(vovworld)- ໃນຊຸມມື້ນີ້ ບັນຍາກາດຕ້ອນຮັບບຸນວັນເພງເດືອນ 8 ດຳເນີນໄປຢ່າງຟົດຟື້ນໃນຖະຫນົນສາຍຕ່າງໆ, ພິເສດ ຢູ່ຄຸ້ມຖະຫນົນເກົ່າຮ່າໂນ້ຍ. ບັນດາຮ້ານຄ້າຢູ່ສອງຟາກທາງສ່ວນຫຼາຍແມ່ນຂາຍເຄື່ອງຫລິ້ນຂອງເດັກຫລາຍປະເພດຄື: ຫນ້າກາກ, ໂຄມໄຟ ຮູບດວງດາວ, ໂຄມໄຟເປັນພວງ, ກອງ…ພອ້ມກັບກີ່ນຫອມຂອງເຂົ້າຫນົມພື້ນເມືອງປະເພດຕ່າງໆ.
ເດັກນ້ອຍດີໃຈຫລາຍເມື່ອໄດ້ຕ້ອນຮັບບຸນບັນເພງເດືອນ 8
|
ຖະຫນົນ ຮ່າງມ໋າ, ເລືອງວັນການ, ຮ່າງບົງ, ຮ່າງເດືອງ, ຕະຫລາດດົງຊວນ… ແມ່ນບັນດາຖະຫນົນຄັບຄາຫນາແຫນ້ນທີ່ສຸດ ເມື່ອບຸນວັນເພງເດືອນ 8 ວຽນມາ. ຢູ່ສອງຟາກທາງ, ສິນຄ້າປະເພດຕ່າງໆເພື່ອຮັບໃຊ້ບຸນວັນເພງເດືອນ 8 ຄື: ເຄື່ອງຫລິ້ນຂອງເດັກ, ໂຄມໄຟຮູບດວງດາວ ທີ່ມີສີສັນຫລາກຫລາຍ ພ້ອມກັບຜູ້ມາຊື້ເຄື່ອງຫລິ້ນເປັນຈຳນວນຫລວງຫລາຍ. ກີ່ນຫອມຂອງເຂົ້າຫນົມພື້ນເມືອງ ພ້ອມກັບສຽງກອງ, ການຟ້ອນສິງໂຕ ໄດ້ສ້າງຄວາມຟົດຟື້ນມ່ວນຊື່ນທີ່ສຸດ. ເຄື່ອງຫລິ້ນຂອງເດັກໃນບຸນວັນເພງເດືອນ 8 ປີນີ້ ແມ່ນຫລາຍຮູບຫລາຍແບບ ແຕ່ບັນດາເຄື່ອງຫລິ້ນພື້ນເມືອງທີ່ຜະລິດຢູ່ໝູ່ບ້ານອາຊີບຕ່າງໆ ຖືກວາງຂາຍຫລາຍກວ່າໝູ່. ເອື້ອຍ ເລທິຮົ່ງເທຶອງ, ເຈົ້າຂອງຮ້ານຂາຍເຄື່ອງຢູ່ຖະຫນົນ ຮ່າງມ້າ ໃຫ້ຮູ້ວ່າ: ປີນີ້ ເຄື່ອງຫລິ້ນຂອງເດັກ ຜະລິດຢູ່ ຫວຽດນາມ ແມ່ນງາມກວ່າຊຸມປີກ່ອນ. ໂຄມໄຟເຮັດດ້ວຍເຈ້ຍ ແລະ ຮູບຂອງຕົວລະຄອນໃນເລື່ອງກະຕຸນລ້ວນແຕ່ໄດ້ຮັບຄວາມນິຍົມຈາກເດັກ, ລາຄາກໍເໝາະສົມ.
“ເຄື່ອງຫລິ້ນຂອງເດັກໃນບຸນວັນເພງເດືອນ 8 ປີນີ້ ສ່ວນຫລາຍແມ່ນຜະລິດຢູ່ ຫວຽດນາມ. ໃນນັ້ນ ຫລາຍສຸດ ແມ່ນໂຄມໄຟຮູບດວງດາວ, ໂຄມໄຟເປັນຮູບຕ່າງໆ, ຫົວສິງໂຕ ແລະ ກອງນ້ອຍ”.
ມີການເຄື່ອນໄຫວຫລາຍຢ່າງເພື່ອຕ້ອນຮັບບຸນວັນເພງເດືອນ 8 ຖືກຈັດຂຶ້ນຢູ່ເຂດຊຸມຊົນຄື: ການວາງສະແດງ, ຕະຫລາດນັດ, ການລະຫລິ້ນພື້ນເມືອງ, ລາຍການສິລະປະສະຫງວນໃຫ້ແກ່ເດັກ ເຮັດໃຫ້ບັນຍາກາດຕ້ອນຮັບບຸນວັນເພງເດືອນ 8 ຍິ່ງຟົດຟື້ນມ່ວນຊື່ນ.ພິເສດ ແມ່ນ ບຸນວັນເພງເດືອນ 8 ຈັດຂຶ້ນຢູ່ຄຸ້ມຖະຫນົນເກົ່າ ຮ່າໂນ້ຍ ດຳເນີນແຕ່ວັນທີ 13-26/9 ຢູ່ ຕະຫລາດ ດົງຊວນ, ເຮືອນມໍລະດົກ ເລັກທີ 87 ມ້າໄມ. ງານບຸນນີ້ ໄດ້ເຮັດໃຫ້ ບັນຍາກາດຕ້ອນຮັບບຸນວັນເພງເດືອນ 8 ຂອງພວກນ້ອງອະນຸຊົນນະຄອນຫລວງ ເຂັ້ມຂົ້ນໄປດ້ວຍສີສັນຊາດ. ພາຍໃຕ້ການແນະນຳຂອງບັນດານັກສິລະປະກອນ, ພວກນ້ອງອະນຸຊົນ ເຍົາວະຊົນໄດ້ເຊື່ອມຕົວເຂົ້າກັບບັນດາຍາກາດເບິກບານມ່ວນຊື່ນຂອງງານບຸນ ຜ່ານການກະກຽມເຮັດເຄື່ອງຫລິ້ນພື້ນເມືອງປະເພດຕ່າງໆ. ຫລານ ຫງວຽນແອງທື ຢູ່ ເມືອງ ເກົາໄຢ ຮ່າໂນ້ຍ ແບ່ງປັນວ່າ:
“ປີນີ້ ມີການລະຫລິ້ນຫລາຍຢ່າງທີ່ນຳມາເຊິ່ງຜົນປະໂຫຍດຄື: ບັນດາການລະຫລິ້ນພື້ນເມືອງ. ຈາກນັ້ນ ຫລານມີຄວາມເຂົ້າໃຈຕື່ມອີກກ່ຽວກັບກົກເຄົ້າເຫງົ້າກໍ ແລະ ບັນດາມູນເຊື້ອວັດທະນະທຳຂອງຊາດຫວຽດນາມ.”
ບັນຍາກາດບຸນວັນເພງເດືອນ 8 ຢູ່ຖະຫນົນສາຍຕ່າງໆ
|
ໃນໂອກາດນີ້ ກຸ່ມສາລາບ້ານຫວຽດນາມ ແລະ ບັນດານັກສິລະປະການພື້ນເມືອງ ໄດ້ຜະລິດໂຄມໄຟເປັນຮູບບັນດາຕົວລະຄອນປະຫວັດສາດ ດ້ວຍຄວາມສູງ 2 ແມັດ. ອ້າຍ ຫງວຽນວັນກ່ວຽນ, ນັກສິລະປະການເຮັດໂຄມໄຟຢູ່ ບ້ານ ດານວຽນ, ຕາແສງ ກາວວຽນ ເມືອງແທງອວາຍ ຮ່າໂນ້ຍ ໃຫ້ຮູ້ວ່າ:
“ພວກຂ້າພະເຈົ້າຢາກສອນວິທີເຮັດເຄື່ອງລະຫລິ້ນພື້ນເມືອງໃຫ້ຄົນລຸ້ນຫລັງສືບທອດ ເພື່ອບໍ່ປະໃຫ້ການລະຫລິ້ນພື້ນເມືອງນີ້ສູນເສຍໄປ. ເພາະນີ້ແມ່ນຈຸດວັດທະນະທຳທີ່ເປັນເອກະລັກສະເພາະໂດຍຄົນລຸ້ນກ່ອນປະໄວ້, ຖ້າຖືກສູນເສຍໄປຈະເຮັດໃຫ້ວັດທະນະທຳຫວຽດນາມ ສູນເສຍສ່ວນຫນຶ່ງ.”
ປະຈຸບັນ, ບຸນວັນເພງເດືອນ 8 ໄດ້ມີການປ່ຽນແປງຫລາຍແລ້ວ ແຕ່ຊາວຫວຽດນາມ ລຸ້ນຕ່າງໆ ຍັງຄົງລໍຖ້າໄດ້ຕ້ອນຮັບວັນບຸນດ້ວຍເຂົ້າຫນົມໜຽວ, ເຂົ້າໜົມປິ້ງພື້ນເມືອງ, ໄດ້ສຳພັດກັບເຄື່ອງລະຫຼິ້ນພື້ນເມືອງ ຫຼືພ້ອມກັນເຮັດໂຄມໄຟຮູບດວງດາວ, ແຕ້ມຫນ້າກາກ, ເຮັດຫົວສິງໂຕ.. ບັນດາເຄື່ອງລະຫລິ້ນພື້ນເມືອງນີ້ ເຮັດບໍ່ຍາກ ແຕ່ພັດມີຄຸນຄ່າວັດທະນະທຳພື້ນເມືອງອັນດີງາມຂອງຊາດຫວຽດນາມ.