນີ້ໃນທັນທີ່, ຊ້ຳບໍ່ໜຳ ຮາມາດຍັງກ່າວເຕືອນວ່າ ຈະດຳເນີນບັນດາການບຸກໂຈມຕີຄືນໃໝ່ ຖ້າຫາກ ອິດສະຣາແອນບໍ່ຍອມຮັບຄຳຮຽກຮ້ອງທັງໝົດຂອງປາແລັດສະຕິນ, ໂດຍສະເພາະແມ່ນການຢຸດຕິການປິດລ້ອມເຂດກາຊາ ແລະ ປ່ອຍຕົວບັນດານັກໂທດປາແລັດສະຕິນພວມຖືກ ອິດສະຣາແອນກັກຂັງ.
ເຖິງວ່າໄດ້ຍອມປະຕິບັດ ຄຳສັ່ງຢຸດຍິງກໍຕາມ, ແຕ່ອຳນາດການປົກຄອງ ອິດສະຣາແອນ ໃຫ້ຮູ້ວ່າ ອິດສະຣາແອນ ຈະຜັນຂະຫຍາຍກອງທັບຢູ່ບັນດາຈຸດປ້ອງກັນຢູ່ນອກເຂດກາຊາ ເພື່ອຮັບມືກັບບັນດາກໍລະນີຖືກບຸກໂຈມຕີ. ເຈົ້າໜ້າທີ່ການທູດຂັ້ນສູງທ່່ານໜຶ່ງຂອງ ອິດສະຣາແອນ ຍັງໃຫ້ຮູ້ວ່າ ອິດສະຣາແອນ ໄດ້ກຽມພ້ອມໃຫ້ກໍລະນີ ຮາມາດ ລ່ວງລະເມີດຄຳສັ່ງຢຸດຍິງ ແລະ ກ່າວເຕືອນໃຫ້ຊາວ ອິດສະຣາແອນລະວັງຕົວ.
ຄວາມຈິງໄດ້ສະແດງໃຫ້ເຫັນວ່າ ສັນຍາຢຸດຍິງສະບັບໃໝ່ຄັ້ງນີ້ ກໍແມ່ນໝາກຜົນຂອງກຳລັງດັນຈາກ ປະຊາຄົມໂລກ, ຫາກບໍ່ແມ່ນເລີ່ມມາຈາກຄວາມເປັນເຈົ້າການຂອງທັງ ອິດສະຣາແອນ ແລະ ຮາມາດ. ດັ່ງນັ້ນ, ວົງການນັກໄຈ້ແຍກຖືວ່າ ນັບທັງຂະນະທີ່ການປະທະກັນຜ່ອນຄ່າຍລົງແລ້ວນັ້ນ, ແງ່ຫວັງສັນຕິພາບຢູ່ເຂດກາຊາກໍຍັງຄົງບໍ່ແນ່ນອນ.