ວັນທີ 5/6 ນີ້, ຊຶ່ງແມ່ນເຫດການສະເຫຼີມສະຫຼອງ 105 ປີແຫ່ງວັນທ່ານປະທານໂຮ່ຈິມິນເດີນທາງອອກຈາກປະເທດຊາດເພື່ອຊອກຫາເສັ້ນທາງກູ້ຊາດ. ໃນວັນນັ້ນ ເພີ່ມໄດ້ເດີນທາງອອກຈາກປະເທດຊາດດ້ວຍ 2 ຝາມືເບົ່າ ແລະ ນ້ຳໃຈຮັກຊາດຢ່າງລົ້ນເຫຼືອ. ຮອດເວລາກັບຄືນມາປະເທດຊາດ, ເພິ່ນໄດ້ນຳທັງທ້ອງຟ້າທີ່ແຈ່ມໃສ ແລະ ອະນາຄົດທີ່ຮຸ່ງເຮືອງເຫຼືອງເຫຼື້ອມມາໃຫ້ຊາດຫວຽດນາມ.
ທ່ານປະທານໂຮ່ຈິມິນໄດ້ລົງເຮືອ Latouche Treville ເດີນທາງອອກຈາກທ່າກຳປັ່ນ ຍ່າຮົ່ງ, ນະຄອນໂຮ່ຈິມິນ ເພື່ອຊອກຫາເສັ້ນທາງກູ້ຊາດ
(ພາບເອກະສານ)
|
ວັນທີ 5/6/1911, ທ່ານປະທານໂຮ່ຈິມິນໄດ້ລົງເຮືອ Latouche Treville ເດີນທາງອອກຈາກທ່າກຳປັ່ນ ຍ່າຮົ່ງ, ນະຄອນໂຮ່ຈິມິນ ເພື່ອຊອກຫາເສັ້ນທາງກ້າວເດີນໃຫ້ປະເທດຊາດ. ເພາະມີຄວາມຫວັງຢາກຊອກຮູ້ຕົວຈິງກ່ຽວກັບທຸກສິ່ງທຸກຢ່າງພວມເກີດຂຶ້ນໃນສັງຄົມຂອງປະເທດທຶນນິຍົມ. ທ່ານປະທານໂຮ່ຈິມິນໄດ້ເລືອກເອົາເສັ້ນທາງໄປຍັງບັນດາປະເທດຝ່າຍຕາເວັນຕົກຊຶ່ງແມ່ນແຫ່ງໃຫ້ກຳເນີດບັນດາແນວຄິດໃຫຍ່, ບັນດາການປະຕິວັດໃຫຍ່ດ້ວຍຄວາມຫວັງ “ຊອກຮູ້ຢູ່ປະເທດຝະລັ່ງ ແລະ ບັນດາປະເທດອື່ນຄືແນວໃດ, ແລ້ວກັບມາຊ່ວຍພໍ່ແມ່ປະຊາຊົນຫວຽດນາມ”
ຈຸດເລີ່ມຕົ້ນອັນຖືກຕ້ອງ
ວັນທີ 5/6/1911 ຊຶ່ງແມ່ນຈຸດເວລາເປີດສາກໄລຍະທາງ 30 ປີທີ່ທ່ານປະທານໂຮ່ຈິມິນໄດ້ພຳນັກຢູ່ທົ່ວທຸກທະວີບໃນໂລກເພື່ອ ຊອກຫາເສັ້ນທາງກູ້ຊາດ. ທ່ານນາງຫງວຽນຖີດຶກ ຜູ້ຮັກສາການຜູ້ອຳນວຍການໃຫຍ່ຫໍພິພິທະພັນໂຮ່ຈິມິນ ໃຫ້ຮູ້ວ່າ ນ້ຳໃຈຮັກຊາດ ແລະ ສະຕິຄັດຄ້ານຈັກກະພັດຂອງ ທ່ານປະທານໂຮ່ຈິມິນ ແມ່ນເລີ່ມມາຈາກແກ່ນສານຂອງສາຍພົວພັນລະຫວ່າງມະນຸດດ້ວຍກັນ. ທ່ານນາງຫງວຽນຖີດຶກ ຜູ້ຮັກສາການຜູ້ອຳນວຍການໃຫຍ່ຫໍພິພິທະພັນໂຮ່ຈິມິນກ່າວ ວ່າ :
“ ເມື່ອເດີນທາງອອກຈາກປະເທດຊາດ, ທ່ານປະທານໂຮ່ຈິມິນໄດ້ນຳເອົາຕາມໂຕດ້ວຍລັດທິຮັກຊາດຫວຽດນາມ, ມູນເຊື້ອປະຕິວັດແຫ່ງບ້ານເກີດເມືອງນອນ ແລະ ສິ່ງທັງໝົດເຫຼົ່ານັ້ນ ພັດໄດ້ຮັບການລ້ຽງດູ, ລະດົມກຳລັງໃຈ, ເສີມສ້າງໃນມູນເຊື້ອຂອງຄອບຄົວ. ຈຸດທີ່ພົ້ນເດັ່ນໃນເສັ້ນທາງກູ້ຊາດຂອງ ທ່ານປະທານໂຮ່ຈິມິນ ແມ່ນໄວໜຸ່ມດ້ວຍບັນດາຄວາມຄາດຫວັງອັນແຮງກ້າ, ເພື່ອຜົນປະໂຫຍດຂອງປະເທດຊາດຫວຽດນາມ, ພ້ອມກັນນັ້ນ ແມ່ນການເຊື່ອມຕົວເຂົ້າກັບໂລກເພື່ອພັດທະນາ. ທ່ານປະທານໂຮ່ຈິມິນ ໄດ້ເລີ່ມຕົ້ນດ້ວຍເສັ້ນທາງແຫ່ງພຶດຕິກຳຕົວຈິງ ນັ້ນແມ່ນເລີ່ມມາຈາກຊາວຜູ້ອອກແຮງງານ ແລະ ຈາກຕົວຈິງນີ້ເອງ, ເພິ່ນໄດ້ມີລະດັບຄວາມຮັບຮູ້ຢ່າງເລິກເຊິ່ງກ່ຽວກັບສິດທິມະນຸດ, ສິດໄດ້ມີຊີວິດ ແລະ ສະແຫວງຫາຄວາມຜາສຸກຂອງບັນດາປະຊາຊາດ”
ມາຮອດປະຈຸບັນ, ບັນດາເລື່ອງລາວກ່ຽວກັບຊຸມວັນເດືອນປີແຫ່ງການອອກແຮງງານດ້ວຍຄວາມລຳບາກກາກກຳ ຊຶ່ງທ່ານປະທານໂຮ່ຈິມິນໄດ້ຜ່ານຜ່າ ຂະນະທີ່ເພິ່ນປະກອບອາຊີບເປັນຄົນໃຊ້ໃນເຮືອນຄົວໃນກຳປັ່ນ, ເປັນນັກຖ່າຍຮູບ, ຄົນຮັບໃຊ້ໃນຮ້ານອາຫານ…ຍັງຄົງສ້າງຄວາມຕື້ນຕັນໃຈໃຫ້ບໍ່ຈັກວ່າເທົ່າໃດຄົນ. ເພື່ອຊອກຫາເສັ້ນທາງທີ່ສະຫວ່າງສະໄຫວໃຫ້ແກ່ອະນາຄົດຂອງປະເທດຊາດ, ທ່ານປະທານໂຮ່ຈິມິນ ໄດ້ຜ່ານຜ່າບັນດາຄ່ຳຄືນໜາວຈັດຈົນກະດູກດຳຢູ່ເອີລົບດ້ວຍການເອົາກ້ອນດິນຈີ່ຄ້າງໄຟ ທຳຄວາມຮ້ອນເພື່ອໃຊ້ທົດແທນເຕົາຝີງ ແລະ ຍັງບໍ່ມີວັນທີ່ເພີ່ນທໍ້ຖອຍໃຈ, ຫວາດຫວັ່ນຕໍ່ຄວາມຫຍຸ້ງຍາກໃນໄລຍະພຳນັກຢູ່ບັນດາທະວີບໃນໂລກນີ້.
ຖືຜົນປະໂຫຍດຂອງປະເທດຊາດເໜືອກວ່າສິ່ງໃດໝົດ
ທ່ານສາດສະດາຈານ, ດຣ ວູ້ມິນຢາງ ປະທານສະພາວິທະຍາສາດ ແລະ ກໍ່ສ້າງ, ມະຫາວິທະຍາໄລແຫ່ງຊາດຮ່າໂນ້ຍ ຖືວ່າ ເຈດຈຳນົງ ແລະ ມານະຈິດແມ່ນ 2 ປັດໄຈທີ່ສຳຄັນທີ່ສຸດເພື່ອຊ່ວຍ ທ່ານປະທານໂຮ່ຈິມິນສາມາດເດີນທາງອອກຈາກປະເທດຊາດເພື່ອຊອກຫາເສັ້ນທາງກູ້ຊາດ. ແລະ ກໍຍ້ອນເຈດຈຳນົງ ແລະ ມານະຈິດນັ້ນ ໄດ້ຊ່ວຍໃຫ້ອ້າຍບ່າວໃນຄາວນັ້ນສາມາດຜ່ານຜ່າທຸກຄວາມຫຍຸ້ງຍາກລຳບາກໃນໄລຍະພຳນັກຢູ່ຕ່າງປະເທດໃນຕະຫຼອດ 30 ປີ. ໜຶ່ງໃນບັນດາປັດໄຈຕັດສິນຜົນສຳເລັດຂອງການເດີນທາງອອກຈາກປະເທດຊາດ ເພື່ອຊອກຫາເສັ້ນທາງກູ້ຊາດຂອງທ່ານປະທານໂຮ່ຈິມິນ ນັ້ນແມ່ນເພິ່ນຍາມໃດກໍຖືຜົນປະໂຫຍດຂອງປະເທດຊາດເໜືອກວ່າສິ່ງໃດໝົດ. ທ່ານສາດສະດາຈານ, ດຣ ວູ້ມິນຢາງ ກ່າວວ່າ :
“ປັດໄຈຕັດສິນຜົນສຳເລັດຂອງການເດີນທາງອອກຈາກປະເທດຊາດ ເພື່ອຊອກຫາເສັ້ນທາງກູ້ຊາດນັ້ນ, ກໍແມ່ນ ຄຳສັບ ຊົນຊາດ. ທີ່ກອງປະຊຸມໃຫຍ່ສ້າງຕັ້ງພັກກອມມູນິດຝະລັ່ງເມື່ອປີ 1920, ເພິ່ນໄດ້ຕັ້ງເອົາຊື່ແກ່ຕົນວ່າ ຫງວຽນອ້າຍກ໋ວກ ແລະ ໄດ້ມີບົດກ່າວປາໄສທີ່ສຳຄັນ, ສະໜັບສະໜູນຂະບວນການສາກົນ 3, ສະໜັບສະໜູນທ່າອຽງມາກຊິດເພາະສະໜັບສະໜູນປະເທດຫົວເມືອງ ຂຶ້ນ, ໃນນັ້ນ ມີປະເທດຫວຽດນາມ. ເປັນອັນວ່າ ຖ້າຫາກທິດສະດີອາດຈະດູດດື່ມກວ່ານັ້ນ, ແຕ່ບໍ່ສະໜັບສະໜູນປະເທດຫົວເມືອງຂຶ້ນນັ້ນ, ລັດທິມາກ ກໍບໍ່ກະທົບເຖິງຫົວໃຈຂອງຫງວຽນອ້າຍກ໋ວກ. ດັ່ງນັ້ນປັດໄຈສຳຄັນກວ່າໝູ່ແມ່ນເພິ່ນຮັກຊາດ, ເພື່ອຜົນປະໂຫຍດຂອງຊາດ ”
ພາຍຫຼັງຊຸມວັນເດືອນປີທີ່ໄດ້ພຳນັກ ແລະ ເຄື່ອນໄຫວປະຕິວັດຢູ່ຕ່າງປະເທດ, ອ້າຍບ່າວ ຫງວຽນເຕິດແທ່ງ (ໝາຍເຖິງທ່ານປະທານໂຮ່ຈິມິນ) ໄດ້ກາຍເປັນຜູ້ພາທາງໃຫ້ທັງຊາດຫວຽດນາມ ແລະ ເຫດການວັນທີ 5/6/1911 ແມ່ນມີຄວາມໝາຍສຳຄັນຍິ່ງໃນປະຫວັດສາດຂອງຊາດຫວຽດນາມ. ທ່ານ ດຣ ເລດິງນຳ, ຮອງຫົວໜ້າພະແນກແນວຄິດໂຮ່ຈິມິນ, ສະຖາບັນສື່ມວນຊົນ ແລະ ໂຄສະນາຖືວ່າ : ເສັ້ນທາງເອກະລາດແຫ່ງຊາດຕິດພັນກັບລັດທິສັງຄົມນິຍົມ ຊຶ່ງທ່ານ ປະທານໂຮ່ຈິມິນໄດ້ເລືອກເຟັ້ນແມ່ນເສັ້ນທາງໜຶ່ງດຽວ ແລະ ຖືກຕ້ອງ ຮັບປະກັນໃຫ້ຊາດຫວຽດນາມມີພື້ນຖານເອກະລາດຢ່າງແທ້ຈິງ. ທ່ານ ດຣ ເລດິງນຳ ຢືນຢັນວ່າ :
“ ພັກກອມມູນິດຫວຽດນາມໄດ້ຮັບຮູ້ກ່ຽວກັບທີ່ຕັ້ງບົດບາດຂອງແນວຄິດໂຮ່ຈິມິນໂດຍໄວ. ໃນມໍ່ໆມານີ້, ພັກເຮົາໄດ້ເຫັນວ່າ ບໍ່ພຽງແຕ່ຮ່ຳຮຽນຕາມແນວຄິດ ທ່ານປະທານໂຮ່ຈິມິນເທົ່ານັ້ນ, ຫາກຍັງຮ່ຳຮຽນ ແລະ ເຮັດຕາມແບບຢ່າງຄຸນສົມບັດຂອງເພິ່ນອີກດ້ວຍ. ພັກເຮົານັບມື້ນັບເຫັນໄດ້ເຖິງຄວາມສຳຄັນຂອງແນວຄິດ ຄຸນສົມບັດ, ແບບແຜນການດຳລົງຊີວິດຂອງ ທ່ານປະທານໂຮ່ຈິມິນໃນຊີວິດສັງຄົມ”
ການເລືອກເຟັ້ນອັນຖືກຕ້ອງ ແລະ ຄຸນງາມຄວາມດີຂອງ ທ່ານປະທານໂຮ່ຈິມິນໃນໄລຍະທາງ 30 ປີແຫ່ງການໄປຊອກຫາເສັ້ນທາງກູ້ຊາດນັ້ນ ໄດ້ປັບປຸງຄວາມເຊື່ອໝັ້ນຕື່ມອີກເພື່ອໃຫ້ຊາດຫວຽດນາມສືບຕໍ່ເຊີດຊູຄັນທຸງເອກະລາດແຫ່ງຊາດ ແລະ ລັດທິສັງຄົມນິຍົມ. ກ້າວຂຶ້ນຢ່າງໝັ້ນຄົງບົນເສັ້ນທາງທີ່ເພິ່ນໄດ້ເລືອກເຟັ້ນ, ຍູ້ແຮງກິດຈະການປ່ຽນແປງໃໝ່ຢ່າງຮອບດ້ານ, ປະຕິບັດພາລະກິດຫັນປະເທດຊາດເປັນອຸດສາຫະກຳ ແລະ ທັນສະໄໝຢ່າງສຳເລັດຜົນ ບໍ່ພຽງແຕ່ແມ່ນຄວາມເຊື່ອໝັ້ນເທົ່ານັ້ນ ຫາກຍັງສະແດງອອກຜ່ານວຽກງານປະຈຳວັນຂອງຊາວຫວຽດນາມແຕ່ລະຄົນອີກດ້ວຍ.