(vovworld)- ພາຍຫລັງ 3 ປີ ແຫ່ງການຜັນຂະຫຍາຍ, ມາຮອດປະຈຸບັນ, ໂຄງການຫນູນຊ່ວຍຄອບຄົວທຸກຍາກກ່ຽວກັບເຮືອນຢູ່ຂອງລັດຖະບານ ຫວຽດນາມ ໄດ້ສຳເລັດລື່ນແຜນການທີ່ວາງອອກ, ກໍ່ສ້າງເຮືອນຢູ່ໃຫ້ຄອບຄົວທຸກຍາກໄດ້ 507.000 ຫລັງ.
ຄອບຄົວທຸກຍາກໄດ້ຮັບເຮືອນຢູ່ຈາກໂຄງການຂອງລັດຖະບານ
ພາບ:internet
|
ໂຄງການຫນູນຊ່ວຍຄອບຄົວທຸກຍາກກ່ຽວກັບເຮືອນຢູ່ໄດ້ຮັບການປະຕິບັດຕາມຂໍ້ຕົກລົງຂອງ ນາຍົກລັດຖະມົນຕີ ລົງວັນທີ 12/12/2008 ໃນໄລຍະ 4 ປີ ແຕ່ປີ 2009 - 2013 ດ້ວຍການຄາດຄະເນວ່າ: ຈະກໍ່ສ້າງເຮືອນໃຫມ່ 500.000 ຫລັງ. ແຕ່ພາຍຫລັງ 3 ປີ ນັບແຕ່ 2009 ມາຮອດປະຈຸບັນ, ໂຄງການດັ່ງກ່າວໄດ້ປະຕິບັດສຳເລັດກ່ອນແຜນການທີ່ໄດ້ວາງອອກ 1 ປີ, ກໍ່ສ້າງເຮືອນຢູ່ໃຫ້ຄອບຄົວທຸກຍາກໄດ້ 507.000 ຫລັງ, ບັນລຸ 102,2% ເມື່ອທຽບໃສ່ຈຳນວນຄອບຄົວທີ່ໄດ້ຮັບການອະນຸມັດຫນູນຊ່ວຍເຮືອນຢູ່ໃນເບື້ອງຕົ້ນ. ເປັນອັນວ່າ ມີກວ່າ 2 ລ້ານຄົນໄດ້ມີເຮືອນຢູ່ຈາກໂຄງການນີ້. ກ່ຽວກັບຄຸນນະພາບເຮືອນຢູ່, ເຮືອນຢູ່ແຕ່ລະຫລັງນັ້ນ ສ່ວນຫລາຍມີເນື້ອທີ່ກວ້າງກວ່າ ແລະ ມີຄຸນນະພາບດີກວ່າເມື່ອທຽບໃສ່ການກຳນົດ. ສິ່ງທີ່ເປັນຫນ້າສົນໃຈ, ນັ້ນແມ່ນໃນຈຳນວນເຮືອນຢູ່ 507.000 ຫລັງນັ້ນ, ມີ 224.000 ຫລັງແມ່ນສະຫງວນໃຫ້ແກ່ຊາວຊົນເຜົ່າສ່ວນຫນ້ອຍ, ກວມເກືອບ 50% ຄອບຄົວທຸກຍາກໃນໂຄງການໄດ້ຮັບເຮືອນຢູ່. ໃນຈຳນວນ 59 ແຂວງ, ນະຄອນ ຜັນຂະຫຍາຍໂຄງການດັ່ງກ່າວ ໄດ້ມີ 9 ແຂວງປະຕິບັດໂຄງການສຳເລັດກ່ອນກຳນົດເວລາ 2 ປີ.
ຕາມທ່ານ Trinh Dinh Dung ລັດຖະມົນຕີກະຊວງກໍ່ສ້າງ ຫວຽດນາມ, ຮອງຫົວຫນ້າຄະນະປະຈຳ ຄະນະຊີ້ນຳສູນກາງກ່ຽວກັບນະໂຍບາຍເຮືອນຢູ່ ແລະ ຕະຫລາດອະສັງຫາລິມະຊັບ ແລ້ວ, ໂຄງການຫນູນຊ່ວຍຄອບຄົວທຸກຍາກກ່ຽວກັບເຮືອນຢູ່ຂອງລັດຖະບານແມ່ນໂຄງການຫນູນຊ່ວຍເຮືອນຢູ່ທີ່ມີຂອບຂະຫນາດໃຫຍ່ສຸດ, ບັນລຸປະສິດທິຜົນທີ່ສຸດນັບແຕ່ເມື່ອປະເທດຊາດປະຕິບັດແນວທາງປ່ຽນແປງໃຫມ່.
“ໂຄງການໄດ້ສະແດງໃຫ້ເຫັນຄວາມຕັດສິນໃຈທາງດ້ານການເມືອງຂອງພັກ, ລັດຖະບານ ແລະ ລັດ ໃນການເອົາໃຈໃສ່ເບິ່ງແຍງດູແລເຖິງຊີວິດການເປັນຢູ່ທາງດ້ານວັດຖຸ ແລະ ຈິດໃຈໃຫ້ແກ່ປະຊາຊົນ ແລະ ໂຄງການນີ້ບໍ່ພຽງແຕ່ມີຄວາມໝາຍທາງດ້ານເສດຖະກິດສັງຄົມເທົ່ານັ້ນ ຫາກຍັງມີຄວາມໝາຍດ້ານວັດທະນະທຳມະນຸດ ແລະ ດ້ານການເມືອງຢ່າງເລິກເຊິ່ງອີກດ້ວຍ. ໂຄງການປະຕິບັດຈຸດໝາຍເພື່ອມະນຸດ, ສະແດງໃຫ້ເຫັນລັກສະນະດີເລີດຂອງລະບອບ ແລະ ປະກອບສ່ວນສຳຄັນເຂົ້າໃນການຍົກສູງຊີວິດທາງດ້ານວັດຖຸ, ວັດທະນະທຳ ແລະ ຈິດໃຈໃຫ້ແກ່ປະຊາຊົນ.”
ທ່ານ Trinh Dinh Dung ລັດຖະມົນຕີກະຊວງກໍ່ສ້າງ ກ່າວສະຫລູບໂຄງການ
ພາບ:capheland.vn
|
ກ່ຽວກັບລັດຖະບານ, ທ່ານ ນາຍົກລັດຖະມົນຕີ Nguyen Tan Dung ເນັ້ນຫນັກວ່າ: ຜົນສຳເລັດຂອງໂຄງການຫນູນຊ່ວຍຄອບຄົວທຸກຍາກກ່ຽວກັບເຮືອນຢູ່ ຂອງລັດຖະບານ ນັ້ນແມ່ນ ຍ້ອນມີຄວາມເອົາໃຈໃສ່ ແລະ ການເຂົ້າຮ່ວມຂອງທັງລະບົບການເມືອງ ນັບແຕ່ຂັ້ນສູນກາງລົງຮອດທ້ອງຖິ່ນ, ວິສາຫະກິດ ແລະ ຄວາມມານະພະຍາຍາມຂອງປະຊາຊົນເອງ. ທ່ານ ນາຍົກລັດຖະມົນຕີ Nguyen Tan Dung ຢືນຢັນວ່າ: ຍາມໃດ ພັກ, ລັດ ກໍເອົາໃຈໃສ່, ຫນູນຊ່ວຍເຮືອນຢູ່ໃຫ້ແກ່ບັນດາເປົ້າໝາຍນະໂຍບາຍ, ຜູ້ທຸກຍາກທີ່ປະສົບກັບຄວາມຫຍຸ້ງຍາກດ້ານເຮືອນຢູ່.ທ່ານ ນາຍົກລດຖະມົນຕີ Nguyen Tan Dung ເວົ້າວ່າ:
“ໂຄງການຫນູນຊ່ວຍເຮືອນຢູ່ໃຫ້ແກ່ຄອບຄົວທຸກຍາກ ປະກອບສ່ວນເພີ່ມທະວີຄວາມໄວ້ເນື້ອເຊື່ອໃຈຂ ອງປະຊາຊົນຕໍ່ການນຳພາຂອງພັກ, ລັດ, ສະແດງໃຫ້ເຫັນລັກສະນະດີເລີດຂອງລະບອບສັງຄົມນິຍົມ. ສິ່ງທີ່ໄດ້ຮັບຈາກໂຄງການ ບໍ່ພຽງແຕ່ຕົວເລກຈຳນວນເຮືອນທີ່ໄດ້ຮັບການກໍ່ສ້າງສຳເລັດເທົ່ານັ້ນ ຫາກຍັງແມ່ນໂຄງການຫນຶ່ງສອດຄ່ອງກັບຈິດໃຈຂອງປະຊາຊົນ, ສອດຄອ່ງກັບຜົນປະໂຫຍດອັນແທດຈິງຂອງປະຊາຊົນ ໄດ້ຮັບຄວາມສະຫນັບສະຫນູນຈາກປະຊາຊົນອີກດ້ວຍ. ຜ່ານໂຄງການນີ້ ພວກເຮົາສືບຕໍ່ເສີມຂະຫຍາຍມູນເຊື້ອອັນດີງາມຂອງຊາດ, ນັ້ນແມ່ນມູນເຊື້ອອູ້ມຊູຊ່ວຍເຫລືອຜູ້ທຸກຍາກ.”
ກ່ຽວກັບທ້ອງຖິ່ນ, ທ່ານ Dang Viet Thuan ຮອງປະທານຄະນະກຳມະການປະຊາຊົນແຂວງ Thai Nguyen ຖືວ່າ:
“ນີ້ແມ່ນໂຄງການໄດ້ຮັບຜົນສຳເລັດທີ່ສຸດນັບແຕ່ຂ້າພະເຈົ້າໄດ້ຊີ້ນຳຢູ່ທ້ອງຖິ່ນຂອງພວກຂ້າພະເຈົ້າ ມາຮອດປະຈຸບັນ ທີ່. ຜົນສຳເລັດຂອງໂຄງການແມ່ນ: ທີຫນຶ່ງ: ໂຄງການໄດ້ຮັບການປະຕິບັດຢ່າງວ່ອງໄວທີ່ສຸດ, ໄດ້ຮັບຄວາມໄວ້ເນື້ອເຊື່ອໃຈຈາກປະຊາຊົນທີ່ສຸດ. ການນຳຂອງຄະນະພັກ, ອຳນາດການປົກຄອງໄດ້ເຂົ້າຮ່ວມຢ່າງຂ້ຽວຂາດທີ່ສຸດ, ໄດ້ສ້າງພາບພົດທີ່ດີງາມໃນທົ່ວລະບົບການເມືອງ, ໃນຄວາມຮັບຮູ້ຂອງປະຊາຊົນ.”
ທົ່ວສັງຄົມໄດ້ມີການປະກອບສ່ວນເພື່ອກໍ່ສ້າງເຮືອນຢູ່ໃຫ້ແກ່ຄອບຄົວທຸກຍາກ. ລະອຽດຄື: ລັດຫນູນຊ່ວຍ 1/3 ທຶນຮອນ, ທະນາຄານນະໂຍບາຍສັງຄົມໃຫ້ກູ້ຢືມ 1/3 ຈຳນວນທຶນ ດ້ວຍອັດຕາດອກເບ້ຍຕຳ່, ສ່ວນຍັງເຫລືອແມ່ນທຶນປະກອບຂອງວົງຄະນາຍາດ, ວິສາຫະກິດ, ຕາແສງ, ໝູ່ບ້ານ ແລະ ວົງຕະກູນຂອງຄອບຄົວທຸກຍາກ. ໃນວິວັດແຫ່ງການປະຕິບັດ, ມີຫລາຍທ້ອງຖິ່ນໄດ້ມີຂໍ້ລິເລີ່ມທີ່ດີ, ປະສິດທິຜົນຄື: ເປີດເຜີຍຄອບຄົວທຸກຍາກ ແລະ ຖ່າຍຮູບຄອບຄົວທຸກຍາກກ່ອນ ແລະ ພາຍຫລັງໄດ້ຮັບເຮືອນຢູ່, ລະດົມທະຫານ, ຜູ້ອາສາສະໝັກເຂົ້າຮ່ວມການກໍ່ສ້າງເຮືອນຢູ່ໃຫ້ແກ່ປະຊາຊົນ, ມອບໃຫ້ພະແນກກໍ່ສ້າງອອກແບບເຮືອນຢູ່ໂດຍບໍ່ເສຍຄ່າເພື່ອໃຫ້ປະຊາຊົນທາບທາມ.
ດ້ວຍຜົນສຳເລັດຂອງໂຄງການຫນູນຊ່ວຍຄອບຄົວທຸກຍາກກ່ຽວກັບເຮືອນຢູ່ຂອງລັດຖະບານ ໄລຍະ 2009 - 2012, ລັດຖະບານ ໄດ້ຊີ້ນຳໃຫ້ກະຊວງກໍ່ສ້າງເປັນເຈົ້າພາບ, ສົມທົບກັບບັນດາກະຊວງ, ຂະແຫນງການກ່ຽວຂ້ອງສ້າງແຜນຮ່າງໂຄງການຫນູນຊ່ວຍເຮືອນຢູ່ໃຫ້ແກ່ຄອບຄົວທຸກຍາກໄລຍະ 2 (2013 - 2015) ໂດຍໄວເພື່ອຍື່ນສະເຫນີຕໍ່ນາຍົກລັດຖະມົນຕີພິຈາລະນາ, ຕົກລົງໃນທ້າຍປີ 2012 ເພື່ອຜັນຂະຫຍາຍປະຕິບັດໃນຕົ້ນປີ 2013. ຄາດໝາຍ ຕ້ອງມີເຮືອນຢູ່ໃຫ້ແກ່ບັນດາຄອບຄົວທຸກຍາກຕາມມາດຕະຖານໃຫມ່, ສູ້ຊົນກໍ່ສ້າງເຮືອນໃຫມ່ 500.000 ຫລັງ, ໃນນັ້ນເປີດກວ້າງເປົ້າໝາຍທຸກຍາກຕື່ມອີກ./.