ລາຍການ “ເຊື່ອມຕໍ່ອ້ອມແຂນໃຫຍ່-ເພື່ອຄົນທຸກຍາກ ”
(ພາບ: baomoi.com)
ກ່ວາ 10 ປີທີ່ຜ່ານມາ, ບັ້ນຂົນຂວາຍ “ວັນເພື່ອຄົນທຸກຍາກ” ໄດ້ຮັບການຕອບສະໜອງຢ່າງສຸດໃຈຈາກທົ່ວສັງຄົມ. ໂດຍຜ່ານໂຄງການ “ເຊື່ອມຕໍ່ອ້ອມແຂນໃຫຍ່” ມາຮອດປະຈຸບັນ ທົ່ວປະເທດຂົນຂວາຍການແຜ່ບໍລິຈາກເງິນໄດ້ກ່ວາ 20.000 ຕື້ດົງ, ອັນໄດ້ຊ່ວຍຄອບຄົວທຸກຍາກນັບລ້ານຄອບຄົວມີເຮືອນຢູ່, ຜູ້ທຸກຍາກນັບລ້ານຄົນສາມາດຫຼຸດພົ້ນອອກຈາກຄວາມທຸກຍາກ, ມີກິດຈະກຳສະຫວັດດີການສັງຄົມ ຫຼາຍແຫ່ງໄດ້ຮັບການກໍ່ສ້າງແນໃສ່ຍົກສູງຊີວິດການເປັນຢູ່ໃຫ້ແກ່ປະຊາຊົນ.
ກ່ວາ 10 ປີທີ່ຜ່ານມາ, ຈາກບັ້ນຂົນຂວາຍ “ວັນເພື່ອຄົນທຸກຍາກ” ໂດຍຄະນະກຳມະການສູນກາງແນວໂຮມປະເທດຊາດຫວຽດນາມປຸກລະດົມນັ້ນ, ມີເຮືອນແຫ່ງສາຍຈິດສາຍໃຈ, ເຮືອນແຫ່ງມະຫາສາມັກຄີນັບລ້ານຫຼັງທີ່ສະຫງວນໃຫ້ແກ່ຜູ້ທຸກຍາກໄດ້ຮັບການປຸກສ້າງ, ຄອບຄົວທຸກຍາກນັບແສນຄອບຄົວ ສາມາດຫຼຸດພົ້ນອອກຈາກຄວາມທຸກຍາກດ້ວຍແຫຼ່ງທຶນໜູນຊ່ວຍໂດຍເລີ່ມຈາກນ້ຳໃຈມາດຕາປານີຂອງວົງຄະນະຍາດ. ບັ້ນຂົນຂວາຍ “ວັນເພື່ອຄົນທຸກຍາກ” ໄດ້ຮັບການສະໜັບສະໜູນຢ່າງກ້ວາງຂວາງຈາກປະຊາຊົນທຸກຊັ້ນຄົນ, ບັນດາອົງການຈັດຕັ້ງສັງຄົມ, ວິສາຫະກິດ, ນັບທັງຊາວຫວຽດນາມອາໄສຢູ່ຕ່າງປະເທດ ແລະ ອົງການຈັດຕັ້ງສາກົນ. ຈາກແຫຼ່ງກຳລັງສະໜັບສະໜູນນີ້, ຄົນທຸກຍາກໄດ້ຮັບການໜູນຊ່ວຍກ່ຽວກັບເຮືອນຢູ່, ໜູນຊ່ວຍທຳການການຜະລິດ, ພວກເດັກໄດ້ໄປໂຮງຮຽນ, ໄດ້ຮັບການປິ່ນປົວພະຍາດ, ໄດ້ຮັບຂອງຂວັນໃນຍາມບຸນປີໃໝ່ປະຈຳຊາດ ຫຼືໃນເວລາປະສົບຄວາມຫຍຸ້ງຍາກ, ຮັບເຄາະຮ້າຍ......ຈາກບັ້ນຂົນຂວາຍ “ວັນເພື່ອຄົນທຸກຍາກ”, ແນວໂຮມປະເທດຊາດ, ບັນດາອົງການຈັດຕັ້ງມະຫາຊົນ, ອຳນາດການປົກຄອງແຂວງຕ່າງຢູ່ເຂດພູດອຍ, ເຂດຊາຍແດນ ຫຼືບັນດາແຂວງ ຮັບຜົນສະທ້ອນຈາກໄພທຳມະຊາດເປັນປະຈຳ, ລ້ວນແຕ່ມີໂຄງການເຄື່ອນໄຫວທີ່ມີຄວາມໝາຍແທດຈິງເພື່ອ ຊ່ວຍຜູ້ທຸກຍາກນັບລ້ານເທື່ອຄົນສາມາດຜ່ານຜ່າຄວາມຫຍຸ້ງຍາກ, ເພີ່ມຄວາມເຊື່ອໝັ້ນ ແລະ ສູ້ຊົນບືນຕົວຂຶ້ນຫຼຸດພົ້ນອອກຈາກຄວາມອຶດຫິວທຸກຍາກ, ສ້າງການດຳລົງຊີວິດເປັນປົກກະຕິ. ທ່ານ ຊຸ່ງອາວ່າງ ປະທານຄະນະກຳມະການແນວໂຮມປະເທດຊາດແຂວງ ອຽນບ໋າຍ ຖືວ່າ : “ ຂ້າພະເຈົ້າຖືວ່າ ນີ້ແມ່ນການປະກອບສ່ວນສຳຄັນທີ່ສຸດ, ຊຶ່ງໄດ້ປະກອບເຫື່ອແຮງປຸກສ້າງເຮືອນຢູ່ໃຫ້ແກ່ຄອບຄົວທຸກຍາກ, ອັນໄດ້ເຂົ້າສູ່ຈິດໃຈຂອງປະຊາຊົນ ແລະ ສາມາດປຸກລະດົມກຳລັງແຮງສັງລວມຂອງປະຊາຊົນທຸກຊັ້ນຄົນ ໃນເຂດຊຸມຊົນ ເຂົ້າຮ່ວມການຊ່ວຍເຫຼືອບັນດາຄອບຄົວທີ່ທຸກຍາກ, ຄອບຄົວທີ່ມີຄຸນງາມ ຄວາມດີຕໍ່ການປະຕິວັດພວມປະສົບກັບຄວາມຫຍຸ້ງຍາກ. ເມື່ອປະຊາຊົນໄດ້ມີຊີວິດການເປັນຢູ່ດີຂຶ້ນແລ້ວ, ກໍ່ລົງທຶນກໍ່ສ້າງທາງຄົມມະນາຄົມ, ຫໍວັດທະນະທຳ, ໂຮງຮຽນ, ໂຮງ ໝໍ.”
ໂດຍເສີມຂະຫຍາຍບັນດາໝາກຜົນທີ່ບັນລຸມາໄດ້ຈາກບັ້ນຂົນຂວາຍ “ວັນເພື່ອ ຄົນທຸກຍາກ”, ໃນຊຸມປີທີ່ ຜ່ານມາ, ຄະນະກຳມະການສູນກາງແນວໂຮມປະເທດຊາດຫວຽດນາມໄດ້ສົມທົບກັບບັນດາອົງການສະມາຊິກ ແລະ ແນວໂຮມປະເທດຊາດຂັ້ນຕ່າງໆ ປະຕິບັ້ນບັ້ນຂົນຂວາຍດ້ວຍຫຼາຍຮູບແບບ ແລະ ມາດຕະການ ຢ່າງມີ ຫົວຄິດ ປະດິດສ້າງ, ປະກອບສ່ວນຢ່າງຕັ້ງໜ້າເຂົ້າໃນການເບິ່ງແຍງດູແລໃຫ້ ແກ່ຄອບຄົວທຸກຍາກໃນບໍລິເວນທົ່ວປະເທດ. ໃນຂະບວນວິວັດປະຕິບັດບັ້ນຂົນຂວາຍ, ມີຫຼາຍທ້ອງຖິ່ນ, ອົງການສະມາຊິກ, ວິສາຫະກິດ, ອົງການທີ່ບໍ່ຂຶ້ນກັບລັດຖະບານ ແລະ ສ່ວນບຸກຄົນ ໄດ້ມີການປະກອບສ່ວນຢ່າງຫຼວງຫຼາຍເພື່ອໜູນຊ່ວຍຄົນທຸກຍາກ, ຊຶ່ງພົ້ນເດັ່ນຂຶ້ນແມ່ນ ນະຄອນໂຮຈິມິນ ປະກອບເງິນ 450 ຕື້ດົງ, ນະຄອນຫຼວງຮ່າໂນ້ຍ 300 ຕື້ກ່ວາດົງ, ນະຄອນຫາຍຟ່ອງ 372 ຕື້ດົງ, ກຸ່ມບໍລິສັດນ້ຳມັນອາຍແກັສ ຫວຽດນາມ 600 ຕື້ດົງ. ບໍ່ພຽງແຕ່ສະໜັບສະໜູນຊວ່ຍເຫຼືອເງິນເທົ່ານັ້ນ, ມີຫຼາຍໝູ່ຄະນະ, ສ່ວນບຸກຄົນໄດ້ສະໜັບສະໜູນຊ່ວຍເຫຼືອດ້ວຍຜະລິດຕະພັນ ເພື່ອນຳໄປຂາຍປະມູນໃນລາຍການ “ເຊື່ອມຕໍ່ອ້ອມແຂນໃຫຍ່” ດ້ວຍຍອດມຸນຄ່າຂຶ້ນເຖິງນັບຮ້ອຍຕື້ດົງ. ທ່ານດອກເຕີ ເລງອກຢຸ້ງ ປະທານສະມາຄົມເຄື່ອງສິລະປະເອ້ຢ້ອງຫີນປະເສີດ ຫວຽດ ນາມໃຫ້ຮູ້ວ່າ : “ສະມາຄົມເຄື່ອງສິລະປະເອ້ຢ້ອງຫີນປະເສີດ ຫວຽດນາມ ຜັນຂະຫຍາຍການສະໜັບສະໜູນໂຄງການ “ເຊື່ອມຕໍ່ອ້ອມແຂນໃຫຍ່”ຢ່າງກ້ວາງຂວາງ ໃນທົ່ວລະບົບ ທີ່ມີສ່ວນກ່ຽວຂ້ອງເຖິງບັນດາຜະລິດຕະພັນ. ທາງດ້ານມູນຄ່າຂອງຜະລິດຕະພັນກໍ່ຢູ່ໃນລະດັບໃດໜຶ່ງ, ແຕ່ຄວາມໝາຍທາງດ້ານຈິດໃຈ ແລະ ຄຸນຄ່າທາງດ້ານວັດທະນະທຳສິລະປະຂອງຜະລິດຕະພັນ ແມ່ນບັນລຸຍອດສູງ”
ທ່ານປະທານ ຄະນະກຳມະການສູນກາງແນວໂຮມປະເທດຊາດ ຫວຽດນາມ ຮີງດາມຖືວ່າ ປະສິດທິຜົນທີ່ ໂຄງການ “ເຊື່ອມຕໍ່ອ້ອມແຂນໃຫຍ່”ເພື່ອຄົນທຸກຍາກນຳມາໃຫ້ພວກເຮົາໃນ 10 ປີທີ່ຜ່ານມາ ແມ່ນໃຫຍ່ຫຼວງທີ່ສຸດ, ບໍ່ພຽງແຕ່ຖືກສະແດງອອກຜ່ານຈຳນວນເງິນປະກອບເທົ່ານັ້ນ, ຫາກຍັງສາມາດປຸກລຸກມູນເຊື້ອໂອບອ້ອມອາລີ ອູ້ມຊູ່ຊ່ວຍເຫຼືອຊຶ່ງກັນແລະກັນຂອງຊາດຫວຽດນາມອີກດ້ວຍ. ທ່ານຢືນຢັນວ່າ : ໂຄງການ “ເຊື່ອມຕໍ່ອ້ອມແຂນໃຫຍ່”ບໍ່ພຽງແຕ່ແມ່ນໂຄງການເຄື່ອນໄຫວເພື່ອການກຸສົນເທົ່ານັ້ນ, ຫາກຍັງມີຄວາມໝາຍທາງດ້ານການເມືອງ, ສັງຄົມ, ແລະ ວັດທະນະທຳມະນຸດຢ່າງເລິກເຊີ່ງອີກດ້ວຍ. ທ່ານ ຮີງດາມ ເວົ້າວ່າ: “ ນີ້ແມ່ນບັ້ນຂົນຂວາຍໃຫຍ່ ມີລັກສະນະທົ່ວປວງຊົນຮອບດ້ານ. ມັນຖືກສ້າງຂຶ້ນເປັນຮູບປະທຳ ແລະໄດ້ສ້າງວັດທະນະທຳຢູ່ເຂດຊຸມຊົນ. ໂຄງການ “ເຊື່ອມຕໍ່ອ້ອມແຂນໃຫຍ່”ສະແດງໃຫ້ເຫັນຄວາມຕັດສິນໃຈຂອງທັງລະບົບການເມືອງຫວຽດນາມ. ສິ່ງທີ່ສຳຄັນຍິ່ງຂອງແນວໂຮມ ແມ່ນສາມາດສ້າງໃຫ້ມີການຫັນປ່ຽນໃນທົ່ວທັງລະບົບການເມືອງ ແລະ ປຸກລຸກທົ່ວສັງຄົມເອົາໃຈໃສ່ເຖິງຄົນທຸກຍາກ. ນີ້ແມ່ນໄມ້ວັດແທກເພື່ອປະຕິບັດແນວຄິດ, ແບບຢ່າງຄຸນສົມບັດຂອງລຸງໂຮ່ທີ່ມີຕໍຄົນທຸກຍາກ”
ພຽງແຕ່ໃນຄ່ຳຄືນລາຍການ “ເຊື່ອມຕໍ່ອ້ອມແຂນໃຫຍ່-ເພື່ອຄົນທຸກຍາກ ” ຄັ້ງທີ່ 10 ຊຶ່ງຫາກໍຈັດຂຶ້ນຢູ່ ຮ່າໂນ້ຍໃນເວລາທີ່ຜ່ານມາ, ສາມາດເກັບເງິນຊ່ວຍເຫຼືອໄດ້ 6500 ຕື້ກ່ວາດົງຈາກບັນດານັກອຸປະຖຳ, ບັນດາຜູ້ມີນ້ຳໃຈໂອບອ້ອມອາລີທີ່ສະຫງວນໃຫ້ແກ່ຜູ້ທຸກຍາກ. ໃນນັ້ນມີ 1152ຕື້ດົງ ສະໜັບສະໜູນກອງທຶນເພື່ອຄົນທຸກຍາກ, 5300 ຕື້ກ່ວາດົງ ແມ່ນເພື່ອປະຕິບັດບັນດາໂຄງການຮັບປະກັນຊີວິດສັງຄົມ. ດ້ວຍແຫຼ່ງທຶນນີ້, ບັນດາທ້ອງຖິ່ນຈະປຸກສ້າງ ສ້ອມແປງເຮືອນເກືອບ 74000ຫຼັງໃຫ້ແກ່ຄອບຄົວທຸກຍາກ, ເບິ່ງແຍງດູແລ, ສ້າງວຽກເຮັດງານທຳໃຫ້ແກ່ຜູ້ທຸກຍາກນັບລ້ານຄົນ, ກໍ່ສ້າງທາງ, ໂຮງຮຽນ, ສຸກສາລາ.......ຜ່ານນັ້ນ, ກໍ່ສາມາດຢັ້ງຢືນໄດ້ວ່າ ໂຄງການ “ເຊື່ອມຕໍ່ອ້ອມແຂນໃຫຍ່-ເພື່ອຄົນທຸກຍາກ ” ໄດ້ ແລະ ພວມເຂົ້າຮ່ວມຢ່າງຕັ້ງໜ້າເຂົ້າໃນບັ້ນຂົນຂວາຍ “ວັນເພື່ອຄົນທຸກຍາກ” ເຊື່ອມຕໍ່ອ້ອມແຂນໃຫຍ່ເພື່ອເສີມຂະຫຍາຍມູນເຊື້ອຮັກແພງມະນຸດດ້ວຍກັນຂອງຊາດຫວຽດນາມ.