ທ່ານ ລ້າຍຮວ່າງເຢືອງ, ຫົວໜ້າບໍລິສັດຫຸ້ນສ່ວນສື່ສານ ແລະ ຄອມພິວເຕີ ແທັງຢ໋ອງ (ພາບ: ຄອມພິວເຕີແທັງຢ໋ອງ)

ເກືອບ 20 ປີແຫ່ງວັນກໍ່ຕັ້ງ, ມາຮອດປະຈຸບັນ, ແທັງຢ໋ອງ ໄດ້ກາຍເປັນໜຶ່ງໃນຈຳນວນ 5 ເຄື່ອງໝາຍການຄ້າຄອມພິວເຕີ ຫວຽດນາມ ທີ່ມີອິດທິພົນຊື່ສຽງ, ສະໜອງຫຼາຍມາດຕະການເຕັກໂນໂລຊີໃໝ່, ດ້ວຍເຄື່ອງອາໄຫຼ່ 66% ທີ່ໄດ້ຜະລິດຢູ່ພາຍໃນປະເທດ. ບໍລິສັດມີ 4 ຜະລິດຕະພັນຕົ້ນຕໍ, ແມ່ນ: ຄອມພິວເຕີສ່ວນບຸກຄົນ (personal computer), ຄອມພິວເຕີຫ້ອງການ, ຄອມພິວເຕີວິສາຫະກິດ ແລະ ຄອມພິວເຕີໂຄງການ.

ເດືອນ ພຶດສະພາ 2024, ບໍລິສັດຄອມພິວເຕີ ແທັງຢ໋ອງ ໄດ້ຮັບລາງວັນ ຊາວຊາງ (ດວງດາວໃສແຈ້ງ) ດ້ວຍເຄື່ອງໝາຍການຄ້າ “ນັກສະໜອງຜະລິດຕະພັນຄອມພິວເຕີ ແທັງຢ໋ອງ - SSTC MAKE IN VIETNAM ທີ່ໄດ້ຮັບຄວາມນິຍົມ”. ນອກນັ້ນ, ຍັງມີຫຼາຍລາງວັນອື່ນໃນໄລຍະຜ່ານມາ. ທ່ານ ລ້າຍຮວ່າງເຢືອງ, ຫົວໜ້າບໍລິສັດຫຸ້ນສ່ວນສື່ສານ ແລະ ຄອມພິວເຕີ ແທັງຢ໋ອງ, ແບ່ງປັນວ່າ:

“ຈຸດເວລາທີ່ພວກຂ້າພະເຈົ້າສະເໜີຕົວໃນຕະຫຼາດນັ້ນ, ເຖິງວ່າ ຫວຽດນາມ ໄດ້ເປີດປະຕູຕະຫຼາດແລ້ວ, ແຕ່ແຫຼ່ງຂໍ້ມູນຍັງຖືກຈຳກັດຢູ່. ສະນັ້ນ, ແຫຼ່ງສະໜອງເພື່ອຜະລິດກໍ່ຕ້ອງອີງໃສ່ບັນດານັກສະໜອງຂອງບັນດາບໍລິສັດ ຫວຽດນາມ ຫຼາຍທີ່ສຸດ. ທີ 2 ແມ່ນຄວາມຫຍຸ້ງຍາກດ້ານທຶນ, ເພື່ອດຳເນີນທຸລະກິດຕ້ອງມີທຶນ, ເພື່ອຊື້ໂຮງຈັກ, ຊື້ຕ່ອງໂສ້ການຜະລິດ, ຊື້ເຕັກໂນໂລຊີ… ສຸດທ້າຍ, ສິ່ງສຳຄັນທີ່ສຸດແມ່ນ, ພາຍຫຼັງໄດ້ຮັບການໜູນຊ່ວຍຂອງ ລັດ, ພວກຂ້າພະເຈົ້າໄດ້ສ້າງແຜນການລະອຽດເພື່ອຜະລິດອອກຜະລິດຕະພັນ”.

ທ່ານຫົວໜ້າບໍລິສັດ ລ້າຍຮວ່າງເຢືອງ ໃຫ້ຮູ້ວ່າ, ທາງບໍລິສັດມີເຂັດລັບສະເພາະເພື່ອບັນລຸຜົນສຳເລັດ, ສ້າງຜະລິດຕະພັນຮັກສາຄວາມລັບສູງຜ່ານການດັດປັບເຕັກໂນໂລຊີ, ຄົ້ນຄວ້າສະສົມຊອບແວຕ້ານການລັກຂໍ້ມູນ ແລະ ຄວາມສ່ຽງດ້ານມານແວຢ່າງບັນລຸປະສິດທິຜົນ.

“ຜະລິດຕະພັນທັງໝົດລ້ວນແຕ່ມີຈຸດທີ່ພວກເຮົາເອີ້ນວ່າຈຸດອ່ອນ. ສະນັ້ນ, ຈຸດອ່ອນຂອງຜະລິດຕະພັນເຕັກໂນໂລຊີນັ້ນແມ່ນ ເລື່ອງລູກຄ້ານຳໃຊ້ເຄື່ອງເຕັກໂນໂລຊີອາດຈະເສຍແຫຼ່ງຂໍ້ມູນ. ພວກຂ້າພະເຈົ້າໄດ້ຜະລິດອອກຜະລິດຕະພັນແກ້ໄຂບັນດາຈຸດອ່ອນນັ້ນ, ປົກປ້ອງແຫຼ່ງຂໍ້ມູນຂອງຜູ້ບໍລິໂພກ”.

ຂັນ ແລະ ໃບຢັ້ງຢືນຮັບລາງວັນ  (ພາບ: ຄອມພິວເຕີ ແທັງຢ໋ອງ)

ນອກຈາກການລົງທຶນໂຮງຈັກຜະລິດຕ່ອງໂສ້ການຜະລິດຕາມຂອບເຂດອຸດສາຫະກຳ, ທາງບໍສັດຍັງຮ່ວມມືກັບກຸ່ມບໍລິສັດ C.P.R (ຍີ່ປຸ່ນ) ເພື່ອຖ່າຍທອດເຕັກໂນໂລຊີຜະລິດເຄື່ອງຄອມພິວເຕີຢູ່ ຫວຽດນາມ, ຕາມມາດຕະຖານ ຍີ່ປຸ່ນ. ນອກນັ້ນ, ແທັງຢ໋ອງ ກໍ່ຮ່ວມສຳພັນກັບກຸ່ມບໍລິສັດຂອງ ສິງກະໂປ ຈຳນວນໜຶ່ງ ເພື່ອລົງທຶນຕ່ອງໂສ້ເຕັກໂນໂລຊີ ແລັບທອັບ (laptop). ທ່ານ ຫງວຽນຕວນມິງ, ປະທານສະຫະສະມາຄົມຄອມພິວເຕີຫ້ອງການ ຫວຽດນາມ, ໃຫ້ຂໍ້ສັງເກດວ່າ:

“ຫວຽດນາມ ບໍ່ມີຫຼາຍຜະລິດຕະພັນມີລັກສະນະເຕັກໂນໂລຊີ ແລະ ແທັງຢ໋ອງ ແມ່ນໜຶ່ງໃນບັນດາບໍລິສັດນຳໜ້າ, ນຳໜ້າດ້ານເຕັກໂນໂລຊີ. ຕ້ອງເວົ້າວ່າ, ການຜະລິດອອກຜະລິດຕະພັນເຕັກໂນໂລຊີແມ່ນວຽກງານຫຍຸ້ງຍາກທີ່ສຸດໃນສະພາບທີ່ ຫວຽດນາມ ຍັງຈຳກັດດ້ານພື້ນຖານໂຄງລ່າງ. ເພື່ອພັດທະນາ ແລະ ຄົງຕົວໃນຕະຫຼາດ ແລະ ຢືນຢັນເຄື່ອງໝາຍ ຫວຽດນາມ ຄືໃນປະຈຸບັນນັ້ນ ແມ່ນຜົນສຳເລັດຢ່າງໃຫຍ່ຫຼວງ”.

ມາຮອດປະຈຸບັນ, ແທັງຢ໋ອງ ໄດ້ສະໜອງບັນດາມາດຕະການແກ້ໄຂດ້ານເຕັກໂນໂລຊີ, ຄື: ໜູນຊ່ວຍຊອບແວ, ອອກແບບຢ່າງມີຫົວຄິດປະດິດສ້າງຜະລິດອອກບັນດາຜະລິດຕະພັນມີລາຄາທີ່ເໝາະສົມ, ແຕ່ຍັງຕອບສະໜອງຄວາມຕ້ອງການໄດ້. ທ່ານ ລ້າຍຮວ່າງເຢືອງ, ຢັ້ງຢືນວ່າ:

“ພວກຂ້າພະເຈົ້າພວມສ້າງຜະລິດຕະພັນຕາມມາດຕະຖານ ຍີ່ປຸ່ນ ແລະ ຂ້າພະເຈົ້າຫວັງວ່າ, ພາຍຫຼັງໄລຍະໜຶ່ງອີກ, ພວກຂ້າພະເຈົ້າຈະໄດ້ຮັບໃບຢັ້ງຢືນເພື່ອສາມາດຂາຍຢູ່ຕະຫຼາດ ຍີ່ປຸ່ນ. ຫວ່າງມໍ່ໆມານີ້, ພວກຂ້າພະເຈົ້າໄດ້ລົງນາມໃນຂໍ້ຕົກລົງຮ່ວມມື (MOU) ສະບັບທຳອິດກັບ ສີລັງກາ ແລະ ມາເລເຊຍ, ມຽນມາ ກໍ່ເຫັນດີອະນຸຍາດສົ່ງເຄື່ອງແບບຕົວຢ່າງມາ. ເມື່ອເຂົາເຈົ້າເຫັນດີ, ພວກຂ້າພະເຈົ້າຫວັງວ່າ ຄອມພິວເຕີ ແທັງຢ໋ອງ ຈະມີໜ້າຢູ່ບັນດາຕະຫຼາດດັ່ງກ່າວໂດຍໄວ”.

ຫວຽດນາມ ໄດ້ຮັບການຕີລາຄາວ່າແມ່ນຕະຫຼາດດຶງດູດ ເພື່ອພັດທະນາບັນດາຜະລິດຕະພັນເຕັກໂນໂລຊີຂໍ້ມູນຂ່າວສານ. ເພື່ອໝູນໃຊ້ກາລະໂອກາດນັ້ນ, ແທັງຢ໋ອງ ໄດ້ວາງອອກຍຸດທະສາດພັດທະນາ, ໃນນັ້ນ, ສຸມໃສ່ຜະລິດຕະພັນມີມູນຄ່າສູງ, ສະເພາະດ້ານ, ພ້ອມກັນນັ້ນ ກໍ່ຍູ້ແຮງການສົ່ງອອກຄອມພິວເຕີໄປສູ່ຕ່າງປະເທດ. ນີ້ແມ່ນເປົ້າໝາຍເຊິ່ງ ແທັງຢ໋ອງ ມຸ່ງໄປເຖິງ, ບົນເສັ້ນທາງກາຍເປັນວິສາຫະກິດເຕັກໂນໂລຊີ “Make in Vietnam”.