ການພົວພັນລະຫວ່າງຫວຽດນາມ-ສະຫະພາບເອີລົບ (EU) ໄດ້ ແລະ ພວມໄດ້ຮັບການພັດທະນາຢ່າງຕັ້ງໜ້າ ແລະ ຮອບດ້ານ ຊື່ງສະແດງອອກຢູ່ບ່ອນວ່າ: ສອງຝ່າຍໄດ້ປະຕິບັດແຜນການຜັນຂະຫຍາຍສັນຍາຄູ່ຮ່ວມມື ແລະ ການຮ່ວມມືຮອບດ້ານຫວຽດນາມ-ອີຢູ (PCA)ໄລຍະ 2011-2012 ຢ່າງມີປະສິດທິຜົນ ແລະ ຫາກໍ່ປະກາດເລີ່ມຕົ້ນແຜນການພັດທະນາ PCA ໄລຍະ 2011-2014 ຢູ່ກອງປະຊຸມສຳມະນາ ”ລາຍການໂອ້ລົມສົນທະນາຍຸດທະສາດໜູນຊ່ວຍການປະຕິບັດ PCA” ຊື່ງດຳເນີນໄປຢູ່ຮ່າໂນ້ຍ ໃນວັນທີ 4/6. ເນື່ອງໃນເຫດການໃໝ່ສຸດໃນການການພົວພັນສອງຝ່າຍນີ້, ນັກຂ່າວເລເຟືອງມີບົດຂຽນດ້ວຍຫົວຂໍ້ວ່າ: ແງ່ຫວັງແຫ່ງການຮ່ວມມືລະຫວ່າງຫວຽດນາມ-ອີຢູ ສັງເກດຈາກສັນຍາ PCA.
ບາດກ້າວໃໝ່ໃນການພົວພັນຫວຽດນາມ-ອີຢູ
(ພາບ: vietbao.vn)
ນັບແຕ່ໄດ້ສ້າງຕັ້ງສາຍພົວພັນທາງການທູດເມື່ອປີ 1990, ແລະ ໄດ້ເຊັນສັນຍາແມ່ກ່ຽວກັບການຮ່ວມມືໃນປີ 1995 ແລະ ພິເສດ ພາຍຫຼັງການເຊັນສັນຍາ ຄູ່ຮ່ວມມື ແລະ ການຮ່ວມມືຮອບດ້ານຫວຽດນາມ-ອີຢູ (PCA) ເມື່ອວັນທີ 27/6/2012 ຢູ່ບຣຸກແຊນ ປະເທດແບນຊິກ, ການພົວພັນລະຫວ່າງຫວຽດນາມ ແລະ ບັນດາສະມາຊິກອີຢູ ໄດ້ ແລະ ພວມພັດທະນາຢ່າງແຮງ ແລະ ຮອບດ້ານທີ່ສຸດ. ກ່ຽວກັບການພົວພັນນີ້, ທ່ານອະດີດຮອງນາຍົກລັດຖະມົນຕີຫວຽດນາມ ຫວູ໋ຄວານ ຖືວ່າ:
”ການພົວພັນລະຫວ່າງຫວຽດນາມ-ອີຢູ ເວົ້າລວມ ແລະ ການພົວພັນດ້ານການຄ້າເວົ້າສະເພາະ ມີບັນດາຈຸດພິເສດສະເພາະຄື: ມີຄວາມຄຶບໜ້າ, ມີຂອບຂະໜາດໃຫ່ຍ, ມີຄຸນນະພາບສູງ, ມີຂອບເຂດກ້ວາງຂວາງ, ມີພື້ນຖານນິຕິກຳໝັ້ນຄົງ, ຖືກຕ້ອງກັບຄວາມຮຽກຮ້ອງຕ້ອງການ ແລະ ຈຸດໝາຍຂອງຫວຽດນາມ. ການພົວພັນລະຫວ່າງຫວຽດນາມ-ອີຢູ ມີທີ່ຕັ້ງພິເສດ, ຢືນອັນດັບໜຶ່ງໃນການພົວພັນລະຫວ່າງຫວຽດນາມ ກັບຄູ່ຮ່ວມມືອື່ນໆ”
ກອງປະຊຸມສຳມະນາ ”ລາຍການໂອ້ລົມສົນທະນາ
ຍຸດທະສາດໜູນຊ່ວຍການປະຕິບັດ PCA”
(ພາບ: dbv.vn)
ປະຈຸບັນ, ອີຢູ ແມ່ນໜຶ່ງໃນບັນດາຄູ່ຮ່ວມມືສຳຄັນອັນດັບໜຶ່ງຂອງຫວຽດນາມ ໃນຫຼາຍຂົງເຂດ, ຈາກດ້ານການເມືອງ-ການທູດ, ການຮ່ວມມືພັດທະນາ, ການຄ້າ-ການລົງທຶນ, ວິທະຍາສາດ-ເຕັກໂນໂລຊີ ຕະຫຼອດຮອດການຮັບມືກັບບັນດາສິ່ງທ້າທາຍໃນທົ່ວໂລກ. ຍາມໃດ, ການນຳຫວຽດນາມ ແລະ ອີຢູ ກໍ່ຢືນຢັນເຖິງຄວາມສຳຄັນຂອງການພົວພັນລະຫວ່າງຫວຽດນາມ-ອີຢູ ແລະ ປາດຖະໜາວ່າການພົວພັນນີ້ຈະໄດ້ ຮັບການເພີ່ມທະວີກ່ວາອີກ ເພື່ອສົມກັບຄວາມສາມາດບົ່ມຊ້ອນ ແລະ ທີ່ຕັ້ງບົດບາດຂອງສອງຝ່າຍ. ກ່າວຄຳເຫັນທີ່ກອງປະຊຸມສຳມະນາ ”ລາຍການໂອ້ລົມສົນທະນາຍຸດທະສາດໜູນຊ່ວຍການປະຕິບັດ ສັນຍາຄູ່ຮ່ວມມື ແລະ ການຮ່ວມມືຮອບດ້ານຫວຽດນາມ-ອີຢູ” ຈັດຂຶ້ນໃນວັນທີ 4/6 ຢູ່ຮ່າໂນ້ຍ, ທ່ານ Franz Jessen ຫົວໜ້າຄະນະຜູ້ຕາງໜ້າອີຢູ ປະຈຳຫວຽດນາມ ຊີ້ແຈ້ງວ່າ:
”ຫວຽດນາມ ມີບົດບາດສຳຄັນ ແລະ ຕັ້ງໜ້າ ສຳລັບອີຢູ. ພວກຂ້າພະເຈົ້າຊົມເຊີຍ ແລະ ມີຄວາມສົນໃຈຕໍ່ຄຳໝັ້ນສັນຍາຂອງໃນການ ຮັບຜິດຊອບໜ້າທີ່ສາກົນຫຼາຍກ່ວາອີກ ແລະ ປາດຖະໜາຢາກສືບຕໍ່ມີການເຈລະຈາ, ຮ່ວມມືກັບຫວຽດນາມ ຢູ່ບັນດາເວທີປາໄສສາກົນ. ຫວຽດນາມ ນອນໃນຈຸດສຸມຂອງການຜັນແປ່ຍຸດທະສາດຕ່າງໆທີ່ພວມດຳເນີນຢູ່ອາຊີ. ພວກຂ້າພະເຈົ້າປາດຖະໜາຢາກສືບຕໍ່ຮ່ວມມືກັບຫວຽດນາມ ຊື່ງປະຈຸບັນພວມແມ່ນປະເທດປະສານງານການພົວພັນລະຫວ່າງຫວຽດນາມ-ອີຢູ ໃນ 3 ປີຂ້າງໜ້າ”.
ການພົວພັນດ້ານການຄ້າສອງສົ້ນລະຫວ່າງຫວຽດນາມ-ອີຢູ ກໍ່ມີການເຕີບໂຕທີ່ໜ້າປະທັບໃຈ. ໃນສະພາບການທີ່ວິກິດການເສດຖະກິດ, ການຄ້າສອງສົ້ນປີ 2012 ບັນລຸ 29,09 ຕື້ໂດລາສະຫະລັດ, ເພີ່ມຂຶ້ນເກືອບ 20% ເມື່ອທຽບໃສ່ປີ 2011. ອີຢູ ກາຍເປັນຕະຫຼາດສົ່ງອອກໃຫ່ຍກ່ວາໝູ່ຂອງຫວຽດນາມ ແລະ ແມ່ນຕະຫຼາດໃຫ່ຍໃຫ້ສຳລັບປະເພດສິນຄ້າສົ່ງອອກຕົ້ນຕໍຂອງຫວຽດນາມ ຄື: ເກີບ, ເຄື່ອງຕຳ່ແຜ່ນຕັດຫຍິບ, ສິນໃນນ້ຳ, ເຄື່ອງເຟີນີເຈີ, ເອເລກໂຕນິກ, ເຄື່ອງໃຊ້ສອຍ…ໄລ່ສະເພາະໃນ 2 ເດືອນຕົ້ນປີ 2013, ວົງເງິນສົ່ງອອກນຳເຂົ້າຫວຽດນາມ-ອີຢູ ບັນລຸກ່ວາ 5 ຕື້ໂດລາສະຫະລັດ, ເພີ່ມຂຶ້ນ 28%. ໃນຕໍ່ໜ້າ, ອີຢູ ຈະສະຫງວນໃຫ້ຫວຽດນາມ ບ້ວງເງິນໜູນຊ່ວຍທີ່ມີຍອດມູນຄ່າກ່ວາ 15 ລ້ານເອີໂຣ ເພື່ອຜັນຂະຫຍາຍການເຄືອ່ນໄຫວເສດຖະກິດ, ການຄ້າ, ການລົງທຶນ…ຊື່ງໄດ້ລະບຸໃນສັນຍາ PCA. ທ່ານ Franz Jessen ຫົວໜ້າຄະນະຜູ້ຕາງໜ້າອີຢູ ປະຈຳຫວຽດນາມ ຖືວ່າ:
”ເສດຖະກິດຫວຽດນາມ ແລະ ອີຢູ ມີລັກສະນະເພີ່ມເຕີມສູງ, ພວກເຮົາຕອ້ງອີງຕາມຄວາມແຕກຕ່າງກັນກ່ຽວກັບໂຄງປະກອບຂອງສອງພື້ນຖານເສດຖະກິດ ເພື່ອແນໃສ່ເພີ່ມທະວີການພົວພັນດ້ານເສດຖະກິດກ່ວາອີກ. ນີ້ແມ່ນສາຍເຫດທີ່ພວກຂ້າພະເຈົ້າຢາກເພີ່ມເຕີມບັນດາຫຼັກການກ່ຽວຂ້ອງເຖິງການຄ້າ ແລະ ການລົງທຶນເຂົ້າສັນຍາ PCA ໂດຍໄວ ຍ້ອນສັນຍາ FTA ລະຫວ່າງຫວຽດນາມ-ອີຢູ. ສັນຍາ FTA ແລະ PCA ຈະຊ່ວຍນຳການແລກປ່ຽນດ້ານການຄ້າສອງສົ້ນ, ການລົງທຶນ ແລະ ການພົວພັນສອງຝ່າຍຂຶ້ນສູ່ລະດັບສູງໃໝ່”.
ພ້ອມກັນນັ້ນ, ອີຢູ ກໍ່ໄດ້ສ້າງລາຍການຄູ່ຮ່ວມມືດ້ານຕຸລະການ, ສະຫງວນບ້ວງເງິນໃຊ້ຈ່າຍກ່ວາ 18 ລ້ານເອີໂຣ ເພື່ອໜູນຊ່ວຍຫວຽດນາມຜັນຂະຫຍາຍ PCA ໃນຂົງເຂດກົດໝາຍ, ຕຸລາການ..
ບັນດາຂໍ້ຕົກລົງໃນ PCA ແມ່ນປະຖົມປັດໄຈສຳຄັນເພື່ອໃຫ້ສອງຝ່າຍສ້າງບັນດາກົນໄກຮ່ວມມືລະອຽດ, ປະກອບສ່ວນເປີດກ້ວາງການພົວພັນຮ່ວມມືລະຫວ່າງຫວຽດນາມ ແລະ ອີຢູ ໃນໄລຍະຈະມາເຖິງຕາມທິດ ”ການພົວພັນຄູ່ຮ່ວມມືສະເໝີພາບ, ຮ່ວມມືຮອບດ້ານ ແລະ ຍາວນານ ເພື່ອສັນຕິພາບ ແລະ ການພັດທະນາຂອງພາກພື້ນ ແລະ ໂລກ”. ຄວາມມານະພະຍາຍາມຈາກສອງຝ່າຍ ເພື່ອຜັນຂະຫຍາຍສັນຍາດັ່ງກ່າວ ໃນ ປະຈຸບັນ ຈະເປີດບັນດາແງ່ຫວັງໃໝ່ໃນການພົວພັນຮ່ວມມືລະຫວ່າງຫວຽດນາມ-ອີຢູ./.