(vovworld) - ນັບແຕ່ເມື່ອທ່ານ Donald Trump ຮັບດຳລົງຕຳແໜ່ງເປັນປະທານາທິບໍດີ ອາເມລິກາ ຢ່າງເປັນທາງການນັ້ນ, ວົງການນັກສັງເກດການໄດ້ເຊື່ອໝັ້ນວ່າ: ການພົວພັນ ອາເມລິກາ - ຈີນ ຈະມີການຜັນແປຫຼາຍຢ່າງໃນອະນາຄົດໃກ້ໆນີ້, ພິເສດແມ່ນໃນຂົງເຂດເສດຖະກິດ, ການຄ້າ ແລະ ການລົງທຶນ. ບົດຂຽນຂອງບັນນາທິການ ແອ໋ງຮ່ວຽນ ດ້ວຍຫົວຂໍ້ວ່າ: “ແງ່ຫວັງຮ່ວມມືດ້ານເສດຖະກິດ ອາເມລິກາ - ຈີນ ໃນອາຍຸການຂອງປະທານາທິບໍດີ Donald Trumph”.
ພາບປະກອບ
|
ປະຈຸບັນ, ການພົວພັນລະຫວ່າງ ອາເມລິກາ - ຈີນ ແມ່ນການພົວພັນສຳຄັນທີ່ສຸດສຳລັບ 2 ປະເທດ ກໍ່ຄືໃນເວທີປາໄສໂລກ. ນີ້ແມ່ນ 2 ພື້ນຖານເສດຖະກິດໃຫຍ່ທີ່ສຸດ ແລະ ທີສອງໃນໂລກ, ແຕ່ຍາມໃດກໍ່ຊ້ອນແຝງບັນດາຄວາມຂັດແຍ້ງ ແລະ ຄວາມບໍ່ລົງລອຍກັນຍ້ອນຜົນປະໂຫຍດຂອງແຕ່ລະປະເທດ. ຍ້ອນແນວທາງ, ແຜນນະໂຍບາຍ, ນະໂຍບາຍຂອງພັກສາທາລະນະຕ່າງກັບພັກປະຊາທິປະໄຕ, ດັ່ງນັ້ນ, ບັນດານັກໄຈ້ແຍກ, ນັກວິຈານສາກົນລ້ວນແຕ່ຖືວ່າ ບັນດາຜະລິດຕະພັນກ່ຽວກັບການພົວພັນຕ່າງປະເທດພາຍໃຕ້ອຳນາດການປົກຄອງຂອງທ່ານປະທານາທິບໍດີ Barack Obama, ໃນນັ້ນມີການພົວພັນ ອາເມລິກາ - ຈີນ, ຈະມີການປັບປຸງໂດຍພື້ນຖານໃນໄລຍະຈະມາເຖິງຢ່າງແນ່ນອນ.
ບັນດາສິ່ງຍັງຄົງຄ້າງໃນການພົວພັນການຄ້າອາເມລິກາ - ຈີນ
ໄປຄຽງຄູ່ກັບບັນດາສິ່ງທີ່ຍັງຄົງຄ້າງລະຫວ່າງ 2 ປະເທດ ຄືການພົວພັນລະຫວ່າງປະເທດໃຫຍ່ແບບໃໝ່, ຍຸດທະສາດສ້າງຄວາມດຸ່ນດ່ຽງຢູ່ ອາຊີ ຄືນໃໝ່, ໃນນັ້ນ, ອາເມລິກາ ອອກແຮງຄວບຄຸມ ຈີນ ຢູ່ ທະເລຕາເວັນອອກ, ທະເລຮວາຕູງ ແລະ ປາຊີຟິກ ຕາເວັນຕົກ, ບັນຫາໄຕຫວັນ…, ນັ້ນຍັງມີບັນຫາທີ່ຄົງຄ້າງໃນການພົວພັນລະຫວ່າງ 2 ປະເທດປະຈຸບັນນີ້ແມ່ນການຂາດຄວາມດຸ່ນດ່ຽງໃນດຸ່ນການຄ້າ. ລາຄາສົ່ງອອກລະຫວ່າງ 2 ປະເທດໃນຊຸມປີມໍ່ໆມານີ້ມີຄວາມແຕກຕ່າງກັນຫຼາຍ. ໃນຂະນະທີ່ ອາເມລິກາ ນຳໃຊ້ອັດຕາພາສີນຳເຂົ້າແມ່ນ 2 – 3% ນັ້ນ, ພາສີນຳເຂົ້າຂອງຈີນ ແມ່ນ 3 – 9%. ຕາມທັດສະນະຂອງ ອາເມລິກາ ແລ້ວ, ເຖິງວ່າດ້ວຍຖານະເປັນສະມາຊິກຂອງອົງການການຄ້າໂລກ (WTO) ກໍ່ຕາມ, ແຕ່ ຈີນ ບໍ່ປະຕິບັດຕາມບັນດາຫຼັກການການຄ້າຂອງ WTO, ສິ່ງດັ່ງກ່າວໄດ້ສົ່ງຜົນສະທ້ອນບໍ່ດີເຖິງການຄ້າຂອງ ອາເມລິກາ. ໄລ່ຮອດຈຸດເວລາກ່ອນທີ່ທ່ານ Obama ອອກຈາກທຳນຽບຂາວ, ການພົວພັນດ້ານການຄ້າຂອງ 2 ປະເທດໄດ້ຮັບການຕີລາຄາຢູ່ໃນລະດັບຕ່ຳສຸດໃນ 15 ປີຜ່ານມາ.
ດັ່ງນັ້ນ, ນັບແຕ່ເມື່ອຮັບດຳລົງຕຳແໜ່ງ, ທ່ານ Trump ໄດ້ມີບັນດາຄຳເຫັນທີ່ແຂງກະດ້າງກ່ຽວຂ້ອງເຖິງບັນຫານີ້. ໃນວັນທຳອິດທີ່ດຳລົງຕຳແໜ່ງເປັນປະທານາທິບໍດີນັ້ນ, ທ່ານໄດ້ຊີ້ນຳກະຊວງການເງິນ ອາເມລິກາ ນຳ ຈີນ ເຂົ້າບັນຊີລາຍຊື່ບັນດາປະເທດຄອບງຳເງິນຕາເພື່ອມີມາດຕະການລົງໂທດ. ທ່ານຖືວ່າ, ປະຈຸບັນ ເງິນຢວນ ຖືກກຳນົດລາຄາຕ່ຳກ່ວາມຸນຄ່າປະມານ 20 – 45% ເພື່ອໃຫ້ ສິນຄ້າ ຈີນ ມີທ່າແກ່ງແຍ້ງສູງກ່ວາ. ດັ່ງນັ້ນ, ຖ້າຫາກ ຈີນ ບໍ່ປ່ຽນແປງການປະພຶດນັ້ນ, ທ່ານຈະຈັດວາງອັດຕາພາສີແມ່ນ 45% ສຳລັບສິນຄ້ານຳເຂົ້າຈາກ ຈີນ. ນອກຈາກນັ້ນ, ທ່ານ Trump ຍັງຖືວ່າ ບັນດາຄວາມຜິດພາດໃຫຍ່ສຸດຂອງ ອາເມລິກາ ໃນກ່ວາ 100 ປີຜ່ານມາແມ່ນເຫັນດີໃຫ້ ຈີນ ເຂົ້າເປັນສະມາຊິກ WTO. 10 ປີກ່ວາທີ່ຜ່ານມາ, ນັບແຕ່ເມື່ອເຂົ້າເປັນສະມາຊິກ WTO ນັ້ນ, ຈີນ ໄດ້ “ຍືດເອົາ” ວິສາຫະກິດກ່ວາ 70.000 ແຫ່ງຂອງ ອາເມລິກາ, ດັ່ງນັ້ນ, ປະທານາທິບໍດີຄົນໃໝ່ ຈະດຳເນີນບັນດາມາດຕະການແຂງກະດ້າງ.
ທ່າທີເຄັ່ງຮ້ອນຂອງທ່ານ Trump ບໍ່ແມ່ນວ່າບໍ່ມີພື້ນຖານ. ຈີນ ນັບມື້ນັບສະແດງໃຫ້ເຫັນວ່າ ບໍ່ມີຄວາມສະໜິດສະໜົມກັບບັນດາວິສາຫະກິດຕ່າງປະເທດເວົ້າລວມ ແລະ ວິສາຫະກິດ ອາເມລິກາ ເວົ້າສະເພາະ, ສ່ວນໜຶ່ງແມ່ນຍ້ອນ ປັກກິ່ງ ເລີ່ມຜັນຂະຫຍາຍຍຸດທະສາດທ້ອນໂຮມວິສາຫະກິດຕ່າງປະເທດ. ບັນດາບໍລິສັດຂອງຈີນ, ດ້ວຍການອຸປະຖຳຂອງລັດຖະບານ, ພວມຜັນຂະຫຍາຍບັນດາການທ້ອນໂຮມວິສາຫະກິດຕ່າງປະເທດໃນບັນດາຂົງເຂດເສດຖະກິດເຊິ່ງ ປັກກິ່ງ ໄດ້ກຳນົດວ່າແມ່ນ “ກຸນແຈ” ໃນຍຸດທະສາດຫັນອຸດສາຫະກຳເປັນທັນສະໄໝທີ່ມີຊື່ວ່າ “Made in China 2025”, ທີ່ໄດ້ກໍ່ຄວາມວິຕົກວັງວົນຫຼາຍຢ່າງໃນເວທີການເມືອງ ອາເມລິກາ.
ແງ່ຫວັງບໍ່ແຈ້ງປານໃດໃນຮູບພາບເສດຖະກິດອາເມລິກາ - ຈີນ
ອາດເຫັນໄດ້ວ່າ, ນັບແຕ່ກ່ອນມາຮອດປະຈຸບັນ, ການພົວພັນລະຫວ່າງ ອາເມລິກາ - ຈີນ ຍັງຄົງກ່ຽວຂ້ອງເຖິງຮູບແບບພື້ນຖານ, ນັ້ນແມ່ນ “ຮ່ວມມືເພື່ອຕໍ່ສູ້, ຕໍ່ສູ້ເພື່ອຮ່ວມມື“. ວົງການນັກສັງເກດການຖືວ່າຮູບແບບນີ້ຍັງຄົງສືບຕໍ່ໃນສະໄໝອຳນາດການປົກຄອງຂອງທ່ານ Trump ຢູ່. ເຖິງຢ່າງໃດກໍ່ຕາມ, ໂດຍແມ່ນນັກທຸລະກິດຜູ້ໜຶ່ງ, ທ່ານ Trump ຈະໃຫ້ບຸລິມາສິດແກ່ບັນດາຜົນປະໂຫຍດດ້ານເສດຖະກິດສູງກວ່າຢ່າງແນ່ນອນ. ຄາດວ່າ, ການຂັດແຍ້ງດ້ານການຄ້າລະຫວ່າງ ອາເມລິກາ ແລະ ຈີນ ຈະເພີ່ມຂຶ້ນພາຍໃຕ້ອຳນາດການປົກຄອງຂອງທ່ານ Trump, ຖ້າຫາກວ່າສອງຝ່າຍບໍ່ກຽມພ້ອມຜ່ອນສັ້ນຜ່ອນຍາວ ແລະ ເຈລະຈານຳກັນ. ແຕ່ເພື່ອນຳໃຊ້ບັນດາມາດຕະການທີ່ຂັນແຂງກັບຈີນໃນຂົງເຂດການຄ້າໃຫ້ໄດ້ນັ້ນ ກໍ່ບໍ່ແມ່ນເລື່ອງງ່າຍ ແລະ ທ່ານ Trump ຈະຕ້ອງມີການຄິດໄລ່ຊັ່ງຊາ. ການນາບຂູ່ຈັດວາງອັດຕາພາສີແມ່ນ 45% ສຳຫຼັບສິນຄ້ານຳເຂົ້າຈາກ ຈີນ ຈະປະຕິບັດຍາກ, ເພາະວ່າກ່ອນອື່ນໝົດມັນຈະພາໄປເຖິງການຊຸກຍູ້ບັນດາມາດຕະການໂຕ້ຕອບຈາກຈີນ, ເຮັດໃຫ້ຫຼາຍຂະແໜງອຸດສາຫະກຳ ອາເມລິກາ ຖືກເສຍຫາຍ. ຄວາມຈິງແລ້ວ, ປັກກິງເຄີຍກ່າວເຕືອນກ່ຽວກັບເລື່ອງ ຈີນຈະຍົກເລີກສັນຍາຊີ້ເຮືອບິນ Boeing, ເກືອດຫ້າມນຳເຂົ້າ iphone, ສາລີ ແລະ ໝາກຖົ່ວເຫຼືອງຈາກ ອາເມລິກາ, ຖ້າຫາກທ່ານ Trump ປຸກລະດົມສົງຄາມດ້ານການຄ້າກັບ ຈີນ. ແຕ່ບັນຫາຕ້ອງເວົ້າເຖິງນັ້ນແມ່ນ, ສິນຄ້າຂອງຈີນທີ່ສົ່ງອອກ ອາເມລິກາ ຄື: ເຄື່ອງເອເລກໂຕນິກ, ເຄື່ອງຕຳແຜ່ນຕັດຫຍິບ… ສ່ວນຫຼາຍແມ່ນສິນຄ້າທີ່ ອາເມລິກາ ບໍ່ຜະລິດອີກ ຫຼືແມ່ນສິນຄ້າໂດຍວິສາຫະກິດ ອາເມລິກາ ຜະລິດຢູ່ ຈີນ. ເລື່ອງຈັດວາງອັດຕາພາສີສູງ ຈະກໍ່ຄວາມເສຍຫາຍເຖິງຜູ້ບໍລິໂພກ, ອຸປະໂພກ ອາເມລິກາ.
ນັບແຕ່ກ່ອນມາຮອດປະຈຸບັນ, ຍາມໃດ ປັກກິງ ກໍ່ສະແດງໃຫ້ເຫັນຄວາມແຂງກ້າຕໍ່ໜ້າຄວາມດັນຈາກພາຍນອກ. ສ່ວນທ່ານ Trump ພັດຢາກເຮັດໃຫ້ຜູ້ມີສິດເລືອກຕັ້ງ ອາເມລິກາ ເຫັນໄດ້ວ່າ, ທ່ານແມ່ນຄົນທີ່ແຂງກ້າກວ່າປະທານາທິບໍດີອາຍຸການກ່ອນ. ຍ້ອນເຫດນັ້ນ, ການພົວພັນດ້ານເສດຖະກິດ - ການຄ້າລະຫວ່າງ ອາເມລິກາ - ຈີນ ໃນໄລຍະຈະມາເຖິງບາງເທື່ອຈະມີການຜັນແປ ແລະ ສົ່ງຜົນສະທ້ອນບໍ່ແມ່ນໜ້ອຍເຖິງພື້ນຖານເສດຖະກິດທົ່ວໂລກ.