(vovworld)- ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຫວຽດນາມ ຊຸດທີ 13 ໄດ້ສະຫງວນເວລາ 2 ມື້ເຄິ່ງເພື່ອດຳເນີນວາລະຊັກຖາມ ແລະ ຕອບຄຳຊັກຖາມບັນດາສະມາຊິກລັດຖະບານ. ບັນດາສະມາຊິກສະພາແຫ່ງຊາດ(ສສຊ) ໄດ້ຊັກຖາມລັດຖະມົນຕີ 4 ທ່ານ ແລະ ທ່ານຮອງນາຍົກລັດຖະມົນຕີ ຫງວຽນຊວນຟຸກ ໄດ້ຮັບສິດມອບໝາຍຈາກນາຍົກລັດຖະມົນຕີ ເຮັດແຈ້ງບາງບັນຫາຕື່ມອີກໃນການຊີ້ນຳ, ບໍລິຫານເສດຖະກິດ ສັງຄົມ ຂຶ້ນກັບຫນ້າທີ່ຂອງລັດຖະບານ ແລະ ຕອບຄຳຊັກຖາມໂດຍກົງຂອງ ສສຊ.
ທ່ານຫງວຽນກວນ, ລັດຖະມົນຕີວ່າການກະຊວງວິທະຍາສາດ
ເຕັກໂນໂລຊີ ຕອບຄຳຊັກຖາມ
ພາບ:chinhphu.vn
|
ການຊັກຖາມ ແມ່ນການເຄື່ອນໄຫວຕິດຕາມກວດກາທີ່ສຳຄັນ. ການຊັກຖາມແມ່ນນຳເອົາສຽງເວົ້າຂອງຜູ້ມີສິດເລືອກຕັ້ງ, ຂອງປະຊາຊົນ ຊື່ງ ສສຊ ແມ່ນຜູ້ຕາງຫນ້າຊັກຖາມບັນດາສະມາຊິກລັດຖະບານ ແລະ ບັນດາສະມາຊິກອື່ນໃນກົງຈັກລັດ, ເຮັດແຈ້ງບັນດາບັນຫາຊື່ງຫາງສຽງສົນໃຈ, ຜູ້ມີສິດເລືອກຕັ້ງຂັດໃຈ ແລະ ສສຊ ສົນໃຈ. ທີ່ ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຫວຽດນາມ ຊຸດທີ 13, ຄະນະປະຈຳສະພາແຫ່ງຊາດ ໄດ້ຮັບເອກະສານຊັກຖາມ 46 ສະບັບ ດ້ວຍ 61 ຄຳຖາມຂອງ ສສຊ ສົ່ງເຖິງນາຍົກລັດຖະມົນຕີ ແລະ ລັດຖະມົນຕີ, ການນຳຂະແຫນງ 15 ທ່ານ.
ບັນດາບັນຫາພວມໄດ້ຮັບຄວາມສົນໃຈຈາງຫາງສຽງລ້ວນແຕ່ຖືກຍົກອອກມາຊັກຖາມ
ທີ່ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຫວຽດນາມ ຊຸດທີ 13 ຄັ້ງນີ້, ລັດຖະມົນຕີ 4 ທ່ານ ຕອບຄຳຊັກຖາມ ນັ້ນແມ່ນ ລັດຖະມົນຕີວ່າການກະຊວງກະສິກຳ ແລະ ພັດທະນາຊົນນະບົດ, ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ, ລັດຖະມົນຕີວ່າການກະຊວງວິທະຍາສາດ ແລະ ເຕັກໂນໂລຊີ, ລັດຖະມົນຕີວ່າການກະຊວງສຶກສາ ແລະ ບຳລຸງສ້າງ. ມ້ວນທ້າຍວາລະຊັກຖາມໃນຕອນເຊົ້າວັນທີ 13/6, ທ່ານຮອງນາຍົກລັດຖະມົນຕີ ຫງວຽນຊວນຟຸກ ຕາງຫນ້າໃຫ້ລັດຖະບານ ເຮັດແຈ້ງບາງບັນຫາຕື່ມອີກໃນການຊີ້ນຳ, ບໍລິຫານເສດຖະກິດສັງຄົມ ຂຶ້ນກັບຄວາມຮັບຜິດຊອບຂອງລັດຖະບານ ແລະ ຕອບຄຳຊັກຖາມໂດຍກົງ ຂອງບັນດາສສຊ. ທ່ານ ເລໂບ້ຫລີງ, ຮອງຫົວຫນ້າກຳມາທິການວິທະຍາສາດ, ເຕັກໂນໂລຊີ ແລະ ສິ່ງແວດລ້ອມຂອງສະພາແຫ່ງຊາດ, ກຳມະການຄະນະເລຂາຂອງ ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຫວຽດນາມ ຊຸດທີ 13 ຖືວ່າ:
“ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຫວຽດນາມ ຊຸດທີ 13 ຄັ້ງນີ້ ຊັກຖາມລັດຖະມົນຕີ 4 ທ່ານ, ໃນນັ້ນ 2 ທ່ານແມ່ນ ຮັບຜິດຊອບກ່ຽວກັບຂົງເຂດເສດຖະກິດ ແລະ 2 ທ່ານ ແມ່ນຮັບຜິດຊອບຂົງເຂດວິທະຍາສາດເຕັກໂນໂລຊີ ແລະ ການສຶກສາບຳລຸງສ້າງ. ຂ້າພະເຈົ້າຖືວ່າ ນີ້ແມ່ນບັນດາບັນຫາພື້ນຖານທີ່ສຸດສຳລັບການພັດທະນາເສດຖະກິດສັງຄົມ, ພິເສດ ແມ່ນບັນຫາການຜະລິດຕິດພັນກັບຕະຫລາດຈຳຫນ່າຍ.”
ບັນດາບັນຫາຍົກອອກມາຊັກຖາມບັນດາສະມາຊິກລັດຖະບານຄັ້ງນີ້ ລ້ວນແຕ່ສຸມໃສ່ບັນຫາທີ່ພວມໄດ້ຮັບຄວາມສົນໃຈເປັນພິເສດຈາງຫາງສຽງໃນສັງຄົມ. ນັ້ນແມ່ນ ມາດຕະການພັດທະນາຕະຫລາດສົ່ງອອກໃນສະພາບການທີ່ຫວຽດນາມ ໄດ້ ແລະ ພວມເຂົ້າຮ່ວມ, ລົງນາມໃນສັນຍາການຄ້າຫລາຍສະບັບ, ຊອກຫາສົ້ນອອກໃຫ້ແກ່ບັນດາຜະລິດຕະພັນກະສິກຳ, ຍູ້ແຮງການຈໍລະຈອນສິນຄ້າໂດຍຫວຽດນາມ ຜະລິດ; ກົນໄກບໍລິຫານລາຄາບັນດາປະເພດສິນຄ້າທີ່ຈຳເປັນຄື: ນ້ຳມັນ, ໄຟຟ້າ, ຖ່ານຫີນ, ການໝູນໃຊ້ວິທະຍາສາດເຕັກໂນໂລຊີເຂົ້າໃນການຜະລິດ ເພື່ອຍົກສູງກຳລັງຄວາມສາມາດແກ້ງແຍ້ງ ແລະ ພັດທະນາແບບຍືນຍົງ, ປະສິດທິຜົນການນຳໃຊ້ງົບປະມານວິທະຍາສາດ ແລະ ເຕັກໂນໂລຊີ, ມາດຕະການຜັນຂະຫຍາຍບັນດາມະຕິຂອງສະພາແຫ່ງຊາດກ່ຽວກັບການປ່ຽນໃຫມ່ຫລັກສູດ, ປື້ມຕຳລາມັດທະຍົມຢ່າງມີປະສິດທິຜົນ, ປ່ຽນໃຫມ່ວິທີການຈັດຕັ້ງການສອບເສັງແຫ່ງຊາດ.
ພາຍຫລັງຊັກຖາມ ໂຄງການດຳເນີນງານຕ້ອງໄດ້ຮັບການປະຕິບັດລະອຽດ
ວາລະຊັກຖາມທີ່ ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຫວຽດນາມ ຊຸດທີ 13 ຄັ້ງນີ້ ມີການປ່ຽນໃຫມ່, ຕາມນັ້ນແລ້ວ ບັນດາບົດລາຍງານລ້ວນແຕ່ກະທັດລັດ, ບັນດາທ່ານລັດຖະມົນຕີ, ການນຳຂະແຫນງສຸມໃສ່ຕອບຄຳຖາມໂດຍກົງ. ສສຊ ກໍຄືຜູ້ມີສິດເລືອກຕັ້ງ ປາດຖະຫນາຢາກບັນດາລັດຖະມົນຕີ ຕ້ອງຍົກອອກມາດຕະການແກ້ໄຂ ບັນດາບັນຫາຢ່າງ ລະອຽດ . ທ່ານ ເລຍືຕຽນ, ຮອງຫົວຫນ້າກຳມາທິການວັດທະນະທຳ, ສຶກສາ, ຊາວຫນຸ່ມ ເຍົາວະຊົນ ແລະ ອະນຸຊົນ ຂອງສະພາແຫ່ງຊາດ, ສສຊ ແຂວງ ກວ໋າງຈີ້ ຖືວ່າ:
“ສິ່ງສຳຄັນຂອງການຊັກຖາມແມ່ນ ຕ້ອງກຳນົດໄດ້ຄວາມຮັບຜິດຊອບຂອງສ່ວນບຸກຄົນ ຫາກບໍ່ແມ່ນຊັກຖາມເພື່ອຊອກຮູ້ຂໍ້ມູນຂ່າວສານ. ພາຍຫລັງຊັກຖາມ ຕ້ອງມີການກະທຳ ຫາກບໍ່ດັ່ງນັ້ນ ການເຄື່ອນໄຫວຊັກຖາມຈະບໍ່ມີຄວາມໝາຍ.”
ມີ ສສຊ ຫລາຍທ່ານ ຖືວ່າ: ໂຄງການດຳເນີນງານປະຕິບັດບັນດາເນື້ອໃນຂອງບັນດາລັດຖະມົນຕີ ພາຍຫລັງຕອບຄຳຊັກຖາມໃຫມ່ ແມ່ນໄມ້ວັດແທກຄຸນຄ່າສຳລັບຜູ້ມີສິດເລືອກຕັ້ງ. ທ່ານນາງ ຫງວຽນແທງຫາຍ, ສສຊ ແຂວງ ຮ່ວາບີງ ໃຫ້ຮູ້ວ່າ:
“ສສຊ ສາມາດຊັກຖາມໃນຕະຫລອດປີ ຫາກບໍ່ພຽງແຕ່ໃນກອງປະຊຸມສະໄຫມສາມັນຂອງສະພາແຫ່ງຊາດ. ຂ້າພະເຈົ້າ ແລະ ສສຊ ຫລາຍທ່ານມີຄວາມສົນໃຈ ເຖິງໝາກຜົນພາຍຫລັງການຕິດຕາມກວດກາ, ໃນນັ້ນ ມີການຊັກຖາມ. ໝາກຜົນການຊັກຖາມ ຈະຊຸກຍູ້ການພັດທະນາເສດຖະເກິດ ສັງຄົມ.”
ທີ່ບັນດາກອງປະຊຸມສະໄຫມສາມັນຂອງສະພາແຫ່ງຊາດ, ການເຄື່ອນໄຫວຊັກຖາມ ແລະ ຕອບຄຳຊັກຖາມ ໄດ້ສ້າງບັນຍາກາດເປີດອົກເປີດໃຈ, ກົງໄປກົງມາ ແລະ ປະຊາທິປະໄຕ. ໃນກອງປະຊຸມສະໄຫມສາມັນຂອງສະພາແຫ່ງຊາດ ແຕ່ລະເທື່ອ, ທຸກບັນຫາສຳຄັນຂອງປະເທດຊາດລ້ວນແຕ່ຖືກຍົກອອກມາຊັກຖາມ, ຕອບສະຫນອງຄວາມມຸ້ງມາດປາດຖະຫນາຂອງຜູ້ມີສິດເລືອກຕັ້ງ. ປະຊາຊົນ ແລະ ຜູ້ມີສິດເລືອກຕັ້ງໃນທົ່ວປະເທດມີຄວາມສົນໃຈ, ຕິດຕາມວາລະຊັກຖາມ ດ້ວຍຄວາມປາດຖະຫນາຢາກສະພາແຫ່ງຊາດຊອກໄດ້ບັນດາມາດຕະການເພື່ອນຳປະເທດຊາດກ້າວຂຶ້ນ. ໃນໄລຍະຜ່ານມາ, ບັນດາກອງປະຊຸມສະໄຫມສາມັນຂອງສະພາແຫ່ງຊາດ ໄດ້ຕອບຫລາຍຄຳຊັກຖາມ ດ້ວຍຈິດໃຈກົງໄປກົງມາ, ສ້າງສັນ ແລະ ມີຄຳໝັ້ນໝາຍຫລາຍຢ່າງໄດ້ ປະກົດຜົນເປັນຈິງ, ອັນໄດ້ສ້າງຄວາມໄວ້ເນື້ອເຊື່ອໃຈໃຫ້ຜູ້ມີສິດເລືອກຕັ້ງ, ປະຊາຊົນໃນທົ່ວປະເທດ .