(vovworld)- ໃນສະພາບເສດຖະກິດພວມປະສົບກັບຄວາມຫຍຸ້ງຍາກ ແຕ່ຫວຽດນາມ ຍັງຄົງສາມາດຫລຸດຜ່ອນອັດຕາຄວາມທຸກຍາກອຶດຫິວລົງ ແລະ ຮັບປະກັນຊີວິດສັງຄົມໄດ້. ນີ້ແມ່ນໝາກຜົນບໍ່ແມ່ນຫນ້ອຍຂອງໂຄງການຈຸດໝາຍແຫ່ງຊາດຊື່ງໄດ້ຮັບການປະຕິບັດໃນ 3 ປີຜ່ານມາ. ເມື່ອຕີລາຄາ ກ່ຽວກັບໝາກຜົນດັ່ງກ່າວ, ບັນດາສະມາຊິກສະພາແຫ່ງຊາດ ທີ່ພວມເຂົ້າຮ່ວມກອງປະຊຸມສະໄຫມສາມັນເທື່ອທີ 6 ສະພາແຫ່ງຊາດຊຸດທີ 13 ໄດ້ຮັບຮູ້ປະສິດທິຜົນຢ່າງຕັ້ງຫນ້າຂອງບັນດາໂຄງການ ພ້ອມທັງຖືວ່າ: ໃນໄລຍະຈະມາເຖິງ, ຫວຽດນາມ ຄວນໃຫ້ບຸລິມະສິດແກ່ການລົງທຶນໃຫ້ແກ່ບາງໂຄງການຈຸດສຸມດ້ວຍການສຸມກຳລັງສູງກວ່າ.
ໂຄງການຈຸດໝາຍແຫ່ງຊາດຊ່ວຍ ຫວຽດນາມ ຮັບປະກັນຊີວິດສັງຄົມ
ປະຈຸບັນ ຫວຽດນາມ ມີ 16 ໂຄງການຈຸດໝາຍແຫ່ງຊາດຢູ່ໃນຫລາຍຂົງເຂດ. ໃນ 3 ປີຜ່ານມາ, ນັບແຕ່ປີ 2011-2013, ຍອດງົບປະມານແຫ່ງລັດ ແລະ ແຫລ່ງທຶນ ODA ທີ່ຈັດແບ່ງໃຫ້ບັນດາໂຄງການຈຸດໝາຍແຫ່ງຊາດ ບັນລຸປະມານ ກວ່າ 80.200 ຕື້ດົ່ງ, ເທົ່າກັບ 33% ແຜນການຂອງໄລຍະ 2011-2015. ບັນດາໂຄງການດັ່ງກ່າວໄດ້ຊ່ວຍໃຫ້ຫວຽດນາມ ປະຕິບັດຫລາຍຈຸດໝາຍຮັບປະກັນຊີວິດສັງຄົມ ແລະ ຈຸດໝາຍສະຫັດສະວັດ, ສ້າງເງື່ອນໄຂເພື່ອລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ປັບປຸງຄຸນນະພາບຊີວິດການເປັນຢູ່ຂອງປະຊາຊົນຢູ່ເຂດປະສົບກັບຄວາມຫຍຸ້ງຍາກ. ເມື່ອຕີລາຄາຄວາມເອົາໃຈໃສ່ຂອງລັດຖະບານກ່ຽວກັບນະໂຍບາຍສັງຄົມ, ທ່ານນາງ ຫງວຽນທິແທງຮ່ວາ, ສສຊ ແຂວງ ບັກນີງ ຮັບຮູ້ວ່າ:
“ບັນດາໝາກຜົນທີ່ບັນລຸໄດ້ໃນ 3 ປີຜ່ານມາແມ່ນດີພໍສົມຄວນ ແລະ ມີຄວາມໝາຍສຳຄັນທີ່ສຸດ. ບັນຫາຮັບປະກັນຊີວິດສັງຄົມຍາມໃດກໍ່ໄດ້ຮັບຄວາມເອົາໃຈໃສ່ຈາກພັກ, ລັດຖະບານ ແລະ ສະພາແຫ່ງຊາດ. ເຖິງວ່າ ເສດຖະກິດພວມປະສົບກັບຄວາມຫຍຸ້ງຍາກ, GDP ຫລຸດລົງກໍຕາມ, ແຕ່ການລົງທຶນໃຫ້ແກ່ຂົງເຂດຮັບປະກັນຊີວິດສັງຄົມຍັງໄດ້ຮັບຄວາມເອົາໃຈໃສ່ເປັນພິເສດ, ຊີວິດການເປັນຢູ່ຂອງປະຊາຊົນກໍໄດ້ຮັບການປົວແປງແລ້ວ, ອັດຕາສ່ວນຄອບຄົວທຸກຍາກໃນແຕ່ລະປີກໍຫລຸດລົງ, ພິເສດບັນດາເມືອງທຸກຍາກແມ່ນຫລຸດລົງໃນລະດັບສູງ. ອັດຕາສ່ວນຜູ້ໄດ້ຊົມໃຊ້ບັດປະກັນສຸຂະພາບກໍເພີ່ມຂຶ້ນ, ເປົ້າໝາຍໄດ້ຮັບການອຸດຫນູນຈາກສັງຄົມແມ່ນເປີດກວ້າງ, ບາງນະໂຍບາຍຫນູນຊ່ວຍລາຍຈ່າຍຮຳ່ຮຽນ, ຫນູນຊ່ວຍທັນຍາຫານໃຫ້ແກ່ນັກຮຽນທຸກຍາກ, ນັກຮຽນຊົນເຜົ່າສ່ວນຫນ້ອຍໄດ້ຮັບການປະຕິບັດແລ້ວ. ”
ເຖິງວ່າບັນລຸໄດ້ບັນດາໝາກຜົນແລ້ວກໍຕາມ, ແຕ່ ສສຊ ຫລາຍທ່ານ ຖືວ່າ: ຍັງມີຫລາຍບັນຫາຄົງຄ້າງໃນການປະຕິບັດໂຄງການຈຸດໝາຍແຫ່ງຊາດ. 16 ໂຄງການຈຸດໝາຍແຫ່ງຊາດ,ໃນນັ້ນ ຫລາຍໂຄງການມີບົດບາດຫນ້າທີ່ຊຳ້ກັບຫນ້າທີ່ເປັນປະຈຳຊ່ຶງບັນດາກະຊວງ, ຂະແຫນງການຕ້ອງເຮັດ. ສະນັ້ນ ເພື່ອໃຫ້ບັນດາໂຄງການຈຸດໝາຍແຫ່ງຊາດບັນລຸປະສິດທິຜົນສູງກວ່າ, ສສຊ ຫລາຍທ່ານຖືວ່າ: ຄວນພິຈາລະນາການເລືອກເຟັ້ນບັນດາໂຄງການດັ່ງກ່າວຄືນໃຫມ່.
ໂຄງການລົບລ້າງຄວາມອຶດຫິວຫລຸດຜ່ອນຄວາມທຸກຍາກ
ພາບປະກອບ:internet
|
ຮັດແຄບຊ່ອງຫວ່າງບັນດາໂຄງການຈຸດໝາຍແຫ່ງຊາດເພື່ອເພີ່ມປະສິດທິຜົນການລົງທຶນ
ບັນດາ ສສຊ ສະເຫນີວ່າ: ຄວນຮັດແຄບຊ່ອງຫວ່າງບັນດາໂຄງການ ຫລືບັນດາໂຄງການພາກສ່ວນ, ພຽງແຕ່ລົງທຶນບັນດາໂຄງການຈຸດສຸມ. ທ່ານ ລາງອກທວາງ, ສສຊ ແຂວງ ກາວບັ່ງ ຍົກຄຳເຫັນວ່າ:
“ຄວນກວດກາຄືນບັນດາຈຸດໝາຍຂອງແຕ່ລະໂຄງການ ແລະ ດັດປັບ ຫລຸດຜ່ອນ, ປະສານສົມທົບລະຫວ່າງບັນດາໂຄງການໃຫ້ເໝາະສົມ ກັບເງື່ອນໄຂ ກ່ຽວກັບແຫລ່ງກຳລັງ. ດັດປັບອັດຕາທຶນຮອນ, ເພີ່ມລາຍຈ່າຍໃຫ້ແກ່ການລົງທຶນພັດທະນາ, ພິເສດແມ່ນພື້ນຖານໂຄງລ່າງ ຄື: ຄົມມະນາຄົມ, ໂຮງຮຽນ, ສຸກສາລາ, ຫລຸດຜ່ອນລາຍຈ່າຍງົບປະມານ…. ຕ້ອງມີຄວາມໄຫວພິບໃນການສຳພັດຂອງແຕ່ລະພາກ, ເຂດ ເພື່ອໃຫ້ໂຄງການບັນລຸປະສິດທິຜົນສູງສຸດ.”
ເຫັນດີກັບຄຳເຫັນດັ່ງກ່າວ, ທ່ານ ບູ່ຍກວາງວີງ ລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ ຢືນຢັນວ່າ:
“ກ່ອນອື່ນ ລັດຖະບານ ຕ້ອງຮັກສາ 16 ໂຄງການ ໄວ້. ທີສອງ ຫລຸດຜ່ອນໂຄງການພາກສ່ວນ ແລະ ຮັດແຄບບັນດາຈຸດໝາຍໃຫ້ເໝາະສົມກັບ ແຫລ່ງ
ກຳລັງ ແລະ ພຶດຕິກຳຂອງພວກເຮົາ. ໃນປີ 2014-2015 ບໍ່ອະນຸຍາດໃຫ້ລົງທຶນກໍ່ສ້າງໂຄງການໃຫມ່ ຫາກພຽງສຸມໃສ່ປະຕິບັດໂຄງການເກົ່າໃຫ້ສຳເລັດ. ຫລັງປີ 2015 ຈະປຶກສາຫາລືຕາມທິດປະສານສົມທົບທັງໝົດໂຄງການຈຸດໝາຍແຫ່ງຊາດເຂົ້າກັນ.”
ເປັນຫນ້າສົນໃຈ, ນັບແຕ່ປີ 2016, ລັດຖະບານ ຈະພິຈາລະນາເພື່ອຮັກສາ 2-3 ໂຄງການສຳຄັນ ແລະ ມີປະສິດທິຜົນ, ໃນນັ້ນ ໂຄງການລົບລ້າງຄວາມອຶດຫິວຫລຸດຜ່ອນຄວາມທຸກຍາກ ແລະ ກໍ່ສ້າງຊົນນະບົດໃຫມ່. ທ່ານ ຮ່ວາງດັງກວາງ, ສສຊ ແຂວງ ກວ໋າງບີງ ຍົກຄຳເຫັນວ່າ:
“ຂ້າພະເຈົ້າເຫັນດີກັບລັດຖະບານ, ໃນເງື່ອນໄຂເສດຖະກິດປະສົບກັບຄວາມຫຍຸ້ງຍາກ ແຕ່ຕ້ອງໃຫ້ບຸລິມະສິດແກ່ແຫລ່ງກຳລັງເພື່ອພັດທະນາກະສິກຳ, ຊົນນະບົດ. ເພາະສະນັ້ນ ຂ້າພະເຈົ້າສະເຫນີ ສະພາແຫ່ງຊາດ, ລັດຖະບານ ເອົາໃຈໃສ່ເພີ່ມການລົງທຶນໃຫ້ແກ່ກະສິກຳ, ມີນະໂຍບາຍເພື່ອສົ່ງເສີມຊາວກະສິກອນຜູກພັນກັບທົ່ງໄຮ່ທົ່ງນາ. ພ້ອມທັງ ຍູ້ແຮງການສ້າງໂຄງປະກອບຂະແຫນງກະສິກຳຄືນໃຫມ່, ສຸມໃສ່ບັນດາລະບອບ, ນະໂຍບາຍຈຳຫນ່າຍຜະລິດຕະພັນກະເສດ, ກະຕຸກຊຸກຍູ້ການຜະລິດ, ອາລັກຂາແກ່ຜະລິດຕະພັນສົ້ນອອກ, ນະໂຍບາຍກ່ຽວກັບລາຄາວັດຖຸອຸປະກອນກະສິກຳໃຫ້ເໝາະສົມ.”
ເພີ່ມສິດເປັນເຈົ້າການໃຫ້ແກ່ທ້ອງຖິ່ນ
ເພື່ອໃຫ້ບັນດາໂຄງການຈຸດໝາຍແຫ່ງຊາດຜັນຂະຫຍາຍຢ່າງມີປະສິດທິຜົນ, ລັດຖະບານ ຈະມອບສິດເປັນເຈົ້າການໃຫ້ແກ່ທ້ອງຖິ່ນຫລາຍກວ່າ, ຫລຸດຜ່ອນການແຊກແຊງຂອງບັນດາກະຊວງ, ຂະແຫນງການເພື່ອໃຫ້ບັນດາທ້ອງຖິ່ນມີສິດເປັນເຈົ້າການ ແລະ ຮັບຜິດຊອບເອງຕໍ່ບັນດາຈຸດໝາຍທີ່ວາງອອກ.
ດ້ວຍການຍູ້ແຮງການປະຕິບັດໂຄງການຈຸດໝາຍແຫ່ງຊາດໃນໄລຍະຈະມາເຖິງຕາມຈຸດສຸມ, ຈຸດໃຈກາງ, ຈະປະກອບສ່ວນພັດທະນາເສດຖະກິດ, ລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ພິເສດແມ່ນການຫລຸດຜ່ອນຄວາມທຸກຍາກແບບຍືນຍົງ.