(vovworld)- ວັນບຸນມະຫາສາມັກຄີທົ່ວປວງຊົນທັງຊາດຫວຽດນາມ (18/11) ດ້ວຍການເຄື່ອນໄຫວຫລາຍຢ່າງທີ່ມີຄວາມໝາຍ ພວມດຳເນີນຢູ່ບັນດາເຂດແຄ້ວນຂອງປະເທດຊາດ. ນີ້ແມ່ນໂອກາດເພື່ອໃຫ້ປະຊາຊົນຢັ້ງຢືນຄວາມສຳຄັນ, ຄວາມເອກອ້າງທະນົງໃຈຕໍ່ມູນເຊື້ອມະຫາສາມັກຄີ, ນ້ຳໃຈຮັກຊາດ ແລະ ບັນດາຂະບວນການມະຫາສາມັກຄີ ໂດຍແນວໂຮມປະເທດຊາດຫວຽດນາມ ປຸກລະດົມ ແລະ ຈັດຕັ້ງ. ບົດຂຽນຂອງນັກຂ່າວ ທູຮວາ ທີ່ມີຫົວຂໍ້ວ່າ: ແນວໂຮມປະເທດຊາດຫວຽດນາມສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດ
ທ່ານ ຫງວຽນທ້ຽນເຍີນ, ປະທານ ຄະນະກຳມະການສູນກາງ
ແນວໂຮມປະເທດຊາດ
ພາບ:daidoanket
|
ວັນບຸນມະຫາສາມັກຄີບັນດາເຜົ່າຢູ່ຫວຽດນາມ ປີນີ້ ກໍແມ່ນໂອກາດສະເຫລີມສະຫລອງ 85 ປີ ແຫ່ງວັນມູນເຊື້ອຂອງແນວໂຮມປະເທດຊາດ ຫວຽດນາມ. ນັບແຕ່ປີ 1941 ມາຮອດປະຈຸບັນ, ແນວໂຮມປະເທດຊາດ ຍາມໃດກໍສະແດງໃຫ້ເຫັນບົດບາດສຳຄັນ, ຄວາມສາມັກຄີ ແລະ ເຕົ້າໂຮມກຳລັງແຮງ, ນ້ຳໃຈຮັກຊາດຂອງທົ່ວປວງຊົນທັງຊາດເພື່ອປະຕິບັດຈຸດໝາຍປົດປ່ອຍຊາດ, ສ້າງສາ ແລະ ພັດທະນາປະເທດຊາດ.
ຕິດຕາມກວດກາ ແລະ ໄຈ້ແຍກຕີລາຄາສັງຄົມ
ແນວໂຮມປະເທດຊາດ ຫວຽດນາມ ມີທີ່ຕັ້ງບົດບາດສຳຄັນ ແມ່ນຂົວຕໍ່ລະຫວ່າງພັກ, ລັດ ກັບປະຊາຊົນ. ໃນບົດບາດເປັນຂົວຕໍ່ນັ້ນ, ຄຽງຄູ່ກັບຂໍ້ມູນຂ່າວສານ 2 ສົ້ນ, ການຕິດຕາມກວດກາ ແລະ ໄຈ້ແຍກຕີລາຄາສັງຄົມ ແມ່ນເນື້ອໃນ ຊື່ງແນວໂຮມປະເທດຊາດ ໄດ້ປະຕິບັດ ແລະ ປະຈຸບັນ ນັບມື້ນັບປະຕິບັດຫລາຍກວ່າ. ທ່ານ ຫງວຽນທ້ຽນເຍີນ, ປະທານ ຄະນະກຳມະການສູນກາງ ແນວໂຮມປະເທດຊາດ ຫວຽດນາມ ໃຫ້ຮູ້ວ່າ:
“ການຕິດຕາມກວດກາໝາຍຄວາມວ່າ ແມ່ນຕິດຕາມກວດກາເລື່ອງປະຕິບັດຕາມກົດໝາຍຂອງລັດ, ຂໍ້ກຳນົດຂອງພັກ, ທ້ອງຖິ່ນ ຄືແນວໃດ. ເພື່ອຮັບປະກັນໃຫ້ບັນດາອົງການ ແລະ ປະຊາຊົນປະຕິບັດຕາມກົດໝາຍ ແນວໂຮມປະເທດຊາດແມ່ນອົງການຕິດຕາມກວດກາ. ການຕິດຕາມກວດກາແມ່ນປະຕິບັດຕາມຫົວເລື່ອງ ແລະ ມີໂຄງການປະສານສົມທົບ. ແລະ ພາຍຫລັງດຳເນີນການຕິດຕາມກວດກາ, ໝາກຜົນທີ່ໄດ້ຮັບຕ້ອງຖືກອຳນາດການປົກຄອງຮັບຟັງ ແລະ ຕ້ອງມີຄຳຕອບຕາມຂໍ້ກຳນົດຂອງກົດໝາຍ.”
ນັບແຕ່ຕົ້ນປີ 2014 ມາຮອດປະຈຸບັນ, ປະຕິບັດລັດຖະທຳມະນູນປີ 2013, ສູນກາງ ແນວໂຮມປະເທດຊາດ ຫວຽດນາມ ໄດ້ສົມທົບກັບບັນດາອົງການສະມາຊິກ, ບັນດາກະຊວງຂະແຫນງການສູນກາງ ຜັນຂະຫຍາຍ 8 ໂຄງການຕິດຕາມກວດກາການປະຕິບັດປະກັນສຸຂະພາບ, ປະກັນສັງຄົມຢູ່ບັນດາວິສາຫະກິດ, ການປະຕິບັດຕາມກົດໝາຍໃນການສະຫນອງ ອຸປະກອນກະສິກຳໃຫ້ຊາວກະສິກອນ, ການປະຕິບັດຕາມກົດໝາຍຢູ່ບັນດາຮາກຖານສາທາລະນະສຸກເອກະຊົນ, ແກ້ໄຂການຮ້ອງທຸກຮ້ອງຟ້ອງຂອງປະຊາຊົນ, ຂະແຫນງສ່ວຍສາອາກອນ ແລະ ພາສີ ປະຕິຮູບລະບຽບການບໍລິຫານ ເພື່ອເຊື່ອມໂຍງ, ຫລຸດຜ່ອນເວລາ, ຍົກສູງຄຸນນະພາບການຮັບໃຊ້ວິສາຫະກິດ, ການປະຕິບັດກົດໝາຍວ່າດ້ວຍວິທະຍາສາດເຕັກໂນໂລຊີ ແລະ ມະຕິສູນກາງພັກຊຸດທີ 11 ກ່ຽວກັບການພັດທະນາວິທະຍາສາດເຕັກໂນໂລຊີ, ຕີລາຄາຄວາມພຶງພໍໃຈຂອງປະຊາຊົນກັບ 6 ການບໍລິການຂອງລັດຢູ່ 20 ແຂວງ, ນະຄອນໃນທົ່ວປະເທດ. ຕໍ່ຈາກນັ້ນ, ໃນປີ ສູນກາງແນວໂຮມປະເທດຊາດ ຫວຽດນາມຈັດຕັ້ງການຕິດຕາມກວດກາຄວາມປອດໄພຫລັກອະນາໄມສະບຽງອາຫານ ພ້ອມທັງສືບຕໍ່ຕິດຕາມກວດກາການຕີລາຄາຄວາມພຶງພໍໃຈຂອງປະຊາຊົນ ແລະ ຖືວ່າ ນີ້ແມ່ນພື້ນຖານສຳຄັນ ເພື່ອຕີລາຄາຄຸນນະພາບປະສິດທິຜົນການຮັບໃຊ້ຂອງພາກສ່ວນຫນຶ່ງຂອງກົງຈັກອຳນາດການປົກຄອງທຸກຂັ້ນ.
ຈັດຕັ້ງການແຂ່ງຂັນຮັກຊາດ, ສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດ
ເສີມຂະຫຍາຍຈິດໃຈຫົວຄິດປະດິດສ້າງ ແລະ ການຄຸ້ມຄອງດ້ວຍຕົນເອງຂອງປະຊາຊົນ, ໃນໄລຍະສິບປີຜ່ານມາ, ແນວໂຮມປະເທດຊາດຫວຽດນາມ ໄດ້ຜັນຂະຫຍາຍການຂົນຂວາຍ, ຂະບວນການແຂ່ງຂັນຮັກຊາດໃນທົ່ວປວງຊົນ, ຮອບດ້ານ ແລະ ມີພະລັງຊີວິດຍາວນານເປັນຫລາຍຄັ້ງ. ແນວໂຮມປະເທດຊາດ ໄດ້ເຕົ້າໂຮມປະຊາຊົນຜ່ານການຂົນຂວາຍ “ທົ່ວປວງຊົນສາມັກຄີສ້າງຊີວິດວັດທະນະທຳຢູ່ເຂດຊຸມຊົນ”, “ຊາວຫວຽດນາມ ບຸລິມະສິດຊົມໃຊ້ສິນຄ້າຫວຽດນາມ”, “ວັນເພື່ອຄົນທຸກຍາກ”. ຈາກໝາກຜົນຂອງບັນດາບັ້ນຂົນຂວາຍດັ່ງກ່າວ, ແນວໂຮມປະເທດຊາດ ສືບຕໍ່ຈັດຕັ້ງປະຕິບັດບັນດາບັ້ນຂົນຂວາຍຢ່າງມີປະສິດທິຜົນກວ່າ. ສິ່ງດັ່ງກ່າວເພື່ອເສີມຂະຫຍາຍນ້ຳໃຈຮັກຊາດ ແລະ ມູນເຊື້ອມະຫາສາມັກຄີທົ່ວປວງຊົນທັງຊາດກວ່າອີກ ໃນສະພາບປະເທດຊາດພວມເຊື່ອມໂຍງຢ່າງແຮງໃນພາກພື້ນ ແລະ ສາກົນ. ທ່ານ ຫງວຽນທ້ຽນເຍີນ, ປະທານຄະນະກຳມະການສູນກາງ ແນວໂຮມປະເທດຊາດ ຫວຽດນາມ ຊີ້ແຈ້ງວ່າ:
“ບົນພື້ນຖານສະຫລຸບບັ້ນຂົນຂວາຍ “ທົ່ວປວງຊົນສາມັກຄີ ສ້າງຊີວິດທາງດ້ານວັດທະນະທຳຢູ່ເຂດຊຸມຊົນ” ແລະ ການເຂົ້າຮ່ວມຂອງ ແນວໂຮມປະເທດຊາດ ເຂົ້າໃນການກໍ່ສ້າງຊົນນະບົດໃຫມ່, ເຂດຕົວເມືອງສີວິໄລ, ນັບແຕ່ປີ 2016 ເປັນຕົ້ນໄປ, ແນວໂຮມປະເທດຊາດ ສືບຕໍ່ປະຕິບັດບັ້ນຂົນຂວາຍໃຫມ່ “ທົ່ວປວງຊົນສາມັກຄີ ກໍ່ສ້າງຊົນນະບົດໃຫມ່, ເຂດຕົວເມືອງສີວິໄລ” ສຸມທຸກເນື້ອໃນທີ່ໄດ້ປະຕິບັດແຕ່ກອ່ນມາຮອດປະຈຸບັນກັບຂະບວນການ ຊື່ງລັດຖະບານປຸກລະດົມ ໃຫ້ກາຍເປັນບັ້ນຂົນຂວາຍໃຫມ່ເພື່ອເສີມຂະຫຍາຍໃນແຕ່ລະອົງການຈັດຕັ້ງມະຫາຊົນ, ຮັບແຕ່ລະຫນ້າທີ່, ມາດຖານລະອຽດ ໃນເຂດຊົນນະບົດໃຫມ່, ເຂດຕົວເມືອງສີວິໄລ. ນີ້ຈະແມ່ນບັ້ນຂົນຂວາຍຕົ້ນຕໍໃນໄລຍະຈະມາເຖິງ.”
ພ້ອມກັນນັ້ນ ແນວໂຮມປະເທດຊາດສືບຕໍ່ປະຕິບັດບັ້ນຂົນຂວາຍ “ຊາວຫວຽດນາມ ບຸລິມະສິດຊົມໃຊ້ສິນຄ້າ ຫວຽດນາມ” ດ້ວຍບັນດາເນື້ອໃນເໝາະສົມກັບໄລຍະປະເທດຊາດເຊື່ອມໂຍງເຂົ້າກັບສາກົນນັບມື້ນັບສູງ. ແນວໂຮມປະເທດຊາດ ກໍມຸ່ງໄປເຖິງບັນດາບັ້ນຂົນຂວາຍເສີມຂະຫຍາຍກຳລັງຄວາມສາມາດປະດິດຄິດສ້າງຂອງ ຄົນງານ ຫວຽດນາມ 55 ລ້ານຄົນ ປະຈຸບັນ, ຈຸດໝາຍແມ່ນເຮັດໃຫ້ກຳລັງຄວາມສາມາດ ປະດິດຄິດສ້າງຂອງຊາວຫວຽດນາມ ກາຍເປັນກຳລັງແຮງສຳຄັນທີ່ສຸດເພື່ອພັດທະນາ.