(vovworld)- ສະພາແຫ່ງຊາດຫວຽດນາມ ຫາກໍ່ຮັບຮອງເອົາມະຕິໃຫ້ສັດຕະຍາບັນສົນທິສັນຍາ ສະຫະປະຊາຊາດ(ສປຊ) ກ່ຽວກັບສິດຂອງຄົນພິການ. ສິ່ງດັ່ງກ່າວເປັນການຢັ້ງຢືນຄຳໝັ້ນສັນຍາດ້ານການເມືອງຢ່າງແຮງຂອງຫວຽດນາມ ຕໍ່ປະຊາຄົມໂລກ ກ່ຽວກັບການຮັບປະກັນສິດທິມະນຸດ, ແມ່ນການສະແດງໃຫ້ເຫັນການປະຕິບັດສິດຂອງຄົນພິການຫວຽດນາມ ຢ່າງລະອຽດ. ເນື່ອງໃນໂອກາດວັນສາກົນກ່ຽວກັບຄົນພິການ(3/12), ບັນນາທິການວິທະຍຸກະຈາຍສຽງຫວຽດນາມ ມີບົດຂຽນທີ່ພາດຫົວຂໍ້ວ່າ: ໃຫ້ສັດຕະຍາບັນສົນທິສັນຍາສະຫະປະຊາຊາດກ່ຽວກັບສິດຂອງຄົນພິການ:ບາດກ້າວເດີນໃຫມ່ເພື່ອໃຫ້ຄົນພິການເຊື່ອມຕົວເຂົ້າກັບວົງຄະນາຍາດ
ສົນທິສັນຍາ ສປຊ ກ່ຽວກັບສິດຂອງຄົນພິການ ໄດ້ຮັບການຮັບຮອງເອົາທີ່ກອງປະຊຸມສະມັດຊາໃຫຍ່ ສປຊ ເມື່ອວັນທີ 13/12/2006, ແມ່ນສົນທິສັນຍາສາກົນຮອບດ້ານທີ່ສຸດ ກ່ຽວກັບການປົກປ້ອງສິດ ແລະ ຜົນປະໂຫຍດອັນຊອບທຳຂອງຄົນພິການ. ສົນທິສັນຍາໄດ້ກຳນົດບັນດາສິດຂອງຄົນພິການ ແລະ ພັນທະຂອງບັນດາປະເທດເຂົ້າຮ່ວມສົນທິສັນຍາ ເພື່ອຮັກສາ ແລະ ຍູ້ແຮງບັນດາສິດນີ້. ຫວຽດນາມ ໄດ້ລົງນາມໃນສົນທິສັນຍາເມື່ອປີ 2007. ການໃຫ້ສັດຕະຍາບັນ ສົນທິສັນຍາ ແມ່ນລະບຽບການສຸດທ້າຍເພື່ອໃຫ້ຫວຽດນາມ ກາຍເປັນສະມາຊິກ ສົນທິສັນຍາ.
ທ່ານຮອງນາຍົກລັດຖະມົນຕີ ຫວູດືກດາມ ກ່າວຄຳເຫັນທີ່
ພິທີສະເຫລີມສະຫລອງເຫດການຫວຽດນາມໃຫ້
ສັດຕະຍາບັນສົນທີສັນຍາສປຊກ່ຽວກັບສິດຂອງຄົນພິການ
|
ການໃຫ້ສັດຕະຍາບັນສົນທິສັນຍາແມ່ນມີຄວາມໝາຍໃນທຸກດ້ານການເມືອງ,ເສດຖະກິດ,ສັງຄົມ
ຫວຽດນາມ ພວມຢູ່ໃນວິວັດການເຊື່ອມໂຍງເຂົ້າກັບປະຊາຄົມໂລກຢ່າງເລິກເຊິ່ງ ແລະ ກວ້າງຂວາງ, ແມ່ນສະມາຊິກສະພາສິດທິມະນຸດຂອງ ສປຊ. ລັດຖະທຳມະນູນປີ 2013 ກໍໄດ້ຢືນຢັນຢ່າງແຮງເຖິງສິດທິມະນຸດ. ສະນັ້ນ ການໃຫ້ສັດຕະຍາບັນ ສົນທິສັນຍາກ່ຽວກັບຄົນພິການແມ່ນມີຄວາມຈຳເປັນທີ່ສຸດ.
ກ່ຽວກັບດ້ານການເມືອງ, ເລື່ອງຫວຽດນາມ ໃຫ້ສັດຕະຍາບັນ ສົນທິສັນຍາ ແມ່ນເພື່ອປະຕິບັດຄຳໝັ້ນສັນຍາຂອງຊາດ, ສ້າງພື້ນຖານໃຫ້ແກ່ການເພີ່ມທະວີການໂອ້ລົມສົນທະນາກ່ຽວກັບສິດທິມະນຸດ ແລະ ແລກປ່ຽນກັບບັນດາປະເທດ, ບັນດາອົງການຈັດຕັ້ງສາກົນກ່ຽວກັບສິດທິມະນຸດ. ທ່ານນາງ ຟ້າມທິຫາຍຈ່ວຽນ, ລັດຖະມົນຕີກະຊວງແຮງງານ,ທະຫານເສຍອົງຄະ ແລະ ສັງຄົມ ຖືວ່າ:
“ການໃຫ້ສັດຕະຍາບັນ ສົນທິສັນຍາກ່ຽວກັບສິດຂອງຄົນພິການ ຈະແມ່ນຄຳໝັ້ນສັນຍາດ້ານການເມືອງຢ່າງແຮງຂອງຫວຽດນາມ ໃນການປົກປ້ອງ ແລະ ຊຸກຍູ້ການພັດທະນາເພື່ອຜົນປະໂຫຍດຂອງຄົນພິການ. ນີ້ກໍແມ່ນຫນຶ່ງໃນບັນດາຫລັກຖານດ້ານກົດໝາຍເພື່ອໃຫ້ຫວຽດນາມ ຢືນຢັນທັດສະນະຂອງຕົນຕໍ່ໂລກກ່ຽວກັບຄົນພິການເວົ້າສະເພາະ ແລະ ສິດທິມະນຸດເວົ້າລວມ. ແລະ ການໃຫ້ສັດຕະຍາບັນສົນທິສັນຍາກ່ຽວກັບສິດຂອງຄົນພິການ ນັບມື້ນັບມີຄວາມໝາຍ ເມື່ອຫວຽດນາມ ກາຍເປັນສະມາຊິກສະພາສິດທິມະນຸດຂອງ ສປຊ ອາຍຸການ 2014-2016.”
ກ່ຽວກັບດ້ານເສດຖະກິດສັງຄົມ, ການໃຫ້ສັດຕະຍາບັນ ສົນທິສັນຍາກ່ຽວກັບສິດຂອງຄົນພິການ ໄດ້ປະກອບສ່ວນສ້າງລະບົບນະໂຍບາຍ, ກົດໝາຍວ່າດ້ວຍຄົນພິການໃຫ້ສົມບູນແບບ, ສ້າງພື້ນຖານດ້ານກົດໝາຍ ຮັບປະກັນການປະຕິບັດນະໂຍບາຍທີ່ມີຕໍ່ຄົນພິການ, ຊີວິດຂອງຄົນພິການນັບມື້ນັບໄດ້ຮັບການປັບປຸງດີຂຶ້ນ ນັບທັງສາທາລະນະສຸກ, ການສຶກສາ, ວຽກເຮັດງານທຳ, ຄົມມະນາຄົມຂົນສົ່ງ, ເຕັກໂນໂລຊີຂໍ້ມູນຂ່າວສານ… ສິ່ງດັ່ງກ່າວຈະຊຸກຍູ້ຄວາມສາມາດ ແລະ ກາລະໂອກາດໃຫ້ຄົນພິການ ໃນການຊອກຫາວຽກເຮັດງານທຳໃຫ້ດີກວ່າ, ຮັບປະກັນຊີວິດໃຫ້ແກ່ຄົນພິການ.
ຕັ້ງຫນ້າຜັນຂະຫຍາຍເພື່ອໃຫ້ ສົນທິສັນຍາເຂົ້າສູ່ຊີວິດຕົວຈິງ
ການໃຫ້ສັດຕະຍາບັນ ສົນທິສັນຍາກ່ຽວກັບສິດຂອງຄົນພິການ ຮຽກຮ້ອງໃຫ້ຫວຽດນາມ ຕ້ອງປະຕິບັດຕາມບັນດາຂໍ້ກຳນົດຂອງ ສົນທິສັນຍາ, ໃນນັ້ນ ມີການຮັບປະກັນສິດສຳພັດຂອງຄົນພິການສຳລັບສະພາບແວດລ້ອມດ້ານວັດຖຸ, ຄົມມະນາຄົມ, ຂໍ້ມູນຂ່າວສານ ແລະ ໂທລະຄົມ. ພາຍຫລັງໃຫ້ສັດຕະຍາບັນ ສົນທິສັນຍາ, ຫລັງຈາກນັ້ນ 2 ປີ ຫວຽດນາມ ຈະມີບົດລາຍງານແຫ່ງຊາດເພື່ອສົ່ງເຖິງ ສປຊ, ຈາກນັ້ນ 4ປີ/ເທື່ອຫນຶ່ງ, ຕ້ອງລາຍງານຕໍ່ສະພາຄວາມໝັ້ນຄົງ ສປຊ ກ່ຽວກັບການປະຕິບັດຂອງຫວຽດນາມ. ດ້ວຍຄວາມຮັບຜິດຊອບແມ່ນອົງການຄຸ້ມຄອງລັດ ກ່ຽວກັບນະໂຍບາຍໃຫ້ແກ່ຄົນພິການ, ກະຊວງແຮງງານ ທະຫານເສຍອົງຄະ ແລະ ສັງຄົມ ຈະສ້າງບັນດາແຜນການຍື່ນສະເຫນີຕໍ່ລັດຖະບານປະຕິບັດໃນໄລຍະ 5 ປີ ແລະ ປະຈຳປີ, ສູ້ຊົນຄ່ອຍໆຍົກບັນດາມາດຖານເພື່ອໃຫ້ເງື່ອນໄຂດຳລົງຊີວິດ, ຮ່ຳຮຽນ, ສຳພັດ ແລະ ເຊື່ອມຕົວເຂົ້າກັບວົງຄະນາຍາດຂອງຄົນພິການໄດ້ຮັບການປັບປຸງອີກບາດກ້າວຫນຶ່ງ. ທ່ານນາງ ຟ້າມທິຫາຍຈ່ວຽນ, ລັດຖະມົນຕີກະຊວງແຮງງານ,ທະຫານເສຍອົງຄະ ແລະ ສັງຄົມ ໃຫ້ຮູ້ວ່າ:
“ພວກຂ້າພະເຈົ້າສະເຫນີ ຄົ້ນຄ້ວາເພີ່ມເຕີມຂໍ້ກຳນົດຍົກເວັ້ນຄ່າຈົດທະບຽນຫນັງສືຢັ້ງຢືນການເກີດໃຫ້ແກ່ເດັກພິການ. ຄົ້ນຄ້ວາເພີ່ມເຕີມຂໍ້ກຳນົດຮັບສະຫມັກຄົນພິການເຂົ້າເຮັດວຽກຢູ່ພາກລັດ ແລະ ຮັບປະກັນການດັດປັບຢ່າງເໝາະສົມຢູ່ບ່ອນເຮັດວຽກເພື່ອສ້າງເງື່ອນໄຂໃຫ້ແກ່ຄົນພິການມີໂອກາດໄດ້ເຮັດວຽກ. ພວກຂ້າພະເຈົ້າກໍສະເຫນີກຳມາທິການບັນດາບັນຫາສັງຄົມ ຈົ່ງຕິດຕາມກວດກາການປະຕິບັດວຽກງານດັ່ງກ່າວ.”
ສົນທິສັນຍາ ສປຊ ກ່ຽວກັບສິດຂອງຄົນພິການ ແມ່ນສົນທິສັນຍາ ສາກົນຢ່າງຮອບດ້ານທີ່ສຸດກ່ຽວກັບການປົກປ້ອງສິດ ແລະ ຜົນປະໂຫຍດອັນຊອບທຳຂອງຄົນພິການ. ໃນວິວັດການປະຕິບັດສົນທິສັນຍາ, ຫວຽດນາມ ອາດຈະປະສົບກັບຄວາມຫຍຸ້ງຍາກບາງຢ່າງ ເມື່ອແຫລ່ງກຳລັງຍັງຈຳກັດ. ເຖິງຢ່າງໃດກໍຕາມ, ດ້ວຍການຍູ້ແຮງບັນດາການເຄື່ອນໄຫວເພື່ອຄົນພິການ, ເພີ່ມທະວີວຽກງານກວດກາ, ຫວຽດນາມ ຈະສຳເລັດຫນ້າທີ່ຂອງປະເທດສະມາຊິກ ສົນທິສັນຍາ, ຊ່ວຍໃຫ້ຊີວິດຂອງຄົນພິການປ່ຽນແປງຕາມທິດດີງາມກວ່າ.