ດ້ວຍອັດຕາຜູ້ມີສິດເລືອກຕັ້ງໄປປ່ອນບັດບັນລຸ 99,35%, ຊຶ່ງແມ່ນອັດຕາສູງສຸດໃນບັນດາການເລືອກຕັ້ງຄັ້ງມໍ່ໆມານີ້, ຈຳນວນຜູ້ໄດ້ຮັບການເລືອກຕັ້ງແມ່ນຄົນໜຸ່ມ, ມີລະດັບວຸດທິສຶກສາຂັ້ນມະຫາວິທະຍາໄລ, ເໜືອມະຫາວິທະຍາໄລແມ່ນຫຼາຍກວ່າເມື່ອທຽບໃສ່ຊຸດກ່ອນໆ. ການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນອາຍຸການ 2016-2021 ໄດ້ປະສົບຜົນສຳເລັດຢ່າງຈົບງາມ, ໝາກຜົນການເລືອກຕັ້ງສ່ອງແສງເຖິງການເລືອກເຟັ້ນຂອງຜູ້ມີສິດເລືອກຕັ້ງໃນທົ່ວປະເທດຢ່າງຖືກຕ້ອງ.
“ໄຊຊະນະທຳອິດ ແລະ ສຳຄັນກວ່າໝູ່ຂອງ ການເລືອກຕັ້ງຄັ້ງນີ້ ກໍແມ່ນໄຊຊະນະຂອງປະຊາທິປະໄຕ, ການເປີດເຜີຍ ແລະ ຄວາມໂປ່ງໃສ”. ນັ້ນແມ່ນຄຳຢືນຢັນຂອງທ່ານຫງວຽນແຫ້ງຟຸກ, ເລຂາທິການໃຫຍ່ສະພາແຫ່ງຊາດຫວຽດນາມ, ຫົວໜ້າຫ້ອງການສະພາເລືອກຕັ້ງແຫ່ງຊາດ ກ່ຽວກັບໝາກຜົນການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນອາຍຸການ 2016-2021 ໃນວັນທີ 22/5 ທີ່ຜ່ານມາ.
ຮັບປະກັນປະຊາທິປະໄຕ, ເປີດເຜີຍ ແລະ ກະຈ່າງແຈ້ງ
ຄວາມຈິງໃນ ການເລືອກຕັ້ງຄັ້ງນີ້, ຢູ່ທຸກທ້ອງຖິ່ນໃນທົ່ວປະເທດ, ຈາກການເລືອກເອົາຜູ້ສະໝັກຮັບເລືອກຕັ້ງ, ຮັບເອົາຄຳເຫັນຂອງຜູ້ມີສິດເລືອກຕັ້ງຢູ່ບ່ອນເຂົາເຈົ້າຢູ່ອາໄສ, ບ່ອນເຮັດວຽກຕະຫຼອດຮອດການດຳເນີນການປຶກສາຫາລືຮອບຕ່າງໆເພື່ອຂຶ້ນບັນຊີລາຍຊື່ ຜູ້ສະໝັກຮັບເລືອກຕັ້ງ ກໍລ້ວນແຕ່ຖືກດຳເນີນຢ່າງມີປະຊາທິປະໄຕ, ຖືກກັບກົດໝາຍ, ຮັບປະກັການເປີດເຜີຍ ແລະ ກະຈ່າງແຈ້ງ ແລະ ຍຸດຕິທຳ. ວິວັດການຂົນຂວາຍຫາສຽງເລືອກຕັ້ງຂອງບັນດາ ຜູ້ສະໝັກຮັບເລືອກຕັ້ງກໍໄດ້ປະຕິບັດຢ່າງເປີດເຜີຍ ແລະ ກະຈ່າງແຈ້ງ ແລະ ຍຸດຕິທຳ.
ຫຼັກການເລືອກຕັ້ງຢູ່ຫວຽດນາມໄດ້ຮັບການກຳນົດຈາກກົດໝາຍວ່າດ້ວຍການເລືອກຕັ້ງ ສ.ສ.ຊ ແລະ ສະມາຊິກສະພາປະຊາຊົນວ່າ : ສາມັນ, ຍຸດຕິທຳ, ໂດຍກົງ ແລະ ປ່ອນບັດລັບ. ຕາມການກຳນົດຂອງກົດໝາຍວ່າດ້ວຍການ ເລືອກຕັ້ງ ສ.ສ.ຊ ແລະ ສະມາຊິກສະພາປະຊາຊົນ, ເປັນຄັ້ງທຳອິດໃນການເລືອກຕັ້ງຄັ້ງນີ້, ຄະນະກຳມະການເລືອກຕັ້ງແຫ່ງຊາດປະຕິບັດຂໍ້ກຳນົດອະນຸຍາດໃຫ້ຜູ້ສະໝັກຮັບເລືອກຕັ້ງ, ອົງການສຳນັກງານ, ຫົວໜ່ວຍ, ຈັດຕັ້ງແນະນຳຜູ້ສະໝັກຮັບເລືອກຕັ້ງຫຼືຜູ້ໄດ້ຮັບການມອບໝາຍມີສິດເປັນສັກຂີພິຍານການນັບບັດ. ນັກຂ່າວກໍມີສິດເປັນສັກຂີພິຍານການນັບບັດ. ນີ້ແມ່ນບາດກ້າວເດີນທີ່ສຳຄັນ ຮັບປະກັນໃຫ້ການເລືອກຕັ້ງສະມາຊິກສະພາແຫ່ງຊາດສະມາຊິກສະພາປະຊາຊົນຂັ້ນຕ່າງໆຢູ່ຫວຽດນາມມີ ປະຊາທິປະໄຕ, ເປີດເຜີຍ ແລະ ກະຈ່າງແຈ້ງ.
ເຄົາລົບສິດເລືອກເຟັ້ນຂອງ ຜູ້ມີສິດເລືອກຕັ້ງ
ໃນການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນອາຍຸການ 2016-2021, ມີ 21 ຄົນບໍ່ແມ່ນສະມາຊິກພັກໄດ້ຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ 14. ໝາກຜົນນີ້ໄດ້ສ່ອງແສງເຖິງການເລືອກເຟັ້ນ, ເຈດຈຳນົງ ແລະ ຄວາມມຸ່ງມາດປາດຖະໜາຂອງຜູ້ມີສິດເລືອກຕັ້ງ ເພາະຕາມ ກົດໝາຍວ່າດ້ວຍການເລືອກຕັ້ງ ສ.ສ.ຊ ແລະ ສະມາຊິກສະພາປະຊາຊົນນັ້ນ, ຜູ້ມີສິດເລືອກຕັ້ງມີສິດເລືອກເອົາຜູ້ເປັນຕົວແທນຂອງຕົນ ເຂົ້າໃນອົງການທີ່ມີອຳນາດແຫ່ງລັດສູງສຸດ.
ເລື່ອງມີຜູ້ອອກສະໝັກຮັບເລືອກຕັ້ງເອງ 2 ຄົນໄດ້ຮັບການເລືອກຕັ້ງເປັນສະມາຊິກສະພາແຫ່ງຊາດຊຸດທີ 14 ກໍແມ່ນເລີ່ມມາຈາກການເລືອກເຟັ້ນຂອງ ຜູ້ມີສິດເລືອກຕັ້ງ. ໃນມາດຕາ 27 ຂອງລັດຖະທຳມະນູນຫວຽດນາມໄດ້ລະບຸວ່າ : “ ພົນລະເມືອງຫວຽດນາມມີອາຍຸຄົບ 18 ປີຂຶ້ນໄປ ແມ່ນມີສິດໄປປ່ອນບັດເລືອກຕັ້ງ ແລະ ຖ້າຫາກມີອາຍຸຄົບ 21 ປີຂຶ້ນໄປ ແມ່ນມີສິດອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ”. ກົດໝາຍກ່ຽວກັບການເລືອກຕັ້ງຂອງຫວຽດນາມ ກໍສ້າງເງື່ອນໄຂສະດວກທີ່ສຸດໃຫ້ແກ່ບັນດາພົນລະເມືອງປະຕິບັດສິດອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ. ກໍເຊັ່ນດຽວກັນກັບບັນດາປະເທດໃນໂລກ, ເພື່ອມີຊື່ໃນບັນຊີລາຍຊື່ຂອງການເລືອກຕັ້ງ, ຜູ້ສະໝັກຮັບເລືອກຕັ້ງທຸກໆຄົນ ໂດຍບໍ່ຈຳແນກອາຊີບ, ຕຳແໜ່ງ, ຜູ້ໄດ້ຮັບການສະເໜີ ແລະ ຜູ້ອອກສະໝັກຮັບເລືອກຕັ້ງເອງ ກໍລ້ວນແຕ່ຕ້ອງຜ່ານການປຶກສາຫາລືຮອບຕ່າງໆໂດຍແນວໂຮມປະເທດຊາດເປັນປະທານ, ເພື່ອໃຫ້ຜູ້ມີສິດເລືອກຕັ້ງຢູ່ບ່ອນເຮັດວຽກ ແລະ ບ່ອນທີ່ເຂົາເຈົ້າຢູ່ອາໄສປະກອບຄຳຄິດເຫັນ, ເລືອກເຟັ້ນດ້ວຍຮູບການປ່ອນບັດໄວ້ວາງໃຈ. ສຳລັບການຂົນຂວາຍຫາສຽງເລືອກຕັ້ງກໍໄດ້ຮັບການດຳເນີນຢ່າງເປີດເຜີຍ ແລະ ຍຸດຕິທຳ ແລະ ໄດ້ຮັບການຕິດຕາມຢ່າງຈາກປະຊາຊົນ. ຢູ່ຕາມສະຖານທີ່ປ່ອນບັດ, ດ້ວຍບັດເລືອກຕັ້ງຂອງຕົນ, ຜູ້ມີສິດເລືອກຕັ້ງຈະຕັດສິນເລືອກເອົາຜູ້ໃດທີ່ເໝາະສົມເພື່ອເຂົ້າເປັນສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນຕ່າງໆ. ເປັນອັນວ່າ ມີບາງຄົນອອກສະໝັກຮັບເລືອກຕັ້ງເອງ ຈະໄດ້ຮັບການເລືອກຕັ້ງຫຼືບໍ່ນັ້ນ ກໍລ້ວນແຕ່ຂຶ້ນກັບຄວາມໄວ້ວາງໃຈຂອງ ຜູ້ມີສິດເລືອກຕັ້ງສຳລັບເຂົາເຈົ້າ.
ການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນອາຍຸການ 2016-2021 ຢູ່ຫວຽດນາມ, ສັງເກດໂດຍສັງລວມແລ້ວ ແມ່ນການເລືອກຕັ້ງຢ່າງປະສົບຜົນສຳເລັດເພາະການເລືອກເຟັ້ນຂອງຜູ້ມີສິດເລືອກຕັ້ງແມ່ນປັດໄຈສຳຄັນສ້າງໃຫ້ມີໝາກຜົນຂອງການເລືອກຕັ້ງຄັ້ງນີ້.